1. Kisa nou divèt fè pou nou pa mouri pannan jou Jéova-a ?

 LÒ LABIB-A ka palé di « jou Jéova-a », i lé palé di moman-an Jéova ka tchwé so lèlmi é ka sové so sèrvitèr. Tan-lontan, i ja détrwi roun patché nasyon (Is. 13:1, 6 ; Ézéch. 13:5 ; Soph. 1:8). Jou Jéova-a nou ka antann jòdla ké koumansé lò yé ké ataké Gran Babilòn-an é i ké fini ké lagèr Armagédon-an. Pou nou pa mouri sa jou-a, a dipi jòdla nou divèt préparé nou kò. Anfèt, Jézi ka di nou ki ‘a pou nou paré’ pou « gran tribilasyon »-an. Sa ka montré ki nou divèt préparé nou kò, mé nou divèt osi rété paré (Mat. 24:21 ; Luc 12:40).

2. Kisa nou ké anprann gras a 1 Thessaloniciens ?

² Annan prémyé lèt i ékri pou krétyen-yan ki té ka rété Tésalonik, apot Pòl pran plizyèr èkzanp pou ankourajé yé pou yé té toujou paré pou gran jou Jéova-a. I té savé ki sa jou-a pa té ké rivé lanmenm (2 Thess. 2:1-3). Pourtan, i di so frè ké sò-ya préparé yé kò kousidiré sa jou-a té ké pou vini landimen-an. Konsèy i bay yé-a, a pou nou osi. É sa i èspliké yé ké pèrmèt nou réponn sa késyon-yan : 1) Kouman jou Jéova-a ké rivé ? 2) Kimoun ki ké mouri ? é 3) Kisa nou pouvé fè pou nou préparé nou kò pou nou pa mouri ?

3. Jou Jéova-a ké vini kou roun volèr pannan lannwit, kisa sa lé di ?

³ « Kou roun volèr pannan lannwit » (1 Thess. 5:2). A prémyé èkzanp Pòl ka pran pou èspliké kouman jou Jéova-a ké rivé. Souvan, lò roun volèr ka vini vòlò, i ka fè vit é a lannwit i ka vini, lò pyès moun pa ka antann li. Menm fason-an,  jou Jéova-a ké rivé bidim é près tout moun ké rété èstébékwé. Menm vré krétyen-yan ké pitèt rété gon lò yé ké wè kouman tout bagaj ka rivé vitman. Bondjé ké détrwi méchan-yan, mé vré krétyen-yan yé menm, yé pa ké mouri.

4. Jou Jéova-a, a ké kou doulèr ka tonbé asou roun fanm ansent lò i ka akouché. Kisa sa lé di ?

⁴ « Kou doulèr ka tonbé asou roun fanm ansent lò i ka akouché » (1 Thess. 5:3). Lò roun madanm ansent, i pa pouvé savé kitan èkzaktéman i ké akouché, mé i savé ki sa jou-a ké rivé. É lò i ké rivé, travay-a ké koumansé rounsèl kou konsa, i ké soufri é i pa ké pouvé anpéché timoun-an soti. A menm bagaj-a pou jou Jéova-a. Nou pa savé kitan èkzaktéman i ké vini ; nou pa konnèt ni jou-a ni lèr-a. Mé nou sir ki i ké vini, ki jijman Jéova-a ké tonbé asou méchan-yan rounsèl kou konsa é yé pa ké pouvé chapé anba l’.

5. Gran tribilasyon-an, a ké kou douvan jou, kisa sa lé di ?

⁵ « Menm fason jou-a ka louvri. » A trwazyèm èkzanp Pòl ka sèrvi, é sa kou-a ankò, i ka palé di volèr ki ka vòlò lannwit. Mé dapré sa nou ka wè, sa kou-a, i ka di ki jou Jéova-a kou douvan jou (1 Thess. 5:4). Lò roun volèr ka vini annan roun kaz lannwit pou vòlò, afòrs i okipé, jou-a pouvé baré l’ épi mété tout so zafè dèrò. Menm fason-an, pannan gran tribilasyon-an, sa-ya ki kou volèr-ya annan èkzanp-a, ki ka rété annan soukou é ka kontinyé fè bagaj Jéova pa kontan, yé pa ké pouvé séré ankò. Tout moun ké wè sa yé ka fè. Mé nou menm, nou ké montré nou paré si nou pa ka fè pyès bagaj Jéova pa kontan é si nou ka fè « tout kalité bagaj ki bon, ki jis é ki vré » (Éph. 5:8-12). Apré sa, Pòl ka sèrvi dé èkzanp pou palé di sa-ya ki ké mouri pannan jou Jéova-a. Annou wè sa dé èkzanp-ya.

6. Lò Pòl ka di ki près tout moun ka dronmi, kisa sa lé di ? (1 Thessaloniciens 5:6, 7).

⁶ « Sa-ya ki ka dronmi » (li 1 Thessaloniciens 5:6, 7). Pòl ka di ki sa-ya ki ké mouri pannan jou Jéova-a, yé kou moun ki ka dronmi. Poukisa i ka di sa ? Paské kou yé pa savé sa ki ka pasé é yé pa ka wè ki tan-an ka pasé, yé pa ka wè ki bagaj enpòrtan ka fèt annan monn-an, é yé pa ka réyaji. Jòdla, a kousidiré près tout moun ka dronmi (Rom. 11:8). Yé pa ka krè prèv-ya ki ka montré ki nou ka viv dèrnyé jou-ya é ki gran tribilasyon-an pròch. Détan, lò gran chanjman ka fèt annan monn-an, sa ka bay roun ran anvi konnèt mésaj Rwayonm-an. Mé roun patché annan yé ka viré dronmi. É annan sa-ya ki ka krè ki Bondjé ké jijé monn-an roun jou, sèrten ka pansé ki sa jou-a lwen toujou (2 Pierre 3:3, 4). Mé pi sa ka alé pi nou ka byen wè ki sa enpòrtan pou nou swiv konsèy Pòl ki ka di nou pa dronmi.

7. Sa-ya Bondjé ké détrwi kou moun ki bwè pou sou, kisa sa lé di ?

⁷ « Sa-ya ki ka bwè pou sou. » Pòl ka di ki sa-ya Bondjé ké détrwi, yé kou moun ki ka bwè pou sou. Lò roun moun boulé, i ka pran tan pou i réyaji é i pa ka pran bon désizyon. Menm fason-an, méchan-yan pa ka tchenbé kont di avèrtisman Bondjé ka bay ; yé ka chwazi viv roun fason ki ké fè yé jwenn lanmò. Mé Bondjé ka ankourajé krétyen-yan kontinyé byen réfléchi (1 Thess. 5:6). Dapré roun èspésyalis Labib-a, roun moun ki ka kontinyé byen réfléchi, « a roun moun ki kalm é ki pa ka paniké. Sa moun-an ka rivé byen réfléchi pou pran bon désizyon b ». Poukisa nou divèt rété kalm épi pa paniké ? Pou nou pa mélé ni annan lapolitik ni annan problèm sa monn-an. Pi jou Jéova-a ké proché, pi yé ké mété présyon anlè nou pou nou pran parti annan sa bagaj-ya. Mé a pa pou nou kasé nou tèt pou savé kouman nou ké réyaji. Lèspri sen ké idé nou rété kalm épi rété fò, é i ké idé nou pran bon désizyon (Luc 12:11, 12).

8. Dapré 1 Thessaloniciens 5:8, ki bèl kalité ké idé nou pa dronmi épi kontinyé byen réfléchi, é ké kisa Pòl ka konparé yé ? (gadé zimaj-a osi).

⁸ « Annou mété kwiras lafwa-a ké lanmou-a, é annou mété èspwar délivrans-a asou nou tèt kou roun kas. » Pòl ka di ki nou kou dé sòlda ki mété yé ékipman é ki toujou paré (li 1 Thessaloniciens 5:8). Lò i gen lagèr, roun sòlda divèt toujou paré pou briga. A menm bagaj-a pou nou. Nou ké paré pou jou Jéova-a si nou ka mété kwiras lafwa-a ké lanmou-a épi kas-a osi, sa lé di èspwar nou gen-an. Nou oblijé gen sa kalité-ya.

9. Kouman nou lafwa ka protéjé nou ?

⁹ Kwiras-a té ka protéjé tchò roun sòlda. Menm fason-an, lafwa ké lanmou ka protéjé nou tchò senbolik. Yé ka pèrmèt nou kontinyé sèrvi Jéova épi swiv Jézi. Lafwa ka pèrmèt nou sir ki Jéova ké rékonpansé nou, paské nou chaché li ké tout nou tchò (Héb. 11:6). É i ka pousé nou rété fidèl douvan nou Chèf, Jézi, menm lò nou annan éprèv. Lò nou ka jwenn problèm annan nou lavi, annou fè nou lafwa vin pi fò. Pou fè sa, annou pran tan réfléchi asou èkzanp sèrvitèr Jéova jòdla ki rété fidèl magré pèrsékisyon-an ouben problèm soumaké. Anplis di sa, pou nou évité tonbé annan zafè kontan soumaké épi chaché gen bokou bagaj, annou imité  sa-ya ki désidé tiré sèrten bagaj annan yé lavi pou mété Rwayonm-an an prémyé c.

10. Kouman lanmou nou gen pou Bondjé ké pou moun-yan ki pa ka adoré Jéova ka idé nou kontinyé préché ?

¹⁰ Nou blijé gen lanmou osi pou nou pa dronmi é pou nou kontinyé byen réfléchi (Mat. 22:37-39). Lanmou nou gen pou Bondjé ka pèrmèt nou kontinyé préché kèlkéswa problèm nou pouvé jwenn (2 Tim. 1:7, 8). É kou sa lanmou-a ka fè nou kontan sa-ya ki pa ka adoré Jéova osi, nou ka kontinyé préché annan nou téritwar, menm si a ké téléfonn ouben lèt. Nou ka kontinyé èspéré ki roun jou, sa moun-yan ké chanjé é ké koumansé fè sa ki byen (Ézéch. 18:27, 28).

11. Kisa lanmou nou gen pou nou frè ké sò-ya ké bay nou anvi fè ? (1 Thessaloniciens 5:11).

¹¹ Nou kontan nou frè ké sò-ya osi. Nou ka montré nou kontan nou konpanyen lò nou ka « ankourajé » nou konpanyen é lò nou ka bay nou konpanyen « plis fòrs » (li 1 Thessaloniciens 5:11). Kou sòlda ki ka briga roun òbò ròt, nou ka ankourajé nou konpanyen. Lò roun sòlda ka briga, i pouvé blésé roun di so kanmarad sòlda. A roun bagaj ki pouvé rivé. Mé i pa ké janmen fè l’ parèsprè. Menm fason-an, nou pa jen lé blésé nou frè ké sò-ya parèsprè, ni bay pou randé (1 Thess. 5:13, 15). Anplis di sa, nou ka montré ki nou kontan nou konpanyen si nou ka rèspèkté frè-ya ki ka dirijé asanblé-a (1 Thess. 5:12). Lò Pòl ékri so prémyé lèt pou frè-ya ki té Tésalonik, sa pa té ka fè roun lannen asanblé-a té fèt. Donk frè-ya ki té gen rèsponsabilité annan asanblé-a pa té gen bokou èspéryans é i dèt gen sèrten bagaj yé mal fè. Mé magré sa, yé té mérité yé frè ké sò rèspèkté yé. Lò gran tribilasyon-an ké tou pròch rivé, pitèt frè-ya annan syèj mondyal-a ouben annan Bétèl-a annan nou péyi pa ké pouvé dirijé nou ankò. Si sa ka rivé, nou ké divèt konté ankò plis asou ansyen-yan annan nou asanblé pou di nou sa nou divèt fè. A pou sa, sa enpòrtan pou nou anprann kontan yé épi rèspèkté yé dipi aprézan. Kèlkéswa sa ki  pouvé rivé, a pou nou kontinyé byen réfléchi : annou pa rété asou yé défo, annou pito wè ki Jéova ka sèrvi Jézi pou gidé sa wonm-yan ki fidèl.

12. Kouman èspwar nou gen-an ka protéjé nou pansé ?

¹² Menm fason kas-a té ka protéjé tèt roun sòlda, èspwar nou gen-an ka protéjé nou pansé. Lò èspwar nou gen-an fò, sa ka pèrmèt nou wè ki sa sa monn-an ka propozé nou pa gen pyès valò (Phil. 3:8). Sa ka pèrmèt nou rété kalm épi byen dibout. A sa Wallace ké Laurinda, ki ka sèrvi Jéova an Afrik, wè. Laurinda pédi so manman épi trwa simenn pita, Wallace pédi so Papa. Akoz di pandémi Covid-19-a, yé pa té pouvé routounen annan yé koté pou rété ké yé fanmi. Men sa Wallace ékri : « Gras a èspwar nou gen-an, mo pa ka wè yé kou yé té fika roun ti moso tan anvan yé mouri annan sa monn-an, mé mo ka imajiné kouman yé ké fika roun ti moso tan apré yé rézirèksyon annan monn nouvo-a. Sa èspwar-a ka konsolé mo lò mo tris ouben lò mo ka santi ki mo ka manké roun bagaj annan mo lavi. »

13. Kisa nou pouvé fè pou nou gen lèspri sen ?

¹³ ‘Annou pa étenn difé lèspri-a’ (1 Thess. 5:19). Pòl di ki lèspri sen kou roun difé ki ka boulé andidan nou. Lò i ka aji asou nou, nou ka fè bon bagaj ké bokou balan ; i ka bay nou fòrs nou bézwen pou nou adoré Jéova (Rom. 12:11). Kisa nou pouvé fè pou nou rousouvwè lèspri sen ? Annou doumandé Jéova bay nou lèspri sen, annou étidyé so Paròl i fè moun ékri gras a so lèspri sen, é annou fè bagaj pou montré ki nou ka fè parti di so òrganizasyon i ka dirijé gras a so lèspri sen. Konsa, nou ké pouvé kontinyé travay pou gen « frwi lèspri-a » (Gal. 5:22, 23).

14. Kisa nou pa divèt fè si nou lé kontinyé rousouvwè lèspri sen Bondjé ? (gadé zimaj-a osi).

¹⁴ Lò Bondjé ka bay nou so lèspri sen, annou fè atansyon pou nou pa « étenn difé » sa lèspri-a. Jéova ka bay so lèspri sèlman pou sa-ya ki pa gen vyé lidé é ki pa gen pyès mové konpòrtman. I pa ké kontinyé  bay nou l’ si nou ka réfléchi asou bagaj ki pa pròp é ki akoz di sa, nou ka fè mové bagaj (1 Thess. 4:7, 8). Pou nou kontinyé rousouvwè l’, nou divèt fè atansyon osi pou nou pa « méprizé profési-ya » (1 Thess. 5:20). Isi-a, lò yé ka palé di « profési », yé ka palé di mésaj Jéova ka bay nou gras a so lèspri, parèkzanp mésaj-ya ki ka palé di so jou é ki ka montré ki sa jou-a pròch. Nou pa lé pansé ki sa jou-a lwen toujou é ki nou ké gen tan mouri anvan Armagédon rivé. Nou pito toujou lé gen sa jou-a annan nou tèt, toupannan nou ka kontinyé gen roun bon konpòrtman é nou ka ‘fè bagaj ki ka montré ki nou lé kontinyé adoré Bondjé’ (2 Pierre 3:11, 12).

15. Kisa nou divèt fè pou nou pa lésé fo enfòrmasyon ni manti démon-yan ka di bloublou nou ? (1 Thessaloniciens 5:21).

¹⁵ Titalò, nou pa savé kouman, mé lèlmi Bondjé-ya ké di ki yé rivé mété lapè ké lasékirité (1 Thess. 5:3). Sa manti-a ki ka vini di démon-yan ké plen latè-a é i ké bloublou près tout moun (Rév. 16:13, 14). É nou menm ? Si nou ka « vérifyé tout bagaj », nou pa ké lésé sa bloublou nou (li 1 Thessaloniciens 5:21). An Grèk, lò yé té ka di « vérifyé », a té pou palé di roun tès yé té ka fè asou métal ki té gen valò. Menm fason-an, a pou nou tèsté sa nou ka tandé ouben sa nou ka li pou nou savé si a roun bagaj ki vré. Sa té enpòrtan pou frè ké sò-ya ki té ka rété Tésalonik fè sa, é sa ké pi enpòrtan pou nou ankò lò gran tribilasyon-an ké tou pròch. Annou pa valé tousa yé ka di nou. Annou pito sèrvi nou tèt. É annou konparé tousa nou ka tandé ouben sa nou ka li ké sa Labib-a ké òrganizasyon Jéova-a ka anprann nou. Konsa, nou pa ké lésé manti démon-yan bloublou nou kèlkéswa sa yé ka di (Prov. 14:15 ; 1 Tim. 4:1).

16. Ki èspwar nou gen, é kisa nou byen désidé fè ?

¹⁶ Nou savé ki pèp Bondjé-a ké janbé gran tribilasyon-an. Mé é nou menm ? Nou pa savé sa ki pouvé rivé nou (Jacq. 4:14). Mé i gen roun bagaj nou pouvé sir : ki nou janbé gran tribilasyon-an, ki nou mouri anvan sa, Jéova ké bay nou lavi pou tout-tan si nou ka rété fidèl. Krétyen wen-yan ké viv annan syèl-a ké Kris, é ròt brébi-ya ké viv annan roun paradi asou latè-a. Donk, annou toujou byen désidé kontinyé sonjé bèl èspwar nou gen-an é annou toujou paré pou jou Jéova-a !