1. Dapré 1 Pierre 5:2, ki rèsponsabilité Jéova bay ansyen-yan ?

 JÉOVA bay ansyen-yan rèsponsabilité pran swen di so brébi i kontan. Pou sa wonm-yan ki fidèl, sèrvi yé frè ké sò-ya, a roun lònò. É yé ka travay rèd pou yé sa dé ‘bèrjé ki ka vréman pran swen’ di brébi Jéova-ya (Jér. 23:4 ; li 1 Pierre 5:2). Nou tèlman kontan nou gen sa kalité wonm-yan annan nou asanblé !

2. Ki kalité problèm roun ran ansyen pouvé jwenn ?

² A pa tout tan sa fasil pou ansyen-yan fè tousa yé gen pou fè. Détan, yé ka jwenn roun patché problèm. Parèkzanp, pran swen di roun asanblé, sa ka doumandé bokou travay. Tony, roun ansyen ki ka rété Ozétazini, té gen pou anprann konnèt so limit parapòrta kantité travay i té ka asèpté fè. I ka di : « Lò pandémi Covid-19-a koumansé, mo asèpté plizanplis travay pou òrganizé réinyon-yan ké prédikasyon-an. Mé pi mo té ka travay, pi i té gen travay pou fè. Finalman, mo pa té ka pran asé tan pou mo li Labib-a, étidyé l’ ké priyè. » Ilir, roun ansyen ki ka rété Kosovo, jwenn rounòt problèm. Lò lagèr koumansé koté i té fika, sa té rèd pou i té obéyi sa òrganizasyon Jéova-a té ka doumandé li fè. I ka di : « Mo té divèt gen kouraj lò komité filyal-a doumandé mo alé idé frè ké sò ki té ka rété roun koté ki té danjéré. Mo té pè, é pou mo, sa yé té ka doumandé mo fè, a pa té roun bon bagaj ». Tim, roun misyonèr ki ka rété an Azi, té ka trouvé ki sa té rèd pou i té fè tousa i té gen pou fè. I ka di : « Détan, mo té ka santi mo té tro las pou mo okipé di frè ké sò-ya. » Kisa ki pouvé idé ansyen-yan ki ka jwenn sa kalité problèm-yan ?

3. Kouman nou tout nou pouvé pran èkzanp asou Jédéyon ?

³ Ansyen-yan pouvé anprann bokou bagaj gras a èkzanp jij Jédéyon (Héb. 6:12 ; 11:32). Jéova té chwazi  Jédéyon pou i té protéjé so pèp é pou i té pran swen di li pannan roun lépòk ki té rèd (Juges 2:16 ; 1 Chron. 17:6). Menm fason-an, Bondjé mété ansyen-yan pou yé pran swen di so pèp pannan sa dèrnyé jou-ya ki rèd menm (Actes 20:28 ; 2 Tim. 3:1). Mé nou tout nou pouvé pran èkzanp asou Jédéyon annan zafè rékonnèt nou limit, gen imilité épi obéyi. Lò Jéova doumandé li fè sèrten bagaj, sa té rèd pou i pa anbandonnen. Ki nou ansyen ki nou pa ansyen, nou pouvé anprann gen plis rékonésans pou sa wonm-yan ki ka travay rèd annan asanblé-a épi soutni yé (Héb. 13:17).

4. Kouman Jédéyon montré ki i té ka rékonnèt so limit é ki i té gen imilité ?

⁴ Jédéyon té ka rékonnèt so limit é i té gen imilité b. Lò zanj Jéova-a di Jédéyon ki a li yé té chwazi pou délivré Israyèl ki té anba lanmen Madyanit-ya, a ké imilité i réponn : « Mo fanmi, a pi piti fanmi-a annan ti nasyon Manasé, é mo menm, a mo ki gen mwens enpòrtans annan fanmi mo papa » (Juges 6:15). Pou li, i pa té pouvé fè sa Bondjé té ka doumandé l’ fè. Mé Jéova té savé ki i té pouvé fè l’. Gras a Jéova, Jédéyon rivé fè tousa i té gen pou fè.

5. Annan ki sitiasyon sa pouvé rèd pou roun ansyen kontinyé gen imilité épi rékonnèt so limit ?

⁵ Ansyen-yan ka fè tousa yé pouvé pou yé rékonnèt yé limit é pou aji ké imilité annan tousa yé ka fè (Mich. 6:8 ; Actes 20:18, 19). Yé pa ka vanté yé kò ké sa yé konnèt fè ouben ké sa yé ka fè. Yé pa ka pansé non plis ki yé pa vo anyen akoz di yé défo ouben akoz di bagaj yé mal fè. Mé détan, sa rèd pou roun ansyen kontinyé rékonnèt so limit épi gen imilité. Parèkzanp, pitèt i pouvé asèpté fè roun patché bagaj épi finalman i ka wè ki sa rèd pou i rivé fè tout sa bagaj-ya. Ouben sa pouvé rèd pou i gen imilité épi rékonnèt so limit lò roun ran moun ka félisité l’ ouben ka kritiké l’ pou fason i ka fè bagaj-ya. Kouman èkzanp Jédéyon pouvé idé yé annan sa sitiasyon-yan ?

6. Kouman Jédéyon montré ki i té ka rékonnèt so limit, é kouman ansyen-yan pouvé imité l’ ? (gadé zimaj-a osi).

 ⁶ Doumandé ròt moun idé to. Roun moun ki ka rékonnèt so limit savé ki i gen sèrten bagaj i pa pouvé fè. Jédéyon montré ki i té ka rékonnèt so limit paské i doumandé ròt moun idé li (Juges 6:27, 35 ; 7:24). Ansyen-yan ki gen sajès ka fè menm bagaj-a. Tony nou ja palé anvan ka di : « Akoz di fason mo lévé, mo té gen tandans asèpté plis travay ki sa mo té pouvé fè. Donk mo désidé palé di sa zafè rékonnèt so limit pannan étid Labib-a ké mo fanmi. É mo doumandé mo madanm di mo si i té ka pansé ki mo té divèt fè progrè annan sa zafè-a. Épi osi, mo viré gadé vidéyo-a Comme Jésus, formons les autres, faisons-leur confiance et rendons-les capables. » Tony koumansé bay ròt moun fè sèrten bagaj i té ka fè annan asanblé-a. Men sa i ka di : « Travay-a ka fèt, é mo gen plis tan pou mo fè mo lanmityé ké Jéova vin pi fò. »

7. Si yé ka kritiké yé, kouman ansyen-yan pouvé imité Jédéyon ? (Jacques 3:13).

⁷ Si yé ka kritiké to, pa faché. Rounòt bagaj ki pouvé rèd pou ansyen-yan, a lò yé ka kritiké yé. La ankò yé pouvé pran èkzanp asou Jédéyon. Kou i té savé i pa té parfè, i rété kalm lò Éfrayimit-ya kritiké li (Juges 8:1-3). Lò Jédéyon réponn yé, i pa palé rèd pou yé. I montré ki i té gen imilité paské i kouté yé, é i palé ké yé jantiman. Sa kalmé yé. Kanta ansyen-yan, si yé ka kritiké yé, yé ké aji ké sajès si yé ka fè kou Jédéyon. Yé ké byen kouté é yé ké réponn ké dousèr (li Jacques 3:13). Konsa, yé ké idé pou lapè rété annan asanblé-a.

8. Kouman ansyen-yan divèt réponn lò yé ka félisité yé ? Bay roun èkzanp.

⁸ Bay Jéova tout laglwar. Lò moun louwé Jédéyon paské i té ganyen asou Madiyanit-ya, a Jéova i bay laglwar (Juges 8:22, 23). Kouman frè-ya ki gen rèsponsabilité pouvé imité Jédéyon ? Yé pouvé bay Jéova laglwar pou sa yé ka rivé fè (1 Cor. 4:6, 7). Parèkzanp, si yé ka félisité roun ansyen paské i ka ansényé byen, i pouvé di ki a Paròl Bondjé-a ki ka ansényé nou, ouben i pouvé montré ki a òrganizasyon Jéova-a ki ka fòrmé nou. Ansyen-yan divèt doumandé yé kò souvan si yé ka ansényé roun fason pou bay Jéova lònò, ouben si annan fason yé ka ansényé, yé ka chaché fè moun wè. Annou palé di roun ansyen yé ka aplé Timothy. O koumansman, Timothy té kontan fè diskour. I ka di : « Mo té ka koumansé diskour-ya ké èkzanp ki té long ké konpliké, é bokou moun té ka vin félisité mo pou sa. Malérèzman, yé té ka mété yé lidé plis asou mo pasé yé mété yé lidé asou Labib-a ouben asou Jéova. » Finalman, Timothy wè ki i té divèt chanjé fason i té ka ansényé pou moun-yan mété yé lidé asou ansèyman-an pasé yé mété yé lidé asou li (Prov. 27:21). Ki bèl bagaj rivé li ? I ka di : « Aprézan, lò frè ké sò-ya ka di mo mèrsi, a pou di mo ki diskour mo fè-a idé yé réglé roun problèm, tchenbé rèd annan roun éprèv ouben vin pi pròch ké Jéova. Mo lontan pi kontan lò mo ka tandé sa kalité paròl-ya pasé sa yé té ka di mo anvan. »

9. Annan ki sitiasyon sa té rèd pou Jédéyon obéyi Jéova é gen kouraj ? (gadé zimaj-a anlè prémyé paj-a).

⁹ Lò Jédéyon divini jij, i té divèt obéyi épi gen kouraj. Bondjé té doumandé li fè roun bagaj ki té danjéré : i té divèt krazé lotèl so papa té fè pou Baal (Juges 6:25, 26). Pita, lò Jédéyon fòrmé so larmé, Jéova doumandé li tiré moun annan l’ dé  fwa (Juges 7:2-7). Pou fini, Bondjé doumandé li ataké so lèlmi an mitan lannwit-a (Juges 7:9-11).

10. Kitan sa pouvé rèd pou roun ansyen obéyi ?

¹⁰ Ansyen-yan divèt « paré pou obéyi » (Jacq. 3:17). Roun ansyen ki ka obéyi ka apliké sa Labib-a ké sa òrganizasyon Bondjé-a ka doumandé li fè, é i ka fè l’ ké bon tchò. Konsa, i ka bay so frè ké sò-ya roun bon èkzanp. Mé détan, sa pouvé rèd pou i obéyi. Parèkzanp, souvan, òrganizasyon-an ka doumandé ansyen-yan chanjé fason yé gen labitid fè bagaj-ya, é sa pouvé rèd pou roun ansyen swiv sa kadans-a. Détan, i pouvé doumandé so kò osi si sèrten bagaj yé ka doumandé li fè vréman saj, ouben si yé pouvé vréman maché. Ouben yé pouvé doumandé li fè roun bagaj ki ka riské fè lapolis arété li. Annan sa kalité sitiasyon-yan, kouman ansyen-yan pouvé obéyi kou Jédéyon ?

11. Kisa ki ké idé ansyen-yan obéyi ?

¹¹ Byen kouté sa yé ka doumandé to fè, épi obéyi. Jéova di Jédéyon kouman i té divèt krazé lotèl so papa. I di li koté i té divèt konstrwi roun nouvo lotèl, é ki zannimo i té divèt bay an sakrifis asou sa lotèl-a. Jédéyon pa doumandé so kò si a té roun bon bagaj ; i fè èkzaktéman sa Jéova té doumandé li fè. Jòdla, òrganizasyon Jéova-a ka sèrvi lèt, kominikasyon ké liv pou di ansyen-yan sa pou yé fè pou nou rété an sékirité épi pròch di Jéova. Nou kontan nou ansyen-yan paské yé ka byen swiv sa òrganizasyon Jéova-a ka doumandé yé fè. Tout asanblé-a ka profité di sa (Ps. 119:112).

12. Kouman ansyen-yan pouvé apliké Hébreux 13:17 lò òrganizasyon Jéova-a ka fè chanjman ?

¹² A pou to paré pou to chanjé. Sonjé ki Jéova di Jédéyon fè près tout so sòlda routounen annan yé kaz (Juges 7:8). Pitèt i di annan so tchò : « Ès mo vréman bézwen fè sa ? Ès sa ké maché ? » Mé Jédéyon obéyi kanmenm. Jòdla, ansyen-yan ka imité Jédéyon lò yé ka fè chanjman òrganizasyon Jéova-a ka doumandé yé fè (li Hébreux 13:17). Parèkzanp, dipi 2014, Kolèj santral-a chanjé fason yé ka péyé pou konstrwi sal asanblé-ya ké sal di Rwayonm-yan (2 Cor. 8:12-14). Roun asanblé lokal pa gen pou ranboursé roun prè ankò. Aprézan, kou tout asanblé-ya asou latè-a ka bay ofrann, organizasyon-an ka sèrvi sa soumaké-a pou konstrwi sal di Rwayonm ké sal asanblé tout koté yé bézwen. É i ka fè sa menm si roun asanblé lokal pa pouvé bay bokou soumaké. O koumansman, José té ka pansé ki sa nouvo métòd pou péyé-a pa té ké maché. I té ka pansé : « Yé pa ké jen rivé konstrwi roun sal di Rwayonm, a pa konsa bagaj-ya ka fèt isi-a. » Kisa ki idé José asèpté sa chanjman-an ? I ka di : « Proverbes 3:5, 6 fè mo sonjé ki mo divèt fè Jéova  konfyans. É sa byen maché toubonnman ! Nou ka konstrwi plis sal di Rwayonm, é anplis di sa, nou ka anprann bay pou konplété sa ròt-ya ka manké. »

13. a) Di kisa Jédéyon té sir ? b) Kouman ansyen-yan pouvé imité Jédéyon ? (gadé zimaj-a osi).

¹³ Fè volonté Jéova ké kouraj. Jédéyon obéyi Jéova menm lò i té pè é lò sa té danjéré (Juges 9:17). Lò Jéova rasiré l’, i vin sir ki i té ké idé l’ protéjé so pèp. I gen péyi koté gouvèrnman-an ka entèrdi nou adoré Bondjé kou nou lé. Ansyen-yan ki ka rété annan sa péyi-ya ka imité Jédéyon. Yé ka dirijé réinyon-yan ké prédikasyon-an menm si yé ka riské arété yé, entérojé yé, fè yé méchansté ouben yé ka riské pédi yé travay c. Pannan gran tribilasyon-an, ansyen-yan ké divèt gen kouraj pou obéyi sa òrganizasyon-an ké doumandé yé fè, menm si sa ké danjéré. Parèkzanp, pitèt yé ké di nou kouman pou nou bay roun mésaj jijman ki kou lagrèl ouben yé ké di nou sa nou divèt fè pou nou pa mouri lò Gòg ki soti péyi Magòg ké ataké nou (Ézéch. 38:18 ; Rév. 16:21).

14. Kitan sa té difisil pou Jédéyon pa anbandonnen ?

¹⁴ Jédéyon té divèt travay rèd pou fè so travay jij. Lò so larmé té ka briga ké larmé Madiyanit-a lannwit, Jédéyon kouri dèyè yé dipi valé Jézréèl-a jik larivyè Jourden-an. É aparaman, lantou sa larivyè-a, i té gen roun patché yanman (Juges 7:22). Ès Jédéyon arété lò i rivé bò d’ Jourden-an ? Non ! Menm si yé té las, li ké so 300 sòlda janbé larivyè-a épi yé kontinyé kouri dèyè yé lèlmi. Finalman, yé rivé trapé yé, épi yé ganyen asou yé (Juges 8:4-12).

15. Poukisa sa pouvé difisil pou roun ansyen pa anbandonnen ?

¹⁵ Kou ansyen-yan ka pran swen di asanblé-a ké di yé fanmi, détan yé pouvé las toubonnman. Si sa ka rivé, kouman ansyen-yan pouvé imité Jédéyon ?

16-17. a) Kisa ki idé Jédéyon pa anbandonnen ? b) Di kisa ansyen-yan pouvé sir ? (Isaïe 40:28-31 ; gadé zimaj-a osi).

 ¹⁶ A pou to sir ki Jéova ké bay to fòrs. Jédéyon té sir ki Jéova té ké bay li fòrs, é a sa menm i fè (Juges 6:14, 34). Roun jou, Jédéyon ké so sòlda kouri dèyè dé rwa madiyanit. Yé té a pyé mé rwa-ya té pitèt asou chamo (Juges 8:12, 21). Mé Bondjé idé Israyélit-ya tchenbé sa rwa-ya é ganyen. Menm fason-an, ansyen-yan pouvé konté asou Jéova, sa-la ki « pa jen las, […] pa jen ka fatigé ». I ké bay yé fòrs lò yé ké bézwen (li Isaïe 40:28-31).

¹⁷ Annou gadé sa ki rivé Matthew, roun frè ki annan roun Comité de liaison hospitalier. Kisa ki ka idé l’ tchenbé ? Men sa Matthew ka di : « Plizyèr fwa mo santi ki Jéova bay mo fòrs yé ka palé annan Philippiens 4:13. Souvan, sa rivé mo krè ki mo pa té pouvé kontinyé ankò, tèlman mo té las. Lò sa té ka rivé mo, mo té ka sipliyé Jéova bay mo fòrs mo té bézwen pou idé mo frè ké sò-ya. A sa moman-an, mo té ka santi ki so lèspri té ka bay mo fòrs, é sa té ka idé mo tchenbé. » Kou Jédéyon, ansyen-yan ka travay rèd pou pran swen di sèrvitèr Jéova-ya menm si sa pa toujou fasil. Sa vré ki yé divèt rékonnèt yé limit é yé divèt konprann ki a pa tout tan yé pouvé fè tousa yé té ké lé. Mé yé pouvé sir ki Jéova ké tandé yé lò yé ké doumandé l’ idé yé é i ké bay yé fòrs pou yé pa anbandonnen (Ps. 116:1 ; Phil. 2:13).

18. Kouman ansyen-yan pouvé imité Jédéyon ?

¹⁸ Ansyen-yan pouvé anprann roun patché bagaj gras a èkzanp Jédéyon. Yé ké montré ki yé ka rékonnèt yé limit é ki yé gen imilité, si yé pa ka asèpté plis travay ki sa yé pouvé fè é si yé ka byen réyaji lò yé ka kritiké yé ouben félisité yé. Kou lafen sa monn-an ka rivé, yé divèt obéyi é yé divèt gen kouraj. É yé divèt sir ki kèlkéswa problèm yé ké pouvé jwenn, yé Bondjé ké pouvé bay yé fòrs. Nou kontan sa bèrjé-ya ki ka travay rèd, é nou lé ‘kontinyé kontan [yé]’ (Phil. 2:29).