1-2. Kou Lòt, ki sitiasyon difisil krétyen-yan ka jwenn jòdla ?

 LÒ NOU ka gadé mèrs moun-yan gen annan sa monn-an, nou ka rousanti menm bagaj ké Lòt ki té sa roun moun jis. Kou i té savé ki nou Papa ki annan syèl-a rayi tout mové konpòrtman, i té « boulvèrsé akoz di konpòrtman […] moun-yan ki pa té ka obéyi pyès lalwa, é ki té ka aji san rèspè épi ké toupé » (2 Pierre 2:7, 8). Kou i té ka krenn Bondjé é i té kontan li, i pa lésé vyé mèrs moun-yan annan so lépòk détenn asou li. Kou Lòt, jòdla, nou ka rété an mitan moun ki pa gen pyès rèspè pou prensip Jéova-ya. Magré sa, nou pouvé rété pròp si nou ka kontinyé kontan Bondjé é si nou ka anprann gen bokou rèspè pou li (Prov. 14:2).

² Pou idé nou fè sa, Jéova ka bay nou konsèy plen ké lanmou annan liv Proverbes-a. Kèlkéswa nou laj, ki nou sa roun fanm ouben roun mouché, nou tout nou pouvé profité di sa konsèy-ya.

3. Dapré Proverbes 17:3, poukisa sa enpòrtan pou nou protéjé nou tchò ? (gadé zimaj-a osi).

³ Roun bagaj enpòrtan ki ka fè ki nou divèt protéjé nou tchò, a ki Jéova ka gadé sa nou gen ofon nou tchò. É lò i ka gadé nou tchò, i ka wè plis ki sa ròt-ya pouvé wè ; i ka wè ki kalité moun nou sa vréman (li Proverbes 17:3). Si nou ka plen nou lèspri ké so sajès ki ka pèrmèt nou gen lavi pou tout-tan, i ké kontan nou (Jean 4:14). É i pa ké gen plas ankò pou manti ké vyé lidé malpròp Satan ké so monn ka éséyé mété annan nou lèspri pou fè nou soufri  (1 Jean 5:18, 19). Pi nou ka vin pròch ké Jéova, pi nou ka rèspèkté l’ é pi nou kontan l’. Kou nou pa lé fè nou Papa lapenn, yenki sonjé fè roun péché, nou ja dégouté. Anplis di sa, lò nou douvan roun tantasyon, nou ka doumandé nou kò : « Kouman mo pouvé fè roun bagaj ki té ké fè roun moun ki kontan mo tèlman lapenn ? » (1 Jean 4:9, 10).

4. Kouman lakrent pou Jéova idé roun sò tchenbé douvan tantasyon-an ?

⁴ Marta b, roun sò ki ka rété Kroasi, briga pou i pa fè roun péché sèksyèl. Men sa i ékri : « Sa té rèd pou mo té kontinyé byen réfléchi é mo briga pou mo pa anvi fè roun mové bagaj. Mé kou mo té pè fè Jéova lapenn, sa protéjé mo. » Kouman lakrent pou Bondjé anpéché Marta fè roun mové bagaj ? I èspliké ki i réfléchi asou sa ki té ké rivé si i té ka pran roun mové désizyon. Nou pouvé fè menm bagaj-a. Pi mové bagaj ki pouvé rivé nou, a fè Jéova lapenn épi pédi posibilité adoré l’ pou tout-tan (Gen. 6:5, 6).

5. Kisa sa ki rivé Leo pouvé anprann to ?

⁵ Lò nou gen lakrent pou Jéova, nou pa ka maché ké moun ki ka fè mové bagaj. Leo, ki ka rété Kongo-Kinchasa, tchenbé latcho lapwèl-a é i wè ki lapwèl-a té cho ! Kat lannen apré i batizé, i koumansé maché ké moun ki té ka fè mové bagaj. I té krè ki kou li menm pa té ka fè mové bagaj, i pa té ka péché kont Jéova. Mé piti piti, sa mové zanmi-ya détenn asou li : i koumansé bwè épi fè péché sèksyèl. Mé apré sa, i réfléchi asou sa so paran krétyen té anprann li é i sonjé kouman i té byen lò i té ka adoré Jéova. Atò, i viré asou bon chimen-an. Ansyen-yan idé li viré gen roun bon lanmityé ké Jéova. Jòdla, i ansyen é pyonyé èspésyal, é so tchò kontan.

6. Di ki madanm senbolik nou ké palé annan sa artik-a ?

 ⁶ Annan sa artik-a, nou ké étidyé Proverbes chapit 9. Sa chapit-a ka palé di dé fanm senbolik : roun fanm ki saj ké roun fanm ki sòt (gadé Romains 5:14 ; Galates 4:24). Toupannan nou ka fè sa, pa bliyé ki sèl bagaj monn Satan-an ka sonjé, a sèks ké pòrnografi (Éph. 4:19). Donk sa enpòrtan pou nou gen lakrent pou Bondjé é pou nou bay do pou sa ki mové (Prov. 16:6). Ki nou sa roun mouché ki nou sa roun madanm, nou tout nou pouvé profité di sa ki marké annan Proverbes chapit 9. Sa dé madanm-yan yé ka palé annan sa chapit-a ka envité sa-ya ki ka krè tout bagaj, sa lé di « sa-ya ki pa gen bon sans ». A kousidiré yé chak té ka di yé : « Vini manjé koté mo ! » (Prov. 9:1, 5, 6, 13, 16, 17). Mé soulon sa yé ka chwazi, swa yé ka jwenn bèl bénédiksyon swa yé ka trapé gro traka.

7. Soulon Proverbes 9:13-18, kisa ki ka rivé sa-ya ki ka asèpté envitasyon fanm-an ki sòt ? (gadé zimaj-a osi).

⁷ Kisa « fanm-an ki sòt » ka envité moun-yan fè ? (li Proverbes 9:13-18). Men sa i ka rélé ké toupé pou sa-ya ki pa gen bon sans : « Vini isi-a ! » I ka di yé vini fè lafèt ké li. Mé kisa ki ké rivé yé ? Labib-a ka di : « A la sa-ya ki san fòrs annan lanmò fika. » Pitèt sa ka fè to sonjé ròt bagaj to ja li annan liv Proverbes. Men sa Proverbes chapit 2 ka di asou « fanm dévèrgondé-a » ké « fanm-an ki ka mennen roun vyé lavi » : « A annan lanmò so kaz ka désann » (Prov. 2:11-19). É Proverbes 5:3-10 ka di nou panga rounòt « fanm dévèrgondé » paské « a annan lanmò so pyé ka désann ».

8. Ki désizyon nou pouvé gen pou pran ?

⁸ Sa-ya ki ka tandé « fanm-an ki sòt » divèt fè roun chwa : yé divèt désidé si yé ké asèpté ouben si yé pa ké asèpté so envitasyon. Nou menm osi, nou pouvé gen sa menm kalité désizyon-an pou nou pran. Si roun moun lé nou fè roun péché sèksyèl ouben si, asou Entèrnèt parèkzanp, nou ka tonbé asou pòrnografi, kisa nou ké désidé fè ?

9-10. Poukisa nou pa divèt gen pyès mové konpòrtman sèksyèl ?

⁹ I gen roun patché bon rézon ki ka fè ki nou pa divèt tonbé annan zafè imoralité sèksyèl-a. « Fanm-an ki sòt » lé fè moun krè ki « dlo moun ka vòlò dous pou bwè ». A kisa sa « dlo moun ka vòlò »-a ? Labib-a ka di ki rélasyon sèksyèl roun mouché gen  ké so madanm maryé kou dlo ki ka rafréchi (Prov. 5:15-18). Roun mouché ké so madanm ki maryé pouvé pran plézi gen rélasyon sèksyèl ki pròp. Mé a pa menm bagaj-a ké « dlo moun ka vòlò ». Sa dlo-a, a dèt rélasyon sèksyèl ki entèrdi é ki pa pròp. Moun-yan ki ka gen sa rélasyon sèksyèl-ya ka séré pou fè sa, menm fason roun volèr ka séré pou vòlò. Sa ‘dlo yé ka vòlò’-a pouvé parèt dous si yé ka pansé ki pyès moun pa ké jen savé sa yé ka fè. Mé yé mal bat yé kart ! Jéova ka wè tout bagaj. I pa gen anyen ki pi anmè pasé pédi favèr Jéova-a. Donk, a pa roun bagaj ki « dous », ouben agréyab (1 Cor. 6:9, 10). Mé a pa sa sèlman non.

¹⁰ Imoralité sèksyèl-a ka fè to ronté, i ka fè to santi ki to pa vo anyen, i ka fè fanmi-ya soufri é roun fanm pouvé tonbé ansent san i pa té lé. Roun moun ké aji ké sajès si i pa ka antré annan « kaz » « fanm-an ki sòt » é si i pa ka manjé koté li. Roun patché moun ki ka désidé gen roun mové konpòrtman sèksyèl, ka riské mouri èspirityèlman (sa lé di pédi yé lanmityé ké Jéova), mé anplis di sa, yé ka trapé maladi ki ka tchwé yé (Prov. 7:23, 26). Proverbes chapit 9 vèrsé 18 ka fini konsa : « Sa-ya sa fanm-an ka envité, a ofon Tonm-an yé fika. » Mé si a malò to ka jwenn si to ka asèpté sa envitasyon-an, poukisa i gen sa patché moun-yan ofon so kaz ? (Prov. 9:13-18).

11. Poukisa gadé pòrnografi-a mové menm ?

¹¹ Annou palé di pòrnografi-a. Roun patché moun ka tonbé annan sa trap-a. Sèrten moun ka pansé ki a pa anyen. Mé sa danjéré menm. Lò to ka gadé sa, to pa ka rèspèkté ni to kò ni ròt-ya ankò, é a kou roun ladròg. Zimaj-ya ka rété annan to tèt ; sa rèd pou to tiré yé. Anplis di sa, yé pa ka tchwé mové anvi to gen annan to tchò. Yé ka fè yé vin pi fò ! (Col. 3:5 ; Jacq. 1:14, 15). A pou sa, roun patché moun ki ka gadé pòrnografi ka fè péché sèksyèl apré.

12. Si nou wéy ka tonbé asou zimaj ki pouvé fè nou gen mové anvi sèksyèl, kouman nou ké montré ki nou ka fè atansyon ?

¹² Kisa nou divèt fè si pòrnografi ka parèt flap asou nou aparèy élèktronik ? A pou nou tounen nou tèt lanmenm. Roun bagaj ki ké idé nou, a sonjé ki i pa gen anyen ki gen plis valò pasé nou lanmityé ké Jéova. Mé a pou nou byen savé osi ki i gen sèrten zimaj moun ka di a pa pòrnografi ki pouvé fè nou gen mové anvi sèksyèl kanmenm. Poukisa a pa pou nou gadé sa kalité zimaj-ya non plis ? Paské nou pa lé riské fè roun adiltèr annan nou tchò (Mat. 5:28, 29). David, roun ansyen ki ka rété Taylann, ka di : « Lò mo wéy ka tonbé asou zimaj moun ka di a pa zimaj pòrno, mo ka pozé mo kò sa késyon-an : “Ès sa té ké fè Jéova plézi si mo té ka gadé sa ?” Sa ka idé mo aji ké sajès. »

13. Kisa ki ké idé nou aji ké sajès ?

¹³ Si nou pè fè Jéova lapenn, sa ké idé nou aji ké sajès. Sa lakrent-a, a « koumansman sajès-a » (Prov. 9:10). A sa nou ka wè annan prémyé parti Proverbes chapit 9, koté yé ka palé nou di rounòt fanm ki ka réprézanté vré sajès-a sa kou-a.

14. Ki ròt envitasyon nou ka jwenn annan Proverbes 9:1-6, é poukisa i diféran di sa-la nou fin palé-a ?

¹⁴ (Li Proverbes 9:1-6.) Isi-a, a Jéova, Sa-la ki kréyé nou é Sa-la koté sajès-a ka soti, ki ka envité moun-yan (Prov. 2:6 ; Rom. 16:27). Yé ka palé nou osi di roun gran kaz ki gen sèt kolonn. Sa èkzanp-a ka montré nou ki Jéova kontan bay é ki i ka  rousouvwè tout sa-ya ki lé apliké konsèy i ka bay nou ki plen ké sajès.

15. Kisa Jéova ka envité nou fè ?

¹⁵ Jéova kontan bay ; tousa i ka bay nou, i ka bay nou l’ san konté. A sa nou ka anprann ké fanm-an Proverbes chapit 9 ka palé é ki ka réprézanté vré sajès-a. Sa chapit-a ka di ki i byen préparé so vyann, i mélanjé so diven é ki i mété tout bagaj asou so tab (Prov. 9:2). É dapré vèrsé 4 ké 5, i ka di sa-ya ki pa gen bon sans : « Vini ! Manjé mo dipen. » Poukisa nou divèt antré annan kaz « vré sajès »-a é manjé sa i ka bay nou manjé ? Paské Jéova lé so timoun aji ké sajès é i pa lé pyès mové bagaj rivé yé. I pa lé nou tchenbé latcho lapwèl-a pou savé si i cho épi rigrété sa nou fè pannan tout nou lavi. A pou sa i ka « gardé sajès-a kou roun trézòr pou sa-ya ki drèt annan yé zafè » (Prov. 2:7). Si nou gen lakrent pou li, nou ké toujou anvi fè li plézi, nou ké swiv konsèy i ka bay nou ki saj é nou tchò ké kontan (Jacq. 1:25).

16. Kouman lakrent Alain gen pou Bondjé idé li pran roun bon désizyon, é kisa sa bay ?

¹⁶ Annou palé di Alain ki ansyen é ki profésèr. Paské i ka krenn Bondjé, i pran roun bon désizyon. I ka rakonté : « Mo té gen roun patché kolèg ki té ka pansé ki fim pòrno té bon pou fè sa yé ka aplé éducation sexuelle-a. » Mé Alain pa lésé so kolèg détenn asou li. I ka di dèyè sa : « Kou mo té pè fè Jéova lapenn, mo réfizé gadé sa fim-yan. É mo èspliké mo kolèg poukisa mo pa té lé gadé sa. » Alain apliké konsèy « vré sajès »-a ki ka di nou « vansé asou chimen entélijans-a » (Prov. 9:6). Roun ran annan so kolèg rété èstébékwé lò yé wè ki anyen pa té pouvé fè l’ chanjé lidé. Jòdla, yé ka étidyé Labib-a é yé ka vini annan nou réinyon.

17-18. Ki bénédiksyon sa-ya ki ka asèpté envitasyon « vré sajès »-a ka jwenn, é ki èspwar yé gen ? (gadé zimaj-a osi).

¹⁷ Gras a èkzanp fanm-an ki sòt ké fanm-an ki saj, Jéova ka anprann nou sa nou divèt fè pou nou tchò kontan dimen. Sa-ya ki ka asèpté envitasyon fanm-an ki ka fè dézòrd é ki sòt, ka chaché fè yé kò plézi, san pyès moun pa wè yé, ké bagaj ki « dous » dapré yé. Yé ka profité paské yé ka di ki anba latè, pa gen plézi, yé pa ka sonjé sa ki ké rivé yé dimen. Yé ké fini « ofon Tonm-an » (Prov. 9:13, 17, 18).

¹⁸ A pa sa ki ka rivé sa-ya ki ka asèpté envitasyon « vré sajès »-a ! Yé tchò kontan paské yé gen tousa yé bézwen pou yé rété pròch ké Jéova (Is. 65:13). Jéova sèrvi  profèt Izayi pou di nou : « Kouté mo byen, épi manjé sa ki bon ; konsa, zòt ké pran plézi manjé pi bon manjé i pouvé gen » (Is. 55:1, 2). Nou ka anprann kontan sa i kontan épi rayi sa i rayi (Ps. 97:10). É nou ka pran plézi envité ròt moun profité di vré sajès-a. A kousidiré nou té ka rélé « dipi koté ki pi rot annan vil-a : “Zòt ki ka krè tout bagaj, vini isi-a !” » Bénédiksyon nou ka jwenn ké bénédiksyon sa-ya ki ka kouté nou ka jwenn, a pa pou roun ti moman rounso, a pou tout-tan. Nou jis gen èspwar « viv » épi « vansé asou chimen entélijans-a » pou tout-tan (Prov. 9:3, 4, 6).

19. Dapré Ecclésiaste 12:13, 14, kisa nou divèt byen désidé fè ? (gadé osi karé-a «  Bénédiksyon nou ka jwenn lò nou ka krenn Bondjé »).

¹⁹ (Li Ecclésiaste 12:13, 14.) A pou lakrent pou Bondjé kontinyé protéjé nou tchò, idé nou rété pròp annan domenn moral épi rété pròch ké li pannan sa dèrnyé jou-ya ! Sa lakrent-a ki bon pou nou ké pousé nou kontinyé envité roun patché moun chaché vré sajès-a épi profité di sa i ka pèrmèt nou gen.