1-2. Dapré Psaume 25:14, kisa nou divèt fè pou nou pròch ké Jéova ?

 DAPRÉ to, kisa dé zanmi divèt fè si yé lé kontinyé rété zanmi ? Pitèt to ké di ki yé divèt kontan ké soutni yé konpanyen, mé pitèt to pa ké di ki yé divèt pè ouben gen lakrent pou yé konpanyen. Mé kou vèrsé-a ki o koumansman sa artik-a ka di, roun moun ki lé pròch ké Jéova divèt ‘gen lakrent pou li’ (li Psaume 25:14).

² Ki i gen lontan ki pa gen lontan nou ka adoré Jéova, nou tout divèt gen lakrent pou li, paské sa lakrent-a ka sové nou. Mé gen lakrent pou Bondjé, kisa sa lé di ? Kouman nou pouvé anprann gen lakrent pou li ? É kisa nou pouvé anprann asou lakrent pou Bondjé gras a èkzanp Abdyas ki té rèsponsab, gran prèt Joad ké rwa Joas ? Annou réponn sa késyon-yan.

3. Kisa ki pouvé fè nou pè, é poukisa, détan, a roun bon bagaj ?

³ Souvan, lò nou pè, a soufri nou pè. A roun bon bagaj paské sa pouvé fè nou aji ké sajès. Parèkzanp, si nou pè tonbé, nou pa ké maché òbò roun falèz. Si nou pè trapé problèm, nou ké évité roun sitiasyon ki danjéré. É si nou pa lé pédi nou zanmi, nou pa ké di ouben fè roun bagaj ki pa janti.

4. Ki kalité lakrent Satan lé nou gen pou Jéova ?

 ⁴ Satan lé nou gen mové kalité lakrent-a pou Jéova, sa lé di i lé nou pè li. I lé fè tout moun krè ki Jéova sa roun Bondjé ki ka vanjé so kò, ki ka kouri faché é ki i pa gen anyen nou pouvé fè pou i kontan — a sa Élifaz di annan liv Job (Job 4:18, 19). Satan lé ki tèlman nou pè Jéova, nou ka arété adoré l’. Pou sa pa rivé nou, nou divèt gen bon kalité lakrent-a pou Bondjé.

5. Kisa sa lé di gen lakrent pou Bondjé ?

⁵ Roun moun ki gen bon kalité lakrent-a pou Bondjé kontan l’ é i pa lé fè anyen ki pouvé fè l’ pédi so lanmityé ké li. Jézi té gen sa kalité « lakrent pou Bondjé » (Héb. 5:7). I pa té pè so Papa (Is. 11:2, 3). O kontrèr, i té kontan li bokou é i té lé obéyi l’ (Jean 14:21, 31). Kou Jézi, nou ka rèspèkté é nou ka admiré Jéova bokou paské i plen ké lanmou, i saj, i jis é i pwisan. Nou savé osi ki, kou i kontan nou bokou, fason nou ka réyaji lò i ka ansényé nou enpòrtan pou li. Fason nou ka réyaji pouvé fè so tchò kontan ouben fè li lapenn (Ps. 78:41 ; Prov. 27:11).

6. Kisa nou pouvé fè pou nou gen lakrent pou Bondjé ? (Psaume 34:11).

⁶ Nou pa ka fèt ké lakrent pou Bondjé ; nou divèt travay pou nou gen l’ (li Psaume 34:11). É roun fason pou nou fè sa, a lò nou ka gadé kréyasyon-an. Pi nou ka wè sajès Jéova, so pwisans ké so lanmou pou nou annan « tousa i fè », pi nou ka rèspèkté l’ é pi nou kontan li (Rom. 1:20). Roun sò yé ka aplé Adrienne di : « Lò mo ka gadé kréyasyon-an, mo ka wè kouman Jéova plen ké sajès é mo ka di mo kò ki i savé sa ki pi bon pou mo. » Kou i pran tan réfléchi asou sa, men sa Adrienne ka di so kò : « Poukisa mo té ké alé fè roun bagaj ki té ké mété roun baryè ant mo ké Jéova ki fè mo ? » Ès sa simenn-an, to pouvé pran roun tibi tan pou réfléchi asou roun bagaj Jéova kréyé ? Sa ké fè to rèspèkté li plis é to ké kontan l’ plis (Ps. 111:2, 3).

7. Kouman lapriyè pouvé idé nou gen lakrent pou Bondjé ?

⁷ Rounòt fason pou nou gen lakrent pou Bondjé, a lò nou ka priyè l’ souvan. Pi nou ka priyè Jéova, pi nou ka anprann konnèt li. Chak fwa nou ka doumandé l’ fòrs pou tchenbé lò nou annan roun éprèv, sa ka fè nou sonjé ki i fò toubonnman. Chak fwa nou ka di l’ mèrsi pou sakrifis so Pitit, sa ka fè nou sonjé kouman i kontan nou. É lò nou ka sipliyé l’ pou i idé nou lò nou gen roun problèm, sa ka fè nou sonjé kouman i gen sajès. Sa kalité lapriyè ka fè nou gen plis rèspè pou li é nou ankò pi désidé pa fè anyen ki pouvé gaté nou lanmityé ké li.

8. Kisa nou divèt fè pou nou kontinyé gen lakrent pou Bondjé ?

⁸ Annan Labib-a, i gen moun ki fè bon bagaj é i gen moun ki fè mové bagaj. Si nou lé kontinyé gen lakrent pou Bondjé, nou divèt étidyé yé èkzanp pou wè sa nou divèt fè. Nou ké koumansé ké dé sèrvitèr fidèl di Jéova : Abdyas (ki té ka okipé di kaz rwa Akab) ké gran prèt Joad. Apré sa, nou ké wè sa nou pouvé anprann ké Joas, roun rwa Jida ki té fidèl douvan Jéova lò i koumansé dirijé, mé ki pa rété fidèl.

9. Ki kalité moun Abdyas té sa paské i té ka krenn Jéova ? (1 Rois 18:3, 12).

⁹ Prémyé fwa Labib-a ka palé di Abdyas b, i ka di ki i « té ka krenn Jéova bokou » (li 1 Rois 18:3, 12). Kou i té ka krenn Bondjé, ki kalité moun i divini ? Roun moun ki té drèt annan so zafè é ki tout moun té pouvé fè konfyans ! A pou sa, rwa-a bay li rèsponsabilité okipé di palè-a (gadé Néhémie 7:2). Paské i té gen lakrent pou Bondjé, i té gen bokou kouraj é i té bézwen kouraj osi paské a sa lépòk-a, a méchan rwa Akab ki té ka dirijé. I té ka « aji pi mal douvan Jéova pasé tout sa ki té rwa anvan li » (1 Rois 16:30). Anplis di sa, Jézabèl, madanm Akab, té ka adoré Baal. Tèlman i té rayi Jéova, i éséyé fè vré ladorasyon-an disparèt annan rwayonm Nòr-a. I jis tchwé roun patché profèt Bondjé (1 Rois 18:4). Abdyas adoré Jéova pannan roun lépòk ki té rèd menm.

10. Poukisa nou ka di ki Abdyas montré i té gen kouraj pou vandé ?

¹⁰ Abdyas té gen kouraj pou vandé. Poukisa nou ka di sa ? Lò Jézabèl koumansé chaché profèt Bondjé-ya pou tchwé yé, Abdyas « séré 100 profèt […], 50 annan roun trou ròch », é i poté « dipen ké dlo » bay yé (1 Rois 18:13, 14). Si Jézabèl té anprann sa, i té ké fè yé tchwé Abdyas. É Abdyas té dèt pè ; i pa té lé mouri. Mé i té kontan Jéova ké so sèrvitèr-ya pasé i té kontan so pròp lavi.

11. Kouman roun patché sèrvitèr Jéova jòdla ka aji ké menm kouraj Abdyas té gen ? (gadé zimaj-a osi).

¹¹ Jòdla, roun patché sèrvitèr Jéova ka rété annan péyi koté nou pa pouvé adoré Bondjé kou nou lé. Sa frè ké sò-ya ka bay otorité-ya rèspè yé ka mérité. Mé kou Abdyas, yé ka bay Jéova osi sa ki di li. Yé ka adoré l’ li rounso (Mat. 22:21). Yé ka montré yé gen lakrent pou Bondjé  lò yé ka obéyi l’ pasé yé obéyi moun-yan (Actes 5:29). Donk yé ka kontinyé préché bon nouvèl-a é yé ka fè yé réinyon san pésonn pa savé (Mat. 10:16, 28). Anplis di sa, yé ka fè sa ki fo pou yé frè ké sò rousouvwè piblikasyon yé bézwen pou yé rété pròch di Bondjé. Annou palé di Henri. I ka rété annan roun péyi an Afrik koté yé entèrdi nou adoré Bondjé kou nou lé pannan roun tan. A sa lépòk-a, i asèpté alé distribiyé piblikasyon pou so frè ké sò-ya. I ékri : « Mo pè moun, a pou sa, mo sir ki a paské mo ka rèspèkté Jéova bokou ki mo rivé gen kouraj mo té bézwen-an. » Ès to ka wè to kò ka fè sa Henri fè ké sa kouraj-a ? To ké gen sa menm kouraj-a si to toujou ka fè sa ki fo pou to gen lakrent pou Bondjé.

12. Kouman gran prèt Joad ké so madanm montré ki a pa ti fidèl yé té fidèl douvan Jéova ?

¹² Gran prèt Joad montré i té fidèl douvan Bondjé é i défann vré ladorasyon-an. Poukisa ? Paské i té gen lakrent pou Jéova. A sa i montré lò tifi Jézabèl, Atali, pran tronn Jida-a. Pèp-a té gen rézon pè li. A té roun madanm méchan é ki té paré fè nenpòrt ki bagaj pou gen pouvwar. I jis éséyé tchwé tout sa-ya ki té divèt érité di tronn-an, sa lé di pròp pitit di so pitit ! (2 Chron. 22:10, 11). Roun annan yé, Joas, pa mouri gras a madanm Joad, Jéochabat. Li ké so mari séré timoun-an é yé pran swen di li. Konsa yé fè sa ki fo pou roun moun annan fanmi David rété vivan épi divini rwa. Menm si Joad té ja granmoun, i rété fidèl douvan Jéova é i pa tranblé douvan Atali (Prov. 29:25).

13. Lò Joas vini gen sèt lannen, kouman Joad montré ankò ki i té fidèl douvan Jéova ?

¹³ Lò Joas vini gen sèt lannen, roun kou ankò Joad montré ki i té fidèl douvan Jéova. I désidé fè roun bagaj. Si sa té ka maché, Joas, ki té gen drwa érité di tronn David, té ké divini rwa. Mé si sa pa té ka maché, Joad té ka riské pédi so lavi. Gras a bénédiksyon Jéova, so lidé byen maché. Chèf pèp-a ké Lévit-ya soutni l’, Joad mété Joas rwa é i fè moun tchwé Atali (2 Chron. 23:1-5, 11, 12, 15 ; 24:1). Apré sa, i fè « roun alyans ant Jéova, rwa-a ké pèp-a, pou yé rété pèp Jéova-a » (2 Rois 11:17). I mété « moun ki té ka véyé lapòt-ya douvan lapòt tanp Jéova-a osi, pou pyès moun ki pa pròp pa antré » (2 Chron. 23:19).

14. Kouman Joad rousouvwè lònò paské i bay Jéova lònò ?

¹⁴ Jéova té di : « Sa-ya ki ka bay mo lònò, mo ké bay yé lònò. » É vré, Jéova bay Joad lònò (1 Sam. 2:30). I fè moun ékri istwè sa gran prèt-a annan Labib-a pou nou pouvé anprann roun patché bagaj (Rom. 15:4). É lò Joad mouri, yé bay li roun gran lònò. Yé antéré l’ « ké rwa-ya annan Vil David, paské i té fè bon bagaj pou vré Bondjé-a ké so tanp, annan péyi Israyèl » (2 Chron. 24:15, 16).

15. Kisa istwè Joad ka anprann nou ? (gadé zimaj-a osi).

¹⁵ Istwè Joad pouvé idé nou tout gen lakrent pou Bondjé. Pou yé imité Joad, ansyen-yan toujou divèt chaché fason pou yé protéjé troupo Bondjé-a (Actes 20:28). Gras a èkzanp Joad, frè ké sò-ya ki ja granmoun pouvé anprann ki si yé ka krenn Jéova é si yé ka rété fidèl,  i pouvé itilizé yé pou réyalizé so projè ; i pa ka mété yé asou koté. Jennjan-yan, yé menm, pouvé imité fason Jéova aji ké Joad lò yé ka rèspèkté yé frè ké sò-ya ki ja granmoun, èspésyalman sa-ya ki ka adoré Jéova ké fidélité dipi lontan (Prov. 16:31). Pou fini, nou tout pouvé pran èkzanp asou fason chèf pèp-a ké Lévit-ya aji ké Joad. Annou imité yé épi soutni ké fidélité ‘sa-ya ki ka dirijé nou’ épi obéyi yé (Héb. 13:17).

16. Poukisa nou pouvé di ki rwa Joas té fèb ?

¹⁶ Lò Joas divini rwa, Joad idé l’ pou i divini roun bon moun (2 Rois 12:2). A pou sa, pannan tout tan Joad té ka bay li konsèy i chaché fè Jéova plézi. Malérèzman, lò Joad mouri, i koumansé kouté prens apòsta-ya. Kisa ki rivé ? Li ké so sèrvitèr koumansé « adoré poto sakré-ya ké zidòl-ya » (2 Chron. 24:4, 17, 18). Menm si Jéova té tris, i kontinyé ‘voyé profèt bay yé pou fè yé rouvini bò d’ [li], mé yé pa kouté’. Yé pa menm kouté pitit Joad, Zakari, alòr ki i té sa roun profèt, roun prèt di Jéova. Mé anplis di sa, a té kouzen Joas. Magré tousa fanmi Zakari té fè pou li, Joas fè yé tchwé l’ ! (2 Chron. 22:11 ; 24:19-22).

17. Kisa ki rivé Joas ?

¹⁷ Joas pa kontinyé gen lakrent pou Jéova é malò rivé l’. Sa Jéova té di rivé li : « Sa-ya ki ka méprizé mo, mo ké méprizé  yé » (1 Sam. 2:30). Siryen-yan ki té gen roun ti larmé rivé bat « gran larmé » Joas, é yé « byen blésé » li. Lò Siryen-yan pati, so pròp sèrvitèr tchwé li paské i té tchwé Zakari. Yé pa menm antéré sa rwa-a ki té méchan annan « tonm rwa-ya » (2 Chron. 24:23-25 ; gadé nòt pou étidyé « fils de Barakia » asou Matthieu 23:35).

18. Dapré Jérémie 17:7, 8, kisa nou divèt fè pou nou pa sanblé ké Joas ?

¹⁸ Kisa istwè Joas ka anprann nou ? Joas té ka sanblé roun pyébwa so rasin pa k’alé fon é ki bézwen roun zété pou rété dibout. Lò « zété-a », sa lé di Joad, mouri épi apòstazi-a rivé kousidéré a té van-an ki té ka souflé, Joas pa tchenbé. Sa ka montré nou ki lakrent nou gen pou Bondjé pa divèt dépann sèlman di nou frè ké sò ki ka idé nou, kou moun annan nou fanmi parèkzanp. Pou nou fè nou lanmityé ké Jéova rété fò, nou divèt étidyé, pran tan réfléchi asou sa nou ka li é priyè souvan pou nou fè nou lanmou pou Jéova vin pi fò é pou nou ankò plis pè fè li lapenn (li Jérémie 17:7, 8 ; Col. 2:6, 7).

19. Kisa Jéova ka doumandé nou fè ?

¹⁹ Jéova pa ka doumandé nou bokou bagaj. Ecclésiaste 12:13 ka di sa i ka doumandé so sèrvitèr : « A pou to gen lakrent pou vré Bondjé-a é a pou to obéyi so koumannman, paské a sa tout moun divèt fè. » Si nou gen lakrent pou Bondjé, nou ké pouvé tchenbé rèd lò éprèv-ya ké vini, kou Abdyas ké Joad. É anyen, anyen pa ké fè nou pédi nou lanmityé ké Jéova !