1. Kisa Jéova lé jòdla ?

 JÒDLA, sa Jéova lé, a ki bon nouvèl Rwayonm-an préché asou tout latè-a (Marc 13:10 ; 1 Tim. 2:3, 4). Sa tèlman enpòrtan pou li ki i chwazi so Pitit i kontan-an pou dirijé sa travay-a. Nou pouvé sir ki, anba otorité Jézi, sa travay-a ké fèt kou Jéova lé i fèt anvan lafen-an rivé (Mat. 24:14).

2. Kisa nou ké wè annan sa artik-a ?

² Annan sa artik-a, nou ké wè kouman Jézi ka sèrvi so « èsklav fidèl ké avizé » pou bay so disip manjé èspirityèl é pou bay yé fòrmasyon yé bézwen pou pi gran travay prédikasyon-an ki pa janmen fèt (Mat. 24:45). Nou ké wè osi kouman nou chak nou pouvé soutni Jézi ké so èsklav.

3. Ki rèsponsabilité Bondjé bay Jézi ?

³ Jézi ka dirijé travay prédikasyon-an. Poukisa nou pouvé sir di sa ? Roun tibi tan anvan i monté annan syèl-a, i jwenn ké roun patché annan so disip asou roun montangn an Galilé. I di yé : « Bondjé bay mo tout pouvwar annan syèl-a ké asou latè-a. » Mé gadé sa i di dèyè sa : « A pou sa, alé épi fè disip annan moun tout nasyon » (Mat. 28:18, 19). Donk, Jézi gen rèsponsabilité dirijé travay prédikasyon-an.

4. Poukisa nou pouvé sir ki Jézi ka dirijé prédikasyon-an jik jòdla ?

 ⁴ Jézi di ki travay prédikasyon ké ansèyman-an té ké fèt annan « tout nasyon »-yan. I di osi ki i té ké ansanm ké so disip « touléjou jistan lafen monn-an rivé » (Mat. 28:20). Sa i di la ka montré ki prédikasyon-an té ké kontinyé fèt anba so otorité jik jòdla.

5. Kisa nou ka fè pou idé profési ki annan Psaume 110:3-a fèt ?

⁵ Jézi té sir ki i té ké gen asé ouvriyé pannan lépòk dèrnyé jou-ya. I té savé ki profési ki annan Psaume 110:3-a té ké fèt. Sa profési-a té ka di : « Jou-a to ké rasanblé to larmé, to pèp ké vini bay to so fòrs ké tout so tchò » (Ps. 110:3). Si to ka préché bon nouvèl-a, to ka soutni Jézi ké èsklav fidèl ké avizé-a, é to ka idé sa profési-a fèt. Donk, travay prédikasyon-an ka fèt kou Bondjé té prévwè, mé nou pouvé jwenn sèrten problèm.

6. Ki problèm nou ka jwenn ?

⁶ Roun problèm nou ka jwenn, a ki moun ka éséyé baré nou chimen. Apòsta, chèf rélijyé ké chèf politik-ya ka manti asou nou. Akoz di sa, détan, moun annan nou fanmi, moun nou konnèt ouben nou kolèg travay ka éséyé fè nou arété adoré Jéova ké arété préché. Annan sèrten péyi, yé ka éséyé fè nou pè, yé ka ménasé nou, yé ka arété nou, yé jis ka mété nou lajòl. Mé tousa pa ka étoné nou. A sa Jézi té di : « Tout nasyon-yan ké rayi zòt akoz di mo non » (Mat. 24:9). Kou yé rayi nou, sa ka montré ki nou ka swiv èkzanp Jézi é ki nou ka fè Jéova plézi (Mat. 5:11, 12). A Djab-a ki ka fè yé baré nou chimen. Mé Jézi lontan pi fò pasé Djab-a ! Jézi ka soutni nou é a konsa nou ka rivé préché bon nouvèl-a pou moun annan tout nasyon-yan.

7. Poukisa to sir ki sa ki ékri annan Révélation 14:6, 7 ka fèt ?

⁷ Rounòt problèm nou ka jwenn, a ki moun-yan ka palé roun patché lang diféran. Annan roun vizyon, Jézi di apot Jan ki sa-ya ki ka préché bon nouvèl-a pa té ké lésé sa anpéché yé kontinyé yé travay (li Révélation 14:6, 7). Kisa yé ka fè ? Yé ka pèrmèt roun patché moun trapé mésaj Rwayonm-an annan yé lang. Jòdla, asou tout latè-a, moun-yan pouvé anprann plis bagaj asou Labib-a lò yé ka alé asou nou sit jw.org koté i gen piblikasyon annan plis pasé 1 000 lang. Anplis di sa, Kolèj santral-a asèpté liv Viv ké tchò kontan pou tout-tan ! fèt annan plis ki 700 lang. A sa liv-a nou ka sèrvi pou bay léson biblik ké fè disip. Sa-ya ki sourdo pouvé trapé vidéyo é sa-ya ki pa ka wè pouvé trapé piblikasyon an bray. Sa klè kou dlo ròch, profési-ya ki annan Labib-a ka fèt ! Moun ki ka palé tout kalité lang ka anprann palé « lang ki sen »-an, sa lé di vérité-ya ki annan Labib-a (Zach. 8:23 ; Soph. 3:9). Si nou ka rivé fè tousa, a paské Jézi ka dirijé sa travay-a.

8. Ki bèl bagaj prédikasyon-an bay jik aprézan ?

⁸ Annan pèp Jéova-a, i gen pasé 8 000 000 moun ki ka viv annan 240 péyi ké téritwar é chak lannen, pasé 100 000 moun ka batizé. Mé sa ki pi enpòrtan-an, a ki sa nouvo disip-ya ka fè tousa yé pouvé pou yé gen kalité roun krétyen divèt gen, a sa Labib-a ka aplé « nouvo pèrsonalité-a » (Col. 3:8-10). Bokou moun ki té ka fè  péché sèksyèl ouben ki té vyolan, ki té ka pézé moun ké wéy ouben ki té fyèr di yé péyi, lésé tousa. Anplis di sa, profési-a ki annan Isaïe 2:4 ka fèt : sèrvitèr Jéova-ya ‘pa ka anprann fè lagèr ankò’. Lò moun-yan ka wè ki nou ka fè éfòr pou mété sa nouvo pèrsonalité-a, yé anvi vini annan òrganizasyon Jéova-a, paské yé ka byen wè ki nou ka swiv Kris (Jean 13:35 ; 1 Pierre 2:12). Tout sa bon bagaj-ya pa ka fèt toubonnman konsa. A gras a Jézi nou ka rivé fè sa.

9. Dapré Matthieu 24:45-47, kisa Jézi té ké fè pannan dèrnyé jou-ya ?

⁹ (Li Matthieu 24:45-47). Jézi di ki pannan dèrnyé jou-ya, i té ké mété roun « èsklav fidèl ké avizé » é a li ki té ké divèt bay so disip manjé èspirityèl-a. Donk nòrmalman, sa èsklav-a divèt travay rèd pou fè sa jòdla. É a byen sa nou ka wè. Jézi ka sèrvi roun ti group wonm Bondjé bay so lèspri sen, pou bay pèp Bondjé-a ké sa ki entérésé yé « manjé jiskont lò yé bézwen ». Sa mouché-ya pa ka dominé asou lafwa ròt-ya (2 Cor. 1:24). Yé ka rékonnèt ki a Jézi ki sa yé « gid » ké yé« chèf » (Is. 55:4).

10. Ki piblikasyon to ka wè asou zimaj-ya fè to désidé pran chimen-an ki ka bay lavi pou tout-tan-an ?

¹⁰ Dipi 1919, èsklav fidèl-a ka fè piblikasyon pou bay sa-ya ki entérésé chans konnèt lavérité ki annan Paròl Bondjé-a. An 1921 (1923 an fransé), i fè liv La Harpe de Dieu pou idé sa moun-yan konnèt ansèyman ki annan Labib-a ki pi enpòrtan. Piti piti, yé fè ròt liv ankò. Ki piblikasyon idé to konnèt nou Papa ki annan syèl-a épi kontan li ? Ès a té « Que Dieu soit reconnu pour  vrai ! », La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible ?, Kisa Labib-a ka anprann nou ? Ouben dèrnyé liv pou étidyé-a Viv ké tchò kontan pou tout-tan ! ? Yé fè tout sa piblikasyon-yan pou idé nou fè disip é a té jiskont sa nou té bézwen lò yé soti.

11. Poukisa nou tout bézwen manjé èspirityèl ?

¹¹ A pa sa-ya ki fin koumansé konnèt lavérité-a rounso ki bézwen gro manjé èspirityèl. Nou tout bézwen sa. Apot Pòl ékri : « Gro manjé-a, a pou sa ki ja mi. » I di osi ki si nou ka pran labitid fè sa nou ka anprann, nou ké rivé « fè diférans ant sa ki bon ké sa ki mové » (Héb. 5:14). Kou jòdla moun-yan ka benyen annan imoralité-a, sa pouvé difisil pou kontinyé obéyi prensip Jéova-ya. Mé Jézi ka fè sa ki fo pou nou anprann bagaj-ya nou bézwen pou nou lafwa rété fò. Sa manjé èspirityèl-a ka vini di Paròl Bondjé-a, Labib-a. A Jézi ki ka dirijé èsklav fidèl-a pou i préparé sa manjé èspirityèl-a é pou i bay nou l’.

12. Kou Jézi, ki valò non Bondjé gen pou nou ?

¹² Kou Jézi, nou ka bay non Bondjé tout lònò i ka mérité (Jean 17:6, 26). Parèkzanp, an 1931, nou pran non Témwen Jéova. Sa non-an ka vini di Labib-a. Konsa nou montré kouman nou kontan non nou Papa ki annan syèl-a (Is. 43:10-12). É dipi òktòb 1931, non Bondjé-a asou chak Tourdégard ki ka soti. Anplis di sa, Traduction du monde nouveau-a roubay sa non-an so plas annan Labib-a. Mé a pa sa Légliz ki  ka di yé krétyen fè. Yé tiré « Jéova » annan plizyèr Labib.

13. Poukisa to sir ki Jézi ka sèrvi « èsklav fidèl ké avizé-a » jòdla ? (Jean 6:68).

¹³ Jézi sèrvi « èsklav fidèl ké avizé-a » pou mété roun òrganizasyon asou latè-a èspésyalman pou moun-yan pouvé adoré Jéova kou i lé. Kisa to ka rousanti lò to ka sonjé sa sa òrganizasyon-an ka fè ? To divèt anvi di menm bagaj Pyèr di Jézi : « Kimoun nou ké swiv ? A to ki gen palò ki ka bay lavi pou tout-tan » (Jean 6:68). Koté nou té ké fika si nou pa té konnèt òrganizasyon Jéova-a ? Jézi ka sèrvi sa òrganizasyon-an pou bay nou sa nou bézwen pou rété fidèl douvan Jéova. I ka bay nou fòrmasyon pou nou divini vayan annan prédikasyon-an. É i ka idé nou pou nou abiyé ké « nouvo pèrsonalité-a » pou nou fè Jéova plézi (Éph. 4:24).

14. Kisa òrganizasyon Jéova-a fè pou nou pannan pandémi Covid-19-a ?

¹⁴ Jézi la osi pou gidé nou lò maré-a mové. A sa nou wè lò pandémi Covid-19-a koumansé. Toupannan moun-yan pa té savé sa pou yé té fè, Jézi fè sa ki fo pou nou té savé sa nou té divèt fè pou protéjé nou kò. Yé di nou mété roun mas koté i gen bokou moun épi rété lwen di moun-yan. Yé fè ansyen-yan sonjé osi ki sa té enpòrtan pou yé té kontinyé pran nouvèl tout moun annan yé asanblé. Yé té divèt chaché savé osi sa chak moun té bézwen pou i rété an sékirité, pou protéjé so lasanté é pou rété pròch ké Jéova  (Is. 32:1, 2). É anplis di sa, nouvèl di Kolèj santral-ya bay nou ròt konsèy ké ankourajman.

15. Kisa yé di nou asou fason pou nou fè réinyon-an ké préché pannan pandémi-a, é ki bèl bagaj rivé ?

¹⁵ Pannan pandémi-a, yé byen di nou osi kouman nou té divèt fè nou réinyon épi kouman nou té divèt préché. Près la pou la, nou koumansé swiv nou réinyon ké nou asanblé asou entèrnèt. Nou koumansé osi préché èspésyalman ké lèt ké téléfonn. Jéova béni nou travay. Roun patché filyal ka di ki dipi pandémi-a, i gen bokou plis proklamatèr. Anplis di sa, bokou frè ké so viv dé sitiasyon ki ankourajé yé pannan sa lépòk-a (gadé karé-a «  Jéova ka béni nou prédikasyon »).

16. Di kisa nou pouvé sir ?

¹⁶ Pitèt sèrten pansé ki òrganizasyon Jéova-a té pran tròp prékosyon pannan pandémi-a. Mé chak fwa, nou wè ki a té roun bon bagaj (Mat. 11:19). Lò nou ka sonjé fason Jézi ka dirijé so disip, sa ka fè nou ankò plis sir ki li menm ké so Papa ké toujou la ké nou, kèlkéswa sa ki rivé dimen (li Hébreux 13:5, 6).

17. Poukisa nou pouvé fyèr di travay anba otorité Jézi ?

¹⁷ Travay anba otorité Jézi, men roun bèl bénédiksyon ! Nou annan roun òrganizasyon koté pyès moun pa ka gadé pou zafè kiltir, nasyon ouben lang. Nou ka rousouvwè sa nou bézwen pou rété pròch di Jéova é nou gen sa nou bézwen pou préché. É pou fini, nou chak ka anprann kouman nou pouvé abiyé ké nouvo pèrsonalité-a épi montré nou lanmou pou nou konpanyen. A pa ti fyèr nou divèt fyèr di travay anba otorité Jézi !