1. Souvan, kisa ki ka touché moun-yan ki ka vin pou prémyé fwa annan nou réinyon ? (gadé zimaj-a osi).

 IMAJINÉ : Roun mouché ké so madanm ka alé annan roun sal di Rwayonm Témwen Jéova-ya. A prémyé fwa yé ka vini pou roun réinyon. Lò yé ka wè kouman yé ka rousouvwè yé ké bokou lanmou é kouman frè ké sò-ya kontan yé konpanyen, sa ka touché yé. Lò yé ka rantré annan yé kaz, madanm-an ka di so mari : « Témwen Jéova-ya pa kou ròt-ya. Yé diféran, yé byen. »

2. Kisa ki vréman rèd pou roun ran moun ?

² Lanmou i gen annan asanblé krétyen-an, a roun bagaj ki bèl toubonnman. A vré, Témwen Jéova-ya pa parfè (1 Jean 1:8). A pou sa, pi nou konnèt nou frè ké sò-ya, pi nou ka wè yé défo (Rom. 3:23). Malérèzman, i gen sa ki pa ka rivé sipòrté défo yé frè ké sò-ya gen.

3. Kouman moun-yan pouvé rékonnèt vré krétyen-yan ? (Jean 13:34, 35).

³ Jité roun koutwéy ankò asou vèrsé-a o koumansman sa artik-a (li Jean 13:34, 35). Kouman moun-yan té ké pouvé rékonnèt vré krétyen-yan ? Yé té ké kontan yé konpanyen. Labib-a pa ka di ki yé té ké parfè. É si to ka byen gadé, Jézi pa di : « A konsa zòt ké savé ki zòt sa mo disip. » I di : « A konsa tout moun ké savé ki zòt sa mo disip. » Donk, Jézi té lé di ki nou té ké pouvé rékonnèt so vré disip gras a lanmou  yé té ké gen pou yé konpanyen. Mé i té lé di osi ki, ni sa ki té sa so disip, ni sa ki pa té sa so disip, té ké pouvé wè sa.

4. Ki késyon roun ran moun pouvé pozé yé kò ?

⁴ Roun ran moun ki pa Témwen Jéova pouvé doumandé yé kò : « Lò yé ka di ki nou ka rékonnèt vré disip Jézi gras a yé lanmou, kisa sa lé di ? Kouman Jézi montré so apot ki i té kontan yé ? É kouman nou pouvé imité èkzanp Jézi jòdla ? » Nou menm ki Témwen, nou divèt réfléchi asou sa késyon-yan. Sa ké idé nou aji ké plis lanmou ankò, èspésyalman lò nou ka wè défo ròt-ya gen (Éph. 5:2).

5. Èspliké sa Jézi di annan Jean 15:12, 13.

⁵ Jézi byen di ki lanmou ki té ké pèrmèt nou rékonnèt so vré disip, a pa té ké nenpòrt ki kalité lanmou (li Jean 15:12, 13). I bay yé sa koumannman-an : « A pou zòt kontan zòt konpanyen, menm fason mo té kontan zòt. » Kisa i té lé di ? I té ka palé di roun lanmou ki ka pousé nou fè sakrifis, roun lanmou ki pouvé menm pousé roun krétyen mouri pou so frè ouben pou so sò si i divèt fè l’ b.

6. Kouman Paròl Bondjé-a ka montré ki lanmou enpòrtan ?

⁶ Annan Paròl Bondjé-a, lanmou gen bokou valò. Bokou moun kontan sa vèrsé-ya : « Bondjé sa lanmou » (1 Jean 4:8), « To divèt kontan to konpanyen kou to menm » (Mat. 22:39), « Lanmou ka kouvri roun patché péché » (1 Pierre 4:8) ké « Lanmou pa janmen ka disparèt » (1 Cor. 13:8). Sa vèrsé-ya, ké ròt ankò, divèt  idé nou chak byen konprann kouman sa enpòrtan pou nou montré sa bèl kalité-a.

7. Poukisa Satan pa pouvé anprann moun kontan yé konpanyen é viv byen ansanm ?

⁷ Roun patché moun ka doumandé yé kò : « Kouman nou pouvé savé a ki rélijyon ki vré ? Tout rélijyon-yan ka di ki yé ka anprann moun-yan lavérité, pourtan, yé ka ansényé bagaj diféran asou Bondjé. » Satan rivé bloublou moun-yan, i fè roun patché fo rélijyon. Mé i pa pouvé fè moun di tout koté asou latè-a kontan yé konpanyen. A Jéova rounso ki pouvé fè sa. É a roun bagaj ki lojik paské, a koté li vré lanmou-a ka soti : pou nou montré sa lanmou-a, a pou nou gen so lèspri é a pou i béni nou (1 Jean 4:7). Donk, sa pa ka étoné nou ki Jézi di ki mark so vré disip, a té ké vré lanmou-a.

8-9. Kouman sèrten moun ka réyaji lò yé ka wè lanmou Témwen-yan gen pou yé konpanyen ?

⁸ Kou Jézi té di l’, roun patché moun ka rékonnèt so vré disip gras a vré lanmou yé gen pou yé konpanyen. Annou palé di roun frè yé ka aplé Ian. Jis jòdla, i ka sonjé prémyé asanblé i alé-a. A té annan roun èstad, pa lwen di so kaz. Déztrwa mwa anvan, i té alé wè roun match annan sa menm èstad-a. I ka di : « Anbyans-a té diféran konplètman. Témwen-yan té poli, yé té byen abiyé é yé timoun pa té anbétan. » I ka di dèyè sa : « É pi enpòrtan-an, yé té ké di ki yé tchò té kontan é ki yé té ka viv annan lapè — a sa menm mo té ka chaché. Mo pa ka sonjé pyès diskour yé fè sa jou-a, mé konpòrtman Témwen-yan touché mo bokou c. » A sèlman vré lanmou-a nou gen pou nou konpanyen ki pouvé fè nou aji byen konsa. Si nou ka aji ké bonté ké nou frè ké sò-ya é si nou ka rèspèkté yé, a paské nou kontan yé.

⁹ Lò roun frè yé ka aplé John koumansé vini annan nou réinyon, i rousanti menm bagaj ké Ian. I ka di : « Yé tout té janti […] — a té kousidiré a té dé moun ki té sen ! Mo rété èstébékwé. Yé té vréman kontan yé konpanyen é sa fè mo sir ki mo té trapé vré rélijyon-an d. » Sa témwanyaj-ya, ké roun patché ròt ankò, ka montré ki Témwen Jéova-ya sa dé vré krétyen.

10. Kitan èspésyalman nou divèt montré nou lanmou krétyen ? (gadé nòt-a osi).

¹⁰ Kou nou wè l’ annan koumansman sa artik-a, i pa gen pyès frè ni pyès sò ki parfè. Donk yé ké fè ouben yé ké di bagaj ki ké nèrvé nou e (Jacq. 3:2). Lò sa ké rivé, nou ké pouvé montré yé ki nou kontan yé vréman. Kouman ? Annan fason nou ké réyaji. Annou wè kisa èkzanp Jézi bay nou annan sa zafè-a ka anprann nou (Jean 13:15).

11. Kisa Jak ké Jan fè ki pa té bon ? (gadé zimaj-a osi).

¹¹ Jézi pa té ka antann so disip fè tout bagaj parfètman. I pito té ka idé yé korijé yé défo pou Jéova kontan yé, é i té  ka fè l’ ké lanmou. Roun jou, dé apot, Jak ké Jan, doumandé yé manman alé palé pou Jézi pou i bay yé roun bon plas annan Rwayonm-an (Mat. 20:20, 21). Sa kou-a, yé montré ki yé té gen òrgèy é ki yé té ka chaché gran bagaj pou yé kò (Prov. 16:18).

12. Ès a Jak ké Jan rounso ki mal aji ?

¹² Mé sa jou-a, a pa Jak ké Jan rounso ki mal aji. Gadé kouman ròt apot-ya réyaji. Labib-a ka di : « Lò dis ròt apot-ya anprann sa sa dé frè-ya té fè, yé koumansé faché » (Mat. 20:24). Nou pouvé pansé ki Jak, Jan ké ròt apot-ya koumansé babyé séryé. Pitèt ròt apot-ya di yé roun bagaj konsa : « Mé kisa zòt krè ? Zòt krè zòt miyò pasé nou, a pou sa zòt doumandé roun bon plas annan Rwayonm-an ? A pa zòt rounso ka travay rèd òbò Jézi ! Poukisa nou té ké pi bas ki zòt ? » Malérèzman, sa kou-a, apot-ya pa aji ké lanmou ké yé konpanyen.

13. Kouman Jézi réyaji parapòrta défo so apot té gen ? (Matthieu 20:25-28).

¹³ Kouman Jézi réyaji ? I pa lévé faché, i pa di ki i té ké alé chaché pi bon apot, dé moun ki té ké gen imilité, é ki té ké toujou aji ké lanmou ké yé konpanyen. I té savé ki apot-ya té lé fè bon bagaj, é a ké pasyans i fè yé réfléchi (li Matthieu 20:25-28). I kontinyé aji ké  yé ké lanmou menm si a pa té prémyé fwa yé té ka briga pou savé kimoun ki té pi gran, é menm si a pa té dèrnyé fwa yé té ké fè l’ (Marc 9:34 ; Luc 22:24).

14. Ké ki mantalité apot-ya lévé ?

¹⁴ Jézi dèt tchenbé kont di fason apot-ya té lévé (Jean 2:24, 25). Pou chèf rélijyé-ya ki té jwif, yé plas annan lasosyété té gen bokou valò (Mat. 23:6 ; gadé vidéyo-a Les premiers sièges dans les synagogues ki ka alé ké nòt pou Matthieu 23:6). Sa chèf rélijyé-ya f té krè yé té pi rot pasé ròt-ya (Luc 18:9-12). Jézi té ka konprann ki sa kalité mantalité-a té pouvé aji asou fason apot-ya té ka wè yé kò é asou fason yé té ka wè ròt-ya (Prov. 19:11). I pa té ka doumandé yé fè plis ki sa yé té pouvé fè ; é lò yé té ka fè roun mové bagaj, i pa té ka kòlè. I té savé ki yé té gen bon tchò. A pou sa i pran pasyans ké yé, i idé yé débarasé yé kò di òrgèy épi zafè chaché gran bagaj pou yé kò, é i anprann yé aji ké lanmou.

15. Kisa sa ki rivé ant Jak, Jan ké ròt apot-ya ka anprann nou ?

¹⁵ Sa ki rivé ant Jak, Jan ké ròt apot-ya, pouvé anprann nou roun patché bagaj. Jak ké Jan pa té pou doumandé roun bon plas annan Rwayonm-an. Mé ròt apot-ya yé menm té divèt fè sa yé té pouvé pou yé té pouvé rété ansanm ansanm. Jézi li menm aji ké bonté épi ké lanmou ké 12 apot-ya. Kisa sa ka anprann nou ? Sa ki pi enpòrtan, a pa sa ròt-ya ka fè, mé a fason nou ka réyaji lò yé ka fè roun bagaj ki pa bon é lò nou ka wè yé défo. Kisa ki pouvé idé nou byen réyaji ? Lò roun frè ouben roun sò ka fè nou lapenn, annou doumandé nou kò : « Poukisa sa i fè ka déranjé mo konsa ? Ès sa ka montré ki mo gen roun défo pou mo korijé ? Ès moun-an ki fè mo sa ka jwenn problèm atchèlman ? Menm si mo ka pansé ki mo gen rézon faché, ès mo pa pouvé aji ké lanmou épi pardonnen ? » Pi nou ka aji ké lanmou ké ròt-ya, pi nou ka montré ki nou sa dé vré disip Jézi.

16. Kisa èkzanp Jézi ka anprann nou ankò ?

¹⁶ Èkzanp Jézi ka anprann nou osi ki nou divèt éséyé konprann nou frè ké sò-ya (Prov. 20:5). A vré, nou pa kou Jézi, nou pa pouvé li annan tchò moun. Mé nou pouvé pran pasyans ké nou frè ké sò-ya lò yé ka nèrvé nou (Éph. 4:1, 2 ; 1 Pierre 3:8). É sa ké pi fasil pou nou fè l’ si nou ka anprann konnèt yé. Annou pran roun èkzanp.

17. Ki bon rézilta roun rèsponsab sirkonskripsyon jwenn pas i anprann konnèt roun frè pi byen ?

¹⁷ Roun rèsponsab sirkonskripsyon ki ka sèrvi an Afrik té ka trouvé ki roun frè annan roun asanblé i té ka vizité pa té janti menm. Kouman i réyaji ? I ka èspliké : « Pasé mo évité sa frè-a, mo désidé anprann konnèt li. » A konsa rèsponsab sirkonskripsyon-an anprann ki i té lévé annan roun fanmi koté sa pa té fasil, é i konprann poukisa i té konsa.  I ka di ankò : « Lò mo anprann kisa i té fè pou briga ké so pèrsonalité é ki progrè i té ja fè, mo koumansé admiré l’. Nou divini bon zanmi. » Kou nou ka wè l’ annan sa èkzanp-a, lò nou ka éséyé konprann nou frè ké sò-ya, sa pi fasil pou nou kontan yé.

18. Si roun frè ouben roun sò fè to lapenn, ki késyon to pouvé pozé to kò ? (Proverbes 26:20).

¹⁸ Si roun frè ouben roun sò fè nou lapenn, pitèt nou ké anvi alé palé pou li. Mé anvan nou alé fè sa, annou pozé nou kò sa késyon-yan : « Ès mo konnèt tout sitiasyon-an ? » (Prov. 18:13), « Ès i fè mo lapenn parèsprè ? » (Eccl. 7:20), « Ès sa pa ja rivé mo fè menm bagaj-a ? » (Eccl. 7:21, 22) é « Si mo k’alé palé pou mo frè ouben pou mo sò, ès mo pa ka riské mété dilwil asou difé ? » (li Proverbes 26:20). Si nou ka pran tan réfléchi asou sa késyon-yan, pitèt nou ké konprann ki, paské nou kontan nou frè ouben nou sò, nou pouvé désidé pasé asou sa.

19. Kisa to byen désidé fè ?

¹⁹ Témwen Jéova-ya kontan yé konpanyen é sa ka montré ki yé sa vré disip Jézi. Mé nou chak nou divèt fè noupa. Nou chak nou divèt montré nou frè ké sò-ya ki nou kontan yé magré yé défo. Fason nou ké aji ké pèrmèt moun-yan rékonnèt vré rélijyon-an épi vini ansanm ké nou pou nou adoré Jéova, Bondjé-a ki plen ké lanmou. Donk, annou byen désidé aji ké lanmou, lanmou ki ka pèrmèt tout moun wè a kimoun ki vré krétyen-yan !