Poukisa mouché-a yé ka aplé « entèl » di ki si i té ka maryé ké Rit, i té ké « gaté » so éritaj ? (Ruth 4:1, 6).

Annan lépòk Labib-a, lò roun mouché maryé té ka mouri san i pa té gen timoun, kisa ki té ka pasé pou so téren ? Ès non so fanmi té ka disparèt pou tout-tan ? Lalwa Bondjé té bay Moyiz té ka palé di sa bagaj-ya.

Kisa ki té ka rivé téren roun mouché ki té mouri ouben téren roun mouché ki té vin maléré é ki té vandé yé ? So frè ouben roun moun annan so fanmi ki té pròch té pouvé viré achté sa téren-yan. Konsa téren-yan té ka rété annan fanmi-a (Lév. 25:23-28 ; Nomb. 27:8-11).

Kouman non mouché-a ki té mouri pa té ka disparèt ? Gras a maryaj léviratik-a : roun mouché té ka maryé ké vèv so frè pou i fè roun timoun ki té ké poté non so frè é ki té ké érité tousa i gen. A sa ki pasé pou Rit. A té roun lalwa ki té plen ké lanmou pou vèv-a osi paské i pa té ka rété san pyès moun pou pran swen di li (Deut. 25:5-7 ; Mat. 22:23-28).

Annou wè sa ki pasé pou Noémi. I té maryé ké roun mouché yé té ka aplé Élimélèk. Mé lò li ké yé dé garson mouri, i pa té gen pyès mouché ankò annan fanmi-a pou pran swen di Noémi (Ruth 1:1-5). Lò yé routounen Jida, i di so bèlfi Rit alé wè Boaz épi doumandé l’ viré achté yé téren. Boaz té sa roun fanmi pròch di Élimélèk (Ruth 2:1, 19, 20 ; 3:1-4). Mé i randé so kò kont ki i té gen rounòt moun ki té pi pròch ankò pasé li, Labib-a ka aplé l’ « entèl ». A sa mouché-a an prémyé ki té gen drwa viré achté téren-yan (Ruth 3:9, 12, 13).

O koumansman, « entèl » té paré pou idé Noémi (Ruth 4:1-4). Sa té ké kouté l’ bokou soumaké, mé i té savé ki Noémi té tro vyé pou i fè roun timoun ki té ké érité di téren Élimélèk pita. Donk, sa téren-yan té ké vin pou « entèl » anplis di sa i té ja gen. Atò, i té ka pansé ki i té byen kalkilé so zafè.

Mé lò i konprann ki i té divèt maryé ké Rit osi, i chanjé lidé. I di : « Mo pa pouvé viré achté l’ paské mo ka riské gaté mo éritaj » (Ruth 4:5, 6). Poukisa i chanjé lidé ?

Si « entèl » ouben rounòt moun té ka maryé ké Rit é i té ka fè roun tibolonm ké li, sa tibolonm-an té ké érité di téren Élimélèk. Kouman sa té ké « gaté éritaj » « entèl » ? Labib-a pa ka di poukisa, mé men plizyèr èsplikasyon posib :

• Prémyèrman, i té ké pédi lajan i té ké dépansé pou viré achté téren Élimélèk, paské finalman, sa téren-yan pa té ké vin pou li. Yé té ké pou pitit Rit.

• Dézyèmman, i té ké gen pou bay Noémi ké Rit manjé, épi pran swen di yé.

• Trwazyèmman, si Rit té ka fè timoun ké « entèl », timoun « entèl » té ja gen té ké divèt partajé éritaj-a ké yé.

• Katriyèmman, si « entèl » patékò gen timoun, é Rit té ka fè roun tibolonm, sa ti bolonm-an té ké érité pita ni téren Élimélèk ni sopa. Donk, lò i té ké mouri, so téren té ké vin pou roun timoun ki pa té ké poté so non mé ki té ké poté non Élimélèk. « Entèl » té byen lé idé Noémi, mé i pa té paré pou fè tousa. I té préféré lésé tousa pou moun-an apré li ki té gen drwa viré achté téren Noémi. A té Boaz. Boaz asèpté sa rèsponsabilité-a paské i té lé ki « éritaj défen-an rété asou so non » (Ruth 4:10).

Dapré sa nou ka wè, sa ki té pi enpòrtan pou « entèl », a té ki i pa pédi ni so non, ni so éritaj. A paské i té ka gadé yenki pou so douvan lèstomak i té ka réfléchi konsa. I pa té lé so non disparèt mé jòdla pyès moun pa konnèt so non ! Épi osi i pa rousouvwè bèl lònò Boaz rousouvwè : Boaz divini roun gangan Mési-a, Jézi Kris. É tousa paské i réfizé idé roun moun ki té bézwen pas i té égoyis. Sa byen tris ! (Mat. 1:5 ; Luc 3:23, 32).