1. Kisa papa ké manman-yan lé pou yé timoun ?

 ZÒT ki gen timoun, nou savé ki zòt vréman lé idé yé konnèt épi kontan Jéova. Mé nou pa pouvé wè l’. Alòr kisa zòt pouvé fè pou zòt timoun pouvé sir ki Bondjé ka èkzisté é pou yé vin pròch ké li ? (Jacq. 4:8).

2. Kouman paran-yan pouvé anprann yé timoun konnèt bèl kalité Jéova gen ?

² Pou idé yé timoun vin pròch ké Jéova, paran-yan oblijé étidyé Labib-a ké yé (2 Tim. 3:14-17). Mé menm Labib-a ka di ki yé pouvé fè rounòt bagaj pou idé yé fè sa. Annan liv Proverbes, nou ka wè roun papa ki ka ankourajé so ti bolonm « pa janmen bliyé » bèl kalité Jéova nou ka wè annan kréyasyon-an (Prov. 3:19-21). Annan sa artik-a, nou ké wè plizyèr fason paran-yan pouvé sèrvi kréyasyon-an pou anprann yé timoun ki kalité Bondjé Jéova sa.

3. Kisa paran-yan divèt idé yé timoun fè ?

³ Labib-a ka di ki « dipi tan Bondjé fè latè-a […] menm si nou pa pouvé wè [li], nou ka wè so bèl kalité annan tousa i fè » (Rom. 1:20). Zòt ki paran, zòt dèt ka pran plézi pronmennen dèrò ké zòt timoun. Ében zòt pouvé sèrvi sa tan-an pou idé zòt timoun wè kouman « tousa [Jéova] fè » ka montré so bèl kalité. Annou wè kouman èkzanp Jézi pouvé idé zòt.

4. Kouman Jézi sèrvi kréyasyon-an pou ansényé so disip ? (Luc 12:24, 27-30).

 ⁴ Annou gadé kouman Jézi sèrvi kréyasyon-an pou ansényé so disip. Roun jou, i doumandé yé gadé krobo-ya ké flèr savann-yan (li Luc 12:24, 27-30). Jézi té pouvé palé di nenpòrt ki zannimo ouben nenpòrt ki plant, mé i chwazi roun zozo ké roun flèr so disip té byen konnèt. Toupannan yé té ka kouté li, pitèt yé té pouvé wè krobo ka volé laro yé tèt épi flèr annan savann-yan. Imajiné Jézi ka montré tout sa bagaj-ya ké so lanmen toupannan i ka palé. É apré i pran sa èkzanp-a, kisa i fè ? I anprann so disip roun bagaj enpòrtan asou yé Papa ki annan syèl-a ki bon é ki kontan bay : Jéova ké toujou bay so sèrvitèr ki fidèl manjé é i ké toujou abiyé yé menm fason i ka fè l’ ké krobo-ya ké flèr savann-yan.

5. Kouman papa ké manman-yan pouvé sèrvi kréyasyon-an pou anprann yé timoun konnèt Jéova pi byen ?

⁵ Papa ké manman, kouman zòt pouvé imité fason Jézi ansényé ? Zòt pouvé palé ké zòt timoun di roun bagaj annan kréyasyon-an ki zòt kontan, kou zannimo ouben plant zòt pi kontan. Lò zòt ka fè sa, pa bliyé èspliké yé kisa sa èkzanp-ya ka montré yé asou Jéova. Apré sa, doumandé yé ki zannimo ouben ki plant yé pi kontan ? Si zòt ka palé ké zòt timoun di roun bagaj yé kontan, pitèt yé ké kouté zòt plis lò zòt ké éséyé anprann yé bagaj asou Jéova.

6. Kisa èkzanp manman Christopher ka anprann nou ?

⁶ Ès zòt blijé pasé roun patché tan ka chaché enfòrmasyon asou roun zannimo ouben roun plant èspésyal anvan zòt palé di sa kréyasyon-an ka montré nou asou Jéova ? Pa fòrséman. Jézi pa bay so disip roun patché èsplikasyon asou sa krobo-ya ka manjé ni asou fason flèr savann-yan ka pousé. Sa vré, détan, zòt timoun kontan anprann détay asou bagaj Jéova fè, mé souvan, roun lidé ouben roun késyon tou senp asé pou idé zòt timoun konprann sa zòt lé di. Roun frè yé ka aplé Christopher ka sonjé fason so manman té ka fè lò i té toupiti : « Mo manman té ka di nou dé bagaj tou senp pou idé nou kontan kréyasyon-an. Parèkzanp, lò nou té bò d’ roun montangn, i té ka di nou : “Gadé kouman sa montangn-yan rot é kouman yé bèl ! Ès zòt pa wè kouman Jéova fòrmidab ?” Ouben lò nou té òbò lanmè, i té ka di nou : “Gadé kouman vag-ya fò ! Ès zòt pa wè kouman Bondjé gen fòrs ?” » Christopher ka di : « Sa ti lidé-ya té senp mé sa té ka fè nou réfléchi ; jis jòdla nou ka sonjé sa. »

7. Kouman papa ké manman-yan pouvé anprann yé timoun réfléchi asou kréyasyon-an ?

⁷ Pi zòt timoun ka vin gran, pi zòt pouvé anprann yé koumansé réfléchi asou kréyasyon-an ké sa sa ka anprann yé asou Jéova. Parèkzanp, zòt pouvé palé di roun bagaj Jéova fè, épi doumandé yé : « Kisa sa ka anprann to asou Jéova ? » Pitèt zòt ké étoné lò zòt ké tandé sa yé gen pou di (Mat. 21:16).

8. Ki okazyon papa ké manman israyélit-ya té gen lò yé té ka « maché asou larout-a » ké yé timoun ?

⁸ Bondjé té di papa ké manman israyélit-ya ansényé yé timoun so lalwa lò yé té ka « maché asou larout-a » ké yé (Deut. 11:19). I té gen larout toupatou annan lakanpagn an Israyèl. Lò moun té ka maché, yé té pouvé wè zannimo, zozo  ké flèr. Donk lò roun fanmi israyélit té ka maché asou larout-ya, paran-yan té pouvé palé ké yé timoun di sa Jéova fè. Zòt ki paran, zòt gen sa kalité okazyon-yan pou sèrvi kréyasyon-an pou ansényé zòt timoun. Annou wè kouman sèrten paran parmi zòt fè sa.

9. Kisa Punitha ké Katia ka anprann nou ?

⁹ Roun manman yé ka aplé Punitha ki ka viv annan roun gran vil an End ka di : « Lò nou k’alé wè nou fanmi lakanpagn, nou ka profité pou idé nou timoun anprann plis bagaj asou bèl bagaj Jéova kréyé. Mo ka wè ki mo timoun ka konprann lanatir pi byen lò yé pa annan lari ki plen ké moun ouben plen ké loto. » Papa ké manman, zòt timoun pa ké janmen bliyé bon ti moman zòt ka pasé ké yé annan roun bèl koté. Roun sò yé ka aplé Katia ki ka rété Mòldavi, ka di : « Pi bèl souvénir mo gen di lò mo té piti, a moman mo té ka pasé ké mo papa ké mo manman lakanpagn. Mo byen kontan paské dipi mo toupiti, yé anprann mo byen gadé sa Jéova fè épi wè so kalité annan sa bagaj-ya. »

10. Kisa paran-yan pouvé fè lò sa rèd pou yé alé lakanpagn ? (gadé ti karé-a «  Pou idé papa ké manman-yan »).

¹⁰ É si aprézan to pa pouvé alé lakanpagn ? Amol, roun frè ki ka rété an End osi, ka di : « Koté mo ka rété-a, paran-yan divèt travay bokou é pou alé lakanpagn sa pouvé kouté chè. Mé, nou pouvé gadé kréyasyon Jéova-a épi palé di so kalité lò nou annan roun ti park ouben asou roun téras laro roun twa. » Si zòt ka pran tan gadé, menm bò d’ zòt kaz, zòt ké trapé roun patché bagaj Jéova fè pou zòt montré zòt timoun (Ps. 104:24). Pitèt zòt ké wè zozo, zensèk, plant ké ròt bagaj ankò. Men sa Karina, roun sò ki ka rété  Almagn, ka sonjé : « Mo manman kontan flèr, é lò mo té piti, chak fwa nou té ka maché ansanm, i té ka montré mo bèl ti flèr. » Papa ké manman, zòt pouvé osi sèrvi tout vidéyo ké piblikasyon asou kréyasyon-an nou òrganizasyon fè pou ansényé zòt timoun. Kèlkéswa zòt sitiasyon, zòt pouvé idé zòt timoun byen gadé sa Jéova fè. Aprézan, annou wè plizyèr kalité Jéova zòt pouvé montré yé pou yé vin pròch ké li.

11. Kouman papa ké manman-yan pouvé idé yé timoun wè lanmou Jéova annan kréyasyon-an ?

¹¹ Pou idé zòt timoun konprann ki Jéova sa roun Bondjé ki plen ké lanmou, zòt pouvé montré yé kouman roun patché zannimo ka pran swen di yé pitit ké tandrès (Mat. 23:37). Zòt pouvé palé osi di kantité bagaj diféran i gen annan kréyasyon-an é ki ka fè nou plézi. Karina, nou fin palé ka di : « Lò nou té ka pronmennen, mo manman té ka ankourajé mo gadé kouman chak flèr té fika é kouman yé té bèl épi i té ka ankourajé mo wè lanmou Jéova dèyè sa. Jòdla ankò, mo toujou ka rété èstébékwé lò mo ka gadé kantité flèr diféran i gen, kouman yé fèt, kantité koulèr i gen. Chak fwa mo ka gadé roun flèr, sa ka fè mo sonjé lanmou Jéova gen pou nou. »

12. Kouman papa ké manman-yan pouvé idé yé timoun wè sajès Jéova-a annan kréyasyon-an ? (Psaume 139:14 ; gadé zimaj-a osi).

¹² Idé zòt timoun osi konprann ki Jéova sa roun Bondjé ki plen ké sajès. Sajès Jéova-a lontan pi gran pasé noupa (Rom. 11:33). Pou palé di sa, zòt pouvé montré zòt timoun ki menm si niyaj-ya plen ké dlo, yé ka floté annan syèl-a é yé ka soti roun bò pou alé rounòt bò san yé pa fè pyès éfòr (Job 38:36, 37). Zòt pouvé palé yé osi di bèl fason Bondjé fè nou kò (li Psaume 139:14). Annou wè kouman Vladimir fè sa ké so pitit. I ka di : « Roun jou, nou tibolonm pran roun so ké so vélo épi i blésé. Mé déztrwa jou pita, so bobo géri. Mo ké mo madanm, nou èspliké li ki Jéova fè nou roun fason pou nou kò géri tousèl. Nou fè li wè osi ki i pa gen pyès bagaj moun envanté ki pouvé fè sa.  Parèkzanp, apré roun aksidan roun loto pa ka ranjé so kò tousèl. Sa idé nou pitit wè kouman Jéova plen ké sajès. »

13. Kouman papa ké manman-yan pouvé idé yé timoun wè pwisans Jéova-a annan kréyasyon-an ? (Isaïe 40:26).

¹³ Jéova ka di nou gadé laro syèl-a épi réfléchi asou kouman i ka fè zétwèl-ya rété koté yé fika gras a so pwisans (li Isaïe 40:26). Donk, zòt pouvé ankourajé zòt timoun gadé syèl-a épi réfléchi asou sa yé ka wè. Roun sò yé ka aplé Tingting, ki ka rété Taywann, ka sonjé : « Roun jou, mo manman mennen mo kanpé, é kou i pa té gen limyèr, nou rivé gadé syèl-a plen ké zétwèl. A sa lépòk-a, yé té ka malmennen mo lékòl é mo té ka doumandé mo kò si mo té ké rivé kontinyé sèrvi Jéova ké fidélité. Mo manman ankourajé mo réfléchi asou pwisans Jéova té divèt gen pou i fè tout sa zétwèl-ya épi i ankourajé mo sonjé ki i té pouvé sèrvi sa pwisans-a pou idé mo tchenbé annan nenpòrt ki éprèv. Sa moman-yan nou pasé ka gadé kréyasyon-an bay mo anvi anprann konnèt Jéova pi byen é sa fè mo pi désidé adoré li. »

14. Kouman papa ké manman-yan pouvé sèrvi kréyasyon-an pou idé yé timoun konprann ki Jéova sa roun Bondjé ki éré ?

¹⁴ Lò nou ka wè sa Jéova kréyé, nou ka wè osi ki so tchò kontan é ki i kontan ari. Plizyèr syantifik wè ki près tout zannimo-ya ka jwé, menm zozo-ya ké poson-yan (Job 40:20). Ès zòt timoun ja ari lò yé wè roun zannimo ka jwé ? Parèkzanp, lò yé wè roun ti chat kouri dèyè roun bagaj ouben ti chyen ka briga jantiman ? Prochen kou zòt timoun ka ari lò yé ka wè roun zannimo ka jwé, profité di sa pou fè yé sonjé ki nou ka adoré roun Bondjé ki éré ? (1 Tim. 1:11).

15. Kisa papa ké manman-yan pouvé fè pou fè timoun-yan di sa yé gen asou yé tchò ? (Proverbes 20:5 ; gadé zimaj-a osi).

¹⁵ A pa tout-tan papa ké manman-yan ka rivé fè yé timoun palé di yé problèm. Si a sa zòt ka viv, zòt ké divèt fè éfòr pou  idé zòt timoun di zòt sa yé gen asou yé tchò (li Proverbes 20:5). Sèrten paran ka trouvé ki sa pi fasil pou yé fè l’ lò yé ka profité di lanatir ansanm ké yé timoun. Poukisa ? Paské i pa gen bokou bagaj ki pouvé anpéché yé kozé. Masahiko ki ka rété Taywann, ka di rounòt bagaj : « Lò nou ka pasé tan ansanm ké nou timoun annan lanatir, parèkzanp lò nou ka alé asou roun montangn pou nou promennen ouben lò nou ka maché òbò lanmè, an jénéral, yé ka santi yé kò pi byen. Donk sa pi fasil pou yé palé di sa ki ofon yé tchò ouben sa ki ka fè yé enkyèt. » Katia nou ja palé anvan ka di menm bagaj-a : « Souvan apré lékòl, mo manman té ka mennen mo annan roun bèl ti park. Annan sa bèl ti koté-a, sa té pi fasil pou mo palé di lajournen ki té pasé épi di mo problèm. »

16. Kouman fanmi-ya pouvé profité di kréyasyon-an pou yé pasé roun bon ti moman épi anmizé ?

¹⁶ Kréyasyon Jéova-a ka pèrmèt fanmi-ya anmizé ansanm épi kontan yé konpanyen plis. Labib-a ka di ki i gen « roun tan pou ari » ké « roun tan pou soté » (Eccl. 3:1, 4, nòt). Lò Jéova fè latè-a, i fè l’ bèl toubonnman, paské i té lé nou fè bagaj ka fè nou plézi annan roun bèl koté. Roun patché moun kontan pasé tan ké yé fanmi annan sa yé ka aplé réserves naturelles, lakanpagn, asou montangn ouben bò d’ lanmè. Souvan, timoun-yan kontan kouri ké jwé annan roun park, gadé zannimo-ya ouben najé annan larivyè, annan roun krik ouben lanmè. Lò nou an mitan lanatir ké tousa Jéova kréyé, nou gen roun patché bagaj pou anmizé !

17. Poukisa papa ké manman-yan divèt anprann yé timoun kontan kréyasyon-an ?

¹⁷ Annan monn nouvo-a, papa, manman ké timoun ké pouvé profité di kréyasyon-an kou yé pa janmen fè l’ anvan. Nou pa ké pè zannimo-ya é yé pa ké pè nou non plis (Is. 11:6-9). Nou ké profité di sa Jéova kréyé pou tout-tan (Ps. 22:26). Mé zòt ki paran, pa antann sa jou-a pou anprann zòt timoun kontan kréyasyon-an. Sèrvi kréyasyon-an pou fè yé konnèt Jéova. Asiré pa pitèt, yé ké di kou rwa David di : « O Jéova, i pa gen anyen kou sa to fè-a » (Ps. 86:8).