1. Détan, kisa nou pouvé doumandé nou kò ?

ÈS DÉTAN to enkyèt lò to ka sonjé sa ki ké pasé titalò : lò yé ké kayakaya fo rélijyon-an, lò Gòg ki soti Magòg ké ataké, é lò lagèr Armagédon-an ké pété ? Ès détan to ka doumandé to kò : « Ès mo ké rivé rété fidèl lò sa bagaj-ya ki ka fè tout moun pè ké fèt ? » Si to ja pozé to kò sa késyon-an, sa nou ké étidyé asou sa Jézi di annan vèrsé sa artik-a ka apiyé asou-a, ké idé to. Jézi di so disip-ya : « Pa lésé anyen fè zòt tchò enkyèt. Montré zòt gen lafwa » (Jean 14:1). Si to lafwa fò, to ké pouvé gen kouraj kèlkéswa sa ki ké rivé dimen.

2. a) Kouman nou pouvé fè nou lafwa vin pi fò ? b) Kisa nou ké wè annan sa artik-a ?

² Kouman nou pouvé fè nou lafwa vin pi fò ? Nou divèt gadé fason nou ka réyaji lò nou ka jwenn problèm jòdla. A la nou ké wè koté nou bézwen fè nou lafwa vin pi fò. Chak fwa nou ka tchenbé rèd annan roun éprèv, nou lafwa ka vin pi fò é nou pi byen paré pou éprèv-ya ki ka vini dèyè. Annan sa artik-a, nou ké wè kat sitiasyon disip Jézi-ya jwenn é ki montré ki yé té bézwen plis lafwa. Nou ké wè osi kouman nou pouvé tchenbé lò nou ka jwenn menm kalité sitiasyon-yan jòdla, é kouman sa sitiasyon-yan pouvé idé nou paré pou sa ki ka vin dèyè.

3. Dapré Matthieu 6:30, 33, kisa Jézi byen èspliké ?

³ Sa roun chèf fanmi lé pou so madanm ké so pitit, a bay yé manjé, lenj pou yé mété ké roun koté pou yé rété, sa nòrmal. Mé annan sa dèrnyé jou-ya nou ka viv, a pa roun bagaj ki fasil. Roun ran krétyen pédi yé travay,  é magré tousa yé ka fè, yé pa ka rivé jwenn rounòt. Rounòt ran té divèt réfizé roun travay paské i pa té k’alé ké sa Labib-a ka di. Lò sa ka rivé nou, nou divèt sir ki Jéova ké bay nou fanmi sa i bézwen. A sa Jézi byen èspliké so disip-ya annan diskour i fè asou montangn-an (li Matthieu 6:30, 33). Si nou vréman sir ki Jéova pa ké lésé nou, nou ké pouvé mété Rwayonm-an an prémyé annan nou lavi, kou nou divèt fè l’. É lò nou ké wè ki Jéova ka idé nou gen sa nou bézwen pou viv, nou ké santi nou kò pi pròch di li é nou lafwa ké vin pi fò.

4-5. Kouman Jéova ka idé roun fanmi dipi mizè tonbé anlè l’ ?

⁴ Annou pran èkzanp fanmi Castro, roun fanmi ki ka rété Vénézwéla, é annou wè kouman Jéova ka idé l’ dipi mizè tonbé anlè l’. Sa fanmi-a té gen roun ti bitasyon ki té ka pèrmèt yé gen roun tibi soumaké pou viv. Mé roun jou, roun bann mouché ki té gen zarm mété yé dèrò di yé bitasyon. Miguel, papa-a, ka di : « Jòdla, a roun moun ki ka prété nou roun ti moso latè é, a gras a sa i ka bay, nou ka rivé manjé. Chak jou bonmanten, mo ka doumandé Jéova idé nou trapé manjé pou lajournen-an. » Menm si lavi-a rèd pou fanmi Castro, yé sir ki nou Papa ki annan syèl-a pouvé bay yé sa yé bézwen pou viv. A pou sa yé ka kontinyé alé annan yé réinyon ké préché. Yé ka mété Rwayonm-an an prémyé annan yé lavi, é Jéova ka bay yé sa yé bézwen.

⁵ Menm si lavi a rèd pou yé, Miguel ké so madanm, Yurai, toujou ka mété yé lidé asou fason Jéova ka pran swen di yé. Détan, Jéova fè frè ké sò-ya bay yé roun ti kichoz pou idé yé, ouben idé Miguel trapé roun travay. Détan ankò, Jéova bay yé sa yé té bézwen pou viv gras a opérasyon pou poté sékour Bétèl-a té òrganizé. Jéova pa janmen anbandonnen yé. Jòdla, lafwa fanmi Castro pi fò pasé anvan.Yoselin, yé pi gran tifi, palé di roun sitiasyon koté i wè kouman Jéova idé yé. Men sa i di : « Sa touché nou lò nou wè ki sa té klè ki Jéova té ka idé nou. Dipi sa jou-a, mo ka wè l’ kou roun zanmi é mo bézwen li pou viv. » I di dèyè sa : « Tout mizè nou fanmi wè ansanm idé nou pou nou paré pou problèm ki pi rèd ki ka vin dèyè. »

6. Kouman nou pouvé fè nou lafwa vin pi fò lò nou gen problèm soumaké ?

⁶ Ès to gen problèm soumaké atchwèlman ? Si a sa, to pouvé profité di sa moman-an ki rèd pou fè to lafwa vin pi fò. Kouman to pouvé fè sa ? Priyè Jéova, li Matthieu 6:25-34 épi byen réfléchi asou sa Jézi di. Èkzanp ròt krétyen pouvé idé to osi paské yé ka montré ki  Jéova ka pran swen di sa-ya ki ka kontinyé adoré l’ ké fidélité, menm si yé gen traka (1 Cor. 15:58). Si to ka réfléchi asou yé èkzanp, to ké ankò plis sir ki, menm fason to Papa ki annan syèl-a soutni yé, i ké soutni to osi. I savé sa to bézwen é i savé kouman pou bay to l’. Chak kou to ké wè Jéova aji annan to lavi, to lafwa ké vin pi fò, é a konsa to ké pouvé tchenbé lò to ké jwenn éprèv ki pi rèd dimen (Hab. 3:17, 18).

7. Kouman gro tanpèt Matthieu 8:23-26 ka palé-a ka montré ki kalité lafwa disip-ya té gen ?

⁷ Roun jou Jézi ké so disip-ya té asou roun bato asou lanmè, roun gro tanpèt lévé. Jézi profité di sa moman-an pou èspliké so disip ki yé té bézwen plis lafwa (li Matthieu 8:23-26). Pannan tanpèt-a té pi fò é ki vag-ya té ka plen bato-a ké dlo, Jézi té ka dronmi rèd. Disip-ya té tèlman pè ki yé lévé l’ pou doumandé li sové yé, mé i doumandé yé jantiman : « Poukisa zòt pè konsa ? Kouman zòt gen roun tibi lafwa konsa ? ». Disip-ya té divèt konprann ki Jéova té pouvé protéjé ni Jézi ni so zanmi, san problèm. Kisa sa istwè-a ka anprann nou ? Si nou lafwa fò nou ké pouvé tchenbé rèd kèlkéswa « gro tanpèt » ki tonbé anlè nou.

8-9. Ki éprèv té pouvé fè Anel pédi so lafwa, é kouman Anel viré byen ?

⁸ Annou wè kouman Anel, roun sò ki pa maryé é ki ka rété Pòrtoriko, soti annan roun gro problèm ké roun lafwa pi fò. Roun vré « tanpèt » tonbé asou l’. So éprèv koumansé an 2017, lò ouragan Maria krazé so kaz. Dèyè sa katastròf-a, i pédi so travay osi. Anel ka di : « Pannan tout sa tan-an, mo té enkyèt toubonnman. Mé mo priyè Jéova bokou. A konsa mo anprann fè li konfyans é pa lésé anyen anpéché mo fè sa mo té divèt fè. »

⁹ I gen rounòt bagaj ki idé Anel : zafè obéyi-a. I ka di : « Kou mo té ka obéyi sa òrganizasyon Jéova-a té ka di nou fè, sa idé mo rété kalm. Mo wè kouman Jéova pran swen di mo osi : i sèrvi frè ké sò-ya pou ankourajé mo ké bay mo sa mo té bézwen pou viv. » I ka di ankò : « Jéova bay mo lontan plis pasé sa mo pa té ké menm sonjé doumandé é sa fè mo lafwa vini bokou pi fò. »

10. Kisa nou pouvé fè si nou annan roun « gro tanpèt » atchwèlman ?

¹⁰ Ès atchwèlman to annan roun « gro tanpèt » ? Pitèt roun katastròf rivé koté to ka rété-a. Ouben pitèt to annan roun tanpèt paské to gen roun maladi ki grav. To pouvé santi kousidiré to anba dlo é to pa savé sa pou to fè. Mé pa lésé  tousa ki ka fè to enkyèt anpéché to fè Jéova konfyans. Priyè l’ ké tout to tchò pou vin pi pròch di li. É sonjé chak kou Jéova idé to anvan, pou fè to lafwa vin pi fò (Ps. 77:11, 12). To pouvé sir ki i pa ké janmen lésé to ni jòdla ni dimen.

11. Poukisa nou divèt byen désidé obéyi sa-ya ki ka dirijé nou ?

¹¹ Kou Anel di, obéyi ké idé to tchenbé osi. Atò, a pou to anprann fè sa-ya Jéova ké Jézi ka fè konfyans, konfyans. Détan, sa-ya ki ka dirijé nou pouvé di nou fè bagaj ki pa ka parèt lojik pou nou. Mé Jéova ka béni nou lò nou ka obéyi. Labib-a ka anprann nou ki obéyi ka sové lavi moun. É sèrvitèr Bondjé ki viv sa, pouvé di nou ki sa byen vré (Ex. 14:1-4 ; 2 Chron. 20:17). Byen réfléchi asou yé èkzanp. Sa ké fè to ankò pi byen désidé obéyi sa òrganizasyon Jéova-a ka di nou fè jòdla é obéyi sa i ké di nou fè dimen (Héb. 13:17). Konsa, to pa ké bézwen pè « gro tanpèt-a » ki ka vin (Prov. 3:25).

12. Dapré Luc 18:1-8, kouman lafwa pouvé idé nou tchenbé lò yé ka fè nou bagaj ki pa jis ?

¹² Jézi té savé ki yé pa té ké trété so disip-ya ké jistis é ki sa té ké pouvé fè yé pédi yé lafwa. Pou préparé yé, i rakonté yé roun istwè ki annan Évanjil Luc. Roun madanm vèv té ka alé wè roun jij méchan toulong pou jistis té pouvé fèt. I té sir ki, paské i pa té las alé wè l’, i té ké trapé sa i té ka doumandé. Pou fini, jij-a bay li sa i té ka doumandé l’ lannwit kou jou. Kisa nou ka anprann ? Jézi di : « É Bondjé [li ki jis], ès i pa ké fè, sa-ya i chwazi é ki ka rélé lannwit kou jou douvan li, gen jistis ? » (li Luc 18:1-8). Épi i di dèyè sa : « Lò Pitit wonm-an ké rivé, ès i ké trouvé sa kalité lafwa-a asou latè-a ? » Lò yé ka fè nou bagaj ki pa jis, a pou nou lafwa fò kou sa di vèv-a té fò. Annou pran pasyans épi pa moli. É a pou nou sir ki, jòdla ouben dimen, Jéova ké fè roun bagaj pou nou. Nou divèt osi gen lafwa annan pouvwar lapriyè-a gen. Détan, Jéova pouvé réponn nou lapriyè roun fason nou pa té ka antann.

13. Kisa ki rivé lò roun tifi priyè ?

¹³ Annou palé di sa ki rivé Véro, roun sò ki ka rété Kongo-Kinchasa. I té ka viv annan roun vilaj ké so mari, ki pa Témwen, ké yé tifi ki té gen 15 an. Mé roun bann mouché ké zarm vini ataké yé vilaj é fanmi-a té gen pou chapé. Asou chimen-an, yé tonbé asou roun baraj. A la plizyèr mouché ki té gen zarm arété yé épi ménasé tchwé yé. Lò Véro koumansé pléré, so tifi priyè tou fò é sèrvi non « Jéova »-a plizyèr fwa pou éséyé kalmé l’. Lò i fin priyè, koumandan-an doumandé l’ : « Tifi, kimoun ki  montré to priyè ? » I réponn li : « A mo manman. É i sèrvi modèl lapriyè ki annan Matthieu 6:9-13. » Koumandan-an di li : « Pa pè tifi, alé, to ké to manman ké to papa, é a pou Jéova zòt Bondjé protéjé zòt. »

14. Kisa ki pouvé jwé asou nou lafwa é kisa ki pouvé idé nou tchenbé rèd ?

¹⁴ Sa ki rivé sa fanmi-a ka montré nou sa kou-a ankò ki nou pa divèt bliyé kouman lapriyè-a enpòrtan. Mé lò Jéova pa ka réponn nou lapriyè lanmenm ouben pa ka fè gran bagaj pou réponn nou lapriyè, sa pouvé jwé asou nou lafwa. Kisa pou nou fè atò ? Kou madanm vèv-a annan istwè Jézi-a, annou kontinyé priyè, paské nou sir ki Bondjé pa ké lésé nou é ki i ké réponn nou lapriyè. Annou kontinyé priyè l’ osi pou i bay nou so lèspri sen (Phil. 4:13). Annou sonjé ki titalò i ké béni nou tèlman ki nou ké jis bliyé tout nou soufrans. Si nou ka tchenbé rèd ké fidélité annan problèm nou ka jwenn jòdla toupannan nou ka konté asou Jéova pou idé nou, nou ké asé fò pou tchenbé lò ròt éprèv-ya ké vini dimen (1 Pierre 1:6, 7).

15. Dapré Matthieu 17:19, 20, kisa ki rivé disip Jézi-ya ?

¹⁵ Jézi anprann so disip-ya ki yé lafwa té ké idé yé tchenbé rèd annan éprèv yé té ké jwenn (li Matthieu 17:19, 20). Roun jou, yé pa rivé chasé roun démon menm si, plizyèr fwa anvan sa, yé té rivé fè l’. Poukisa ? Jézi èspliké yé ki yé pa té gen asé lafwa. Apré sa, Jézi di yé ki si yé lafwa té asé fò yé té ké pouvé tchenbé rèd annan éprèv ki gro kou montangn ! Jòdla osi, problèm pouvé tonbé anlè nou épi nou pouvé krè ki nou pa ké janmen rivé tchenbé ?

16. Kouman lafwa Geydi idé l’ tchenbé rèd magré malò ki tonbé asou l’ ?

¹⁶ Annou palé di Geydi, roun sò ki ka rété Gwatémala. Yé tchwé so mari, Edi, douvan li lò yé té ka routounen annan yé kaz apré roun réinyon. Kouman lafwa Geydi idé l’ pou i tchenbé rèd magré so tchò té gro ? I ka di : « Mo ka jité mo fardo asou Jéova annan lapriyè é mo gen mwens lapenn. Mo ka wè kouman Jéova ka sèrvi mo fanmi ké frè ké sò-ya annan mo asanblé pou pran swen di mo. Kou mo ka kontinyé gen bokou bagaj pou fè annan sèrvis pou Jéova, mo ka soufri mwens. Sa ka pèrmèt mo viv chak jou san mo pa enkyété mo kò tròp pou sa ki ké rivé dimen. Sa malò-a montré mo ki, si dimen mo ka jwenn rounòt éprèv, mo ké pouvé tchenbé rèd gras a Jéova, so Pitit ké so òrganizasyon ki ké idé mo. »

17. Kisa nou divèt fè lò nou ka jwenn roun problèm ki kou roun montangn ?

 ¹⁷ Ès to pédi roun moun annan to fanmi ouben roun zanmi ? Alòr, pran tan rouli istwè annan Labib-a ki ka rakonté kouman Bondjé roubay plizyèr moun lavi, pou fè to lafwa annan rézirèksyon-an vini pi fò. Ès to gen lapenn paské roun moun annan to fanmi èskominyé ? Si a sa, étidyé Labib-a pou fè to ankò plis sir ki Jéova toujou jis lò i ka korijé roun moun. Chak kou to gen roun problèm, profité pou fè to lafwa vin pi fò. Di Jéova sa to gen asou to tchò. Pa rété to rounso, rété pròch di to frè ké to sò-ya (Prov. 18:1). Fè bagaj ki ké idé to tchenbé rèd menm si a ké pléré (Ps. 126:5, 6). Kontinyé fè sa to gen labitid fè : kontinyé alé annan réinyon-yan, préché ké li Labib-a. É toujou sonjé bèl bénédiksyon Jéova ké bay to. Lò to ké wè ki i toujou la pou to, to lafwa ké vin pi fò.

18. Si nou ka konprann ki nou bézwen plis lafwa, kisa nou pouvé fè ?

¹⁸ Si problèm to jwenn anvan, ouben problèm to gen jòdla, montré to bézwen plis lafwa, pa dékourajé. A la pou to fè l’ vin pi fò. Fè kou apot-ya ki doumandé : « Bay nou plis lafwa » (Luc 17:5). Réfléchi osi asou èkzanp frè ké sò-ya nou palé annan sa artik-a. Kou Miguel ké Yurai, sonjé chak kou Jéova soutni to. Kou tifi Véro épi kou Anel, priyè Jéova ké tout to tchò, èspésyalman lò to gen problèm. É kou Geydi, sonjé ki Jéova pouvé sèrvi to fanmi ouben moun annan asanblé-a pou idé to. Si to ka lésé Jéova idé to jòdla, to ké wè li fè bagaj pou to é a konsa to ké ankò plis sir ki i ké idé to dimen.

19. a) Di kisa Jézi té sir ? b) Di kisa nou pouvé sir ?

¹⁹ Jézi pa té pè montré so disip-ya koté yé té bézwen plis lafwa. Mé i té sir ki gras a Jéova, yé té ké rivé tchenbé rèd annan problèm yé té ké jwenn (Jean 14:1 ; 16:33). I té savé ki roun patché moun té ké janbé gran tribilasyon-an gras a roun lafwa ki fò (Rév. 7:9, 14). Ès to ké annan sa granfoul-a ? Wi, gras a Jéova é si dipi aprézan to ka profité di tout okazyon pou fè to lafwa vin pi fò ! (Héb. 10:39).