1-2. Ki bon rézon nou gen pou aji ké lanmou fidèl ?

NOU gen bon rézon pou aji ké lanmou fidèl. Men déztrwa rézon nou ka trouvé annan liv Proverbes-ya : « Pa lésé bonté-a ké fidélité-a lésé to. [...] Atò to ké gen favèr moun-yan é ni yé ni Bondjé ké wè to kou roun moun entélijan. » « Roun wonm ki gen lanmou fidèl ka fè bon bagaj pou so kò. » « Sa-la ki ka kouri dèyè lajistis ké lanmou fidèl-a, ké jwenn lavi » (Prov. 3:3, 4, nòt ; 11:17, nòt ; 21:21).

² Sa proverbes-ya ka bay nou trwa rézon pou nou aji ké lanmou fidèl ké ròt-ya. Prémyèrman, sa kalité-a ka fè nou gen valò pou Bondjé. Dézyèmman, si nou ka aji ké lanmou fidèl, nou ka fè bon bagaj pou nou kò ; parèkzanp, sa ka pèrmèt nou gen bon zanmi. Trwazyèmman, sa ké pèrmèt nou gen bénédiksyon pou dimen, kou lavi pou tout-tan-an. Donk nou gen bon rézon pou swiv sa konsèy Jéova ka bay nou-a : « Aji ké zòt konpanyen ké lanmou fidèl ké mizérikòrd » (Zach. 7:9).

3. Ki késyon nou ké réponn annan sa artik-a ?

³ Annan sa artik-a, nou ké wè répons asou sa kat késyon-yan : Ké kimoun nou divèt aji ké lanmou fidèl ? Kisa liv Ruth ka anprann nou asou lanmou fidèl-a ? Kouman nou pouvé aji ké lanmou fidèl ké ròt-ya ? É ki bénédiksyon sa-ya ki ka aji ké lanmou fidèl ka jwenn ?

4. Kou Jéova, kouman nou pouvé aji ké lanmou fidèl ? (Marc 10:29, 30).

⁴ Artik nou fin wè-a idé nou konprann ki Jéova ka aji ké lanmou fidèl sèlman ké sa-ya ki kontan l’ é ki ka adoré l’ (Dan. 9:4). Nou lé « imité Bondjé, kou timoun i kontan » (Éph. 5:1). Pou nou rivé fè sa, nou divèt gen roun lanmou ki fò pou nou frè ké sò-ya é nou divèt gen sa lanmou-a tout tan (li Marc 10:29, 30).

5-6. Détan, kouman roun ran ka sèrvi mo « fidélité-a » ? Bay roun èkzanp.

⁵ Si nou ka byen konprann a kisa ki lanmou fidèl-a, sa ké pi fasil pou nou aji ké lanmou fidèl ké nou frè ké sò-ya. Moun ka sèrvi mo « fidélité-a », é yé ka konprann li roun fason, mé a pa menm bagaj-a ké « lanmou fidèl-a ». Annou pran roun èkzanp.

⁶ Jòdla, pitèt nou ké di ki roun moun ki ka travay annan roun antrépriz fidèl, paské sa ka fè lontan i ka travay la. Mé pitèt i pa janmen wè so patron ouben sa-ya ki ka travay ké patron-an. É pitèt, a pa tout tan i dakò ké désizyon yé ka pran annan so travay. Nou pa pouvé di i kontan so antrépriz, mé i kontan gen roun travay ki ka pèrmèt li gen soumaké. I ké kontinyé travay pou li jouktan i pran so rétrèt, sof si yé ka propozé li roun pi bon travay rounòt koté.

7-8. a) Kisa ki ka pousé roun moun aji ké lanmou fidèl ? b Poukisa nou ké wè plizyèr vèrsé annan liv Ruth ?

⁷ Ki diférans i gen ant sa anpwayé-a ki fidèl kou moun ka di, ké roun moun ki ka aji ké lanmou fidèl ? A pa menm bagaj-a ki ka pousé yé montré yé kò fidèl ! Annan lépòk Labib-a, kisa ki té ka pousé sèrvitèr Bondjé-ya aji ké lanmou fidèl ? Yé pa té ka fè l’ paské yé té blijé fè l’, mé a yé tchò ki té ka pousé yé fè sa. Annou pran èkzanp David. So tchò fè li aji ké lanmou fidèl ké so zanmi Jonatan, menm si papa Jonatan té lé tchwé l’. É plizyèr lannen apré Jonatan mouri, David kontinyé aji ké lanmou fidèl lò i pran swen di Méfibochèt, pitit Jonatan-an (1 Sam. 20:9, 14, 15 ; 2 Sam. 4:4 ; 8:15 ; 9:1, 6, 7).

⁸ Nou ké anprann plis bagaj ankò asou lanmou fidèl-a lò nou ké gadé plizyèr vèrsé annan liv Ruth *. Kisa èkzanp moun-yan annan istwè-a ka anprann nou ? É kouman nou menm nou pouvé aji ké lanmou fidèl annan nou asanblé ?

9. Poukisa Noémi té krè ki Jéova té aji kont li ?

⁹ Liv Ruth-a ka rakonté nou istwè Noémi, so bèlfi Rit, ké Boaz, roun mouché ki té fanmi ké so mari, é ki té gen lakrent pou Bondjé. Pas i té gen lafamin annan péyi Israyèl-a, Noémi, so mari ké yé dé tibolonm pati pou alé rété Moab. Lò yé té Moab, mari Noémi mouri. Apré sa, so dé tibolonm maryé, mé malérèzman, yé mouri yé menm osi (Ruth 1:3-5 ; 2:1). Sa éprèv-ya ki tonbé roun dèyè ròt, fè Noémi tonbé annan roun gro chagren. I té tèlman dékourajé ki i té krè ki Jéova té kont li. Annou gadé  sa i di pou montré kouman i té ka santi so kò : « Jéova aji kont mo. » « Tou-Pwisan-an randé mo lavi anmè menm. » « Jéova li menm aji kont mo [...] Tou-Pwisan-an fè malò-a tonbé anlè mo » (Ruth 1:13, 20, 21).

10. Kouman Jéova réyaji lò i tandé paròl anmè Noémi di ?

¹⁰ Kouman Jéova réyaji lò i tandé sa paròl anmè-ya annan bouch Noémi ? I pa lésé sa madanm-an ki té fidèl mé ki té dékourajé. Pasé i fè sa, i montré i té ka konprann li. I savé ki « lò roun moun ki gen sajès anba présyon, sa pouvé fè l’ vin fou » (Eccl. 7:7). A pou sa, i idé Noémi konprann ki i té toujou la pou idé l’. Kouman i fè sa ? (1 Sam. 2:8). I fè Rit aji ké Noémi ké lanmou fidèl. Rit té lé montré so bèlmè ki i té kontan li. É i idé li jantiman pa rété dékourajé, épi konprann ki Jéova té kontan l’ toujou. Kisa èkzanp Rit ka anprann nou ?

11. Kisa ki ka pousé roun patché frè ké sò idé sa-ya ki ka soufri ?

¹¹ Lanmou fidèl-a ka pousé nou idé sa-ya ki ka soufri. Menm fason Rit idé Noémi, roun patché frè ké sò ki janti, tou kontan idé sa-ya ki dékourajé ouben ki tris annan yé asanblé. Yé kontan yé frè ké sò-ya, é yé lé fè tousa yé pouvé pou idé yé (Prov. 12:25, nòt ; 24:10). Lò yé ka fè sa, yé ka swiv sa konsèy Pòl bay-a : « Palé roun fason pou konsolé sa-ya ki krazé. Idé sa-ya ki fèb é pran pasyans ké tout moun » (1 Thess. 5:14).

12. Ki pi bon fason nou gen pou idé roun moun ki dékourajé ?

¹² Souvan, pi bon fason pou nou idé roun moun ki dékourajé, a kouté li jantiman, é fè li konprann ki nou kontan l’. Jéova ké kontan wè nou idé so sèrvitèr-ya ki gen valò (Ps. 41:1). Nou ka li annan Proverbes 19:17 : « Moun-an ki ka aji ké bonté ké sa-la ki piti, a Jéova i ka prété, é i ké rékonpansé li pou sa i ka fè. »

13. a) Ki désizyon diféran Rit ké Òrpa pran ? b) Poukisa sa Rit désidé fè ka byen montré a kisa ki lanmou fidèl-a ? (gadé zimaj-a anlè prémyé paj-a).

¹³ Nou ka rivé konprann pi byen a kisa ki lanmou fidèl-a, lò nou ka gadé sa ki rivé Noémi roun tibi tan apré lanmò so mari ké so dé tibolonm. Lò Noémi anprann ki « Jéova té okipé di so pèp, i té bay li manjé », i désidé routounen annan so péyi (Ruth 1:6). So dé bèlfi koumansé alé ké li, mé toupannan yé té asou chimen-an, Noémi ankourajé yé routounen Moab. I fè sa trwa fwa. Kisa ki pasé atò ? « Òrpa bo so bèlmè é i alé, mé Rit rété ké li » (Ruth 1:7-14). Lò i chwazi routounen annan so koté, Òrpa  fè sa Noémi té ka di li fè. Rit li menm, té byen désidé idé Noémi. Li menm osi té pouvé routounen an so koté, mé so lanmou fidèl pou so bèlmè fè l’ désidé pa lagé li (Ruth 1:16, 17). Si Rit kontinyé idé Noémi, a pa paské i té ka blijé l’ fè sa, mé a pas i té lé fè l’. Sa Rit désidé fè sa jou-a, ka byen montré nou a kisa ki lanmou fidèl-a. Kisa sa ka anprann nou ?

14. a) Kouman roun patché frè ké sò ka aji ké lanmou fidèl ? b) Dapré Hébreux 13:16, ki sakrifis Bondjé kontan wè ?

¹⁴ Lanmou fidèl-a ka pousé nou fè plis pou idé ròt-ya. Jòdla kou anvan, roun patché krétyen ka aji ké lanmou fidèl ké yé frè ké sò-ya, menm ké sa-ya yé pa byen konnèt. Parèkzanp, lò yé ka anprann ki gen roun katastròf natirèl ki rivé roun koté, lanmenm yé ka doumandé sa yé pouvé fè. Ouben si i gen roun moun annan asanblé-a ki gen problèm soumaké, yé pa pè propozé li idé li. Kou krétyen Masédwann annan prémyé syèk-a, yé ka fè roun patché sakrifis. Détan, yé jis ka bay plis ki sa yé gen pou idé sa-ya ki bézwen (2 Cor. 8:3). Jéova divèt kontan wè ki yé kontan bay ! (li Hébreux 13:16).

15-16. Kouman Rit montré ki i pa té ka lagé ?

¹⁵ Fason Rit okipé di Noémi pouvé anprann nou roun patché bagaj. Men déztrwa bagaj sa ka anprann nou :

¹⁶ Pa lagé. Lò Rit di li ki i té lé alé Jida ké li, pou koumansé, Noémi réfizé, mé Rit pa lagé konsa. Kisa ki pasé ? « Lò Noémi wè ki Rit té ka ensisté pou vini ké li, i pa éséyé anpéché l’ ankò » (Ruth 1:15-18).

17. Kisa ki ké idé to pa lagé konsa ?

¹⁷ Sa sa ka anprann nou : A pou nou pran pasyans pou idé roun moun ki tris. Donk, annou pa lagé tro vit. Si to ka propozé roun sò ki annan roun problèm idé li, pitèt o koumansman, i pa ké lé asèpté to idé l’ *. Mé lanmou fidèl-a ké pousé to rété pròch ké li (Gal. 6:2). Pa arété krè ki roun jou i ké asèpté lanmen to ka lonjé bay li-a.

18. Kisa Noémi di ki dèt fè Rit lapenn ?

¹⁸ Pa kouri faché. Lò Noémi ké Rit rivé Bètléyèm, Noémi bité ké so vwazin i té gen anvan. I rakonté yé : « Lò mo alé mo té plen, mé Jéova fè mo rouvini mo dé lanmen vid » (Ruth 1:21). Imajiné sa Rit dèt rousanti lò i tandé Noémi di sa ! Rit té fè tousa i té pouvé pou idé Noémi, i té pléré ansanm ké li, i té konsolé l’ é a pa dé jou i té maché ké li, é magré sa, Noémi di : « Jéova fè mo rouvini mo dé lanmen vid. » I pa menm palé di sa Rit ki té dibout òbò li-a té fè pou idé l’. Sa dèt fè Rit lapenn bokou ! Pourtan, i pa lagé Noémi.

19. Kisa ki ké idé nou pa lésé roun moun ki pa lé nou idé l’ débrouyé so kò li rounso ?

¹⁹ Sa sa ka anprann nou : Roun sò ki annan roun problèm ki ka fè l’ soufri, pouvé o koumansman di dé bagaj ki ka fè to lapenn, menm si to ka fè tousa to pouvé pou idé l’. Mé pa faché pou sa. Pa lésé li débrouyé so kò tousèl, é doumandé Jéova idé to trapé roun mwayen pou konsolé l’ (Prov. 17:17).

20. Kisa ki bay Rit fòrs pou i kontinyé fè sa ki byen ?

 ²⁰ Lò to ka wè roun moun bézwen yé ankourajé l’, ankourajé l’. Rit té aji ké lanmou fidèl ké Noémi, mé aprézan, a li ki té bézwen yé ankourajé l’. Alòr Jéova pousé Boaz ankourajé l’. Men sa Boaz di Rit : « A pou Jéova béni to pou sa to fè. A pou Jéova Bondjé Israyèl-a bay to roun gro rékonpans paské to vini séré anba so zèl. » Sa bèl paròl-ya dèt konsolé Rit bokou. I réponn li : « To konsolé mo é to palé ké mo, mo ki sa to sèrvant, roun fason pou rasiré mo » (Ruth 2:12, 13). Bèl ti paròl Boaz di li o bon moman bay li fòrs pou i kontinyé fè sa ki byen.

21. Kou nou ka wè l’ annan Isaïe 32:1, 2, kisa ansyen-yan ka chaché fè ?

²¹ Sa sa ka anprann nou : Détan, sa-ya ki ka aji ké lanmou fidèl ké ròt-ya bézwen ankourajman yé menm osi. Menm fason Boaz fè Rit savé ki tout bon bagaj i té ka fè pa té pou bon tchò, ansyen-yan ka fè sa yé pouvé pou byen gadé kimoun ki ka idé ròt-ya é yé ka di yé mèrsi pou sa yé ka fè. Lò yé ka tandé sa ankourajman-yan ki ka vini di yé tchò, frè ké sò-ya ka trapé fòrs yé bézwen pou kontinyé fè sa ki byen (li Isaïe 32:1, 2).

22-23. Ki chanjman nou ka wè annan fason Noémi té ka wè bagaj-ya é poukisa ? (Psaume 136:23, 26).

²² Roun ti moso tan apré, Boaz fè sa ki fo pou Rit té pouvé vini ranmasé roun patché manjé pou li ké so bèlmè (Ruth 2:14-18). Kouman Noémi réyaji lò Boaz fè sa bon bagaj-a bay yé ? I di : « A pou Jéova béni li, li ki pa arété aji ké lanmou  fidèl ké sa-ya ki vivan ké sa-ya ki mouri ! » (Ruth 2:20a). Santiman Noémi té gen té chanjé ! Pi bònò, i té di ké bokou chagren : « Jéova [...] aji kont mo. » É aprézan i té ka rélé ké tchò kontan : « Jéova [...] pa arété aji ké lanmou fidèl. » Kisa ki fè l’ chanjé fason i té ka wè bagaj-ya ?

²³ Noémi té rivé konprann ki Jéova té ka fè bokou bagaj annan so lavi. I té sèrvi Rit pou idé l’ pannan i té ka routounen annan so péyi (Ruth 1:16). É i té wè lanmen Jéova lò Boaz, roun di sa ki té pou « viré achté yé * », bay yé ké tchò kontan sa yé té bézwen pou viv (Ruth 2:19, 20b). I dèt di annan so tchò : « Aprézan mo ka konprann ki Jéova pa jen lagé mo. Dipi koumansman-an i té la pou mo ! » (li Psaume 136:23, 26). A pa ti rékonésans Noémi té dèt gen pou Rit ké Boaz paské yé pa janmen sonjé arété idé l’ ! Nou pouvé imajiné kouman yé toulétrwa té kontan.

24. Poukisa nou lé kontinyé aji ké lanmou fidèl ké nou frè ké sò-ya ?

²⁴ Kisa liv Ruth-a anprann nou asou lanmou fidèl-a ? Lanmou fidèl-a ka pousé nou kontinyé idé nou frè ké sò-ya ki annan roun sitiasyon ki rèd. I ka pousé nou osi fè sakrifis pou idé yé. Ansyen-yan divèt byen gadé kimoun ki ka aji ké lanmou fidèl ké ròt-ya é ankourajé yé. Lò nou ka wè ki roun moun nou ka idé ka viré gen fòrs pou adoré Jéova, nou tchò kontan toubonnman (Actes 20:35). Mé poukisa nou ka kontinyé aji ké lanmou fidèl ? A pas nou lé imité Jéova ki « plen ké lanmou fidèl » é fè so tchò kontan (Ex. 34:6 ; Ps. 33:22).