1. Kisa Jéova lé ?

JÉOVA kontan lanmou fidèl-a (Osée 6:6). É i ka ankourajé nou bay sa kalité-a menm valò li menm ka bay li. Kou profèt Miché di l’, ‘i vréman lé ki nou kontan lanmou fidèl-a’ (Mich. 6:8, nòt). Mé, pou nou pouvé kontan sa kalité-a, a pou nou savé a kisa ki lanmou fidèl-a.

2. A kisa ki lanmou fidèl-a ?

² A kisa ki lanmou fidèl-a ? Nou ka trouvé « lanmou fidèl » pasé 200 fwa annan La Bible. Traduction du monde nouveau-a. Lò roun moun gen lanmou fidèl pou rounòt moun, i tèlman kontan sa moun-an, ki i ka kontinyé kontan l’, é ki i ka kontinyé rété òbò li. Pi gran èkzanp lanmou fidèl i pouvé gen, a Jéova. Annan sa artik-a, nou ké wè kouman i ka montré sa kalité-a pou tout moun. É annan artik ki ka vin dèyè-a, nou ké wè ki, nou ki sa so sèrvitèr, nou pouvé imité l’ lò nou ka montré lanmou fidèl pou nou konpanyen.

3. Kisa Jéova fè Moyiz konnèt ?

³ Roun tibi tan apré Israyélit-ya soti Éjip, Jéova fè Moyiz konnèt so non ké so bèl kalité. I di : « Jéova, Jéova, Bondjé ki plen ké pityé ké tandrès, i pa ka kouri faché, i plen ké lanmou fidèl é i toujou ka di lavérité ; i ka montré so lanmou fidèl pou roun patché moun é i ka pardonnen fot-a ké péché-a » (Ex. 34:6, 7). Lò i di sa, Jéova fè Moyiz konnèt roun bagaj èspésyal asou so lanmou fidèl. Ki bagaj ?

4-5. a) Kouman Jéova ka palé di li menm ? b) Ki késyon nou ké réponn ?

 ⁴ Jéova pa di sèlman ki i té sa roun Bondjé ki gen lanmou fidèl. I di ki i té « plen ké lanmou fidèl ». Nou ka trouvé sa lidé-a plizyèr fwa annan Labib-a (Nomb. 14:18 ; Néh. 9:17 ; Ps. 103:8 ; 145:8 ; Joël 2:13 ; Jon. 4:2). Chak kou, a pou palé di Jéova, a pa jen pou palé di moun. Jéova ka sèrvi sa kalité-a pou palé di li menm annan so Paròl. Ès a pa roun bèl bagaj ? Donk nou pouvé wè ki sa kalité-a vréman enpòrtan pou li *. A pou sa, rwa David di : « O Jéova, to lanmou fidèl ka alé jik annan syèl-a [...]. Bondjé o, to lanmou fidèl gen bokou valò ! Pitit wonm-yan ka vin séré anba lonbraj to zèl » (Ps. 36:5, 7). Kou David, ès nou ka bay sa lanmou fidèl Bondjé gen-an bokou valò ?

⁵ Pou nou rivé konprann pi byen a kisa ki lanmou fidèl-a, nou ké réponn sa dé ròt késyon-yan : Pou kimoun Jéova ka montré so lanmou fidèl ? É ki bénédiksyon nou ka trapé pas Jéova ka aji ké lanmou fidèl ?

6. Ké kimoun Jéova ka aji ké lanmou fidèl ?

⁶ Pou kimoun Jéova ka montré so lanmou fidèl ? Labib-a ka di ki nou pouvé kontan roun patché bagaj, kou « diven ké dilwil », « disiplin-an », « konésans-a » ouben « sajès-a » (Prov. 12:1 ; 21:17 ; 29:3). Parkont, nou ka aji ké lanmou fidèl ké roun moun, nou pa jen ka fè l’ ké roun bagaj. Mé, Jéova pa ka aji ké lanmou fidèl ké tout moun. I ka aji ké lanmou fidèl ké sa-ya ki gen roun lanmityé ki fò ké li. Nou Bondjé fidèl ké so zanmi. I gen roun bèl projè pou yé é i pa ké janmen arété kontan yé.

7. Kouman Jéova ka montré so lanmou pou tout moun ?

⁷ Jéova ka montré so lanmou pou tout moun. Men sa Jézi di Nikodèm : « Bondjé té tèlman kontan monn-an [sa lé di moun-yan] ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:1, 16 ; Mat. 5:44, 45).

8-9. a) Poukisa Jéova ka aji ké lanmou fidèl ké so sèrvitèr ? b) Kisa nou ké wè aprézan ?

⁸ Kou nou wè l’, Jéova ka montré so lanmou fidèl sèlman pou sa-ya ki gen  roun lanmityé ki fò ké li, sa lé di so sèrvitèr-ya. Nou ka byen wè sa annan sa rwa David ké profèt Danyèl di. Parèkzanp, men sa David doumandé Bondjé : « Kontinyé aji ké lanmou fidèl ké sa-ya ki konnèt to. » É i di osi : « Lanmou fidèl Jéova gen pou sa-ya ki gen lakrent pou li, ka rété pou tout-tan. » É men sa Danyèl di Jéova : « O Jéova vré Bondjé-a, Bondjé [...] ki ka aji ké lanmou fidèl ké tout sa ki kontan l’ é ki ka obéyi so koumannman » (Ps. 36:10 ; 103:17 ; Dan. 9:4). Sa paròl Jéova fè yé ékri-ya ka byen montré ki i ka aji ké lanmou fidèl ké so sèrvitèr paské yé konnèt li, yé gen lakrent pou li, yé kontan l’ é yé ka obéyi so koumannman. Wi, i ka gardé so lanmou fidèl pou so sèrvitèr, pou sa-ya ki ka adoré l’ kou i lé.

⁹ Anvan nou koumansé adoré Jéova, i té ja ka montré nou so lanmou, kou i ka fè l’ ké tout moun (Ps. 104:14). Mé aprézan nou ka adoré l’, i ka aji ké nou osi ké lanmou fidèl. Men promès i ka fè nou-a : « Yé pa ké tiré mo lanmou fidèl anlè to » (Is. 54:10). Kou David wè l’, ‘Jéova ka fè roun bagaj èspésyal pou sa-la ki fidèl’ (Ps. 4:3). Kisa sa divèt bay nou anvi fè ? Moun-an ki ékri Psaume 107:43 ka bay répons-a : « Moun-an ki gen sajès ké byen gadé sa bagaj-ya é i ké réfléchi asou sa Jéova ka fè ki ka montré ki i gen lanmou fidèl ». Toupannan nou ka tchenbé sa konsèy-a, nou ké wè trwa bénédiksyon sèrvitèr Jéova-ya ka jwenn paské i ka aji ké lanmou fidèl.

10. Dapré Psaume 31:7, kisa sa ka fè nou lò nou savé ki lanmou fidèl Jéova-a ka rété pou tout-tan ?

¹⁰ Lanmou fidèl Jéova-a pa jen ka disparèt. Nou ka jwenn sa lidé-a 26 fwa annan Psaume 136-a. Men sa nou ka li annan prémyé vèrsé-a : « Di Jéova mèrsi, paské i bon — paské so lanmou fidèl ka rété pou tout-tan » (Ps. 136:1). Épi nou ka jwenn réfren-an « paské so lanmou fidèl ka rété pou tout-tan » annan tout ròt vèrsé-ya. Lò nou ka li sa psaume-an,  nou ka rété èstébékwé lò nou ka wè tousa Jéova ka fè toulong pou montré so lanmou fidèl. Réfren-an ki ka di « paské so lanmou fidèl ka rété pou tout-tan » ka pèrmèt nou sir ki lanmou Bondjé gen pou so sèrvitèr-ya pa ka chanjé. Sa ka rasiré nou lò nou savé ki Jéova pa ka lagé so sèrvitèr-ya konsa ! I ka rété maré ké sa-ya ki ka adoré l’ é anyen pa ké fè l’ arété soutni yé, èspésyalman lò yé anba traka. Sa sa ka anprann nou : Kou nou savé ki Jéova pa ké lagé nou, sa ka bay nou lajwa é sa ka bay nou fòrs. A konsa nou pouvé tchenbé lò nou anba traka é nou pouvé kontinyé adoré l’ (li Psaume 31:7).

11. Dapré Psaume 86:5, poukisa Jéova ka pardonnen ?

¹¹ Lanmou fidèl Jéova gen ka fè li pardonnen nou. Lò i ka wè roun moun ki péché ki ka répanti é ki ka chanjé so konpòrtman, so lanmou fidèl ka fè li aji ké mizérikòrd ké sa moun-an. Men sa David di asou Jéova : « I pa ka aji ké nou dapré nou péché é i pa ka randé nou dapré sa nou ka mérité pou fot nou ka fè » (Ps. 103:8-11). Kou i té wè l’ ké so pròp wéy, David té savé ki, lò nou konsyans ka bat nou, a roun bagaj ki lou pou poté. Mé i té anprann osi ki Jéova té « paré pou pardonnen ». Kisa ki ka bay Jéova anvi montré so mizérikòrd ? Nou ka jwenn répons-a annan Psaume 86:5 (li). Kou David di l’ annan so lapriyè, Jéova ka pardonnen ké tout so tchò paské i plen ké lanmou fidèl pou tout sa ki ka aplé li.

12-13. Si nou ka santi nou kò koupab ké tris akoz di péché nou fè anvan, kisa ki pouvé idé nou ?

¹² Lò nou ka péché, é ki akoz di sa nou pa byen, sa nòrmal é a roun bon bagaj. Paské sa pouvé fè nou répanti épi chanjé sa nou gen pou chanjé annan nou lavi. Malérèzman, roun ran sèrvitèr Jéova krazé anba lapenn yé gen akoz di péché yé fè anvan. Yé tchò ka kondanen yé é ka fè yé konprann ki Jéova pa ké janmen pardonnen yé, menm si yé ja répanti vré. Si a sa to ka rousanti, lò to savé ki Jéova lé montré so sèrvitèr-ya so lanmou fidèl, sa pouvé idé to.

 ¹³ Sa sa ka anprann nou : Menm si nou pa parfè, nou pouvé adoré Jéova ké tchò kontan ké roun konsyans ki pròp. Paské, « disan Jézi so Pitit ka pirifyé nou di tout péché » (1 Jean 1:7). Lò to dékourajé akoz di roun bagaj to ka fè ki pa bon, a pou to sonjé ki Jéova paré pou pardonnen péchèr-ya ki ka répanti. Annou gadé ki lyen David ka fè ant lanmou fidèl-a ké pardon-an. Men sa i ékri : « Menm fason syèl-a pi rot ki latè-a, menm fason-an so lanmou fidèl pou sa-ya ki gen lakrent pou li gran. Menm fason koté solèy-a ka lévé lwen di koté i ka kouché-a, menm fason-an i ka mété nou péché lwen di nou » (Ps. 103:11, 12). Wi, Jéova paré pou ‘pardonnen nou ké tout so tchò’ ! (Is. 55:7).

14. Kisa David di asou fason lanmou fidèl Jéova-a ka protéjé nou ?

¹⁴ Lanmou fidèl Jéova-a ka protéjé nou lanmityé ké li. Annan roun lapriyè, men sa David di Jéova : « To sa roun koté mo pouvé alé séré ; to ké protéjé mo lò bagaj-ya ké rèd pou mo. To ké fè mo rété an mitan moun ki ka rélé afòrs yé kontan akoz di délivrans to ka bay-a. [...] Sa-la ki ka fè Jéova konfyans, i ka antouré l’ ké so lanmou fidèl » (Ps. 32:7, 10). Annan lépòk Labib-a, vil-ya té gen miray a yé lantou ki té ka protéjé moun-yan ki té annan sa vil-ya. Menm fason-an, lanmou fidèl Jéova-a kou roun mir ki ka protéjé nou di tout bagaj ki pouvé gaté nou lanmityé ké li. Anplis di sa, lanmou fidèl Jéova-a ka pousé li fè nou vini òbò li (Jér. 31:3).

15. Poukisa nou pouvé di ki lanmou fidèl Jéova-a kou roun réfij ké roun koté nou ka jwenn sékirité ?

¹⁵ David pran rounòt èkzanp pou montré kouman Bondjé ka protéjé so sèrvitèr. Men sa i ékri : « Bondjé sa mo réfij koté mo an sékirité, Bondjé-a ki ka aji ké mo ké lanmou fidèl. » Men sa i di osi asou Jéova : « A li ki sa mo lanmou fidèl ké koté mo ka jwenn sékirité, sa-la koté mo ka alé séré ké sa-la ki ka libéré mo, mo boukliyé ké sa-la koté mo ka alé protéjé mo kò » (Ps. 59:17 ; 144:2). Poukisa David di ki lanmou fidèl Jéova-a kou roun réfij ké roun koté i ka jwenn sékirité ? Dipi nou ka adoré Jéova, nenpòrt ki koté nou ka rété, i ké toujou bay nou sa nou bézwen pou protéjé nou lanmityé ké li. A sa Psaume 91 ka di nou. Pitèt a Moyiz ki ékri l’, men sa i di : « Mo lé di Jéova : “To sa mo réfij ké koté mo ka jwenn sékirité” » (Ps. 91:1-3, 9, 14). Donk Moyiz di ki Jéova kou roun réfij (Ps. 90:1, nòt). Anplis di sa, lò i té pròch mouri, i di roun bagaj ki ka rasiré nou. Lò i fin ékri : « Dipi tan-lontan Bondjé sa roun koté pou alé séré », i di dèyè sa : « I ka soutni to ké so bra pou tout-tan » (Deut. 33:27). « I ka soutni to ké so bra pou tout-tan » : kisa sa lidé-a ka anprann nou asou Jéova ?

16. Kouman Jéova ka idé nou ? (Psaume 136:23).

¹⁶ Kou Jéova sa nou réfij, nou ka santi nou kò an sékirité. Mé détan, pitèt nou pouvé dékourajé é pitèt sa rèd pou nou viré gen kouraj. Lò sa ka rivé nou, kisa Jéova ka fè pou nou ? (li Psaume 136:23). I ka tchenbé nou ké so bra é i ka idé nou lévé toudousman (Ps. 28:9 ; 94:18). Sa sa ka anprann nou : Sa ka ankourajé nou lò nou savé ki nou toujou pouvé konté asou Jéova. Nou ka wè li fè dé bagaj pou idé nou : Prémyèrman, kèlkéswa koté nou fika, i ka bay nou roun koté pou nou séré. Dézyèmman,  nou Papa ki annan syèl-a ka pran swen di nou ké lanmou.

17. Dapré Psaume 33:18-22, di kisa nou pouvé sir ?

¹⁷ Kou nou wè l’, nou pouvé sir ki, si nou annan roun éprèv, Jéova ké fè roun bagaj pou nou. I ké bay nou sa nou bézwen pou nou rété fidèl (2 Cor. 4:7-9). Men sa profèt Jérémi wè : « A gras a lanmou fidèl Jéova-a nou pa disparèt, paské sa i ka fè pou montré so mizérikòrd pa ka jen fini » (Lam. 3:22). Nou pouvé sir ki lanmou fidèl Jéova-a ké toujou anlè nou paské, kou Labib-a ka di l’, « wéy Jéova-a ka protéjé sa-ya ki ka krenn li, sa-ya ki ka konté asou so lanmou fidèl » (li Psaume 33:18-22).

18-19. a) Kisa nou lé sonjé ? b) Kisa nou ké wè annan artik ki ka vin dèyè-a ?

¹⁸ Kisa nou lé sonjé ? Anvan nou koumansé adoré Jéova, i té ja ka montré nou so lanmou, kou i ka fè l’ ké tout moun. Mé aprézan nou ka adoré l’, i ka montré nou osi so lanmou fidèl. A sa lanmou-a ki ka fè Jéova kroké nou pou protéjé nou. I ké toujou tchenbé nou òbò li, é i ké fè tout promès i fè nou-a fèt. I lé nou tchò kontan ! (Ps. 46:1, 2, 7). A pou sa, kèlkéswa éprèv nou gen-an, i ké bay nou fòrs pou rété fidèl.

¹⁹ Nou wè déztrwa bagaj Jéova ka fè pou montré so sèrvitèr-ya so lanmou fidèl. Mé, i lé nou menm osi montré nou konpanyen sa kalité-a. Kisa nou divèt fè ? Annan artik ki ka vin dèyè-a, nou ké palé di sa bagaj enpòrtan-an.