CHAK lannen, roun patché brébi ka rouvini annan asanblé krétyen-an. Imajiné kouman i gen lajwa « annan syèl-a » lò yé chak ka rouvini ! (Luc 15:7, 10). Si yé viré asèpté to annan asanblé-a, to pouvé sir ki Jézi, zanj-ya ké Jéova li menm kontan wè to fè parti di asanblé-a ankò. Mé toupannan to ka ranjé to rélasyon ké Jéova, to pouvé jwenn déztrwa problèm. Ki kalité problèm ? É kisa ki pouvé idé to ?

Roun patché frè ké sò ka kontinyé santi yé kò dékourajé menm si yé rouvini annan asanblé-a. Pitèt to ka konprann sa David li menm rousanti, menm apré Jéova pardonnen l’ pou so péché. I di : « Fot mo fè-ya tèlman bokou ki yé ka krazé mo » (Ps. 40:12 ; 65:3). Apré roun moun rouvini òbò Jéova i pouvé santi so kò koupab pannan lontan. Isabelle *, roun sò ki rété èskominyé pannan pasé 20 lannen, ka di : « Sa té rèd pou mo té asèpté ki Jéova té pouvé pardonnen mo. » Si to ka dékourajé, to lanmityé ké Jéova pouvé roudivini fèb ankò (Prov. 24:10). Fè tousa to pouvé pou sa pa rivé to.

Épi osi, i gen sa ki enkyèt paské yé ka pansé ki yé pa ké pouvé fè tousa yé divèt pou roudivini zanmi ké Jéova. Apré yé viré asèpté l’ annan asanblé-a, Antoine di : « Mo santi ki mo té bliyé tousa mo té abitchwé fè lò mo té Témwen Jéova anvan. » Sa kalité lidé-a pouvé anpéché roun moun fè tousa i pouvé pou Jéova.

Annou pran roun èkzanp : I gen roun moun ki gen roun kaz, é i kontan sa kaz-a. Mé roun jou, roun tanpèt ka krazé so kaz. A pa ti dékourajé i dékourajé lò i ka wè kantité  bagaj i ké divèt ranjé, épi tan sa ké pran li pou fè tousa. Menm fason-an, si to gaté to lanmityé ké Jéova paské to fè roun péché ki grav, pitèt to ka santi ki sa ké doumandé to fè bokou éfòr pou to ranjé to lanmityé ké li. Mé to pa tousèl.

Men sa Jéova ka di to fè : « Vini é annou ranjé tout bagaj ansanm » (Is. 1:18). To ja travay rèd pou « ranjé tout bagaj ». É Jéova kontan to paské to fè sa éfòr-a. Anplis di sa, kou to routounen òbò li, i pouvé sèrvi to èkzanp pou byen montré ki Satan sa roun mantò ! (Prov. 27:11).

Lò to rouvini òbò Jéova, to vin pi pròch ké li, é i ka promèt to vin pi pròch ké to osi (Jacq. 4:8). Anplis di sa, pou ròt-ya, to ka viré fè parti di asanblé-a é sa byen. Mé to bézwen fè rounòt bagaj ankò ! To bézwen fè to lanmou pou Jéova ki sa to Papa ké to Zanmi vin pi fò. Kouman to pouvé fè sa ?

Désidé fè bagaj to ké rivé fè. To dèt ka sonjé toujou bagaj enpòrtan to anprann asou Jéova, ké promès paradi i fè-a. Mé aprézan to bézwen roukoumansé gen bon labitid èspirityèl, kou préché, vini annan réinyon-yan ké pasé tan ké frè ké sò-ya. Gadé déztrwa bagaj to pouvé désidé fè.

Palé ké Jéova souvan. To Papa ka konprann ki, si to ka kontinyé santi to kò koupab, sa pouvé difisil pou to priyè l’ (Rom. 8:26). Mé a pou to kontinyé priyè é di Jéova kouman sa enpòrtan pou to di rété so zanmi (Rom. 12:12). Andrej ka sonjé : « Mo té ronté é mo té ka santi mo kò koupab tèlman, mé chak kou apré mo té fin priyè, sa santiman-yan té ka pati roun ti moso. Mo té ka santi mo kò pi byen. » Si to pa savé kisa pou to di annan to lapriyè, to pouvé gadé lapriyè David fè lò i té fin répanti annan Psaumes 51 ké 65.

Étidyé Labib-a souvan. Sa ké idé to gen roun lafwa ki fò é sa ké idé to kontan Jéova ankò plis (Ps. 19:7-11). Felipe ka di : « A paské mo pa té gen roun program pou li ké étidyé Labib-a ki mo vin fèb é ki mo fè Jéova lapenn. Mo pa té lé fè Jéova lapenn roun dézyèm kou. Donk mo fè tousa ki fo pou mo té sir ki mo té ké étidyé Labib-a souvan. » To pouvé fè menm bagaj-a. Si to bézwen roun moun idé to pou chwazi roun bagaj pou étidyé, to pouvé alé wè roun zanmi ki gen roun lanmityé ké Jéova ki fò pou i pouvé idé to.

Ranjé to lanmityé ké to frè ké sò-ya. Lò yé ka rouvini annan asanblé-a, roun ran pè ròt-ya rété faché ké yé. Men sa Larissa ka di : « Mo té ronté ! Mo té ka santi ki mo té trayi asanblé-a. É mo kontinyé krè sa pannan lontan. » To pouvé sir ki ansyen-yan ké ròt frè ké sò ki gen èspéryans pouvé idé to ranjé to lanmityé ké Jéova (gadé karé-a «  Sa ansyen-yan pouvé fè »). Yé kontan wè ki to rouvini annan asanblé-a é yé lé to tchò kontan ! (Prov. 17:17).

Kisa ki pouvé idé to vin pi pròch ké asanblé-a ? Kontinyé alé annan tout réinyon-yan ké to frè ké sò-ya, épi préché ké yé souvan. Kouman sa ké idé to ? Men sa Félix ka di : « Frè ké sò-ya annan mo asanblé té ka antann mo rouvin òbò Jéova. Mo santi mo té gen valò ! Yé tout fè mo santi ki mo té ka fè parti di yé fanmi ankò é ki Jéova té pardonnen mo. É yé idé mo avansé. » (Gadé karé-a «  Kisa to pouvé fè ? ».)

Pi to ké fè sa ki fo pou ranjé to lanmityé ké Jéova, pi Satan ké voyé problèm asou to pou éséyé fè to arété (Luc 4:13). A pou sa, to divèt fè to lanmityé ké Jéova vin pi fò dipi aprézan pou to paré pou Satan.

Men sa Jéova ka promèt so brébi-ya : « Mo ké alé chaché mouton-an ki pédi, é mo ké viré ké sa-la ki pa savé koté pou i alé, é mo ké pansé sa-la ki blésé, é mo ké bay sa-la ki fèb, fòrs » (Ézéch. 34:16). Jéova ja idé patché ròt frè ké sò ranjé yé lanmityé ké li. To pouvé sir ki i lé idé to kontinyé konstrwi ké fè to lanmityé ké li rété fò.