1. Ki èspwar Jéova bay nou ?

 JÉOVA bay nou roun èspwar ki bèl toubonnman : viv pou tout-tan. Roun ran annan nou ké viv pou tout-tan annan syèl-a, é yé ké divini dé lèspri ki pa ké janmen mouri (1 Cor. 15:50, 53). Mé près nou tout nou ké viv pou tout-tan asou latè-a, nou ké kontan, é nou ké gen roun lasanté parfè (Rév. 21:3, 4). Ki nou gen èspwar viv pou tout-tan annan syèl-a ouben asou latè-a, sa èspwar-a gen bokou valò pou nou.

2. Asou kisa nou èspwar ka tchenbé, é poukisa nou pouvé di sa ?

² Annan Labib-a, lò yé ka di « èspwar », détan a pou palé di roun bon bagaj nou ka antann. Nou pouvé sir ki sa nou ka antann ké fèt, paské a Jéova ki ka bay nou sa èspwar-a (Rom. 15:13). Nou savé ki promès i fè nou é nou savé ki i toujou ka fè sa i ka di (Nomb. 23:19). Nou sir ki i lé é ki i pouvé fè tousa i ka promèt fè. Donk nou èspwar, a pa roun bagaj nou ka imajiné annan nou tèt ouben roun bagaj nou vréman lé gen. Nou èspwar ka tchenbé asou prèv é asou bagaj ki vré.

3. Kisa nou ké wè annan sa artik-a ? (Psaume 27:14).

³ Nou Papa ki annan syèl-a kontan nou é i lé nou fè li konfyans (li Psaume 27:14). Si nou ka vréman fè Jéova konfyans, nou ké pouvé tchenbé anba éprèv nou ka jwenn, é kèlkéswa sa ki rivé nou dimen, nou ké pouvé kontinyé gen kouraj ké lajwa. Annou wè kouman nou èspwar  ka protéjé nou. Pou koumansé, nou ké wè poukisa nou pouvé di ki nou èspwar kou roun lank é kou roun kas asou nou tèt. É apré sa, nou ké wè diféran bagaj nou pouvé fè pou nou fè l’ vin pi fò.

4. Poukisa nou pouvé di ki nou èspwar kou roun lank ? (Hébreux 6:19).

⁴ Annan lèt i ékri pou Ébré-ya, apot Pòl di ki nou èspwar kou roun lank (li Hébreux 6:19). Kou i té ka pran bato souvan pou vwayajé, i té savé ki roun lank ka anpéché roun bato pati a lanmè. Pannan roun di so vwayaj, i té gen roun gro tanpèt, é i wè matlo-ya jité lank-a pou anpéché l’ krazé asou ròch-ya (Actes 27:29, 39-41). Menm fason roun lank ka pèrmèt roun bato rété stab, nou èspwar ka pèrmèt nou rété stab é ka anpéché nou pati lwen di Jéova lò nou annan bon problèm. Si nou èspwar fò, nou ké pouvé tchenbé douvan nenpòrt ki tanpèt annan nou lavi, paské nou ké sir ki titalò tout bagaj ké rouvin kalm. Annou pa bliyé ki Jézi avèrti nou ki yé té ké pèrsékité nou (Jean 15:20). Si nou ka réfléchi asou rékonpans Jéova ka promèt nou-a, sa ké pèrmèt nou kontinyé kouri nou lakours krétyen-an.

5. Kouman èspwar Jézi té gen-an idé l’ douvan lanmò ?

⁵ Sonjé Jézi : èspwar i té gen-an pèrmèt li rété fò menm si i té savé ki i té ké soufri épi mouri. Jou Lapannkot 33 di nou lépòk, apot Pyèr roupran roun profési ki annan liv Psaumes, é ki ka byen montré kouman Jézi pa té enkyèt é kouman i té kalm : « Mo ké toujou gen èspwar ; paské to pa ké lagé mo annan Tonm-an é to pa ké lésé to fidèl pouri. […] To ké fè mo gen bokou lajwa òbò to » (Actes 2:25-28 ; Ps. 16:8-11). Jézi té savé ki i té ké mouri, mé i té sir ki Jéova té ké résisité l’ é ki so tchò té ké kontan pas i té ké rouwè so Papa annan syèl-a (Héb. 12:2, 3).

6. Kisa roun frè di asou nou èspwar ?

⁶ Nou èspwar krétyen-an idé roun patché frè ké sò tchenbé. Annou pran èkzanp Leonard Chinn, roun frè fidèl ki té ka rété an Anglétèr. Pannan Prémyé Lagèr mondyal-a, yé mété l’ lajòl paské i pa té lé fè larmé. Yé mété l’ li rounso annan roun ti karé lajòl pannan dé mwa. Apré sa, yé kondané l’ pou fè travaux forcés. Pita, men sa i ékri : « Sa mo viv fè mo konprann kouman nou bézwen nou èspwar pou nou tchenbé. Nou gen èkzanp Jézi, apot-ya ké profèt-ya, mé nou gen osi roun patché bèl promès annan Labib-a. Tout sa bagaj-ya ka fè nou èspwar vin pi fò é ka bay nou fòrs pou nou tchenbé. » Pou Leonard, èspwar krétyen-an, a té roun lank é i pouvé sa roun lank pou nou osi.

7. Poukisa nou èspwar ka vin pi fò lò nou ka jwenn éprèv ? (Romains 5:3-5 ; Jacques 1:12).

⁷ Nou èspwar ka vin pi fò lò nou ka tchenbé annan éprèv-ya paské nou ka wè lanmen Jéova annan nou lavi, é nou ka wè ki i kontan nou (li Romains 5:3-5 ; Jacques 1:12). Donk, jòdla, sa èspwar-a pi fò ki lò nou asèpté bon nouvèl-a. Satan lé nou lésé éprèv nou ka jwenn néyé nou, mé ké Jéova, nou pouvé tchenbé rèd annan tout éprèv-ya.

8. Poukisa nou pouvé di ki nou èspwar kou roun kas ? (1 Thessaloniciens 5:8).

⁸ Labib-a ka di osi ki nou èspwar kou roun kas (li 1 Thessaloniciens 5:8). Roun sòlda ka mété roun kas pou protéjé so tèt si so lèlmi ka bay li kou. Menm fason-an, nou ki annan roun lagèr  èspirityèl, nou divèt protéjé nou lèspri kont tousa Satan ka fè pou ataké nou. I ka mété roun patché tantasyon douvan nou, ké patché lidé pou défòrmé fason nou ka réfléchi. Menm fason roun kas ka protéjé tèt roun sòlda, nou èspwar ka protéjé nou pansé, é ka pèrmèt nou rété fidèl douvan Jéova.

9. Ki kalité lavi roun patché moun ki pa gen pyès èspwar ka mennen ?

⁹ Kou nou gen èspwar viv pou tout-tan, sa ka pousé nou aji ké sajès é sa ka idé nou fè diférans ant sa ki bon ké sa ki mové. Parkont, si sa èspwar-a pa tèlman vré pou nou, é si nou ka lésé tout anvi nou gen koumandé nou, pitèt nou ké bliyé sa èspwar-a nèt. A sa ki rivé roun ran krétyen ki té ka rété Korent. Yé té arété krè annan roun promès enpòrtan Bondjé té fè yé : yé pa té gen lafwa annan rézirèksyon-an ankò (1 Cor. 15:12). Pòl fè yé wè ki sa-ya ki pa gen pyès èspwar ka roulé ron paské yé ka di ki anba latè pa gen plézi (1 Cor. 15:32). Jòdla, roun patché moun ki pa gen lafwa annan promès Bondjé ka fè nou, ka kouri dèyè anmizman. Mé nou menm, nou pa ka bliyé tout bèl bagaj Bondjé ka promèt nou pou dimen. Nou èspwar kou roun kas, i ka protéjé nou pansé é i ka anpéché nou gadé yenki pou nou douvan lèstomak, konsa nou pa ké gaté nou rélasyon ké Jéova (1 Cor. 15:33, 34).

10. Kouman èspwar nou gen-an ka protéjé nou kont lidé ki pa vré ?

¹⁰ Nou èspwar ka anpéché nou krè osi ki éséyé fè Jéova plézi pa ka sèrvi anyen. Pitèt roun ran pouvé di annan yé tchò : « Jéova pa ké janmen bay mo lavi pou tout-tan. Mo pa mérité l’. Mo pa ké janmen rivé fè sa i ka doumandé mo fè. » Sonjé ki Élifaz (a té roun annan sa-ya ki té vin konsolé Jòb swadizan) di li sa menm kalité bagaj-a. I di li : « Kouman moun-an ki ka mouri-a pouvé sen ? » É i di osi : « Gadé ! Bondjé pa ka fè so sen-yan konfyans, é menm syèl-a pa pròp pou li » (Job 15:14, 15). A yenki manti ! A Satan ki lé to réfléchi konsa ! I savé ki si to ka koumansé réfléchi asou sa kalité bagaj-ya, to pa ké gen pyès èspwar ankò. Donk, pa kouté sa kalité manti-ya é mété to lidé asou promès Jéova ka fè to. I lé to viv pou tout-tan é i ké idé to pou to rivé ; a pou to sir di sa ! (1 Tim. 2:3, 4).

11. Poukisa nou divèt antann jantiman Jéova fè so promès-ya fèt ?

¹¹ A pa tout tan sa fasil pou nou gardé nou èspwar byen vivan. Toupannan nou ka antann Jéova fè so promès-ya fèt, pitèt nou pouvé pédi pasyans. Mé, Jéova la dipi tout-tan é i ké la pou tout-tan. I pa ka konté tan-an kou nou menm (2 Pierre 3:8, 9). I ké fè so projè fèt pi bon fason i pouvé fèt, mé pitèt pa lò nou menm nou ka pansé i ké fè l’. Kisa ki ké idé nou gardé nou èspwar byen vivan toupannan nou ka antann nou Bondjé ? (Jacq. 5:7, 8).

12. Dapré Hébreux 11:1, 6, ki lyen i gen ant èspwar-a ké lafwa-a ?

¹² Nou ké gardé nou èspwar byen vivan si nou ka rété pròch di Jéova, paské a gras a li ki tout bon bagaj nou ka antann ké fèt. Anfèt, dapré Labib-a, i gen roun lyen ant èspwar-a ké lafwa-a : pou nou èspwar fò, nou divèt krè ki Jéova la, é ki i sa « sa-la ki ka rékonpansé moun-yan ki ka chaché l’ ké tout yé tchò » (li Hébreux 11:1, 6). Pi nou ké pròch ké Jéova, pi nou ké sir ki i ké fè so promès-ya fèt. Donk, annou wè aprézan kouman nou pouvé fè  nou lanmityé ké li vin pi fò, pou nou pouvé gardé nou èspwar byen vivan.

13. Kouman nou pouvé vin pi pròch ké Jéova ?

¹³ Priyè Jéova épi li so Paròl. Menm si nou pa ka wè Jéova, nou pouvé vin pi pròch ké li. Nou pouvé palé ké li gras a lapriyè é nou sir ki i ké kouté nou (Jér. 29:11, 12). É nou pouvé kouté li lò nou ka li so Paròl é lò nou ka réfléchi asou l’. Lò nou ké wè kouman Jéova pran swen di so sèrvitèr-ya ki té fidèl, sa ké fè nou èspwar vin pi fò. Tout bagaj ki marké annan so Paròl, « yé ékri sa pou nou anprann patché bagaj, pou nou pouvé gen roun èspwar paské nou ka kontinyé tchenbé rèd é paské Ékritir-ya ka konsolé nou » (Rom. 15:4).

14. Poukisa sa bon pou nou réfléchi asou sa Jéova fè pou ròt-ya ?

¹⁴ Réfléchi asou promès Jéova fè é asou fason i tchenbé sa promès-ya. Sonjé sa Jéova fè pou Abraam ké Sara. Yé té ja gen roun bon ti laj, é yé pa té pouvé gen timoun ankò. Pourtan, Bondjé promèt yé ki yé té ké fè roun timoun (Gen. 18:10). Kouman Abraam réyaji ? Men sa Labib-a ka di : « [I té] gen lafwa ki i té ké divini papa roun patché nasyon » (Rom. 4:18). Menm si i pa té ka wè kouman promès Jéova té ké fèt, i té sir ki so Bondjé té ké tchenbé so paròl. É sa mouché-a ki té fidèl pa trapé pyès désèpsyon (Rom. 4:19-21). Sa kalité istwè-ya ka anprann nou ki Jéova toujou ka tchenbé so promès, menm si yé té ké di ki a roun bagaj ki pa pouvé fèt.

15. Poukisa nou divèt réfléchi asou sa Jéova ka fè pou nou ?

¹⁵ Réfléchi asou sa Jéova ka fè pou to. Réfléchi asou bèl bagaj ki rivé to gras a sèrten promès annan Labib-a ki ja fèt.  Parèkzanp, Jézi promèt ki so Papa té ké bay nou sa nou bézwen pou viv (Mat. 6:32, 33). I di to osi ki Jéova té ké bay to so lèspri sen lò to té ké doumandé li (Luc 11:13). Ès to pa wè sa promès Jéova-ya fèt annan to lavi ? É to dèt ka sonjé ròt promès ankò. Parèkzanp, i promèt i ké pardonnen to, konsolé to é bay to sa to bézwen pou to rété pròch ké li (Mat. 6:14 ; 24:45 ; 2 Cor. 1:3). Si to ka réfléchi asou sa i ja fè pou to, sa ké fè to vin plis sir ankò ki i ké aji pou to dimen.

16. Poukisa nou èspwar a roun kado ki gen bokou valò ?

¹⁶ Èspwar viv pou tout-tan Jéova ka bay nou-a, a roun kado ki gen bokou valò. A roun èspwar ki bèl toubonnman é nou pouvé sir ki i ké fèt. Kou roun lank, i ka pèrmèt nou rété stab, é i ka pèrmèt nou tchenbé rèd douvan éprèv-ya, douvan pèrsékisyon-an é menm douvan lanmò. Kou roun kas, i ka protéjé nou pansé, i ka pèrmèt nou rijété sa ki mové é fè sa ki byen. Sa èspwar-a, ki ka apiyé asou Labib-a, ka fè nou vin pi pròch di Jéova é i ka pèrmèt nou wè ki kalité lanmou i gen pou nou. Si nou ka gardé sa èspwar-a byen vivan, nou ké gen roun patché bénédiksyon.

17. Poukisa Pòl di : « A pou zòt tchò kontan gras a lèspérans » ?

¹⁷ Men konsèy Pòl bay krétyen-yan ki té Ròm : « A pou zòt tchò kontan gras a lèspérans » (Rom. 12:12). Li menm osi té pouvé kontan : i té savé ki si i té ka rété fidèl, i té ké gen lavi pou tout-tan annan syèl-a. Nou menm osi, nou tchò pouvé kontan gras a èspwar nou gen-an ; wi, nou sir ki Jéova ké fè so promès-ya fèt. Kou nou ka li l’ annan Psaume 145:5, 6 : « Byennéré sa-la […] ki ka mété so èspwar annan Jéova so Bondjé, [li] ki ka rété fidèl pou tout-tan. »