MEN SA roun ofisyé nazi rélé pou roun group Témwen Jéova pannan Dézyèm Lagèr mondyal-a : « Si roun annan zòt ka réfizé briga kont Lafrans ouben Langlétèr, zòt tout ké mouri ! ». Menm si plizyèr sòlda nazi té la ké yé zarm ka antann òbò yé, i pa gen rounsèl annan nou frè ki moli. Men sa yé ka aplé kouraj ! Sa èkzanp-a ka byen montré kouman nou menm ki Témwen Jéova nou ka wè lagèr-a : nou ka réfizé partisipé annan lagèr sa monn-an. Menm si moun-yan ka di yé ké tchwé nou, nou pa ka pran parti lò sa monn-an ka fè lagèr.

1. TOUT MOUN ANNAN PÈP BONDJÉ-A TÉ KA FÈ PARTI DI ROUNSÈL NASYON

Tan-lontan, Jéova chwazi roun pèp pou i sa so pèp : nasyon Israyèl-a. I di ki i té sa so « nasyon èspésyal annan tout pèp-ya » (Ex. 19:5). Anplis di sa, Bondjé bay Israyélit-ya roun téritwar. Donk lò i té ka voyé yé briga kont ròt nasyon-yan, yé pa té ka ni briga ni tchwé sa-ya ki té ka adoré Bondjé kou yé menm a.

Jòdla, vré sèrvitèr Jéova-ya ka vini di « tout nasyon, ti nasyon kou gran nasyon, ké pèp ké lang » (Rév. 7:9). Si pèp Bondjé-a té ka fè lagèr, yé té ké riské briga ké moun ki ka adoré Bondjé kou yé menm ouben menm tchwé yé.

 2. A JÉOVA KI TÉ KA VOYÉ ISRAYÉLIT-YA FÈ LAGÈR

Tan-lontan, a Jéova ki té ka désidé kitan é poukisa Israyélit-ya té divèt alé fè lagèr. Parèkzanp, Bondjé voyé Israyélit-ya fè lagèr pou pini Kananéyen-yan ki té ka adoré démon-yan, ki té ka fè roun patché bagaj sèksyèl malpròp é ki té ka sakrifyé yé timoun. Jéova bay Israyélit-ya lòrd tchwé moun-yan ki té ka fè sa mové bagaj-ya é ki té annan péyi i té pou bay yé-a. Konsa, sa moun-yan pa té ké détenn asou yé (Lév. 18:24, 25). Lò Israyélit-ya enstalé annan Latè Bondjé té promèt-a, détan Bondjé pèrmèt yé fè lagèr pou yé défann yé kò kont yé lèlmi (2 Sam. 5:17-25). Mé Jéova pa janmen pèrmèt Israyélit-ya désidé yé menm alé fè lagèr. Chak kou yé pran sa désizyon-an, malò rivé yé (Nomb. 14:41-45 ; 2 Chron. 35:20-24).

Jòdla, Jéova pa ka pèrmèt pyès moun alé fè lagèr. Nasyon-yan ka briga pou sa yé lé, yé pa ka briga pou sa Bondjé lé. Yé ka désidé fè lagèr pou yé péyi vin pi gran, pou yé gen plis soumaké ouben akoz di lapolitik. I gen sa osi ki ka di ki yé ka fè lagèr annan non Bondjé pou protéjé yé rélijyon ouben pou tchwé lèlmi Bondjé. Mé, a pita, pannan lagèr Armagédon-an, Jéova ké protéjé so vré adoratèr-ya é i ké kayakaya so lèlmi (Rév. 16:14, 16). A zanj rounso i ké gen annan so larmé, i pa ké gen pyès sèrvitèr Bondjé ki asou latè-a (Rév. 19:11-15).

3. ISRAYÉLIT-YA PA TÉ KA TCHWÉ SA-YA KI TÉ GEN LAFWA ANNAN VRÉ BONDJÉ-A

Tan-lontan, larmé israyélit-a aji ké mizérikòrd ké sa-ya ki montré ki yé té gen lafwa annan Jéova, é yé tchwé sèlman sa-ya ki, pou li, té mérité mouri. Gadé sa dé èkzanp-ya. Menm si Jéova bay lòrd krazé Jériko, Israyélit-ya sové Raab ké so fanmi paské sa madanm-an té gen lafwa (Jos. 2:9-16 ; 6:16, 17). Pita, Israyélit-ya sové tout moun  annan vil Gabaon paské yé té montré ki yé té ka rèspèkté Bondjé (Jos. 9:3-9, 17-19).

Jòdla, nasyon-yan ki ka fè lagèr pa ka sové sa-ya ki gen lafwa é souvan yé ka tchwé moun ki pa sòlda.

4. ISRAYÉLIT-YA TÉ DIVÈT SWIV LALWA BONDJÉ ASOU LAGÈR

Tan-lontan, Jéova té ka doumandé sòlda israyélit-ya swiv sa i té ka di yé lò yé té ka fè lagèr. Parèkzanp, détan Bondjé doumandé yé fè vil yé té ka ataké-a ‘savé kisa pou yé té fè si yé té lé fè lapè ké yé’ (Deut. 20:10). I té lé osi ki sòlda israyélit-ya rété pròp, ki yé rèspèkté sa i ka di asou sa ki bon ké asou sa ki mové, épi i té lé ki yé kan toujou rété pròp ké sen (Deut. 23:9-14). Lò nasyon-yan ki té òbò yé té ka fè lagèr, yé té gen labitid vyolé fanm-yan yé té ka trapé annan téritwar yé té ataké. Mé Jéova défann Israyélit-ya fè sa. Anfèt, yé pa té pouvé maryé ké roun fanm ki té prizonyé anvan roun mwa té pasé apré yé té pran vil-a (Deut. 21:10-13).

Jòdla, près tout péyi-ya di yé dakò fè lagèr dapré sèrten règ. Menm si sa règ-ya fèt pou protéjé moun-yan ki pa sòlda, malérèzman, souvan, sòlda-ya pa ka rèspèkté sa règ-ya.

5. BONDJÉ TÉ KA BRIGA POU SO PÈP

Tan-lontan, Jéova té ka briga pou Israyélit-ya, é souvan i té ka fè mirak pou yé té pouvé ganyen. Parèkzanp, kouman Jéova idé Israyélit-ya ganyen asou vil Jériko-a ? Kou Jéova té di, lò Israyélit-ya « rélé pou koumansé lagèr-a, miray-a tonbé » konsa, sa té pi fasil pou yé pran vil-a (Jos. 6:20). É kouman yé ganyen lagèr kont Amorit-ya ? « Jéova fè gro lagrèl tonbé asou yé […]. Mé, i gen pi bokou sòlda ki mouri anba lagrèl ki anba zépé » (Jos. 10:6-11).

VRÉ KRÉTYEN-YAN KA CHACHÉ FÈ LAPÈ KÉ RÒT-YA

Kou nou wè l’, nou sitiasyon, a pa menm sitiasyon ké Israyélit-ya. Mé a pa pou sa rounso nou pa ka fè lagèr. I gen ròt bagaj ankò. Parèkzanp, Bondjé anonsé ki pannan dèrnyé jou-ya, sa-ya i té ké ansényé, pa té ké « anprann fè lagèr ankò » ; donk, yé pa té ké fè lagèr non plis (Is. 2:2-4). Jézi li menm di ki so disip pa té ké « fè parti di monn-an » ; yé pa té ké pran parti ni annan lagèr sa monn-an ni annan lapolitik (Jean 15:19).

Anplis di sa, Jézi doumandé so disip fè plis ki sa. I di yé pa tonbé annan konpòrtman ki pouvé fè yé tchenbé moun asou yé tchò, fè yé kòlè, ouben fè yé fè lagèr (Mat. 5:21, 22). Épi i ansényé so disip ki yé té divèt travay pou i gen lapè é pou yé kontan yé lèlmi (Mat. 5:9, 44).

Kouman nou pouvé swiv sa prensip-ya ki ka vini di Paròl Bondjé-a annan nou lavi ? Nou pa anvi fè pyès lagèr. Mé ès annan nou tchò nou rayi roun moun annan asanblé-a ? Annou kontinyé travay pou tiré sa kalité bagaj-ya annan nou tchò ! (Jacq. 4:1, 11).

Nou pa ka antré annan pyès lagèr nasyon-yan. Pasé nou fè sa, nou ka travay rèd pou i gen lapè ké lanmou annan asanblé-a (Jean 13:34, 35). Nou byen désidé kontinyé pa pran parti toupannan nou ka antann wè jou-a Jéova ké tiré tout kalité lagèr pou tout-tan (Ps. 46:9).