1-2. Kisa nou ké wè annan sa artik-a ?

ANNOU pran sa èkzanp-a : to ka antann roun zanmi mennen roun komisyon to vréman bézwen. Kouman to ké santi to kò si i pa ka vini lò i di i té ké vini ? Ès to ké yèg ? Proverbes 13:12 ka di ki « lò to ka antann roun bagaj lontan, to tchò ka vin malad ». Mé si aprézan, yé ka èspliké to poukisa to zanmi pa vini lò to té ka antann li é ki i gen roun bon rézon ? Si a sa, sa ké pi fasil pou to antann, pa vré ?

² Annan sa artik-a, nou ké wè plizyèr prensip annan Labib-a ki ké idé nou ‘antann [Jéova] ké pasyans’ (Mich. 7:7). Apré sa, nou ké wè dé sitiasyon koté nou divèt antann Jéova fè roun bagaj. Pou fini, nou ké wè ki bénédiksyon sa-ya ki ka asèpté antann ké gen.

3. Ki prensip i gen annan Proverbes 13:11 ?

³ Proverbes 13:11 ka èspliké nou poukisa nou divèt gen pasyans. Nou ka li : « Richès roun moun ka trouvé vitman ké fini vit, mé richès roun moun ka ranmasé piti piti ké vin gro. » Ès to ka wè ki prensip i gen annan sa vèrsé-a ? A roun bon bagaj lò nou ka pran nou tan pou byen fè tout bagaj nou divèt fè.

4. Ki prensip i gen annan Proverbes 4:18 ?

⁴ Nou ka li annan Proverbes 4:18 ki « chimen moun ki jis kou limyèr bonmanten ki ka kléré épi pi jou-a ka vansé  pi i ka kléré fò jistan jou louvri nèt ». Èkzanp ki annan sa vèrsé-a ka idé nou konprann ki Jéova ka fè so pèp konnèt so projè piti piti. Mé nou pouvé di osi ki sa vèrsé-a ka palé di fason roun krétyen ka vansé. Sa ka pran tan pou roun moun vin pròch ké Jéova. Nou divèt byen kouté konsèy Labib-a ké òrganizasyon Jéova-a ka bay nou é fè sa nou ka anprann. A konsa, piti piti, nou ké gen menm bèl kalité Jézi gen. É nou ké anprann konnèt Jéova plizanpli byen. Annou wè ki èkzanp Jézi pran pou palé di sa.

5. Ki èkzanp Jézi pran pou montré ki sa ka pran tan pou roun moun chanjé bagaj annan so lavi ?

⁵ Jézi di ki mésaj Rwayonm-an nou ka préché kou ti grenn. Sa grenn-yan « ka pousé é ka grandi » annan tchò moun-yan ki kontan sa ki drèt. Kouman sa ka fèt ? Jézi di : « San [moun-an ki sonmen-an] pa savé kouman sa ka fèt. Di li menm, latè-a ka bay piti piti : tij-a pou koumansé, apré sa, zépi-a, épi pou fini, grenn ki antchè annan zépi-a » (Marc 4:27, 28). Kisa Jézi té lé di ? I té lé di ki menm fason roun plant ka pousé piti piti, roun moun ki ka krè mésaj Rwayonm-an ké pran tan pou chanjé bagaj annan so lavi. Nou ka wè sa ké sa-ya ki ka étidyé Labib-a : pi yé ka vin pi pròch ké Jéova, pi yé ka chanjé bagaj annan yé lavi (Éph. 4:22-24). Mé a Jéova ki ka fè sa ti grenn-yan pousé (1 Cor. 3:7).

6-7. Kisa fason Jéova fè latè-a ka anprann nou ?

⁶ Jéova gen pasyans. Annan tousa i ka fè, i ka pran so tan pou byen fè so travay. I ka fè sa pou glorifyé so non é pou idé ròt-ya. Parèkzanp, lò i préparé latè-a pou nou, i pa fè l’ rounsèl kou mé i fè l’ piti piti.

⁷ Lò i ka palé di fason Bondjé fè latè-a, Labib-a ka di ki i désidé ki « grosèr i té divèt fè », i ‘anfonsé so fondasyon’  é i ‘mété so ròch ki annan kwen-an’ (Job 38:5, 6). I jis pran so tan pou byen gadé sa i té fè-a (Gen. 1:10, 12). Ès to pouvé imajiné sa zanj-ya rousanti lò yé wè tout bagaj nòv Jéova té ka fè piti piti ? Yé té divèt kontan toubonnman ! Yé jis ‘rélé fòrs yé té kontan’ (Job 38:7). Kisa sa ka anprann nou ? Jéova pran roun patché lannen pou kréyé tout bagaj mé lò i gadé tousa i té fè, i di ki « sa té bon toubonnman » (Gen. 1:31).

8. Kisa nou ké wè aprézan ?

⁸ Kou nou fin wè l’, annan Labib-a nou ka jwenn roun patché prensip ki ka montré ki nou divèt gen pasyans, sa enpòrtan. Aprézan, nou ké wè dé sitiasyon koté nou divèt paré antann Jéova.

9. Bay roun prémyé sitiasyon koté nou divèt paré antann Jéova.

⁹ Détan, nou divèt antann Jéova réponn nou lapriyè. Pitèt nou ka doumandé l’ fòrs pou nou tchenbé rèd annan roun éprèv, ouben pou i idé nou briga ké roun défo nou gen. Ès nou ka santi ki soulajman nou ka antann-an pa ka rivé menm ? Poukisa Jéova pa ka réponn tout nou lapriyè lanmenm ?

10. Poukisa nou divèt antann ké pasyans ki Jéova réponn nou lapriyè ?

¹⁰ Jéova ka pran tan byen kouté nou lapriyè (Ps. 65:2). Pou li, a roun fason di montré ki nou gen lafwa (Héb. 11:6). Lò nou ka priyè Jéova pou i idé nou fè sa i lé, i lé wè ki nou byen désidé fè éfòr pou fè so volonté (1 Jean 3:22). Donk, lò nou ka doumandé Jéova idé nou arété fè roun bagaj i pa kontan, pitèt nou ké divèt gen pasyans é fè tousa nou pouvé pou chanjé. Jézi idé nou konprann ki Jéova pa té ké réponn tout nou lapriyè lanmenm lò i di : « Kontinyé doumandé, é yé ké bay zòt. Kontinyé chaché, é zòt ké trouvé. Kontinyé konyen, é yé ké louvri lapòt-a pou zòt. Paské sa-la ki ka doumandé ka rousouvwè, sa-la ki ka chaché ka trouvé é sa-la ki ka konyen lapòt-a yé ké louvri pou li » (Mat. 7:7, 8). Si nou ka swiv konsèy Jézi bay nou é si nou ka ‘kontinyé priyè toulong’, nou pouvé sir ki nou Papa ki annan syèl-a ka kouté nou é ki i ké réponn nou lapriyè (Col. 4:2).

11. Kouman Hébreux 4:16 pouvé rasiré nou lò nou ka santi ki Jéova ka pran tan pou réponn nou lapriyè ?

¹¹ Lò nou ka santi ki Jéova ka pran tan pou réponn nou lapriyè, annou sonjé ki i ka promèt nou réponn nou « jiskont lò nou bézwen » (li Hébreux 4:16). A pou sa, nou pa divèt janmen faché ké Jéova paské sa nou lé-a pa ka rivé lò nou lé. Parèkzanp, sèrten té ké byen lé wè lafen sa monn-an rivé, é sa ka fè lontan yé ka priyè pou rwayonm Bondjé-a vini. Anplis di sa, Jézi li menm di nou priyè pou sa (Mat. 6:10). Nou té ké byen sòt si nou té ka pédi nou lafwa annan Bondjé paské lafen-an pa ka vini lò nou lé ! (Hab. 2:3 ; Mat. 24:44). Miyò nou kontinyé antann Jéova é priyè ké lafwa. Lafen-an ké vini lò i divèt vini, paské Jéova ja chwazi so « jou » ké so « lèr ». É a sa jou-a ki ké pi bon pou tout moun (Mat. 24:36 ; 2 Pierre 3:15).

12. Annan ki ròt sitiasyon sa ké pouvé rèd pou nou gen pasyans ?

¹² Détan, nou divèt antann ké pasyans ki Jéova fè moun arété fè nou méchansté.  Annan monn nou ka viv-a, roun patché moun ka malmennen ròt-ya paské yé sa dé fanm, ouben akoz di yé ras, akoz di yé kiltir ouben di yé nasyonalité. Yé ka malmennen ròt moun ankò paské yé andikapé. É yé ka pèrsékité roun patché sèrvitèr Jéova akoz di yé lafwa. Lò yé ka fè nou sa kalité méchansté-ya, annou sonjé sa Jézi di : « Sa-la ki ké tchenbé jouktan lafen-an rivé ké sové » (Mat. 24:13). Mé aprézan, kouman to divèt réyaji si to ka anprann ki roun moun annan asanblé-a fè roun péché grav ? Lò ansyen-yan ké vin savé sa ki pasé, ès to ké antann jantiman ki yé réglé problèm-an kou Jéova ka doumandé yé fè ? Annou wè sa ansyen-yan divèt fè annan sa kalité sitiasyon-an.

13. Kisa Jéova ka doumandé ansyen-yan fè lò roun moun fè roun péché ki grav ?

¹³ Lò ansyen-yan ka vin savé ki roun moun annan asanblé-a fè roun péché grav, yé ka priyè Jéova pou i « bay yé sajès laro-a » paské yé lé konprann kouman i ka wè sitiasyon-an (Jacq. 3:17). Sa yé lé, a idé péchèr-a ‘rouvini asou bon chimen-an’ si sa posib (Jacq. 5:19, 20). Yé lé fè osi tousa yé divèt fè pou protéjé asanblé-a é pou konsolé sa-ya ki pran fè (2 Cor. 1:3, 4). Lò ansyen-yan ka anprann ki roun moun fè roun péché grav, pou koumansé, yé ka chaché savé sa ki vréman pasé, é sa pouvé pran tan. Apré sa, yé ka priyè, yé ka bay péchèr-a konsèy ki ka vini di Labib-a é yé ka korijé l’ ‘jiskont soulon sa i bézwen’ (Jér. 30:11). Yé pa ka antann lontan anvan yé fè roun bagaj mé an menm tan, yé pa ka kouri pran désizyon. Lò yé ka swiv sa Jéova ka di yé fè, tout asanblé-a ka trapé bénédiksyon. Mé, menm si yé réglé roun problèm kou yé té divèt fè l’, sa pouvé rivé ki roun moun ki pa fè anyen, ki inosan, ka kontinyé soufri akoz di sa sitiasyon-an. Si a sa to ka viv, kisa to pouvé fè pou to trapé roun soulajman ?

14. Ki èkzanp annan Labib-a pouvé konsolé to si roun annan to frè ouben to sò-ya fè to roun méchansté ?

¹⁴ Ès yé ja fè to roun bagaj ki pa jis ? Pitèt menm a roun frè ouben roun sò ki fè  to sa. Annan Labib-a, to ké trouvé bèl èkzanp wonm ké fanm ki antann Jéova ranjé sitiasyon-an. Annou palé di Jozèf. So frè-ya té fè l’ roun patché méchansté. Mé magré sa, i pa vini yèg akoz di mové bagaj yé té fè l’. Pasé i fè sa, i kontinyé fè tousa i té pouvé pou sèrvi Jéova, é Jéova li menm bay li bokou bénédiksyon paské i té gen pasyans é i tchenbé rèd (Gen. 39:21). Piti piti, Jozèf rivé pardonnen so frè-ya é i konprann ki Jéova té béni l’ (Gen. 45:5). Kou Jozèf, nou ké jwenn konsolasyon si nou ka rété pròch ké Jéova é si nou ka fè li konfyans pou i ranjé sitiasyon-an (Ps. 7:17 ; 73:28).

15. Kisa ki idé roun sò sipòrté mové bagaj yé fè li ?

¹⁵ Pitèt, yé pa ké fè nou menm kalité méchansté yé fè Jozèf, mé menm lò sa pa tèlman grav sa pouvé fè nou mal bokou. Lò nou gen roun problèm ké roun moun, sa toujou byen di swiv prensip ki annan Labib-a, menm si sa moun-an pa ka adoré Jéova (Phil. 2:3, 4). Annou palé di roun sò ki té gen lapenn paské i anprann ki roun annan so kolèg-ya té ka manti asou li. Pasé i réyaji lanmenm, i pran tan réfléchi asou èkzanp Jézi. Lò yé té ka jouré l’, i pa té ka bay pou randé (1 Pierre 2:21, 23). A konsa sò-a désidé pa fè roun wélélé ké sa. Pita, i anprann ki so kolèg té malad menm, é ki i té enkyèt akoz di sa. I konprann ki kolèg-a pa té ka vréman pansé sa i té ka di. I té byen kontan i té sipòrté mové paròl so kolèg té di, é i viré santi so kò byen.

16. Kouman 1 Pierre 3:12 pouvé konsolé nou lò yé ka fè nou soufri ?

¹⁶ Si to ka tchenbé rèd paské yé ka fè to roun mové bagaj ouben akoz di rounòt sitiasyon ki rèd, a pou to sonjé ki Jéova pròch di « sa-ya yé tchò krazé » (Ps. 34:18). I kontan to paské to ka montré to gen pasyans é paské to jité tout to traka asou li (Ps. 55:22). A li ki Jij tout latè-a ; i ka wè tout bagaj (li 1 Pierre 3:12). Si to annan problèm to pa pouvé réglé, ès to paré antann li ?

17. Dapré Isaïe 30:18, di kisa nou pouvé sir ?

¹⁷ Titalò, nou Papa ki annan syèl-a ké kouvri nou ké bénédiksyon gras a so rwayonm. Nou ka li annan Isaïe 30:18 : « Jéova ka pran pasyans é i ka antann pou montré zòt so konpasyon, é i ké lévé pou fè zòt mizérikòrd. Paské Jéova sa roun Bondjé lajistis. Sa-ya ki ka kontinyé antann li, yé tchò kontan. » Sa-ya ki ka kontinyé antann Jéova pouvé sir ki yé ké gen roun patché bénédiksyon dipi aprézan é annan monn nouvo-a.

18. Ki bénédiksyon Jéova ké bay nou annan monn nouvo-a ?

¹⁸ Annan monn nouvo-a, nou pa ké enkyèt pou pyès bagaj é nou pa ké gen problèm ankò. I pa ké gen pyès moun ki ka fè bagaj ki pa jis é i pa ké gen doulèr ankò (Rév. 21:4). Anyen pa ké fè nou enkyèt ankò paské nou ké gen plis ki sa nou bézwen (Ps. 72:16 ; Is. 54:13). A pa ti bèl sa ké bèl !

19. Pou kisa Jéova ka préparé nou ?

¹⁹ Jéova ka préparé nou jòdla pou nou viv anba so dominasyon lò i ka idé nou lésé nou vyé labitid, é chaché gen bèl kalité ki ka fè l’ plézi. Alòr, annou kontinyé pran kouraj é annou pa lésé tonbé. La pli bèl anba la bay ! Ké tout sa bèl bagaj-ya ki ka antann nou, annou kontinyé antann jantiman Jéova fini so travay !