1. Kisa nou pitèt ka santi annan nou tchò, lò nou ka sonjé tousa Jéova fè ?

LÒ TO ka réfléchi asou tousa Jéova fè, kisa to ka santi annan to tchò ? Pitèt to ka santi menm bagaj-a ké David ki di Jéova : « Lò mo ka wè syèl to fè-a, tousa to lanmen fè, lalin ké zétwèl to préparé-ya, mo ka di mo kò : “Moun-an ki ka mouri-a, kimoun i sa pou to sonjé l’, é pitit roun wonm, kimoun i sa pou to okipé di li ?” » (Ps. 8:3, 4). Kou David, lò nou ka wè kouman nou piti parapòrta tout zétwèl Jéova fè, pitèt nou pa menm ka rivé di kouman nou kontan paské, magré sa, Jéova ka gadé pou nou. Annan sa artik-a, nou ké wè ki Jéova byen okipé di prémyé moun i té fè-ya. Mé a pa sa rounso i fè, i rousouvwè yé annan so fanmi !

2. Ki projè Bondjé té gen pou so prémyé pitit asou latè-a ?

² Adan ké Èv té sa prémyé pitit Jéova té fè asou latè-a é i té sa yé Papa ki té kontan yé. I té bay yé roun travay pou fè, é i té lé yé fè l’. I té di yé : « Fè pitit é divini bokou ; plen latè-a é okipé di li » (Gen. 1:28). Donk, yé té divèt fè timoun épi pran swen di latè-a ki té sa yé kaz. Si yé té obéyi é si yé té fè sa Jéova té doumandé yé fè-a, Adan ké Èv ké yé pitit té ké rété annan so fanmi pou tout-tan.

3. Poukisa nou pouvé di ki a pa roun ti plas Jéova té bay Adan ké Èv annan so fanmi ?

³ A pa roun ti plas Jéova té bay Adan ké Èv annan so fanmi. Men sa David té di Jéova asou moun i té fè-a : « To fè l’ roun tibi pi bas pasé zanj-ya é to bay li laglwar kou  roun kouròn asou so tèt » (Ps. 8:5). A vré, nou pa fò, nou pa entélijan kou zanj-ya é nou pa pouvé fè menm bagaj yé ka fè (Ps. 103:20). Mé nou jis ‘ti moso pi bas’ ki sa zanj pwisan-yan. Ès to ka randé to kò kont ? Jéova té vréman bay nou prémyé papa ké nou prémyé manman roun bèl lavi !

4. a) Kisa ki rivé Adan ké Èv paské yé dézobéyi ? b) Kisa nou ké wè annan sa artik-a ?

 ⁴ Malérèzman, Adan ké Èv pédi plas yé té gen annan fanmi Jéova-a. Kou nou ké wè l’ annan sa artik-a, sa mennen bon problèm pou yé pitit. Mé projè Jéova-a pa chanjé. I lé sa ki ka obéyi l’ rété so pitit pou tout-tan. Annan sa artik-a, nou ké wè kouman Jéova montré ki nou gen valò pou li. Apré sa, nou ké wè kouman nou pouvé montré li ki nou lé fè parti di so fanmi. Pou fini, nou ké wè ki bénédiksyon Jéova ké bay so pitit asou latè-a pou tout-tan.

5. Kouman nou pouvé bay Jéova lònò ?

⁵ Jéova montré ki nou gen valò pou li lò i fè nou kou li menm (Gen. 1:26, 27). Paské Bondjé fè nou kou li menm, nou pouvé anprann imité tout so bèl kalité. Parèkzanp, so lanmou, so konpasyon, so fidélité ké so jistis (Ps. 86:15 ; 145:17). Lò nou ka fè tousa nou pouvé pou imité sa bèl kalité-ya, nou ka bay Jéova lònò é nou ka montré li ki nou gen rékonésans pou tousa i fè pou nou (1 Pierre 1:14-16). Nou tchò kontan lò nou ka fè sa nou Papa ki annan syèl-a kontan. Lò i fè nou kou li menm, Jéova bay nou posibilité divini roun moun i lé wè annan so fanmi.

6. Lò Jéova préparé latè-a pou nou, kouman i montré ki nou gen valò pou li ?

⁶ Jéova fè roun bèl kaz pou nou. Lontan anvan i fè prémyé wonm-an, i préparé latè-a pou moun té pouvé rété asou l’ (Job 38:4-6 ; Jér. 10:12). Paské i janti é i kontan bay, i fè nou gen roun patché bon bagaj pou nou tchò kontan (Ps. 104:14, 15, 24). Lò i té ka rété pou gadé sa i té fin fè-a, ‘i té ka wè ki sa té bon’ (Gen. 1:10, 12, 31). É i montré ki nou té gen valò pou li lò i ‘bay nou otorité asou tousa i fè ké so lanmen’ (Ps. 8:6). Bondjé lé ki nou parfè é ki nou pran plézi okipé di tout bèl bagaj i fè, pou tout-tan. Ès to ka di li mèrsi souvan pou tout bèl bagaj i prévwè fè pou nou ?

7. Annan Josué 24:15, kisa ka montré ki nou gen libèrté di chwazi ?

⁷ Jéova fè nou roun fason pou nou pouvé désidé sa nou lé fè. Yé ka aplé sa, libèrté di chwazi. Sa lé di ki nou pouvé désidé nou menm sa nou ké fè annan nou lavi (li Josué 24:15). Nou Papa ki kontan nou, kontan lò nou ka chwazi adoré l’ (Ps. 84:11 ; Prov. 27:11). Mé nou pouvé sèrvi sa libèrté nou gen-an annan tousa nou ka fè annan nou lavi. Annou wè èkzanp Jézi ka bay nou annan sa zafè-a.

8. Kouman Jézi byen sèrvi libèrté di chwazi i té gen-an ?

⁸ Kou Jézi, nou pouvé désidé mété sa ròt-ya bézwen anvan sa nou menm bézwen. Roun jou, Jézi ké so apot-ya té byen las, yé alé annan roun koté ki té kalm pou yé té pouvé pozé yé kò moso. Mé yé pa rivé pozé non. Roun patché moun ki té lé Jézi ansényé yé rivé trouvé yé. Ès Jézi faché pou sa ? Non, i pa faché pou sa ! I pito pran yé lapenn. Kisa i fè ?  « I koumansé anprann yé roun patché bagaj » (Marc 6:30-34). Si nou ka pran nou tan ké nou fòrs pou idé ròt-ya kou Jézi té ka fè l’, nou ké bay nou Papa ki annan syèl-a lònò (Mat. 5:14-16). É nou ké montré Jéova osi ki nou lé fè parti di so fanmi.

9. Kisa papa ké manman-yan divèt sonjé ?

⁹ Jéova bay nou posibilité fè timoun, mé osi rèsponsabilité anprann yé kontan l’ ké adoré l’. Si to gen timoun, ès to ka di li mèrsi pou sa ? Jéova bay zanj-ya roun patché bénédiksyon, mé i pa pèrmèt yé fè timoun. Donk, papa ké manman-yan divèt kontan paské yé pouvé fè timoun é yé pouvé lévé yé. Yé gen roun gran rèsponsabilité, yé divèt « lévé yé soulon prensip ké avèrtisman Jéova ka bay » (Éph. 6:4 ; Deut. 6:5-7 ; Ps. 127:3). Pou idé yé, òrganizasyon Bondjé-a ka bay papa ké manman-yan roun patché piblikasyon, mé osi vidéyo, chanté ké ròt bagaj asou Entèrnèt. Asiré pa pitèt, nou Papa ki annan syèl-a ké so Pitit kontan timoun-yan (Luc 18:15-17). Papa ké manman-yan ka fè tchò Jéova kontan lò yé ka konté asou li é lò yé ka fè tousa yé pouvé pou pran swen di yé timoun. Anplis di sa, lò yé ka fè sa, yé ka bay yé timoun posibilité antré annan fanmi Jéova é rété annan l’ pou tout-tan.

10-11. Gras a ranson-an, kisa Jéova rivé fè ?

¹⁰ Jéova bay so Pitit ki gen bokou valò pou nou viré fè parti di so fanmi. Kou nou wè l’ annan  paragraf 4-a, Adan ké Èv pédi plas yé té gen annan fanmi Jéova é yé anpéché yé pitit antré annan sa fanmi-a osi (Rom. 5:12). Yé chwazi dézobéyi Bondjé, donk yé té ka mérité Bondjé mété yé dèrò di so fanmi. Mé kisa ki té ké rivé yé pitit ? Pas i kontan nou, Jéova prévwè adòpté tout sa ki té ké obéyi li. Pou fè sa, i bay so sèl Pitit, Jézi, an sakrifis (Jean 3:16 ; Rom. 5:19). Gras a sa sakrifis-a, Bondjé ka adòpté 144 000 moun dipi aprézan pou yé divini so pitit (Rom. 8:15-17 ; Rév. 14:1).

¹¹ Mé, patché ròt moun ankò ka adoré Bondjé ké fidélité. Apré dèrnyé éprèv-a ki ké fèt lò 1 000 lannen-yan ké bout, yé menm osi yé ké pouvé antré annan fanmi Bondjé-a (Ps. 25:14 ; Rom. 8:20, 21). Kou yé gen sa èspwar-a, a dipi aprézan yé pouvé aplé Jéova « Papa » (Mat. 6:9). Sa-ya ki ké résisité ké pouvé anprann osi kisa Jéova lé yé fè. Si yé ka obéyi l’, yé menm osi yé ké pouvé fè parti di so fanmi.

12. Ki késyon nou ké réponn aprézan ?

¹² Kou nou fin wè l’, Jéova fè plizyèr bagaj pou montré nou ki nou gen valò pou li. I ja adòpté krétyen wen-yan kou so pitit é i ka bay sa-ya ki annan « granfoul »-a posibilité divini so pitit annan monn nouvo-a (Rév. 7:9). Mé kouman nou pouvé montré Jéova ki nou lé fè parti di so fanmi pou tout-tan ?

13. Dapré Marc 12:30, kisa nou divèt fè pou Jéova asèpté nou annan so fanmi adoratèr-ya ?

¹³ Adoré Jéova ké tout to tchò pou montré li to kontan li (li Marc 12:30). Posibilité adoré Jéova, a roun annan pi bèl kado i fè nou-a. Nou ka montré Jéova ki nou kontan l’, lò nou ka ‘obéyi so lalwa’ (1 Jean 5:3). Roun annan sa koumannman i fè Jézi bay nou, a fè disip é batizé yé (Mat. 28:19). I doumandé nou osi kontan nou konpanyen (Jean 13:35).  Si nou ka obéyi li, i ké asèpté nou annan so gran fanmi adoratèr-ya (Ps. 15:1, 2).

14. Dapré Matthieu 9:36-38 ké Romains 12:10, kouman nou pouvé montré ki nou kontan ròt-ya ?

¹⁴ Aji ké ròt-ya ké lanmou. Lanmou, a pi gran kalité Jéova gen (1 Jean 4:8). I montré i té kontan nou anvan menm nou té konnèt li (1 Jean 4:9, 10). Lò nou ka aji ké ròt-ya ké lanmou, nou ka imité l’ (Éph. 5:1). Pi bon fason pou nou montré nou kontan ròt-ya, a idé yé konnèt Jéova anvan i tro ta (li Matthieu 9:36-38). Konsa, nou ka bay yé posibilité fè parti di fanmi Bondjé-a. É lò roun moun ka batizé, nou divèt kontinyé kontan l’ ké rèspèkté l’ (1 Jean 4:20, 21). Kisa sa lé di ? Parèkzanp, nou ké fè li konfyans. Si i ka fè roun bagaj nou pa ka konprann, nou pa ké di ki i té gen roun mové lidé dèyè so tèt, nou ké pito bay li lònò é nou ké wè l’ kou roun moun ki pi fò pasé nou (li Romains 12:10 ; Phil. 2:3).

15. Ké kimoun nou divèt janti é kimoun nou divèt pardonnen ?

¹⁵ A pou to janti é a pou to pardonnen tout moun. Pou nou mérité aplé Jéova nou « Papa », a pou nou fè tousa i ka di nou annan Labib-a. Parèkzanp, Jézi ka doumandé nou janti ké tout moun épi pardonnen tout moun, menm nou lèlmi (Luc 6:32-36). Mé détan, sa rèd ! A pou sa nou divèt réfléchi kou Jézi é nou divèt fè kou li. Lò nou ka fè tousa nou pouvé pou obéyi Jéova é pou imité Jézi, nou ka montré nou Papa ki annan syèl-a, ki nou lé fè parti di so fanmi pou tout-tan.

16. Kisa nou pouvé fè pou nou pa sali répitasyon fanmi Jéova-a ?

¹⁶ Pa sali répitasyon fanmi Jéova. Annan roun fanmi koté i gen timoun, pi piti-ya gen tandans ka imité yé gran frè ouben yé gran sò. Si sa-ya ki pi gran ka fè sa Labib-a ka di, yé ka bay pi piti-ya roun bon èkzanp. Mé si yé ka fè sa ki pa bon, yé ti-frè ouben yé ti-sò ka riské swiv yé mové èkzanp. A menm bagaj-a annan fanmi Jéova-a. Si roun krétyen ka divini apòsta ouben ka koumansé gen roun lavi ki pa k’alé ké sa Labib-a ka di, ròt moun annan asanblé-a ké pitèt anvi imité l’. Si yé té ka fè sa, yé té ké sali répitasyon fanmi adoratèr Jéova-ya (1 Thess. 4:3-8). Annou pa imité sa-ya ki ka fè mové bagaj é annou pa janmen alé lwen di nou Papa ki annan syèl-a ki kontan nou !

17. Ki lidé ki pa vré nou pa divèt asèpté é poukisa ?

¹⁷ Pasé to mété to konfyans annan bagaj matéryèl, fè Jéova konfyans. Jéova ka promèt nou bay nou manjé, lenj, kaz si nou ka mété rwayonm-an douvan é si nou ka obéyi so prensip ki jis (Ps. 55:22 ; Mat. 6:33). Donk, nou pa divèt pansé ki a bagaj matéryèl-ya ki ka protéjé nou é ki ka fè nou tchò kontan. Nou savé ki a sèlman si nou ka fè volonté Jéova-a ki nou pouvé gen lapè annan nou tchò (Phil. 4:6, 7). Menm si nou gen soumaké pou achté roun patché bagaj, nou divèt doumandé nou kò si nou ké gen tan ké fòrs pou sèrvi sa bagaj-ya é okipé di sa bagaj-ya. Anplis di sa, ès nou pa ka riské kontan sa nou gen tròp ? Annou sonjé ki Jéova lé ki moun annan so fanmi gen bokou travay pou fè pou li. Sa lé di ki nou pa divèt lésé pyès bagaj anpéché nou fè sa. Annou pa imité sa jennjan-an ki té tèlman kontan sa i té gen ki i pa asèpté swiv Jézi. Jéova té pouvé adòpté l’ pou i divini so pitit, mé i raté sa (Marc 10:17-22).

18. Ki bèl lònò é ki bèl bénédiksyon tout sa ki ka obéyi ké wè ?

¹⁸ Sa-ya ki ka obéyi Jéova ké gen pi gran lònò i pouvé gen : kontan Jéova ké adoré li pou tout-tan (Luc 23:42, 43). Sa-ya ki gen èspwar viv asou latè-a ké kontan pran swen di sa bèl latè-a Jéova fè èspésyalman pou yé. Talò, anba rwayonm Bondjé-a, latè-a ké tousa i gen asou l’ ké géri. Jézi ké réparé tout déga Adan ké Èv mennen paské yé désidé lésé fanmi Bondjé-a. Jéova ké résisité roun patché moun é i ké bay yé posibilité viv pou tout-tan, ké roun lasanté parfè, asou roun latè ki ké divini roun paradi (Luc 23:42, 43). Lò fanmi Jéova-a ki asou latè-a ké divini parfè, yé ké gen ‘laglwar kou roun kouròn asou yé tèt’, kou David ka di (Ps. 8:5).

19. Kisa nou pa divèt bliyé ?

¹⁹ Si to annan « granfoul »-a, sonjé ki to gen roun bèl èspwar. Bondjé kontan to é i lé rousouvwè to annan so fanmi. Atò, fè tousa to pouvé pou fè li plézi. Chak jou Bondjé fè jou, sonjé sa promès-ya. A pou to kontan posibilité to gen di adoré to Papa ki annan syèl-a mé osi èspwar to gen-an di louwé li pou tout-tan !