1. Poukisa Jézi doumandé Jéova véyé asou so disip ?

 LANNWIT anvan i mouri, Jézi doumandé so Papa ki annan syèl-a roun bagaj èspésyal : i doumandé li véyé asou so disip (Jean 17:15, 20). Jéova toujou véyé asou so disip ; i toujou pran swen di yé é i toujou protéjé yé. Mé Jézi té savé ki Satan té ké asiz asou so disip ké plis méchansté ankò. Donk yé té ké bézwen Jéova idé yé ankò plis.

2. Dapré Psaume 33:18-20, poukisa nou pa bézwen pè problèm ki pouvé tonbé asou nou ?

² Monn-an Satan ka kontrolé ka fè vré krétyen-yan wè roun patché mizè jòdla. Nou ka jwenn problèm ki pouvé dékourajé nou ouben menm anpéché nou rété fidèl douvan Jéova. Mé kou nou ké wè l’ annan sa artik-a, nou pa bézwen pè. Jéova ka véyé asou nou. Sa lé di ki i ka wè problèm nou ka jwenn é ki i toujou paré pou idé nou. Annou wè dé èkzanp annan Labib-a ki ké montré nou ki i ka « protéjé sa-ya ki ka krenn li » (li Psaume 33:18-20).

3. Annan ki sitiasyon nou pouvé santi ki nou tousèl ké nou kò ?

³ Menm si nou gen roun patché frè ké sò annan asanblé-a, détan nou pouvé santi ki nou tousèl. Parèkzanp, jennjan-yan pouvé santi ki i pa gen pésonn pou idé yé lò yé divèt èspliké yé kanmarad lékòl sa yé ka krè, ouben lò yé ka chanjé asanblé. Détan, roun ran frè ké sò tris ouben ka briga paské yé déprimé. Yé ka santi kousidiré i pa gen pyès moun pou idé yé. Lò sa ka rivé nou, pitèt nou pouvé pè di ròt-ya sa nou ka rousanti, paské nou ka pansé ki yé pa ké konprann nou. Épi osi, nou pouvé jis doumandé nou kò si roun moun ka gadé pou nou. Si nou ka santi ki nou tousèl ké nou kò akoz di bagaj nou fin palé ouben akoz di ròt  bagaj ankò, nou pouvé dékourajé ké angwasé. Mé Jéova pa lé nou tonbé annan sa léta-a. Poukisa nou pouvé di sa ?

4. Poukisa profèt Éli di : « A mo rounso ki ka rété » ?

⁴ Parèkzanp annou wè sa ki rivé profèt Éli. Sa té ka fè 40 jou i té ka kouri pou sové so lavi, paské renn Jézabèl té jiré ki i té ké tchwé l’ (1 Rois 19:1-9). Finalman, i rivé annan roun gro trou ròch, i té tousèl. I koumansé pléré pou Jéova : « Yé tchwé tout to profèt ké zépé. A mo rounso ki ka rété » (1 Rois 19:10). Pourtan, Abdias té rivé séré 100 profèt pou Jézabèl pa tchwé yé (1 Rois 18:7, 13). Atò, poukisa Éli té ka santi so kò tousèl konsa ? Ès i té ka pansé ki pannan sa tan-an tout profèt Abdias té sové, té mouri ? Ès pitèt i té ka santi so kò tousèl paské pyès moun pa té vini adoré Jéova ké li, menm lò Jéova té byen montré ki i té sa vré Bondjé-a, asou montangn Karmèl ? Ès i té krè ki pésonn pa té savé danjé ki té asou so tèt ? Ouben ès i pansé ki pyès moun pa té mélé ké li ? Labib-a pa ka di nou anyen asou sa. Mé roun bagaj nou savé, a ki Jéova té ka konprann poukisa Éli té ka santi ki i té tousèl ké so kò, é i té byen savé kisa i té bézwen.

5. Kouman Jéova fè Éli konprann ki i pa té tousèl ?

⁵ Jéova fè plizyèr bagaj pou idé Éli. Pou koumansé, i ankourajé l’ palé. Dé fwa i doumandé Éli : « Kisa to ka fè la ? » (1 Rois 19:9, 13). É chak fwa, i kouté Éli vidé so tchò. I réponn li, é i di li ki i té la ké li. É i fè li wè so pwisans. I di li osi ki i té gen roun patché moun ki té ka adoré l’ toujou an Israyèl (1 Rois 19:11, 12, 18). Éli té divèt soulajé lò i di Jéova tousa ki té asou so tchò é lò i tandé répons i bay li. Anplis di sa, Jéova bay li trwa bagaj enpòrtan pou i té fè : i doumandé li alé vidé dilwil asou tèt Azayèl pas i té chwazi li pou i té divini rwa Siri. I doumandé li osi vidé dilwil asou Jéyou ki té pou divini rwa Israyèl ké asou Élizé ki té pou divini roun profèt (1 Rois 19:15, 16). A konsa i idé l’ mété tout so lidé asou bon bagaj. Bondjé bay li osi roun zanmi, Élizé. É to menm,  kouman Jéova pouvé idé to lò to ka santi to tousèl ?

6. Kisa nou pouvé di Jéova annan nou lapriyè lò nou ka santi ki nou tousèl ? (Psaume 62:8).

⁶ Jéova ka doumandé to priyè l’. I ka wè ki problèm to ka jwenn é i ka promèt to ki i ké kouté to chak kou to ké priyè l’ (1 Thess. 5:17). I kontan kouté sa-ya ki ka adoré l’ (Prov. 15:8). Kisa to pouvé di li lò to ka santi to tousèl ? Kou Éli, di li tousa to gen asou to tchò (li Psaume 62:8). Di li tout traka to gen ké sa to ka rousanti. Doumandé li idé to konprann sa ki ka rivé to é sa to pouvé fè. Parèkzanp, si to ka santi to tousèl é ki to pè lò to divèt èspliké to kanmarad lékòl kisa to ka krè, to divèt doumandé Jéova bay to kouraj pou palé. To pouvé doumandé li osi sajès pou to pouvé èspliké sa to ka krè di roun fason ki agréyab (Luc 21:14, 15). Ouben si to ka soufri paské to pa ka santi to kò byen annan to tchò ké annan to tèt, doumandé Jéova bay to fòrs pou to palé ké roun krétyen ki gen èspéryans. To pouvé doumandé li osi pou i aji asou moun-an, pou i pran tan kouté to épi konprann to. Donk, vidé to tchò pou Jéova é gadé kouman i ka réponn to lapriyè. Épi asèpté to frè ké sò-ya idé to. Konsa, to pa ké santi to tousèl kou anvan.

7. Kisa èkzanp Mauricio ka anprann nou ?

⁷ Jéova ka bay nou tout travay enpòrtan pou nou fè. To pouvé sir ki i ka wè é ki i kontan tousa to ka fè pou préché é pou travay annan asanblé-a (Ps. 110:3). Si to ka santi to tousèl, poukisa sa enpòrtan pou to toujou gen travay pou to fè annan sa dé bagaj-ya ? Annou pran èkzanp roun jenn frè yé ka aplé Mauricio b. Roun tibi tan apré i batizé, i wè ki roun di so pi bon zanmi té ka koumansé lésé lavérité-a. I ka di : « Lò mo wè ki i té ka lésé Jéova, sa chalviré mo lèspri. Mo té ka doumandé mo kò si mo té ké rivé rèspèkté vé mo té fè-a, épi rété annan fanmi Jéova-a. Mo té ka santi mo kò tousèl, é mo té ka pansé ki pyès moun pa té ké konprann sa mo té ka rousanti. » Kisa ki idé Mauricio tchenbé ? Men sa i ka di : « Mo koumansé préché plis. Sa idé mo pa mété mo lidé asou mo sitiasyon rounso, ni asou sa mo té ka rousanti. Paské mo té ka pasé plis tan ké ròt-ya ka préché, mo pa té ka santi mo kò tousèl kou anvan, é mo tchò té pi kontan. » A vré pou nou osi ; menm lò nou pa pouvé préché ké nou frè ké sò-ya an vré, nou ka trapé ankourajman lò nou pouvé fè témwanyaj ké téléfonn ouben témwanyaj ké lèt. Ki ròt bagaj idé Mauricio ? I ka di : « Mo té gen osi bokou bagaj pou fè annan asanblé-a. Mo té ka préparé é mo té ka prézanté sijè mo té gen pou réinyon-yan ké tout mo  tchò. Tousa fè mo wè ki mo té gen valò pou Jéova ké pou mo frè ké sò-ya. »

8. Lò nou ka jwenn gro problèm, kouman nou pouvé santi nou kò ?

⁸ Nou savé ki nou ké gen problèm pannan sa dèrnyé jou-ya (2 Tim. 3:1). Mé détan, éprèv-a pouvé sirprann nou paské i ka yenki tonbé anlè nou rounsèl kou, ouben paské nou pa té ka pansé ki roun bagaj konsa té pouvé rivé nou. Problèm pouvé tonbé san nou pa ka antann : problèm soumaké, roun maladi grav ka pran nou, ouben roun moun nou kontan ka mouri. Lò sa ka rivé, nou pouvé santi nou néyé anba éprèv é nou pouvé pansé ki nou pa ké janmen rivé tchenbé. Èspésyalman lò nou ka santi ki éprèv-ya ka vini roun dèyè ròt, ouben ki yé tout ka tonbé anlè nou rounsèl kou. Mé annou sonjé ki Jéova ka véyé asou nou é ki gras a li, nou ké pouvé tchenbé rèd annan nenpòrt ki éprèv san nou pa pè.

9. Rakonté ki éprèv Jòb trapé.

⁹ Annou wè kouman Jéova idé Jòb. Plizyèr gro problèm tonbé asou li annan roun ti moman. Menm jou-a, i anprann ki i té pédi tout so zannimo, yé té tchwé so sèrvitèr épi pi mové ankò, tout so timoun i té kontan té mouri (Job 1:13-19). Roun ti moman apré sa, toupannan i té annan so lapenn, i tonbé malad. I té ka soufri bokou. I té gen bobo dipi laro so tèt, jik annan so plat pyé (Job 2:7). Tèlman i té ka soufri, Jòb di : « Mo rayi mo lavi ; mo pa anvi viv ankò » (Job 7:16).

10. Kouman Jéova soutni Jòb ? (gadé zimaj-a anlè prémyé paj-a).

¹⁰ Jéova té ka véyé asou Jòb. Kou Jéova té kontan Jòb, i bay li sa i té bézwen pou i té tchenbé annan so éprèv é pou i té rété fidèl. I palé pou Jòb, i fè li sonjé ki i sa roun Bondjé ki gen bokou sajès é ki i ka pran swen di tousa i kréyé. I palé li di roun patché zannimo ki vayan menm (Job 38:1, 2 ; 39:9, 13, 19, 27 ; 40:15 ; 41:1, 2). Jéova sèrvi osi Éliyou, roun jennjan ki té gen bokou lafwa, pou i konsolé Jòb é bay li fòrs. Éliyou fè li konprann ki Jéova toujou ka rékonpansé so sèrvitèr ki ka rété fidèl. Mé i gen rounòt bagaj Jéova fè. I fè Éliyou bay Jòb konsèy ki té plen ké lanmou. Éliyou idé Jòb mété so lidé asou sa ki té pi enpòrtan. I fè li sonjé kouman moun lontan pi piti pasé Jéova, Sa-la ki kréyé tout inivèr-a (Job 37:14). Jéova bay li osi roun bagaj pou i té fè : i té divèt priyè pou so trwa zanmi ki té péché (Job 42:8-10). Mé kouman Jéova ka soutni nou jòdla lò nou gen éprèv ?

11. Kouman Labib-a pouvé konsolé nou lò nou gen problèm ?

¹¹ Jéova pa ka palé ké nou kou i fè l’ ké Jòb. Mé i ka palé ké nou gras a so Paròl, Labib-a (Rom. 15:4). I ka konsolé nou paské i ka bay nou roun èspwar pou dimen. Annou wè plizyèr bagaj annan Labib-a ki ka konsolé nou lò nou gen problèm. Parèkzanp, Jéova ka asiré nou ki anyen, pa menm pi gro éprèv i pouvé gen, « pa ké pouvé séparé nou di [so] lanmou » (Rom. 8:38, 39). I ka asiré nou osi ki i « pròch di tout sa ki ka aplé l’ » annan lapriyè (Ps. 145:18). Jéova ka promèt nou ki si nou ka konté asou li, nou ké pouvé tchenbé annan nenpòrt ki éprèv nou gen, é nou ké menm pouvé kontan (1 Cor. 10:13 ; Jacq. 1:2, 12). Paròl Bondjé-a ka fè nou sonjé osi ki éprèv nou ka jwenn pa ké la pou tout-tan. Yé la pou roun ti moso tan rounso, èspésyalman lò nou ka  konparé yé ké rékonpans pou tout-tan i promèt nou-a (2 Cor. 4:16-18). Anplis di sa, Jéova ka di nou ki i ké fin ké sa-ya ki ka fè nou soufri : Satan Djab-a ké sa-ya ki ka imité mové bagaj i ka fè (Ps. 37:10). Ès to pran tan anprann plizyèr vèrsé annan Labib-a ki ké ankourajé to lò to ké jwenn problèm ?

12. Kisa Jéova ka doumandé nou fè pou nou byen profité di so Paròl ?

¹² Jéova ka doumandé nou pran tan souvan pou étidyé Labib-a é pou réfléchi asou sa nou ka li. Lò nou ka fè sa nou anprann, nou lafwa ka vin pi fò, é nou ka vin pi pròch di nou Papa ki annan syèl-a. Finalman, nou pi fò pou tchenbé annan éprèv nou ka jwenn. Jéova ka bay osi sa-ya ki ka konté asou so Paròl, so lèspri sen. É sa lèspri-a pouvé bay nou « pwisans-a ki ka dépasé pwisans ki nòrmal-a » pou tchenbé annan nenpòrt ki éprèv (2 Cor. 4:7-10).

13. Kouman manjé èspirityèl « èsklav fidèl ké avizé-a » ka bay nou-a ka idé nou tchenbé rèd annan éprèv nou ka jwenn ?

¹³ Gras a Jéova, « èsklav fidèl ké avizé-a » ka bay nou roun patché manjé èspirityèl : artik, vidéyo ké chanté ki pouvé idé nou fè nou lafwa vin pi fò, é rété pròch di Jéova (Mat. 24:45). Nou divèt byen profité di sa manjé-a ki toujou ka vini o bon moman. Roun sò ki ka rété Ozétazini, di sa i ka rousanti pou tousa Jéova ka bay nou. I di : « Pannan 40 lannen mo sèrvi Jéova, mo trapé plizyèr éprèv ki té pouvé anpéché mo rété fidèl. » Sa sò-a soufri bokou : so granpapa mouri annan roun aksidan loto akoz di roun moun ki té sou, so manman ké so papa tonbé malad, é yé toulédé mouri. É li menm briga ké roun kansèr dé fwa. Kisa ki idé l’ tchenbé rèd ? Men sa i ka di : « Jéova toujou pran swen di mo. Sa ki idé mo tchenbé, a manjé èspirityèl i ka fè èsklav fidèl ké avizé-a bay nou. A pou sa mo ka rousanti menm bagaj ké Jòb, lò i di : “Jiktan mo mouri, mo pa ké jen lésé mo fidélité !” » (Job 27:5).

14. Kouman Jéova ka sèrvi nou frè ké sò-ya pou soutni nou lò nou gen problèm ? (1 Thessaloniciens 4:9).

¹⁴ Jéova anprann so sèrvitèr montré lanmou épi konsolé yé konpanyen lò lavi-a rèd (2 Cor. 1:3, 4 ; li 1 Thessaloniciens 4:9). Kou Éliyou, nou frè ké sò-ya lé idé nou pou nou rété fidèl menm si nou gen traka (Actes 14:22). Parèkzanp, gadé  kouman asanblé Diane ankourajé l’ é idé l’ rété pròch ké Jéova lò so mari tonbé malad. Men sa i ka di : « Sa té rèd. Mé, pannan tout sa mwa-ya ki té rèd menm, nou santi bra Jéova-ya pwisan ké plen ké lanmou. Frè ké sò-ya annan nou asanblé fè bokou bagaj pou soutni nou. Yé vini wè nou, yé aplé nou, yé vini kroké nou. A sa menm nou té bézwen pou kontinyé vansé. Kou mo pa gen pèrmi, frè ké sò-ya òrganizé yé kò pou mo té pouvé alé annan réinyon-yan é pou mo préché lò mo té pouvé. » Viv annan roun fanmi ki gen bokou lanmou, men roun bèl bénédiksyon !

15. Poukisa nou sir ki nou ké pouvé tchenbé lò nou ké gen problèm ?

¹⁵ Nou tout ké jwenn éprèv. Mé kou nou wè l’, nou pa ké janmen gen pou tchenbé nou rounso. Jéova sa roun papa ki plen ké lanmou é i toujou ka véyé asou nou. I òbò nou é i paré pou kouté nou lò nou ka doumandé l’ idé nou é pou soutni nou (Is. 43:2). Poukisa nou sir ki nou ké pouvé tchenbé lò nou ké gen problèm ? A paské i bay nou tousa nou bézwen pou tchenbé : nou pouvé priyè l’, i bay nou Labib-a, roun patché manjé èspirityèl épi frè ké sò ki plen ké lanmou pou idé nou tchenbé lò bagaj-ya rèd.

16. Kisa nou divèt fè pou nou rété anba protèksyon Jéova ?

¹⁶ Nou kontan toubonnman paské nou gen roun Papa annan syèl-a ki ka véyé asou nou ! « A li ki ka fè nou tchò kontan » (Ps. 33:21). Annou profité di tout bagaj Jéova mété pou idé nou, konsa nou ké montré li nou rékonésans. Épi osi, pou nou rété anba protèksyon Bondjé, annou kontinyé fè tousa nou pouvé pou obéyi Jéova é pou fè sa ki drèt douvan li é i ké véyé asou nou pou tout-tan ! (1 Pierre 3:12).