1. Ki bèl bagaj roun patché jennjan ja rivé fè é kouman yé rivé fè l’ ?

 CHAK lannen, roun patché jennjan ka batizé. É to menm, ès to ja batizé ? Si to ja batizé, to frè ké sò-ya kontan pou to é Jéova kontan osi ! (Prov. 27:11). Pran roun ti moman pou sonjé tousa to fè pou to rivé batizé : To pran tan byen étidyé Labib-a, pitèt pannan plizyèr lannen é apré sa, to rivé sir ki Labib-a sa Paròl Bondjé-a. Mé sa ki pi enpòrtan ankò, to rivé konnèt é kontan sa-la ki fè sa liv ki sakré-a. To lanmou pou Jéova grandi tèlman ki jòdla, to sa roun sèrvitèr Jéova vouwé ké batizé. Men roun bèl bagaj !

2. Kisa nou ké wè annan sa artik-a ?

 ² Anvan to batizé, to dèt jwenn plizyèr éprèv. Mé kou to ka vin gran, to ké jwenn ròt éprèv ankò. Satan ké éséyé fè to lanmou pou Jéova fébli, é i ké éséyé fè to arété adoré li (Éph. 4:14). Pa lésé l’ fè sa ké to ! Kisa ki pouvé idé to rété fidèl douvan Jéova é rèspèkté vé to fè-a ? To divèt kontinyé travay rèd pou to divini roun krétyen ki fò annan domenn èspirityèl (Héb. 6:1). Mé kouman to pouvé fè sa ? A sa nou ké wè annan sa artik-a.

3. Kisa tout krétyen-yan divèt kontinyé fè apré yé batizé ?

³ Apré yé batenm, tout krétyen-yan divèt swiv konsèy apot Pòl bay so frè ké sò-ya ki té Éfèz. I ankourajé yé « vin gran » annan domenn èspirityèl-a (Éph. 4:13). A  rounòt fason pou di : « Kontinyé fè progrè. » I konparé zafè vin gran annan domenn èspirityèl ké lò roun timoun ka grandi. Manman ké papa-ya tou fyèr di yé ti bébé, mé ti bébé-a pa pouvé rété konsa pou tout-tan. Roun jou, i ké divèt arété « fè kou roun timoun » (1 Cor. 13:11). A menm bagaj-a pou krétyen-yan : apré nou batizé, nou divèt kontinyé fè progrè. Annou wè plizyèr konsèy ki ké idé nou fè sa.

4. Ki bèl kalité ké pouvé idé to fè progrè annan domenn èspirityèl ? Èspliké (Philippiens 1:9).

⁴ Fè to lanmou pou Jéova vin pi fò. To ja kontan Jéova bokou. Mé to lanmou pou li pouvé divini pi fò ankò. Kouman ? Annan Philippiens 1:9 (li), nou ka wè kouman nou pouvé fè sa. Pòl priyè pou Filipyen-yan té « toujou gen plis lanmou ». Donk nou lanmou pouvé divini pi fò. A sa ki ké rivé si nou ka chaché gen « vré konésans-a » ké roun « entélijans ki parfè ». Pi nou ka anprann konnèt Jéova, pi nou kontan l’ é pi nou kontan so kalité ké fason i ka aji. Nou plis anvi ankò fè li plézi é nou pa lé fè anyen ki pouvé fè li lapenn. É nou ka travay rèd pou nou byen konprann so volonté é kouman pou nou aji annan menm sans-a.

5-6. Kouman to pouvé fè to lanmou pou Jéova vin pi fò ? Èspliké.

⁵ Jézi ka imité parfètman kalité Jéova gen. Donk si nou ka anprann konnèt Jézi pi byen, nou ké pouvé kontan Jéova plis (Héb. 1:3). É pi bon fason i gen pou anprann konnèt Jézi pi byen, a lò to ka étidyé kat Évanjil-ya. Si to pòkò pran labitid li Labib-a chak jou, to pouvé koumansé aprézan. Toupannan to ka li istwè lavi Jézi, byen gadé so bèl kalité. Moun té pouvé alé bò d’ li fasilman é i té ka byen rousouvwè yé ; parèkzanp, i té ka pran timoun-yan annan so bra (Marc 10:13-16). É i té ka mété so disip alèz ; parèkzanp, yé pa té pè di li sa yé té ka pansé (Mat. 16:22). Nou savé ki Jézi té ka imité so papa, donk sa lé di ki sa fasil pou palé pou Jéova osi. Nou pouvé priyè l’. Lò nou ka priyè l’, nou pouvé di tousa nou gen asou nou tchò. Nou savé ki i pa ké kondané nou. I kontan nou, é i ka gadé pou nou (1 Pierre 5:7).

⁶ Jézi té ka rousanti lapenn moun-yan annan so tchò. Men sa apot Matyé di asou li : « Lò i wè kantité moun ki té la, so tchò raché, paské yé té tou kanyankanyan ké pédi kou mouton ki pa gen bèrjé » (Mat. 9:36). É Jéova li menm ? Kisa i ka rousanti pou moun-yan ? Jézi di : « Mo Papa ki annan syèl-a pa lé rounsèl annan sa piti-ya mouri » (Mat. 18:14). Sa paròl-ya ka rasiré nou ! Pi nou ké anprann konnèt Jézi pi byen, pi nou lanmou pou Jéova ké vin pi fò.

7. Ki bénédiksyon to ké gen si to ka pasé tan ké krétyen ki gen èspéryans ?

⁷ Si to ka pasé tan ké frè ké sò-ya ki gen èspéryans annan to asanblé, to ké anprann kontan Jéova plis, é to lanmityé ké li ké vin pi fò. Gadé kouman tchò sa frè ké sò-ya kontan ! Yé désidé sèrvi Jéova é yé pa ka rigrété sa désizyon-an. Doumandé yé rakonté to sa yé viv annan yé sèrvis pou Jéova. É lò to gen roun désizyon enpòrtan pou to pran, doumandé yé bay to konsèy.  Sonjé ki « lò i gen roun patché moun pou bay konsèy, tout bagaj ka maché byen » (Prov. 11:14).

8. Kisa to pouvé fè si roun jou to ka douté di sa Labib-a ka di ?

⁸ Lò to pa sir di roun bagaj, chaché prèv. Kou nou wè l’ annan  paragraf 2-a, Satan ké éséyé anpéché to vansé plis annan domenn èspirityèl-a. Roun fason i pouvé fè sa, a fè to douté di sèrten ansèyman ki annan Labib-a. Parèkzanp, roun jou to ké tonbé asou théorie évolution-an ki ka dérèspèkté Bondjé. Pitèt to pa janmen réfléchi asou sa lò to té piti. Mé aprézan to vin gran, a sa yé dèt ka anprann to lékòl. Sa to profésèr ka di pou montré ki évolution-an vré pouvé sanblé lojik, mé pitèt yé pa janmen pran tan gadé prèv-ya ki ka montré ki i gen roun Kréyatèr. Sonjé prensip-a ki annan Proverbes 18:17 : « Prémyé moun-an ki ka rakonté sopa vèrsyon di sa ki pasé, a li ki sanblé gen rézon, jiktan ròt moun-an rivé épi ka doumandé l’ bay prèv di sa i ka di. » Pasé to valé tousa yé ka di to lékòl, pran tan fouyé annan Paròl Bondjé-a. Chaché annan nou piblikasyon. Palé ké frè ké sò ki té ka krè annan évolution-an anvan. Doumandé yé kisa ki fè yé sir ki i gen roun Kréyatèr ki kontan nou. Sa kalité kozé-ya pouvé idé to trouvé prèv ki i byen gen roun Kréyatèr.

9. Kisa sa Mélissa di ka anprann to ?

⁹ Roun sò yé ka aplé Mélissa * étidyé asou kréyasyon-an, é sa idé l’ bokou. I ka di : « Lékòl, lò yé ka palé di évolution-an, yé té ké di yé gen rézon. O koumansman, mo pa té lé chaché savé si a té vré si a pa té vré, paské mo té pè wè ki évolution-an té vré. Mé mo di an mo tchò : Jéova pa lé nou adoré l’ san nou pa pozé nou kò pyès késyon. Donk mo koumansé chaché. Mo li liv Y a-t-il un Créateur qui se soucie de vous ? Ké ti liv La vie a-t-elle été créée ? ké Cinq questions à se poser sur l’origine de la vie. A té sa menm mo té bézwen, mo té divèt fè sa pi bònò ! »

10-11. Kisa ki ké idé to rété pròp annan zafè moralité-a ? (1 Thessaloniciens 4:3, 4).

 ¹⁰ Rété lwen di imoralité sèksyèl-a. Lò to sa roun jennjan, anvi gen rélasyon sèksyèl pouvé fò, é pitèt ròt-ya ka éséyé pousé to fè roun bagaj sèksyèl imoral. Satan té ké lé to tonbé annan sa trap-a. Kisa ki pouvé idé to tchenbé douvan tantasyon-yan ? (li 1 Thessaloniciens 4:3, 4). Lò to ka priyè Jéova, di li sa to ka rousanti é doumandé li fòrs pou to tchenbé douvan tantasyon-yan (Mat. 6:13). Pa bliyé Jéova lé idé to ; i pa la pou kondané to (Ps. 103:13, 14). Paròl Bondjé-a osi pouvé idé to. Mélissa nou ja palé anvan té ka djoubaté pou i pa gen vyé lidé sèksyèl. I ka di : « Kou mo té ka li Labib-a chak jou, sa idé mo briga ké vyé anvi mo té gen annan mo tchò. Sa té ka fè mo sonjé ki mo té bay Jéova mo lavi, é ki mo té désidé adoré l’ pannan tout mo lavi » (Ps. 119:9).

¹¹ Pa éséyé réglé to problèm to tousèl. Di to papa ké to manman ké kisa to ka briga. A vré, sa pa fasil di palé di to ti zafè, mé sa enpòrtan pou to fè sa. Mélissa ka di : « Mo doumandé Jéova bay mo kouraj épi mo palé ké mo papa. Apré sa, mo té soulajé ! Mo té savé ki Jéova té fyèr di mo. »

12. Kisa ki ké idé to pran bon désizyon ?

¹² Lésé prensip-ya ki annan Labib-a gidé to. Pi to ké vin gran, pi to papa ké to manman ké lésé to pran to désizyon. Mé i gen roun patché bagaj to pòkò savé. Kouman to pouvé panga pou to pa fè roun bagaj ki pouvé gaté to lanmityé ké Jéova ? (Prov. 22:3). Roun sò yé ka aplé Kari ka di sa ki idé l’ pran pi bon désizyon. I konprann ki krétyen ki gen èspéryans pa bézwen roun lalwa pou chak sitiasyon. I ka di : « Mo té divèt anprann konprann prensip ki annan Labib-a pasé mo chaché swiv roun lalwa. » Lò to ka li Labib-a pozé to kò sa késyon-yan : « Kisa sa vèrsé-a ka anprann mo asou fason Jéova ka wè bagaj-ya ? Ès i gen prensip ki ka fè mo savé sa mo divèt fè pou mo pouvé fè l’ plézi ? Si mo ka swiv sa prensip-ya, ki bénédiksyon mo ké jwenn ? » (Ps. 19:7 ; Is. 48:17, 18). Li Labib-a é pran tan réfléchi asou prensip-ya ki annan l’. Konsa, sa ké pi fasil pou to pran désizyon ki ka fè Jéova plézi. Pi to ké fè progrè, pi to ké wè ki to pa bézwen roun lalwa pou chak sitiasyon, paské to ké konprann kouman Jéova ka wè bagaj-ya.

13. Kisa bon zanmi pouvé bay to anvi fè ? (Proverbes 13:20).

¹³ Chwazi zanmi ki kontan Jéova. Kou nou ja wè l’ annan paragraf 7-a, to zanmi pouvé idé to divini roun krétyen ki gen roun bon lanmityé ké Jéova (li Proverbes 13:20). Roun sò yé ka aplé Sara té koumansé vin tris. Mé roun bagaj idé l’ gen plis lajwa. Sara ka rakonté : « Mo trapé bon zanmi jiskont lò mo té bézwen. Chak simenn, mo té ka étidyé Tourdégard-a ansanm ké roun jenn sò. É gras a rounòt sò mo koumansé bay répons annan réinyon-yan. Mo zanmi idé mo é yé bay mo anvi pran tan byen étidyé ké priyè. Mo lanmityé ké Jéova divini pi fò é mo tchò viré kontan. »

14. Kouman Julien trapé bon zanmi ?

¹⁴ Kouman to pouvé gen zanmi ki ké idé to fè bèl bagaj ? Julien, roun frè ki ansyen aprézan ka di : « Lò mo té pi  jenn, mo trapé bon zanmi lò mo té ka préché ké frè ké sò-ya annan mo asanblé. Yé té ka préché ké bokou balan é gras a yé, mo wè ki prédikasyon-an pouvé fè nou tchò kontan. Sa bay mo anvi pran sèrvis a plen tan-an. Mo konprann ki mo pa té gen bokou bon zanmi paské mo té ka chaché zanmi ki té gen mo laj rounso. Pita, mo trapé bon zanmi osi annan Bétèl-a. Yé èkzanp idé mo chwazi mo anmizman pi byen é sa fè mo vin pi pròch ké Jéova. »

15. Ki konsèy Pòl bay Timoté ? (2 Timothée 2:20-22).

¹⁵ Kisa to pouvé fè si to ka wè ki roun moun annan asanblé-a pa sa roun bon frékantasyon ? Pòl té savé ki roun ran annan asanblé 1^é syèk-a pa té ka ni réfléchi ni aji kou krétyen-yan divèt fè l’. A pou sa i di Timoté pa rété ké sa moun-yan (li 2 Timothée 2:20-22). Nou lanmityé ké Jéova gen bokou valò. Nou travay tèlman rèd pou vin pròch ké Jéova, alòr annou pa lésé pyès moun kasé sa lanmityé-a ! (Ps. 26:4).

16. Ki kalité òbjèktif to divèt chwazi ?

¹⁶ Chwazi òbjèktif ki vo lapenn. Chwazi òbjèktif ki ké fè to lafwa vin pi fò é ki ké idé to divini roun krétyen ki gen roun bon lanmityé ké Jéova (Éph. 3:16). Parèkzanp, to pouvé désidé étidyé épi li Labib-a pi souvan (Ps. 1:2, 3). To pouvé osi priyè pi souvan épi priyè ké tout to tchò. Pitèt to bézwen kontrolé to kò plis annan zafè anmizman to ka chwazi ouben annan fason to ka sèrvi to tan (Éph. 5:15, 16). Lò Jéova ké wè ki to ka travay rèd pou to fè plis progrè, sa ké fè l’ plézi.

17. Ki bénédiksyon to ké jwenn si to ka idé ròt-ya ?

¹⁷ Pou to divini roun krétyen ki gen roun bon lanmityé ké Jéova, sa enpòrtan pou to idé ròt-ya. Jézi di : « Nou tchò kontan plis lò nou ka bay ki lò nou ka rousouvwè » (Actes 20:35). To ké trapé bokou bénédiksyon si to ka sèrvi to fòrs ké to tan pou idé ròt-ya. Parèkzanp, to pouvé désidé idé frè ké sò-ya  ki ja granmoun ké sa-ya ki andikapé annan to asanblé. Doumandé to kò : « Ès yé bézwen roun moun fè komisyon pou yé ouben idé yé ké yé aparèy élèktronik ? » Si to sa roun frè, chwazi òbjèktif divini roun asistan, konsa to ké pouvé idé to frè ké sò-ya pi byen (Phil. 2:4). To ka montré osi ki to kontan sa-ya ki pa annan asanblé-a lò to ka di yé bon nouvèl Rwayonm-an (Mat. 9:36, 37). É si sa posib, désidé divini roun sèrvitèr a plen tan.

18. Kouman sèrvis a plen tan-an pouvé idé to vin pi pròch ké Jéova ?

¹⁸ Sèrvis a plen tan-an pouvé idé to gen roun patché okazyon pou vin pi pròch ké Jéova. Parèkzanp, sèrvis pyonyé-a pouvé pèrmèt to fè Lékòl pou évanjélizatèr Rwayonm-an, travay annan Bétèl-a, ouben asou chantyé pou òrganizasyon-an. Kaitlyn, roun jenn sò pyonyé ka di : « Sa ki idé mo bokou pou fè progrè apré mo batenm, a pasé tan annan prédikasyon-an ké frè ké sò-ya ki gen èspéryans. Yé èkzanp bay mo anvi gen plis konésans asou Labib-a épi vin pi vayan annan zafè prédikasyon-an. »

19. Ki bénédiksyon to ké trapé si to ka kontinyé vin pi pròch ké Jéova ?

¹⁹ Si to ka kontinyé vin pi pròch ké Jéova, to ké jwenn roun patché bénédiksyon. To pa ké pédi tan sèrvi to fòrs pou fè bagaj ki pa vo lapenn (1 Jean 2:17). To tchò pa ké fè to mal paské to pran mové désizyon. To ké rivé annan to lavi é to tchò ké kontan (Prov. 16:3). Ki yé vyé ki yé jenn, to bèl èkzanp ké bay to frè ké sò-ya kouraj (1 Tim. 4:12). É pi enpòrtan ankò, to ké gen lapè annan to tchò é to ké kontan paské to ké savé ki to ka fè Jéova plézi é paské to sa so zanmi (Prov. 23:15, 16).