1. Dapré 1 Thessaloniciens 5:11, annan ki travay nou tout ka partisipé ?

 ÈS TO asanblé ja konstrwi ouben ranjé roun sal di Rwayonm ? Si to ja viv sa, asiré pa pitèt to pa ké janmen bliyé prémyé réinyon zòt fè annan sa sal-a. To di Jéova mèrsi plizyèr fwa. Anfèt, to té tèlman kontan ki pitèt to pa menm té pouvé chanté prémyé kantik-a. Nou bèl sal di Rwayonm-yan ka louwé Jéova. Mé nou pouvé louwé Jéova plis ankò lò nou ka partisipé annan rounòt kalité travay. Sa travay-a pi bèl pasé fè batiman. A roun travay pou ankourajé sa-ya ki ka vini annan sa batiman-yan. A sa kalité travay-a apot Pòl té ka sonjé lò i ékri sa ki annan 1 Thessaloniciens 5:11 (li) (sa artik-a ka apiyé asou sa vèrsé-a). Nou ka konprann sa paské « bay plis fòrs », sa lé di « konstrwi ».

2. Kisa nou ké wè annan sa artik-a ?

² Pòl té savé kouman i té pouvé bay so frè ké sò-ya plis fòrs. I té ka konprann yé lapenn. Annan sa artik-a, nou ké wè kouman i idé so frè ké sò-ya 1) tchenbé rèd magré yé problèm, 2) viv annan lapè ké yé konpanyen é 3) fè yé lafwa annan Jéova vin pi fò. Annou wè kouman nou pouvé imité l’ épi bay nou frè ké sò-ya plis fòrs (1 Cor. 11:1).

3. Kouman Pòl té ka wè so travay ké sa i té ka fè pou Jéova ?

³ Pòl té kontan so frè ké sò-ya bokou. Kou li menm té pasé anba roun patché traka, i té pouvé konprann so frè ké sò-ya ki té ka djoubaté ké yé problèm. Roun jou, Pòl pa  té gen soumaké ankò é i té divèt trouvé roun travay pou trapé sa i té bézwen pou viv é pou idé so konpanyen osi (Actes 20:34). I té anprann fè tant. Donk, lò i rivé Korent, i koumansé fè tant ké Akilas ké Prisil. Mé « chak saba », i té ka préché pou Jwif-ya ké Grèk-ya. Apré sa, lò Silas ké Timoté rivé, i « koumansé mété tout so fòrs annan prédikasyon-an » (Actes 18:2-5). Pòl pa janmen bliyé ki sa ki té pi enpòrtan annan so lavi, a té adoré Jéova. Kou Pòl té ka travay pou ganyen so lavi é an menm tan té ka travay pou Jéova, i té byen plasé pou ankourajé so frè ké sò-ya. I fè yé sonjé ki yé pa té divèt lésé ni traka lavi-a, ni yé rèsponsabilité annan yé fanmi anpéché yé mété yé lidé « asou sa ki té pi enpòrtan », sa lé di tousa yé té ka fè pou adoré Jéova (Phil. 1:10).

4. Kouman Pòl ké Timoté idé yé frè ké sò-ya tchenbé magré pèrsékisyon-an ?

⁴ Roun ti moman apré yé fè asanblé Tésalonik-a, roun patché moun koumansé éséyé baré chimen sa frè ké sò-ya ki té fin batizé. Roun jou, roun bann moun ki té méchan té ka chaché Pòl ké Silas. Kou yé pa té ka trouvé yé, « yé mennen [...] plizyèr frè douvan chèf vil-a ». Yé té ka rélé : « Sa mouché-ya pa ka obéyi lalwa Sézar » (Actes 17:6, 7). Ès to ka imajiné kouman sa frè ké sò-ya ki té fin batizé, té divèt pè lò yé wè ki plizyèr mouché annan yé vil té ka ataké yé ? Yé té pouvé ralanti annan sa yé té ka fè pou Jéova, mé Pòl pa té lé sa rivé yé. Menm si Pòl ké Silas té divèt pati, yé fè tout bagaj pou asanblé-a ki té fin fèt trapé tousa i té bézwen. Pòl di yé : « [Nou] voyé Timoté pou zòt, nou frè [...], pou i bay zòt fòrs é pou i konsolé zòt pou zòt lafwa rété fò, pou pyès moun pa tonbé akoz di sa éprèv-ya » (1 Thess. 3:2, 3). Asiré pa pitèt Timoté té wè pèrsékisyon annan vil Lis, koté i té fèt. É i té wè kouman Pòl té ankourajé frè ké sò-ya ki té la. I té wè osi kouman Jéova té soutni sa frè-ya. Donk i té pouvé rasiré so nouvo frè ké sò-ya é di yé ki tout bagaj té ké byen pasé pou yé osi. Yé té ké rivé tchenbé rèd magré pèrsékisyon-an (Actes 14:8, 19-22 ; Héb. 12:2).

5. Ki bénédiksyon Bryant trapé lò roun ansyen idé li ?

⁵ Kouman Pòl ankourajé so frè ké sò-ya ankò ? Lò li ké Barnabé « routounen Lis, Ikonyòm ké Antyòch », yé « mété plizyèr ansyen pou yé annan chak asanblé » (Actes 14:21-23). Nou pouvé sir ki sa frè-ya té sa vréman roun bèl ankourajman pou asanblé-a, kou ansyen-yan jòdla. Men sa roun frè yé ka aplé Bryant di : « Lò mo pran mo 15 an, mo papa lésé kaz-a é yé èskominyé mo manman. Mo santi mo té tousèl ké mo kò é mo té dékourajé. » Kisa ki idé Bryant tchenbé annan sa éprèv-a ? I ka di : « Tony, roun ansyen, té ka palé ké mo souvan lò nou té gen réinyon ouben ròt moman ankò. I té ka palé mo di plizyèr frè ké sò ki kontinyé gen tchò kontan magré yé éprèv. I té ka montré mo Psaume 27:10 é i té ka palé mo souvan di Ézékyas ki rété fidèl menm si so papa pa té sa roun bon èkzanp pou li. » Kouman sa idé Bryant ? Bryant ka di : « Gras a ankourajman Tony bay mo, mo koumansé sèrvis a plen tan-an, é sa sèrvis-a ka fè mo tchò kontan toubonnman. » Zòt ki ansyen, chaché wè kimoun annan asanblé-a bézwen roun « bon paròl » kou Bryant (Prov. 12:25).

6. Kouman Pòl itilizé istwè lavi sèrvitèr Bondjé tan-lontan pou ankourajé so frè ké sò-ya ?

 ⁶ Pòl fè so frè ké sò-ya sonjé ki « roun patché témwen » rivé tchenbé magré plizyèr problèm, gras a fòrs Jéova ka bay (Héb. 12:1). Pòl té savé ki istwè sa sèrvitèr Bondjé-ya té pouvé bay so frè ké sò-ya kouraj épi idé yé kontinyé mété yé lidé asou « vil Bondjé ki vivan-an » (Héb. 12:22). A menm bagaj-a jòdla. Kimoun ki pa jwenn kouraj lò i tandé palé di Jédéyon, Barak, David, Samiyèl ké roun patché ròt moun ankò ? (Héb. 11:32-35). É kisa nou pouvé di asou frè ké sò-ya jòdla ki ka montré roun bèl èkzanp ké yé lafwa ? Bokou frè ké sò ka ékri syèj mondyal-a pou di kouman yé lafwa vin pi fò lò yé li istwè lavi roun Témwen Jéova jòdla.

7. Kisa konsèy Pòl bay annan Romains 14:19-21 ka anprann nou ?

⁷ Nou ka ankourajé nou frè ké sò-ya osi lò nou ka travay pou i gen lapè annan asanblé-a. Nou pa divizé menm si chak moun ka pansé roun fason. É nou pa ka ensisté pou yé fè kou nou lé lò i pa gen pyès prensip annan Labib-a nou divèt swiv. Annou pran roun èkzanp : Annan asanblé Ròm, i té gen krétyen ki té jwif épi ròt krétyen ki pa té jwif. Lò Lalwa Bondjé té bay Moyiz té fini, moun pa té bézwen rèspèkté Lalwa asou sèrten manjé ki té entèrdi ankò (Marc 7:19). Donk roun ran krétyen ki té jwif té ka santi yé kò alèz pou manjé tout kalité manjé, parkont, rounòt ran pa té lé fè sa. Asanblé-a té divizé parapòrta sa problèm-an. Donk, Pòl fè yé sonjé kouman sa té enpòrtan pou yé chaché lapè, é i di yé : « Miyò to pa manjé vyann, ni bwè diven, ni fè anyen ki pouvé fè to frè bité » (li Romains 14:19-21). A konsa Pòl idé so frè ké sò-ya konprann ki, si chak moun té ka pran yépa bò, sa té ké mennen problèm pou roun ran annan yé é pou tout asanblé-a osi. Li menm té paré arété fè bagaj i té gen drwa fè, pou i pa choké ròt-ya (1 Cor. 9:19-22). Menm fason-an, nou pouvé ankourajé ròt-ya é nou pouvé chaché lapè si nou pa ka fè pyès wélélé lò a chak moun ki pou désidé sa i lé fè.

8. Kouman Pòl réyaji lò roun problèm enpòrtan té pouvé mété dézòrd annan asanblé-a ?

⁸ Mé kouman nou divèt réyaji lò roun ran moun annan asanblé-a pa ka tonbé dakò asou késyon ki enpòrtan ? La ankò, Pòl ka bay nou roun bèl èkzanp. Roun ran krétyen annan 1^é syèk-a té ka ensisté pou krétyen-yan ki pa té jwif té sirkonsi. Pitèt yé pa té lé pyès moun vin kritiké Jwif-ya (Gal. 6:12). Pòl pa té dakò ké sa menm, mé i pa oblijé ròt moun swiv li. Ké imilité, i doumandé apot-ya ké ansyen Jérizalèm-yan réfléchi asou sa késyon-an (Actes 15:1, 2). Finalman, sa i fè idé sa krétyen-yan gardé yé lajwa ké lapè annan asanblé-a (Actes 15:30, 31).

9. Kouman nou pouvé swiv èkzanp Pòl ?

⁹ Si roun gro blo lévé, nou ké travay pou i gen lapè si nou k’alé wè sa-ya Jéova mété pou pran swen di asanblé-a. Souvan, a annan nou piblikasyon ouben annan konsèy òrganizasyon Jéova ka bay ki nou ké trouvé sa nou divèt fè dapré prensip ki annan Labib-a. Si nou ka swiv sa yé ka di nou pasé nou chaché blijé moun fè kou nou lé, nou ké idé asanblé-a viv annan lapè.

10. Ki ròt bagaj Pòl fè pou i té gen lapè annan asanblé-a ?

 ¹⁰ Pòl té ka travay pou i gen lapè annan asanblé-a. Pasé i palé di défo so frè ké sò-ya té gen, i té ka palé di yé bèl kalité. Parèkzanp, lò i fini lèt i ékri pou asanblé ki té Ròm, Pòl nonmen non roun patché frè ké sò. É byen souvan, i di roun bèl bagaj ouben roun détay asou yé. Nou pouvé imité Pòl lò nou pa pè palé di bèl kalité nou frè ké sò-ya gen. Si nou ka fè sa, frè ké sò-ya ké anvi vin ankò pi pròch ké yé konpanyen, é sa ké pèrmèt lanmou ki annan asanblé-a divini pi fò.

11. Kouman lapè pouvé rouvini apré roun djopopo ?

¹¹ Détan, menm krétyen ki gen èspéryans pouvé pa tonbé dakò ouben menm babyé roun ké ròt. A sa ki rivé Pòl ké so bon zanmi Barnabé : roun té lé Mark vini ké yé annan vwayaj misyonèr yé té k’alé fè, é ròt-a pa té lé. « Yé pété roun blo », é yé chak pran yé bò (Actes 15:37-39). Mé Pòl, Barnabé ké Mark roudivini bon zanmi ; a konsa yé montré ki sa ki té pi enpòrtan pou yé, a té ki asanblé-a viv ansanm annan lapè. Pita, Pòl di bèl bagaj asou Barnabé ké Mark (1 Cor. 9:6 ; Col. 4:10). Nou menm osi, nou divèt réglé problèm nou pitèt gen ké frè ké sò-ya annan asanblé-a, épi apré sa, kontinyé wè bèl kalité yé gen. Konsa, nou ké idé pou i gen lapè é pou asanblé-a viv byen ansanm (Éph. 4:3).

12. Ki problèm nou frè ké sò-ya ka jwenn ?

¹² Nou ka ankourajé nou frè ké nou sò-ya lò nou ka fè yé lafwa annan Jéova vin pi fò. Détan, yé fanmi ki pa témwen, yé kanmarad lékòl ouben yé kolèg travay ka ari di yé tèt. Ròt frè ké sò gen problèm santé ki grav ouben yé ka briga ké sa yé ka rousanti annan yé tchò. I gen frè ké sò ki batizé dipi nanninannan é sa ka fè lontan yé ka antann sa monn-an fini. Tout sa sitiasyon-yan pouvé sa roun pyèj pou nou lafwa. Mé annan 1^é syèk-a osi, nou frè ké sò-ya té gen menm kalité traka. Kisa Pòl fè pou fè yé lafwa vin pi fò ?

13. Kouman Pòl idé sa-ya ki té ka jwenn moun ki té ka ari di yé tèt akoz di sa yé té ka krè ?

¹³ Pòl té ka sèrvi Ékritir-ya pou fè lafwa so frè ké sò-ya vin pi fò. Parèkzanp, krétyen-yan ki té jwif pitèt pa té savé kisa pou yé té réponn lò moun annan yé fanmi té ka kritiké yé, té ka di ki lalwa jwif-ya té pi rot pasé lalwa krétyen-an. Asiré pa pitèt, lèt Pòl ékri pou Ébré-ya divèt bay sa krétyen-yan fòrs (Héb. 1:5, 6 ; 2:2, 3 ; 9:24, 25). Yé té pouvé sèrvi fason i té ka byen prézanté bagaj-ya pou fè sa-ya ki té ka akizé yé fronmen yé bouch. Jòdla, nou pouvé idé nou frè ké sò-ya ki gen sa problèm-an sèrvi nou piblikasyon-yan pou yé èspliké poukisa yé ka krè sa yé ka krè. É si jennjan-yan ka jwenn moun ki ka ari di yé tèt paské yé ka krè ki i gen roun Kréyatèr, nou pouvé idé yé jwenn enfòrmasyon annan dé ti liv La vie a-t-elle été créée ? ké Cinq questions à se poser sur l’origine de la vie.

14. Menm si Pòl té ka pasé bokou tan ka préché ké ansényé, kisa i pa té ka bliyé fè ?

¹⁴ Pòl té ka ankourajé so frè ké sò-ya montré yé té kontan yé konpanyen ké « bèl bagaj » yé té ka fè (Héb. 10:24). I idé so frè ké sò-ya ké sa i té ka di, mé osi ké sa i té ka fè pou yé. Parèkzanp, lò i té gen lafamin an Jidé, Pòl idé pou distribiyé manjé ké ròt bagaj pou frè ké sò-ya  (Actes 11:27-30). Anfèt, menm si Pòl té ka pasé bokou tan ka préché ké ansényé, i toujou té ka chaché fason pou idé sa-ya ki pa té gen sa yé té bézwen pou viv (Gal. 2:10). Konsa, i té ka ankourajé so frè ké sò-ya pou yé té pi sir ankò ki Jéova té ké pran swen di yé. Jòdla, lò nou ka bay nou tan, nou fòrs ouben sa nou konnèt fè pou soutni komité pou poté sékour, nou menm osi nou ka idé nou frè ké sò-ya gen plis lafwa. Menm bagaj-a ka pasé lò nou ka bay nou soumaké pou tousa òrganizasyon-an ka fè asou tout latè-a. A konsa épi ròt fason ankò, nou ka idé nou frè ké sò-ya pou yé plis sir ankò ki Jéova pa ké janmen lagé yé.

15-16. Kouman nou divèt aji ké sa-ya yé lafwa fébli ?

¹⁵ Pòl pa janmen lésé sa-ya yé lafwa té fébli tonbé. I montré i té gen konpasyon pou yé épi lò i té ka palé ké yé, i té janti é i té ka di bèl bagaj (Héb. 6:9 ; 10:39). Parèkzanp, annan lèt i voyé pou Ébré-ya, souvan i di « nou ». Konsa, i té ka rékonnèt ki li menm osi té divèt swiv konsèy i té ka bay (Héb. 2:1, 3). Kou Pòl, nou pa lé lésé sa-ya yé lafwa vin fèb tonbé. Pasé nou fè sa, nou ka ankourajé yé, nou ka montré yé nou ka gadé pou yé. A konsa, nou ka montré ki nou kontan yé. A pa sa nou ka di yé rounso ki ké ankourajé yé mé osi fason nou ka palé ké yé.

¹⁶ Pòl rasiré so frè ké sò-ya é i di yé ki Jéova té ka byen wè bèl bagaj yé té ka fè (Héb. 10:32-34). Nou pouvé fè menm bagaj-a lò nou ka idé roun frè ouben roun sò ki fébli annan so lafwa. Parèkzanp, nou pouvé doumandé li rakonté nou kouman i vini annan lavérité ouben nou pouvé ankourajé li sonjé sitiasyon  koté Jéova idé li. Nou pouvé profité di sa okazyon-an pou montré l’ ki Jéova pa ka bliyé lanmou i montré pou so non anvan é ki i pa ké janmen lésé l’ tonbé (Héb. 6:10 ; 13:5, 6). Sa kozé-ya pouvé ankourajé sa frè ké sò-ya pou yé kontinyé adoré yé Bondjé.

17. Annan ki domenn nou lé divini pi vayan ?

¹⁷ Piti piti, roun ouvriyé ki ka travay annan zafè batiman ka vin pi vayan. Menm fason-an, nou menm osi nou pouvé divini plizanpli vayan annan zafè ankourajé nou konpanyen. Pou nou idé nou frè ouben nou sò gen plis fòrs pou yé tchenbé lò yé gen éprèv, nou pouvé palé di sèrvitèr Jéova ki viv menm kalité sitiasyon ki yé. Nou pouvé travay pou i gen lapè annan asanblé-a lò nou ka palé di bèl bagaj nou frè ké nou sò-ya ka fè. Nou pouvé idé pou lapè kontinyé rété annan asanblé-a lò i gen roun problèm é pou i viré gen lapè lò sèrten frè ké sò pa ka tonbé dakò. É nou pouvé osi ankourajé ròt-ya lò nou ka bay yé prèv annan Labib-a ki ké idé yé èspliké sa yé ka krè. Nou pouvé idé yé lò yé bézwen épi soutni yé si yé lafwa fébli.

18. Kisa nou lé kontinyé fè ?

¹⁸ Sa-ya ki ka travay pou konstrwi kaz koté nou ka adoré Jéova, yé tchò toujou kontan. Nou tchò pouvé kontan lò nou ka ankourajé nou frè ké sò-ya. Batiman nou ka fè ké abimé piti piti, mé lò nou ka travay pou ankourajé ròt-ya, sa pouvé tchenbé pou tout-tan. Atò, annou byen désidé « kontinyé ankourajé é bay nou konpanyen plis fòrs » (1 Thess. 5:11).