1. Poukisa sa ka fè nou tchò kontan rakonté kouman nou fè konnèt lavérité-a ?

 « KOUMAN to fè konnèt lavérité-a ? » Yé dèt pozé to sa késyon-an plizyèr fwa. Lò nou ka kontré ké nou frè ké sò-ya, a roun annan prémyé bagaj nou ka doumandé yé. Nou kontan tandé yé rakonté kouman yé anprann konnèt ké kontan Jéova, é nou kontan èspliké yé ki bèl bagaj lavérité ka fè pou nou (Rom. 1:11). Sa kalité kozé-ya ka fè nou sonjé kouman lavérité-a gen valò. Sa ka pèrmèt nou osi pi désidé « kontinyé maché annan lavérité-a », sa lé di kontinyé fè sa ki fo annan nou lavi pou nou pouvé gen bénédiksyon Jéova é pou i kontan nou (3 Jean 4).

2. Di kisa nou ké palé annan sa artik-a ?

² Annan sa artik-a, nou ké wè déztrwa bagaj ki ka fè nou kontan lavérité-a. Apré sa, nou ké wè kouman nou pouvé kontinyé montré ki nou kontan lavérité-a. Sa ké pèrmèt nou gen plis rékonésans pou Jéova ki fè nou vini òbò li (Jean 6:44). É sa ké bay nou plis anvi fè ròt-ya konnèt lavérité-a.

3. Poukisa nou kontan lavérité-a ?

³ Nou kontan lavérité-a pou plizyèr rézon. Mé pi enpòrtan-an, a paské nou kontan Jéova : a koté li lavérité-a ka soti ! Lò nou étidyé so Paròl, Labib-a, nou anprann ki i Tou-Pwisan é ki a li ki fè syèl-a ké latè-a. Mé  nou anprann osi ki i sa roun Papa annan syèl-a ki kontan nou bokou (1 Pierre 5:7). Nou anprann osi ki nou Bondjé « plen ké pityé ké tandrès, i pa ka kouri faché, i plen ké lanmou fidèl é i toujou ka di lavérité » (Ex. 34:6). Jéova kontan lajistis (Is. 61:8). Sa ka fè li lapenn lò i ka wè nou soufri, é i présé fè nou arété soufri. É a sa i ké fè lò moman-an i chwazi ké rivé (Jér. 29:11). Men roun bèl èspwar ! Nou blijé kontan Jéova !

4-5. Poukisa apot Pòl di ki nou èspwar kou roun lank ?

⁴ Poukisa nou kontan lavérité-a ankò ? Paské i ka pèrmèt nou santi nou kò byen. Annou pran roun èkzanp : nou èspwar. Èspwar nou gen-an ka fè parti di lavérité-a. Pou montré kouman sa èspwar-a gen valò, men sa apot Pòl ékri : « Nou gen sa èspwar-a kou roun lank pou nou lavi, sa èspwar-a sir ké solid » (Héb. 6:19). Menm fason roun lank ka anpéché roun bato pédi a lanmè, èspwar nou gen-an ka pèrmèt nou rété byen dibout lò nou ka jwenn éprèv.

⁵ Annan so lèt, Pòl té ka palé di èspwar krétyen-yan gen di viv annan syèl-a. Mé sa i di-a, a osi pou krétyen-yan ki gen èspwar viv pou tout-tan annan roun paradi asou latè-a (Jean 3:16). Asiré pa pitèt, èspwar nou gen-an bay nou lavi roun sans !

6-7. Kisa Ivonne rousanti lò i anprann lavérité asou sa dimen ké poté ?

⁶ Annou gadé sa Ivonne ka di. So papa ké so manman pa té Témwen Jéova, é lò i té piti, i té pè lanmò-a. I ka sonjé ki roun jou, i li roun bagaj i pa janmen bliyé : « Roun jou, tout moun ké mouri. » I ka di : « Sa lidé-a té ka anpéché mo dronmi : tout lannwit, mo té ka sonjé sa ki té ké rivé pita. Mo té ka di an mo tchò : “Sa lavi-a pa gen sans. Poukisa mo la ?” Mo pa té lé mouri ! »

⁷ Lò Ivonne té jennjan, i kozé ké Témwen Jéova-ya. I ka di : « Mo koumansé krè ki mo té pouvé gen èspwar viv pou tout-tan annan paradi-a asou latè-a. » Kisa i rousanti lò i anprann lavérité-a ? I ka di : « Mo pa pè ni sa dimen ké poté ni lanmò ankò, sa pa ka anpéché mo dronmi ankò ». Lavérité-a gen bokou valò pou Ivonne, é i kontan fè ròt-ya konnèt ki èspwar i gen (1 Tim. 4:16).

8-9. a) Ki sakrifis mouché-a annan èkzanp trézòr ki séré-a té paré pou fè ? b) Ki valò lavérité-a gen pou to ?

⁸ Bon nouvèl-a asou rwayonm Bondjé-a ka fè parti di lavérité-a osi. Jézi di ki bon nouvèl Rwayonm-an kou roun trézòr ki séré. Kou nou pouvé li l’ annan Matthieu 13:44, i di : « Rwayonm-an ki annan syèl-a kou roun trézòr yé séré annan roun chan. Roun mouché ka trouvé li é i ka viré séré l’. É afòrs i kontan, i ka alé vandé tousa i gen épi i ka achté chan-an. » Lò nou ka byen gadé, sa mouché-a pa té ka chaché trézòr-a. Mé lò i trapé l’, i fè roun gran sakrifis pou i té pouvé gen l’. I vandé tousa i té gen. Poukisa ? Paské i wè ki sa trézòr-a té gen valò. Sa trézòr-a té gen plis valò pasé tousa i té vandé pou achté l’.

⁹ Ès lavérité-a gen bokou valò pou to osi ? Asiré pa pitèt. Nou savé ki monn-an pa gen anyen ki pouvé bay nou menm lajwa nou gen lò nou ka sèrvi Jéova. É anplis di sa, nou gen  èspwar viv pou tout-tan anba dominasyon Rwayonm-an. I pa gen pyès sakrifis ki tro gran pou fè, pou nou pouvé kontinyé rété zanmi ké Jéova ! Sa ki ka fè nou tchò plis kontan, a « fè li plézi » (Col. 1:10).

10-11. Kisa ki fè Michael fè bokou chanjman annan so lavi ?

¹⁰ Près nou tout nou fè roun patché sakrifis pou fè Jéova plézi. Roun ran lésé roun bon travay. Rounòt ran désidé pa divini rich. Épi roun ròt ran ankò chanjé yé lavi konplètman. A sa Michael fè. So papa ké so manman pa té Témwen Jéova é lò i té jennjan, i té kontan karaté. I ka di : « Mo té fyèr pas mo té fò. Détan, mo té ka santi ki pyès moun pa té pouvé bat mo. » Mé lò i koumansé étidyé Labib-a, i anprann sa Jéova ka pansé di lavyolans (Ps. 11:5). I étidyé Labib-a ké roun frè ké so madanm é men sa i ka di asou yé : « Yé pa janmen di mo ki mo té divèt arété fè karaté : sa yé fè, a kontinyé anprann mo lavérité-a ki annan Labib-a. »

¹¹ Pi Michael té ka anprann konnèt Jéova, pi so lanmou pou li té ka vin fò. Sa ki touché l’ èspésyalman, a konpasyon Jéova ka montré pou sa-ya ki ka adoré l’. Piti piti, i konprann ki i té gen roun désizyon enpòrtan pou pran. I ka èspliké : « Mo té savé ki sa ki té ké pi rèd pou mo, a zafè arété fè karaté. Mé mo té savé osi ki sa té ké fè Jéova plézi é mo té sir ki i pa té gen pyès sakrifis ki té tro gran pou fè pou adoré Jéova. » Michael konprann ki lavérité i té anprann-an té gen bokou valò, é a pou sa i té paré fè bokou chanjman annan so lavi (Jacq. 1:25).

12-13. Kouman lavérité-a kléré lavi Mayli ?

¹² Pou byen montré kouman lavérité-a gen valò, Labib-a ka di osi ki i kou roun lanp ki ka kléré annan soukou (Ps. 119:105 ; Éph. 5:8). Mayli lévé an Azèrbaydjan, i wè kouman Paròl Bondjé-a kléré so lavi. So papa té mizilman é so manman té jwif. Men sa i ka rakonté : « Menm si mo toujou krè ki Bondjé ka èkzisté, i gen déztrwa késyon ki té ka fè mo réfléchi. Mo té ka doumandé mo kò : “Poukisa Bondjé fè nou, é poukisa roun ran ka soufri tout yé lavi pou yé kontinyé soufri pou tout-tan apré annan difé lanfè ?” Kou roun patché moun ka di ki tousa ki ka rivé nou, a volonté Bondjé, mo té ka doumandé mo kò : “Ès Bondjé ka jwé ké nou kou ti pòpòt annan so lanmen é ès i kontan wè moun soufri ?” »

¹³ Mayli chaché répons-ya pannan plizyèr lannen. Apré sa, i asèpté étidyé Labib-a é i divini Témwen Jéova. Men sa i ka èspliké : « Mo wè ki Labib-a lojik é sa chanjé fason mo té ka wè lavi-a nèt. Èsplikasyon mo trapé annan l’ idé mo gen lapè annan mo tchò. » Kou Mayli, nou tout ka louwé Jéova, ‘sa-la ki fè nou soti annan soukou pou fè nou vini annan so bèl limyèr’ (1 Pierre 2:9).

14. Kouman nou pouvé fè nou lanmou pou lavérité-a vini pi fò ? (gadé osi karé-a «  Ròt èkzanp »).

¹⁴ Nou wè jis déztrwa bagaj ki ka montré valò lavérité-a. Mé to dèt ka sonjé ròt bagaj ki ka montré ki lavérité-a gen valò. Pitèt to pouvé pran tan étidyé sa é chaché ròt bagaj ki ka fè ki lavérité-a gen valò ? Pi nou ké kontan lavérité-a, pi nou ké fè tousa nou pouvé pou montré ki nou kontan l’.

15. Kouman nou pouvé montré ki nou kontan lavérité-a ?

¹⁵ Nou pouvé montré ki nou kontan lavérité-a lò nou ka étidyé Labib-a ké nou piblikasyon-yan souvan. Ki nou konnèt lavérité-a dipi lontan, ki nou konnèt lavérité-a dipi roun ti moman sèlman, nou toujou gen bagaj pou anprann. Tou prémyé Tourdégard-a té ka di : « Lavérité-a kou roun ti flèr pédi an mitan sa monn-an plen ké manti. A kousidiré roun patché radyé té ka près toufé sa flèr-a, é sa pouvé rèd pou nou trapé lavérité-a. A pou sa, a pou nou chaché l’ san pran van pou nou trouvé l’. To divèt fè éfòr pou to gen l’. Pa janmen arété chaché plis vérité annan Labib-a. » A pou nou fè éfòr pou nou étidyé, mé a pa charyé dlo ké panyen !

16. Ki métòd pou étidyé to pi kontan ? (Proverbes 2:4-6).

¹⁶ A pa nou tout ki kontan li ké étidyé. Mé Jéova ka di nou « kontinyé chaché » épi chaché konprann lavérité-a pi byen ‘san nou pa arété’ (li Proverbes 2:4-6). Lò nou ka fè sa éfòr-a, nou  toujou ka trapé roun patché bénédiksyon. Lò Corey ka étidyé Labib-a, i kontan arété asou chak vèrsé. I ka èspliké : « Mo ka li tout nòt-ya, mo ka pran tout vèrsé-ya ki an référans é mo ka fouyé. […] Konsa, mo ka byen profité di sa mo ka li ! » Ki nou ka sèrvi sa métòd-a ouben rounòt, lò nou ka pran tan étidyé Labib-a, nou ka montré ki lavérité-a gen bokou valò pou nou (Ps. 1:1-3).

17. Kisa sa lé di maché annan lavérité-a ? (Jacques 1:25).

¹⁷ Nou byen savé ki étidyé vérité-ya ki annan Labib-a, a roun bon bagaj. Mé a pa sa rounso nou divèt fè. Nou divèt maché annan lavérité-a osi, sa lé di apliké sa nou ka anprann gras a sa nou étidyé. A konsa sèlman lavérité-a ké pèrmèt nou gen roun patché bénédiksyon é ké fè nou tchò kontan toubonnman (li Jacques 1:25). Kouman nou pouvé sir ki nou ka maché annan lavérité-a ? Roun frè ka di ki nou pouvé gadé sa nou ka fè annan nou lavi pou nou wè annan ki domenn nou ka apliké sa nou ka anprann é annan ki domenn nou divèt fè pi byen. A sa Pòl di nou fè : « Kèlkéswa progrè nou ja fè, annou kontinyé maché drèt asou menm chimen-an » (Phil. 3:16).

18. Poukisa nou lé « kontinyé maché annan lavérité-a » ?

¹⁸ A pa ti bénédiksyon nou ka jwenn lò nou ka fè éfòr pou « kontinyé maché annan lavérité-a » ! Nou lavi pi bèl, mé anplis di sa nou ka fè Jéova ké nou frè ké sò-ya plézi (Prov. 27:11 ; 3 Jean 4). A pi bon rézon nou gen pou nou kontan lavérité-a é pou nou maché annan lavérité-a !