1. Ki problèm Jozèf jwenn, é kouman i réyaji ?

 JOZÈF, pitit Jakòb, jwenn roun problèm ki té rèd. Roun fanm koumansé kasé ti bwa annan so zorè. I té ka di li : « Kouché ké mo ! » A té madanm so mèt, Pitifar. Mé Jozèf pa janmen asèpté fè sa. Nou té ké pouvé doumandé nou kò : « Poukisa i pa asèpté fè sa ? » Pitifar pa té la. Anplis di sa, Jozèf té sa roun èsklav, é sa madanm-an té pouvé fè li patché mizè si i pa té ka asèpté kouché ké li. Mé magré sa, Jozèf pa janmen moli. Poukisa ? I di : « Kouman to lé mo fè roun bagaj mové konsa épi péché kont Bondjé ? » (Gen. 39:7-12).

2. Kouman Jozèf té savé ki fè adiltèr, a roun péché kont Bondjé ?

² Kouman Jozèf té savé ki, pou Bondjé, i té ké « fè roun bagaj mové » si i té ka fè roun adiltèr ? Annan lalwa Moyiz, nou ka jwenn sa koumannman-an « To pa divèt fè adiltèr ». Mé a sèlman 200 lannen pita Bondjé té ké bay Israyélit-ya sa koumannman-an (Ex. 20:14). Mé Jozèf té konnèt Jéova asé pou i té savé a kisa ki té roun kondwit sèksyèl malpròp. Parèkzanp, i té savé ki lò Bondjé té prévwè maryaj-a, a té pou mété roun mouché ké roun madanm ansanm. Yé té divèt rakonté li osi sa Jéova té fè dé fwa pou protéjé lònò Sara, manman so granmanman, lò roun mouché manké vyolé l’. Pita, i mété lanmen osi pou protéjé Rébéka, madanm Izaak (Gen. 2:24 ; 12:14-20 ; 20:2-7 ; 26:6-11). Lò Jozèf réfléchi  asou sa bagaj-ya, i konprann sa ki té bon ké sa ki pa té bon pou Bondjé. Kou i té kontan so Bondjé, i té kontan so prensip-ya ki jis osi, é i té byen désidé swiv yé.

3. Kisa nou ké wè annan sa artik-a ?

³ Ès to kontan fè sa ki jis ? Asiré pa pitèt. Mé nou pyès pa parfè, é si nou pa ka panga, nou pouvé lésé prensip-ya ki annan monn-an détenn asou nou (Is. 5:20 ; Rom. 12:2). A pou sa, annan sa artik-a, nou ké wè kisa sa lé di fè sa ki jis, é déztrwa bénédiksyon nou ké jwenn si nou kontan fè sa ki jis. Nou ké wè osi trwa bagaj nou divèt fè pou nou pi kontan prensip Jéova-ya ki jis.

4. Ki lidé ki pa vré moun-yan gen asou sa ki jis ?

⁴ Roun ran moun plen ké òrgèy. Yé ka kritiké ròt-ya, yé ka pansé ki yé miyò pasé pyès moun, é pourtan, dapré yé, yé ka fè sa ki jis. Mé Bondjé rayi sa kalité konpòrtman-yan. Lò Jézi té asou latè-a, i kondané chèf rélijyé-ya ki té ka désidé yé menm sa ki té jis ké sa ki pa té jis (Eccl. 7:16 ; Luc 16:15). Roun moun ki ka pansé ki i jis pasé pyès moun, pòkò jis menm.

5. a) Dapré Labib-a, kisa sa lé di, fè sa ki jis ? b) Kouman roun moun ki jis douvan Bondjé ka aji ?

⁵ Lajistis, a roun bèl kalité. Roun moun ki jis, a roun moun ki ka fè sa ki drèt douvan Bondjé. Annan Labib-a, mo ébré ké grèk, ki ka sèrvi pou lajistis, lé di viv soulon prensip Jéova-ya ki pi rot pasé pyès ròt prensip. Parèkzanp, Jéova té lé ki Israyélit-ya ki té ka vandé ké achté té sèrvi ‘pwa ki té jis’ (Deut. 25:15). Si roun krétyen lé fè sa ki drèt douvan Bondjé, i divèt onèt annan tousa i ka fè lò i ka vandé ké achté. Anplis di sa, sa-la ki kontan sa ki jis, rayi wè roun moun fè rounòt moun méchansté. É pou fè Jéova plézi, roun moun ki ka vréman fè sa ki drèt ka tchenbé kont di fason Jéova ka wè bagaj-ya annan tousa i ka désidé fè (Col. 1:10).

6. Poukisa nou pouvé fè Jéova konfyans lò i ka bay nou prensip asou sa ki bon ké sa ki pa bon ? (Isaïe 55:8, 9).

⁶ Labib-a ka di ki Jéova, a li ki Sours lajistis. A pou sa i ka di ki, a koté li « lajistis ka rété » (Jér. 50:7). Kou a li ki kréyé tout bagaj, a li rounso ki pouvé désidé sa ki bon ké sa ki pa bon. Kou nou menm nou pa parfè é nou ka péché, nou pa pouvé savé sa ki bon ké sa ki pa bon. Mé kou Jéova parfè, i savé èkzaktéman sa ki bon ké sa ki pa bon (Prov. 14:12 ; li Isaïe 55:8, 9). Mé, Bondjé fè nou kou li menm, a pou sa nou pouvé rivé swiv so prensip-ya ki jis (Gen. 1:27). É nou kontan rèspèkté yé. Nou lanmou pou nou Papa ka pousé nou fè tousa nou pouvé pou imité l’ (Éph. 5:1).

7. Poukisa nou bézwen règ ki lojik é ki rézonab ? Bay roun èkzanp.

⁷ Lò nou ka swiv prensip Jéova-ya asou sa ki bon ké sa ki pa bon, nou ka jwenn roun patché bénédiksyon. Ès to ka wè poukisa ? Imajiné sa ki té ké pouvé rivé si chak bank té ka désidé yé menm ki valò soumaké-a té gen. A té ké rounsèl dézòrd ! É si dòktèr-ya ké enfirmyé-ya pa té ka rèspèkté menm règ-ya pou swanyé moun-yan, roun ran moun té ké pouvé mouri. Asiré pa pitèt, lò moun gen règ pou yé swiv ki lojik é ki rézonab pou réglé sèrten bagaj, a roun  protèksyon. Menm fason-an, prensip Jéova mété asou sa ki bon ké sa ki mové ka protéjé nou.

8. Ki bénédiksyon sa-ya ki kontan fè sa ki jis ké gen ?

⁸ Jéova ka béni sa-ya ki ka fè tousa yé pouvé pou yé swiv so prensip-ya. Men sa i ka promèt yé : « Moun ki jis ké gen latè-a, é yé ké viv asou l’ pou tout-tan » (Ps. 37:29). Sonjé kouman tout moun ké viv ansanm, annan lapè ké tchò kontan, lò tout moun ké swiv prensip Jéova-ya. To Bondjé lé to profité di sa bèl lavi-a. Donk, a pou nou kontan sa ki jis ! Annou wè trwa bagaj nou pouvé fè pou nou pi kontan sa bèl kalité-a.

9. Kisa ki ka pousé to kontan sa ki jis ?

⁹ Prémyèrman, a pou to kontan Sa-la ki mété prensip-ya asou sa ki jis. Si nou lé kontan sa ki jis, a pou nou pi kontan ankò Sa-la ki mété prensip-ya asou sa ki bon ké sa ki mové. Pi nou ké kontan Jéova, pi nou ké anvi rèspèkté so prensip. A sa istwè Adan ké Èv ka montré nou. Si yé té kontan Jéova, yé pa té ké janmen dézobéyi (Gen. 3:1-6, 16-19).

10. Kouman Abraam rivé konnèt Jéova pi byen ?

¹⁰ Nou pa lé fè kou Adan ké Èv. Donk, nou divèt kontinyé anprann konnèt Jéova pi byen, bay so bèl kalité valò, é fè sa nou pouvé pou nou konprann fason i ka wè bagaj-ya. A konsa nou lanmou pou li ké vin pi fò. Annou pran èkzanp Abraam. I té vréman kontan Jéova. Lò i pa té ka konprann désizyon Jéova té ka pran, i pa té ka faché ké li. I pito té ka chaché konprann li pi byen. Parèkzanp, lò i anprann ki Jéova té désidé krazé Sodòm ké Gomòr, pou koumansé, i té pè ki « Jij tout latè-a » krazé sa-ya ki jis an menm tan ki sa-ya ki méchan. Pou Abraam, a té roun bagaj ki pa té pouvé rivé. Donk, ké bokou rèspè, i pozé Jéova plizyèr késyon. Jéova pran pasyans ké li é i réponn li. Finalman, Abraam randé so kò kont ki Jéova ka gadé tchò chak moun, é i ka pini sa-la ki koupab, mé i pa janmen ka pini sa-la ki inosan (Gen. 18:20-32).

11. Kouman Abraam montré ki i té kontan Jéova é ki i té ka fè li konfyans ?

¹¹ Abraam pa janmen bliyé kozé i pran ké Jéova asou Sodòm ké Gomòr. Sa fè lanmou ké rèspè i té gen pou so Papa vin pi fò ankò. A sa nou ka byen wè plizyèr lannen apré, lò i té annan roun sitiasyon ki té pouvé fè li arété fè Jéova konfyans. Jéova doumandé li bay so pitit Izaak an sakrifis, so pitit i té kontan tèlman. Mé kou aprézan Abraam té konnèt so Bondjé pi byen, i pa pozé li pyès késyon. I fè sa Jéova té ka doumandé li fè. Pourtan, imajiné sa i dèt rousanti, toupannan i té ka préparé tout bagaj pou sakrifyé so pitit. So tchò té divèt ka fè l’ mal toubonnman ! A pa roun dé fwa i dèt réfléchi asou sa i té anprann asou Jéova. I té savé ki so Bondjé pa té ké janmen fè pyès bagaj ki pa té jis ouben ki té méchan. Dapré apot Pòl, Abraam di an so tchò ki Jéova té pouvé résisité so pitit (Héb. 11:17-19). Ès i pa té promèt ki tout roun nasyon té ké vini di Izaak ? É a sa moman-an, Izaak pa té gen timoun. Kou Abraam té kontan Jéova, i té ka fè li konfyans, é i té savé ki i té ké toujou fè sa ki jis. Menm si sa té rèd toubonnman,  i obéyi ké bokou lafwa (Gen. 22:1-12).

12. Kouman nou pouvé imité Abraam ? (Psaume 73:28).

¹² Kouman nou pouvé imité Abraam ? Nou divèt kontinyé anprann konnèt Jéova pi byen. Si nou ka fè sa, nou ké vin pi pròch ké li, é nou ké kontan l’ plis ankò (li Psaume 73:28). Anplis di sa, nou konsyans ké pousé nou tchenbé kont di fason i ka wè bagaj-ya (Héb. 5:14). Donk, lò roun moun ké éséyé fè nou fè sa ki pa bon, nou pa ké kouté li. Yenki sonjé fè roun bagaj ki ka fè nou Papa lapenn, é ki pouvé gaté nou lanmityé ké li, sa ka dégouté nou. Mé ki ròt bagaj nou pouvé fè pou montré ki nou kontan fè sa ki jis ?

13. Kouman nou pouvé chaché fè sa ki jis ? (Proverbes 15:9).

¹³ Dézyèmman, fè tousa to pouvé pou to plizanpli kontan sa ki jis. Lò nou ka travay pou nou pi kontan prensip Jéova ki jis, a kou lò nou ka travay pou fè nou misk vin pi fò : pou nou rivé fè sa, a pou nou fè éfòr, pa roun dé jou, mé souvan. Fè éfòr touléjou, a pa roun bagaj ki tro rèd pou fè. Jéova rézonab. I pa ka janmen doumandé nou fè plis ki sa nou pouvé fè (Ps. 103:14). I ka di nou ki « i kontan sa-la ki ka chaché fè sa ki jis » (li Proverbes 15:9). Lò nou ka chaché fè roun bagaj pou Jéova, nou ka fè éfòr pou nou rivé fè l’. A menm bagaj-a lò nou ka « chaché fè sa ki jis ». Jéova li menm ké pran pasyans ké nou é i ké idé nou kontinyé fè progrè (Ps. 84:5, 7).

14. A kisa ki « kwiras lajistis », é poukisa nou bézwen l’ ?

¹⁴ Jéova ka fè nou sonjé ké lanmou ki so prensip ki jis pa fòrsan (1 Jean 5:3). Yé pito ka protéjé nou. É nou bézwen sa prensip-ya touléjou. Sonjé ékipman èspirityèl Pòl palé-a (Éph. 6:14-18). Ki parti annan sa ékipman-an ka protéjé tchò krétyen-an ? A « kwiras lajistis », i  ka réprézanté prensip Jéova-ya ki jis. Menm fason roun kwiras ka protéjé tchò-a, prensip Jéova-ya ki jis ka protéjé to tchò èspirityèl, sa lé di moun-an to sa andidan. A pou sa, fè atansyon pou to toujou gen to kwiras lajistis annan to ékipman èspirityèl ! (Prov. 4:23).

15. Kisa sa lé di poté kwiras lajistis ?

¹⁵ Kisa sa lé di poté kwiras lajistis ? Sa lé di tchenbé kont di prensip Jéova-ya annan désizyon nou ka pran touléjou. Anvan to désidé sa to ké di, ki lanmizik to ké kouté, kisa to ké gadé latélé, ouben asou Entèrnèt, ouben ki liv to ké li, doumandé to kò : « Kisa mo ké mété annan mo lèspri é annan mo tchò ? Ès Jéova kontan sa bagaj-a ? Ouben, ès sa ka pousé mo fè bagaj ki pa jis pou Jéova kou parèkzanp, gen roun vyé kondwit sèksyèl, divini roun moun ki vyolan, roun moun ki pa janmen gen asé, roun moun ki égoyis ? » (Phil. 4:8). Si désizyon to ka pran ka alé ké volonté Jéova, to ké protéjé to tchò.

16-17. Kouman Isaïe 48:18 ka montré nou ki nou pouvé rivé pa janmen arété swiv prensip Jéova-ya ?

¹⁶ Ès sa ka rivé to pè pa rivé swiv prensip Jéova ki jis touléjou, lannen apré lannen ? Gadé èkzanp Jéova li menm ka pran. Nou ka jwenn sa èkzanp-a annan Isaïe 48:18 (li). Annan sa i ka di, i ka pèrmèt nou sir ki, nou jistis pouvé « kou vag lanmè-ya ». Imajiné to kò asou roun gran laplaj ka gadé vag lanmè-ya ka alé vini roun dèyè ròt. Ès to té ké pè vag-ya arété roun jou ? Non ! To savé yé toujou ka vin krazé yé kò asou sa menm laplaj-a dipi nanninannan, é yé pa ké janmen arété fè l’.

¹⁷ To pouvé sa roun moun ki ka fè sa ki jis kou vag lanmè-ya. Kisa sa lé di ? Lò to gen roun désizyon pou pran, pou koumansé, doumandé to kò sa Jéova té ké lé to fè. Apré sa, a pou to fè l’. Pitèt sa ké rèd pou to, mé to Papa ki plen ké lanmou ké toujou la pou idé to ; i ké bay to fòrs to bézwen pou to viv touléjou soulon so prensip-ya ki jis (Is. 40:29-31).

18. Poukisa nou pa divèt jijé ròt-ya soulon sa nou ka pansé ki drèt ?

¹⁸ Trwazyèmman, lésé Jéova jijé ròt-ya. Toupannan nou ka fè tousa nou pouvé pou nou rèspèkté prensip Jéova-ya ki jis, nou divèt panga pa jijé ròt-ya, épi pa krè ki nou pi jis pasé yé. Nou pa gen drwa ni méprizé yé ni jijé yé soulon sa nou menm ka pansé ki drèt. Annou sonjé ki, a Jéova ki « Jij tout latè-a » (Gen. 18:25). I pa bay nou rèsponsabilité jijé ròt-ya. Anplis di sa, men sa Jézi di nou fè : « Arété jijé moun, é yé pa ké jijé zòt * » (Mat. 7:1).

19. Kouman Jozèf montré i té ka fè Jéova konfyans pou jijé bagaj-ya ?

¹⁹ Annou viré palé di Jozèf, roun mouché ki té jis. I pa té ka pèrmèt so kò jijé ròt-ya, menm sa ki té fè li wè mizè. So pròp frè té ataké li, yé té vandé l’ pou i divini roun èsklav, é yé té fè yé papa krè ki i té mouri. Plizyèr lannen apré, Jozèf ké so fanmi jwenn yé konpanyen. Aprézan, i té sa roun chèf pwisan, i té  pouvé rèd ké so frè épi chaché vanjé so kò. A sa so frè-ya té pè, menm si yé té ka vréman rigrété sa yé té fè. Mé Jozèf rasiré yé lò i di yé : « Pa bézwen pè. Ès a mo ki Bondjé ? » (Gen. 37:18-20, 27, 28, 31-35 ; 50:15-21). Ké imilité, Jozèf lésé Jéova jijé sitiasyon-an.

20-21. Kisa nou pouvé fè pou nou pa krè ki nou pi jis pasé ròt-ya ?

²⁰ Kou Jozèf, nou ka lésé Jéova jijé ròt-ya. Parèkzanp, nou pa ka di ki nou savé kisa ki ka fè nou frè ké sò-ya aji roun fason ouben rounòt. Nou pa pouvé li annan tchò moun. A Jéova rounso ki « ka wè sa ki ka fè nou aji » (Prov. 16:2). I kontan tout kalité moun, i pa ka gadé ni koté yé soti ni yé kiltir. É i ka ankourajé nou ‘louvri nou tchò gran’ (2 Cor. 6:13). Nou ka fè tousa nou pouvé pou nou kontan tout nou frè ké sò-ya, é pou nou pa jijé yé.

²¹ Pa jijé ròt-ya, sa lé di pa jijé sa-ya ki pa annan asanblé-a non plis (1 Tim. 2:3, 4). Ès to té ké di asou roun moun di to fanmi ki pa annan menm rélijyon ké to : « I pa ké janmen asèpté lavérité-a ! » ? Non, sinon, sa té ké lé di ki to ka gonflé to lèstomak. A kousidiré to ka pansé ki to pi jis pasé li. Jéova toujou ka bay « tout moun tout koté » posibilité répanti (Actes 17:30). Pa janmen bliyé ki, pou Jéova, sa-ya ki ka pansé ki yé pi jis pasé ròt-ya, yé sa dé moun ki pa jis.

22. Poukisa to byen désidé kontinyé kontan fè sa ki jis ?

²² Si nou kontan prensip Jéova-ya ki jis, nou tchò ké kontan. Bon èkzanp nou ké bay-a ké fè ròt-ya vin pi pròch di nou, é pi pròch di Jéova osi. Atò, a pou nou toujou « fen ké swèf lajistis » (Mat. 5:6). A pou nou sir osi ki Jéova ka wè tout éfòr nou ka fè, é ki i kontan lò nou ka fè progrè. A vré, pi sa k’alé, pi sa monn-an k’alé lwen annan sa ki pa jis. Mé annou pran kouraj ! Annou toujou sonjé ki « Jéova kontan moun ki jis » (Ps. 146:8).