1-2. Kisa roun frè anprann asou zafè bay konsèy ?

 I JA gen plizyèr lannen, dé ansyen alé wè roun sò ki pa té ka vini annan tout réinyon-yan dipi roun ti moman. Roun annan yé montré sò-a plizyèr vèrsé ki ka montré poukisa vini annan réinyon-yan enpòrtan. I té krè ki sa i té di té ankourajé sò-a. Mé lò i té paré pou pati, sò-a di : « Zòt pa menm gen roun ti lidé asou problèm mo ka pasé. » Frè-ya té bay sò-a konsèy san yé pa menm té doumandé li anvan kouman i té ka alé. Akoz di sa, sò-a pa santi ki konsèy yé té bay li-a té idé l’.

² Ansyen-an ki montré sò-a sa vèrsé-ya ka di : « Lò sò-a di nou sa, mo di an mo tchò ki i pa té gen pyès rèspè pou nou. Mé lò mo pran tan réfléchi, mo randé mo kò kont ki mo té vini ké roun patché vèrsé pasé mo té sonjé pozé mo sò késyon kou : “Ès tout bagaj k’ alé byen pou to atchèlman ? Ès nou pouvé fè roun bagaj pou idé to ?” » Sa ansyen-an anprann roun bagaj enpòrtan ké sa ki rivé li. Jòdla i sa roun bèrjé ki ka chaché konprann ròt-ya é ki kontan idé yé.

3. Kimoun annan asanblé-a pouvé bay konsèy ?

 ³ Kou yé sa dé bèrjé, ansyen-yan divèt bay konsèy lò a pou yé fè l’. Mé sa pouvé rivé osi ki ròt-ya annan asanblé-a gen pou bay konsèy osi. Parèkzanp, roun frè ouben roun sò pouvé bay roun zanmi roun konsèy ki ka vini di Labib-a (Ps. 141:5 ; Prov. 25:12). Ouben ankò, roun sò ki ja gen so laj pouvé « bay jenn fanm-yan konsèy » asou bagaj  yé ka palé annan Tite 2:3-5. Épi nou pa bézwen di ki paran-yan divèt bay yé timoun konsèy souvan épi korijé yé osi. Donk, menm si sa artik-a ka palé pou ansyen-yan annan asanblé-a èspésyalman, sa ké bon pou nou chak rouwè kouman nou pouvé bay konsèy pratik ké ankourajan ki ké « fè tchò moun kontan » (Prov. 27:9).

4. Kisa nou ké wè annan sa artik-a ?

⁴ Annan sa artik-a, nou ké réponn kat késyon asou zafè bay konsèy : 1) Kisa ki divèt fè nou bay roun konsèy ? 2) Ès nou vréman bézwen bay sa konsèy-a ? 3) Kimoun ki divèt bay sa konsèy-a ? 4) Kouman nou pouvé bay konsèy ki ké idé ròt-ya ?

5. Kisa ki ké idé roun ansyen bay konsèy ki fasil pou asèpté ? (1 Corinthiens 13:4, 7).

⁵ Roun ansyen kontan so frè ké sò-ya. Détan i ka montré sa lò i ka bay roun moun ki ka pran roun mové chimen roun konsèy (Gal. 6:1). Anvan roun ansyen alé palé pou roun moun, sa bon pou i sonjé déztrwa bagaj Pòl di asou lanmou. « Lanmou pasyan ké bon. […] I ka sipòrté tout bagaj, ka krè tout bagaj, ka èspéré tout bagaj, ka andiré tout bagaj » (li 1 Corinthiens 13:4, 7). Si roun ansyen ka réfléchi asou sa vèrsé-ya, sa ké idé l’ réfléchi asou sa ki ka pousé li alé bay so frè ouben so sò roun konsèy é sa ké idé l’ fè l’ ké lanmou. Si moun-an ki ka rousouvwè konsèy-a ka santi ki ansyen-an kontan li, i ké asèpté konsèy-a pi fasilman (Rom. 12:10).

6. Ki bon èkzanp apot Pòl bay ?

⁶ Apot Pòl sa roun bon èkzanp pou ansyen-yan. Lò frè-ya ki té Tésalonik té bézwen konsèy, i pa ézité bay yé konsèy. Mé pou koumansé, Pòl félisité yé paské a lafwa ki té ka pousé yé travay, paské yé té ka tchenbé rèd é paské yé té ka travay ké lanmou. I rékonnèt osi ki yé lavi pa té fasil é ki yé té ka sipòrté pèrsékisyon-an ké kouraj (1 Thess. 1:3 ; 2 Thess. 1:4). I jis di yé ki yé té sa roun èkzanp pou ròt krétyen-yan (1 Thess. 1:8, 9). A pa ti kontan yé té divèt kontan lò yé li sa Pòl té ka di asou yé. Asiré pa pitèt Pòl té kontan so frè-ya bokou. A pou sa, annan so dé lèt i ékri pou Tésalonisyen-yan, i rivé bay yé bon konsèy ki idé yé (1 Thess. 4:1, 3-5, 11 ; 2 Thess. 3:11, 12).

7. Poukisa roun ran pa ka byen réyaji lò yé ka rousouvwè roun konsèy ?

⁷ Kisa ki pouvé rivé si fason nou ka bay roun konsèy pa bon ? Roun ansyen ki gen bokou èspéryans ka di : « Roun ran pa ka byen réyaji lò yé ka rousouvwè roun konsèy. Si yé ka réyaji konsa, a pa paské konsèy-a pa bon, mé a paské nou pa bay konsèy-a ké lanmou. » Kisa sa ka anprann nou ? Si moun-an ki ka bay nou roun konsèy ka fè l’ paské i kòlè, sa ké rèd pou nou asèpté l’. Mé si i ka fè l’ paské i kontan nou, nou ké asèpté l’ pi fasilman.

8. Kisa roun ansyen divèt doumandé so kò lò i ka réfléchi pou savé si i divèt bay roun moun roun konsèy ?

⁸ Roun ansyen pa divèt kouri bay roun konsèy. Anvan i fè sa, i divèt doumandé so kò : « Ès mo vréman bézwen di roun bagaj ? Ès mo vréman sir ki sa sa moun-an ka fè pa bon ? Ès Labib-a ka di ki sa i  ka fè pa bon ? Ouben ès sa i ka fè jis diféran di sa mo menm té ké fè ? » Kou yé gen sajès, ansyen-yan pa ‘présé palé’ (Prov. 29:20). Si roun ansyen pa sir ki i divèt bay roun konsèy, i pouvé alé doumandé rounòt ansyen si li menm osi ka pansé ki, dapré Labib-a, a pou i bay sa konsèy-a (2 Tim. 3:16, 17).

9. Kisa Pòl ka anprann nou asou fason pou bay konsèy asou aparans ké lenj moun ka mété ? (1 Timothée 2:9, 10).

⁹ Annou imajiné ki roun ansyen enkyèt lò i ka wè fason roun krétyen ka abiyé. I divèt doumandé so kò : « Ès a roun prensip annan Labib-a ki ka fè mo di roun bagaj ? » Kou i pa lé bay sa krétyen-an sopa lidé, i pouvé alé wè rounòt ansyen, rounòt frè ouben rounòt sò ki gen èspéryans pou doumandé yé sa yé ka pansé. Yé pouvé rouwè ansanm konsèy Pòl bay asou aparans ké fason nou divèt abiyé (li 1 Timothée 2:9, 10). Pòl ka bay plizyèr gran prensip. I ka di : roun krétyen divèt abiyé roun fason ki korèk, ké modèsti ké bon sans. I pa ka bay roun lis bagaj nou pouvé mété ouben nou pa divèt mété. Apot-a ka rékonnèt ki nou chak nou pouvé désidé ki lenj nou ké mété dipi sa pa ka alé kont sa Labib-a ka di. Donk, lò yé ka réfléchi pou savé si yé ké bay roun konsèy, ansyen-yan divèt doumandé yé kò si moun-an ka abiyé ké modèsti ké bon sans.

10. Kisa ki ké idé nou rèspèkté désizyon ròt-ya ka pran ?

¹⁰ A pa pou nou bliyé ki dé krétyen ki gen èspéryans pouvé désidé fè dé bagaj diféran, mé sa pa lé di ki roun désizyon bon épi ròt-a pa bon. Nou pa divèt fòrsé roun frè ouben roun sò fè sa nou menm nou ka pansé ki bon (Rom. 14:10).

11-12. Si roun ansyen gen pou bay roun konsèy, ki késyon i divèt pozé so kò é poukisa ?

¹¹ Si nou ka wè ki nou bézwen bay roun konsèy, prochen késyon nou gen pou pozé nou kò, a : kimoun ki divèt bay li ? Anvan roun ansyen alé bay roun sò ki maryé ouben roun timoun ki pòkò gen 18 an roun konsèy, i divèt alé wè chèf fanmi-a ki ké pitèt lé okipé di sa bagaj-a li menm *. Ouben chèf fanmi-a ké pitèt doumandé pou i la lò ansyen-an ké bay konsèy-a. É kou nou wè l’ annan  paragraf 3-a, détan pitèt sa ké pi bon pou roun sò ki ja gen laj bay roun jenn sò roun konsèy.

¹² Roun ansyen ké doumandé so kò osi : « Ès a mo ki divèt bay sa konsèy-a ouben ès moun-an té ké asèpté l’ pi byen si a té rounòt moun ki té ka bay li konsèy-a  ? » Parèkzanp sa ké pi fasil pou roun krétyen ki pa gen konfyans annan sa i ka fè, kouté konsèy ki ka vini di roun ansyen ki ja santi so kò konsa li menm osi. Pitèt sa ansyen-an ké konprann moun-an pi byen é pitèt i ké di bagaj-ya roun fason ki ké pi fasil pou moun-an asèpté yé. Mé a tout ansyen-yan ki divèt ankourajé yé frè ké sò chanjé sa Labib-a ka doumandé yé chanjé annan yé lavi. Donk, si roun moun bézwen roun konsèy, sa ki pi enpòrtan-an, a ki moun-an rousouvwè sa konsèy-a.

13-14. Poukisa sa enpòrtan ki roun ansyen kouté ?

¹³ A pou to paré pou kouté. Lò roun ansyen ka alé bay roun frè roun konsèy, i divèt doumandé so kò : « Kisa mo savé asou sitiasyon mo frè ? Kisa ki ka rivé li annan so lavi ? Ès i ka jwenn problèm mo pa konnèt ? Kisa i plis bézwen atchèlman ? »

¹⁴ Prensip nou ka jwenn annan Jacques 1:19 bon pou sa-la ki ka bay roun konsèy. Men sa ki ékri : « Chak moun toujou divèt paré pou kouté, pa présé palé é pa kouri faché. » Roun ansyen pouvé krè ki i konnèt tout sitiasyon-an. Mé ès i konnèt tout sitiasyon-an vré ? Proverbes 18:13 ka fè nou sonjé ki « lò roun moun ka pran parti annan roun bagaj anvan menm i tandé sa ki pasé, a roun moun ki sòt é a roun ronté pou li. » Sa pi bon pou nou doumandé moun-an li menm di nou annan ki sitiasyon i fika. Sa lé di ki nou divèt kouté anvan nou palé. Sonjé sa nou anprann ké sa ki rivé ansyen-an nou palé annan koumansman sa artik-a. I konprann ki, pasé i té koumansé ké sa i té préparé, i té divèt pozé sò-a sa kalité késyon-yan : « Ès tout bagaj k’ alé byen pou to atchèlman ? Ès nou pouvé fè roun bagaj pou idé to ? » Si roun ansyen ka chaché gen tout enfòrmasyon-yan, i gen plis chans idé ké ankourajé so frè ké sò-ya.

15. Kouman roun ansyen pouvé fè sa Proverbes 27:23 ka di ?

¹⁵ Chaché konnèt troupo-a. Kou nou wè l’ o koumansman sa artik-a, bay roun konsèy ki ka maché, a pa yenki li déztrwa vèrsé annan Labib-a ouben bay déztrwa lidé pou idé roun moun. Nou frè ké sò-ya bézwen santi ki nou kontan yé, ki nou ka konprann yé é ki nou lé idé yé (li Proverbes 27:23). Donk roun ansyen divèt fè tousa i pouvé pou vin bon zanmi ké so frè ké sò-ya.

16. Kisa ki ké idé roun ansyen bay konsèy ki fasil pou asèpté ?

¹⁶ Roun ansyen pa té ké lé so frè ké sò-ya pansé ki a sèlman lò i bézwen bay yé roun konsèy, i ka vin wè yé. I pito ka palé ké so frè ké yé sò-ya souvan, é lò yé ka jwenn roun problèm, i ka montré yé ki i ka gadé pou yé. Roun ansyen ki gen  èspéryans ka di :« Lò to ka fè sa, to ka divini yé zanmi. É si roun jou to bézwen bay roun konsèy, sa ké pi fasil pou to fè l’. » Kanta sa-la ki ka rousouvwè konsèy-a, i ké asèpté l’ pi fasilman.

17. Annan ki sitiasyon èspésyalman roun ansyen divèt janti épi pran pasyans ?

¹⁷ A pou to gen pasyans é a pou to janti. Lò roun moun pa lé asèpté ouben swiv roun konsèy, sa enpòrtan pou nou pran pasyans ké li é pou nou janti ké li. Annan sa kalité sitiasyon-an, roun ansyen pa divèt kouri faché. Men sa Labib-a té di asou Jézi : « I pa ké krazé rozo-a ki ja abimé é i pa ké étenn mèch-a ki ja près étenn » (Mat. 12:20). Donk, lò roun ansyen ka priyè, i pouvé doumandé Jéova béni moun-an ki bézwen konsèy-a, idé li konprann poukisa yé ka bay li sa konsèy-a, épi idé li apliké l’. Sa krétyen-an ké pitèt bézwen tan pou réfléchi asou sa yé di li. Si i ka santi ki ansyen-an pran pasyans ké li é ki i té janti ké li, sa ké pi fasil pou i kouté konsèy-a. Nou pa bézwen di ki konsèy-a divèt toujou vini di Paròl Bondjé-a.

18. a) Kisa nou pa divèt bliyé lò nou ka bay roun konsèy ? b) Di kisa papa ké manman-an ki asou zimaj-a ka palé ?

¹⁸ Sèrvi sa to fè ki pa bon pou to vin miyò. Paské nou pa parfè, nou pa ké toujou pouvé byen apliké sa yé ka di nou fè annan sa artik-a (Jacq. 3:2). Nou ké fè bagaj ki pa bon, mé lò nou ké fè sa, annou éséyé sèrvi sa ki rivé nou pou nou vin miyò. Anplis di sa, si nou frè ké sò-ya ka wè ki nou kontan yé, sa ké pi fasil pou yé pardonnen nou si nou di ouben si nou fè roun bagaj ki fè yé lapenn. (Gadé ti karé-a «  Kozman pou papa ké manman » osi.)

19. Kouman nou pouvé fè tchò nou frè ké sò-ya kontan ?

¹⁹ Kou nou wè l’, sa pa fasil pou nou bay konsèy ki ka byen maché. Nou pa parfè  é sa-ya nou ka bay konsèy pa parfè non plis. Donk, sonjé tout prensip nou wè annan sa artik-a. Lò to ka bay roun konsèy, a pou to sir ki to ka fè l’ ké bon lentansyon. Doumandé to kò osi si to vréman bézwen bay sa konsèy-a é ki a byen to ki divèt fè l’. Anvan to bay konsèy-a, pozé moun-an bon késyon-yan, pran tan byen kouté sa i ka réponn to, konsa to ké pouvé konprann ki problèm moun-an ka jwenn. Chaché wè bagaj-ya fason moun-an ka wè yé. A pou to janti épi chaché vin zanmi ké to frè ké sò-ya. Sonjé kisa to ka chaché fè : to lé to konsèy byen maché, mé to lé osi ki i ‘fè tchò moun-an kontan’ (Prov. 27:9).