ARTIK POU ÉTIDYÉ 33
KANTIK 130 Pardonnen ké tout nou tchò
Kouman asanblé-a pouvé imité fason Jéova ka wè sa-ya ki fè roun péché ki grav
« Si roun moun ka fè roun péché, nou gen roun asistan » (1 JEAN 2:1).
SA NOU KÉ ANPRANN
Nou ké wè sa asanblé Korent annan 1é syèk-a fè lò roun frè fè roun péché ki té grav épi nou ké wè sa sa ka anprann nou.
1. Kisa Jéova lé pou tout moun ?
JÉOVA ka pèrmèt tout moun pran yé pròp désizyon. É a sa to ka fè touléjou. Roun ran désizyon pi enpòrtan pasé rounòt ran. Désizyon pi enpòrtan roun moun pouvé pran, a bay Jéova so lavi épi fè parti di so fanmi. A sa Jéova lé tout moun fè. Poukisa ? Pas i kontan moun-yan é i lé sa ki pi bon pou yé tout. I lé yé divini so zanmi é yé viv pou tout-tan (Deut. 30:19, 20 ; Gal. 6:7, 8).
2. Menm lò roun moun ka fè roun péché ki grav é pa ka répanti, kisa Jéova lé i fè ? (1 Jean 2:1).
2 Mé, Jéova pa ka fòrsé pyès moun adoré l’. I ka lésé chak moun désidé sa i ké fè. Atò, kisa ansyen-yan divèt fè lò roun krétyen ka fè roun péché ki grav ? Si i pa ka répanti, yé divèt tiré l’ annan asanblé-a (1 Cor. 5:13). Mé, menm annan sa sitiasyon-an, Jéova vréman lé sa moun-an rouvini òbò li. A pou sa Jéova bay ranson-an : pou i pouvé pardonnen sa-ya ki fè roun péché ki grav mé ki ka répanti (li 1 Jean 2:1). Nou Bondjé ki kontan nou ka doumandé sa-ya ki fè roun péché ki grav répanti, é i ka fè l’ ké bokou lanmou (Zach. 1:3 ; Rom. 2:4 ; Jacq. 4:8).
3. Kisa nou ké wè annan sa artik-a ?
3 Jéova lé nou wè péché-a ké sa-ya ki ka péché kou li menm ka wè yé. A pou sa, annan sa artik-a, nou ké wè sa Pòl di asanblé Korent fè lò roun frè fè roun péché ki té grav. Apré sa, nou ké wè sa Pòl di asanblé-a fè lò i répanti. É pou fini, nou ké wè sa sa ka anprann nou asou fason Jéova ka wè krétyen-yan ki fè roun péché ki grav.
SA ASANBLÉ KORENT FÈ LÒ ROUN FRÈ FÈ ROUN PÉCHÉ KI TÉ GRAV
4. Kisa ki té ka pasé annan asanblé Korent ? (1 Corinthiens 5:1, 2).
4 (Li 1 Corinthiens 5:1, 2.) Pannan so trwazyèm vwayaj misyonèr, Pòl tandé palé di mové bagaj ki té ka pasé annan asanblé Korent, roun asanblé ki té fin fèt. Roun frè annan sa asanblé-a té ka kouché ké madanm so papa. Sa konpòrtman-an pa té bon menm menm menm ! A roun ‘bagaj moun ròt nasyon-yan pa menm té ka fè’ ! Mé asanblé-a li menm té ka asèpté sa é yé té ké di ki yé té fyèr di fason yé té ka aji ké l’. Pitèt roun ran té ka pansé ki kou yé té ka asèpté sa sitiasyon-an, yé té ka fè kou Bondjé ki gen pityé pou moun ki pa parfè. Mé Jéova pa ka asèpté sa-ya ki ka fè mové bagaj anmitan so pèp. Kou mouché-a té gen roun mové konpòrtman é té ka aji ké toupé, i té ka gaté bon répitasyon asanblé-a. É si i té ka rété annan asanblé-a, i té ké pouvé détenn asou frè ké sò-ya ki té ka frékanté l’. Donk, kisa Pòl di asanblé Korent fè ?
5. Kisa Pòl di asanblé Korent fè, é kisa sa té lé di ? (1 Corinthiens 5:13 ; gadé zimaj-a osi).
5 (Li 1 Corinthiens 5:13.) Bondjé fè Pòl ékri roun lèt pou Korentyen-yan. Annan sa lèt-a, i di yé ki yé té divèt « tiré » moun-an ki té ka péché é ki pa té ka répanti annan asanblé-a. Kouman krétyen-yan ki té fidèl té divèt aji ké li ? Pòl di yé « arété frékanté » l’. Kisa sa té lé di ? Pòl èspliké ki yé ‘pa menm té divèt manjé ké roun moun konsa’ (1 Cor. 5:11). Lò nou ka manjé ké roun moun, a pa manjé rounso nou ka manjé ké moun-an. Souvan, nou ka pran plézi palé ké l’. Donk, Pòl té lé di ki asanblé-a pa té divèt pasé tan ké sa mouché-a lò yé pa té oblijé fè l’. Konsa, sa mouché-a pa té ké pouvé fè déga annan asanblé-a (1 Cor. 5:5-7). Anplis di sa, si yé pa té ka frékanté l’, sa té pouvé idé l’ konprann ki i té fè Jéova lapenn bokou. Pitèt sa té ké fè l’ ronté é i té ké anvi répanti.
Annan prémyé lèt Bondjé fè l’ ékri, Pòl di Korentyen-yan tiré moun-an ki pa té ka répanti annan yé asanblé (gadé paragraf 5).
6. Kouman asanblé-a réyaji lò yé rousouvwè lèt Pòl, é kisa mouché-a ki té ka péché fè ?
6 Lò Pòl voyé so lèt pou asanblé-a ki té Korent, i doumandé so kò kouman asanblé-a té ké réyaji. Mé Tit poté roun bon nouvèl bay li. I di l’ ki asanblé-a té byen réyaji lò yé rousouvwè so lèt (2 Cor. 7:6, 7). Yé té fè sa i té doumandé yé fè. Anplis di sa, déztrwa mwa apré Pòl té voyé sa lèt-a, mouché-a té répanti ! I té chanjé so konpòrtman é i té koumansé swiv prensip Jéova-ya (2 Cor. 7:8-11). Kisa Pòl té ké doumandé asanblé-a fè aprézan ?
KOUMAN ASANBLÉ-A TÉ DIVÈT AJI KÉ MOUCHÉ-A KI TÉ RÉPANTI
7. Kouman mouché-a ki té péché réyaji lò yé tiré l’ annan asanblé-a ? (2 Corinthiens 2:5-8).
7 (Li 2 Corinthiens 2:5-8.) Lò i ékri so dézyèm lèt pou Korentyen-yan, Pòl di ki ‘korèksyon-an yé tout té bay sa mouché-a té ja asé pou li’. Sa lé di ki korèksyon-an té idé mouché-a répanti. Donk, asanblé-a pa té bézwen kontinyé korijé l’ ankò (Héb. 12:11).
8. Ki ròt bagaj Pòl doumandé asanblé-a fè ?
8 Apré sa, men sa Pòl di asanblé-a : « Pardonnen [frè-a ki péché] ké tout zòt tchò é konsolé l’ », épi « fè li savé zòt kontan li ». Si to ka byen gadé, Pòl ka doumandé yé fè plis ki lésé mouché-a viré annan pèp Jéova-a. I té lé yé montré sa mouché-a, annan sa yé té ka di ké annan sa yé té ka fè, ki yé té vréman pardonnen li é ki yé té kontan l’. Konsa, yé té ké montré frè-a ki yé té byen kontan i rouvini annan asanblé-a.
9. Poukisa sa té pitèt rèd pou roun ran krétyen Korent pardonnen frè-a ki té répanti ?
9 Ès sa té rèd pou roun ran annan asanblé-a byen rousouvwè mouché-a ki té répanti ? Labib pa ka di anyen asou sa, mé pitèt sa té rèd pou sèrten frè ké sò. Pitèt roun ran té faché toujou paské i té mété bon problèm annan asanblé-a. É pitèt sèrten frè ké sò té dékourajé toujou paské i té fè yé soufri. Sa frè ké sò-ya té travay rèd pou obéyi Jéova, donk pitèt roun ran té ka pansé ki yé pa té divèt lésé roun moun ki té fè sa kalité mové bagaj-ya, rouvini annan asanblé-a (gadé Luc 15:28-30). Mé poukisa sa té enpòrtan ki asanblé-a montré frè-a ki té rouvini ki yé té kontan l’ ké tout yé tchò ?
10-11. Kisa ki té pouvé rivé si ansyen-yan pa té asèpté mouché-a ki té répanti viré fè parti di asanblé-a ?
10 Imajiné sa ki té ké pitèt rivé, si ansyen-yan pa té asèpté mouché-a ki té répanti viré fè parti di asanblé-a ouben si, lò i té viré, frè ké sò-ya pa té montré l’ ki yé té kontan l’. Pitèt i té ké néyé « anba gro chagren ». Pitèt menm i té pouvé di so kò ki i pa té ké janmen pouvé fè parti di asanblé-a ankò. É akoz di sa, pitèt i té ké arété fè éfòr pou viré byen ké Jéova.
11 Sa ki pi mové, a ki si frè ké sò-ya annan asanblé-a pa té pardonnen l’, yé menm, yé té ké mété yé pròp lanmityé ké Jéova an danjé. Poukisa ? Paské yé pa té ké imité Jéova ki ka pardonnen sa-ya ki ka répanti. Pasé sa, yé té ké imité Satan ki mové menm é ki pa gen pyès pityé. Anfèt, yé té ké fè travay Djab-a : i té ké pouvé sèrvi yé pou fè sa mouché-a arété adoré Jéova (2 Cor. 2:10, 11 ; Éph. 4:27).
12. Kouman asanblé Korent té pouvé imité Jéova ?
12 Kouman frè ké sò-ya annan asanblé Korent té pouvé imité Jéova pasé yé imité Satan ? Yé té divèt pardonnen sa-ya ki té ka répanti kou Jéova té ka pardonnen yé. Gadé sa sèrten mouché ki ékri Labib di asou nou Bondjé. David di ki Jéova « bon é [...] paré pou pardonnen » (Ps. 86:5). Miché li menm di : « Kimoun ki kou to, roun Bondjé ki ka pardonnen fot so pèp é ki pa ka tchenbé kont di so péché ? » (Mich. 7:18). É Izayi di : « A pou méchan-an chanjé so konpòrtman, é a pou moun-an ki mové lésé tout lidé i gen ; a pou i rouvin òbò Jéova ki ké pran so lapenn, wi òbò nou Bondjé, paské i ké pardonnen l’ ké tout so tchò » (Is. 55:7).
13. Poukisa ansyen-yan pa té bézwen antann pou roumété mouché-a ki té répanti annan asanblé-a ? (gadé karé-a « Kitan yé roumété mouché-a ki té répanti annan asanblé Korent ? »).
13 Pou frè ké sò-ya annan asanblé-a té pouvé imité Jéova, yé té divèt byen rousouvwè frè-a ki té répanti épi montré l’ ki yé té kontan l’. É a sa yé fè. Yé aji kou Pòl té doumandé yé aji ké li, é a konsa yé montré ki yé té ka « obéyi tout kalité domenn » (2 Cor. 2:9). A vré, sa té ka fè déztrwa mwa sèlman yé té tiré l’ annan asanblé-a. Mé grasa korèksyon yé té bay li-a, i té répanti. Donk, ansyen-yan pa té bézwen antann pou roumété l’ annan asanblé-a.
KOUMAN IMITÉ JÉOVA KI JIS, KI GEN PITYÉ POU MOUN É KI LÉ PARDONNEN YÉ
14-15. Kisa fason yé aji ké mouché-a ki té fè roun péché ki té grav annan asanblé Korent ka anprann nou ? (2 Pierre 3:9 ; gadé zimaj-a osi).
14 Jéova fè moun ékri annan Labib sa ki rivé annan asanblé Korent « pou nou anprann patché bagaj » (Rom. 15:4). Nou ka konprann ki Jéova pa ka asèpté ki moun ki ka fè mové bagaj rété annan asanblé-a. Roun ran ka pansé ki kou Jéova ka pran pityé pou moun é i lé pardonnen yé, i ké lésé sa-ya ki ka péché é ki pa lé répanti rété annan asanblé-a. Mé a pa konsa Jéova ka fè. A vré i ka pran pityé pou moun é i lé pardonnen yé, mé i pa ka asèpté nenpòrt ki kalité konpòrtman ; sa i ka di asou sa ki bon ké sa ki pa bon pa ka chanjé (Jude 4). Si i té ka asèpté nenpòrt ki kalité konpòrtman, sa té ké lé di ki i pa gen pyès pityé paské sa té ké mété tout asanblé-a an danjé (Prov. 13:20 ; 1 Cor. 15:33).
15 Mé, sa ki rivé annan asanblé Korent ka anprann nou osi ki Jéova pa lé pyès moun mouri. I ka éséyé sové moun chak fwa sa posib. Si yé ka chanjé é si yé ka fè tousa yé pouvé pou yé viré byen ké li, i ka pran pityé pou yé (Ézéch. 33:11 ; li 2 Pierre 3:9). Lò mouché-a ki té annan asanblé Korent répanti é i chanjé, Jéova sèrvi Pòl pou èspliké Korentyen-yan ki yé té divèt pardonnen l’ épi rousouvwè l’ ké bokou lanmou.
Asanblé-a ka imité Jéova ki kontan nou, ki gen pityé pou nou é ki lé pardonnen nou, lò yé ka byen rousouvwè sa-ya ki ka rouvini annan asanblé-a (gadé paragraf 14-15).
16. Lò to ka réfléchi asou fason Jéova doumandé asanblé Korent aji ké moun-an ki té péché, kisa sa ka fè to ?
16 Fason Jéova doumandé asanblé Korent aji ké moun-an ki té péché ka montré nou ki Jéova gen bokou lanmou é ki i jis (Ps. 33:5). Ès sa pa ka bay to anvi louwé nou Bondjé ankò plis ? Kou nou tout ka péché, nou tout bézwen i pardonnen nou. Donk nou divèt di Jéova mèrsi pas i bay ranson-an ki ka pèrmèt li pardonnen nou. Sa ka konsolé nou é sa ka rasiré nou lò nou savé ki Jéova vréman kontan so sèrvitèr-ya é ki i lé sa ki pi bon pou yé.
17. Ki késyon nou ké réponn annan artik-ya ki ka vin dèyè ?
17 É si roun moun ka fè roun péché ki grav jòdla ? Kouman ansyen-yan pouvé imité Jéova ki lé idé sa-ya ki péché répanti ? É lò yé ka désidé tiré roun moun annan asanblé-a ouben roumété l’ annan asanblé-a, kouman frè ké sò-ya divèt réyaji ? Nou ké réponn sa késyon-yan annan artik-ya ki ka vin dèyè.
KANTIK 109 Aimons intensément avec le coeur
