ARTIK POU ÉTIDYÉ 31
KANTIK 12 Jéhovah, Dieu magnifique
Sa Jéova fè pou tiré nou anba péché-a
« Bondjé té tèlman kontan monn-an ki i bay so sèl Pitit » (JEAN 3:16).
SA NOU KÉ ANPRANN
Nou ké palé di sa Jéova désidé fè pou idé nou briga ké péché-a é sa i fè pou libéré nou di péché-a épi pèrmèt nou viv pou tout-tan.
1-2. a) Péché-a, a kisa, é kouman nou pouvé ganyen l’ ? (gadé osi nòt « Pou byen konprann »). b) Ki késyon nou ké réponn annan sa artik-a ? c) Di kisa nou ké palé annan ròt artik-ya annan sa Tourdégard-a ? (gadé osi « Pou sa-ya ki ké li sa Tourdégard-a » annan sa Tourdégard-a).
ÈS TO lé savé a ki pwen Jéova kontan to ? Si to ka étidyé sa i fè pou libéré to di péché ké lanmò-a, to ké wè fòrs lanmou i gen pou to. Péché-a a sa roun lèlmi, é i mové menm. To pa pouvé ganyen l’ to rounso. Nou tout ka péché touléjou é nou tout ka mouri akoz di péché-a (Rom. 5:12). Mé érèzman, Jéova ké tiré nou anba péché-a, asiré pa pitèt !
2 Sa ka fè apéprè 6 000 lannen Jéova ka idé nou briga ké péché-a. Poukisa i ka fè sa ? Paské i kontan nou. I kontan nou dipi koumansman-an. A pou sa i fè bokou bagaj pou idé nou briga. I savé ki a péché-a ki ka fè si nou ka mouri é i pa lé nou mouri. Pasé sa, i lé nou viv pou tout-tan (Rom. 6:23). É a sa i lé pou to menm osi. Annan sa artik-a, nou ké réponn sa trwa késyon-yan : 1) Kisa Jéova fè pou bay moun ki pa parfè roun èspwar ? 2) Annan lépòk Labib, kisa moun ki pa té parfè fè pou Jéova asèpté yé ? 3) Kisa Jézi fè pou libéré moun di péché-a ?
KISA JÉOVA FÈ POU BAY MOUN KI PA PARFÈ ROUN ÈSPWAR ?
3. Kisa ki fè Adan ké Èv péché ?
3 Lò Jéova fè prémyé wonm-an ké prémyé fanm-an, i té lé yé tchò kontan. I bay yé roun bèl ti koté pou yé rété, i fè yé roun bèl kado, maryaj-a, é i bay yé roun bagaj enpòrtan pou yé fè. Yé té divèt fè pitit pou plen latè-a épi fè l’ divini roun paradi kou jarden Édèn-an. I té gen rounsèl bagaj yé pa té divèt fè. Jéova avèrti yé ki si yé pa té ka kouté, é si yé té ka tounen yé do bay li, yé té ké mouri akoz di sa péché-a. Nou savé sa ki rivé : roun zanj méchan ki pa té kontan ni Bondjé ni yé bay yé anvi dézobéyi Bondjé. Pasé yé fè yé Papa ki té kontan yé konfyans, yé fè sa sa zanj méchan-an té lé : yé péché. Apré sa, bagaj-ya fèt kou Jéova té di. Kou Adan ké Èv dézobéyi, yé soufri pannan tout yé lavi. Yé vin vyé é finalman, yé mouri (Gen. 1:28, 29 ; 2:8, 9, 16-18 ; 3:1-6, 17-19, 24 ; 5:5).
4. Poukisa Jéova rayi péché-a é ka idé nou briga ké l’ ? (Romains 8:20, 21).
4 Jéova té lé nou savé sa ki rivé annan jarden Édèn-an pou fè nou konprann roun bagaj enpòrtan. Sa ka idé nou konprann poukisa nou Papa rayi péché-a konsa. Péché-a ka séparé nou di li é ka mennen nou asou chimen lanmò (Is. 59:2). É a pou sa Satan, zanj-a ki mété nou annan sa benyenyen-an, kontan péché-a é lé fè nou péché. Lò Adan ké Èv péché, pitèt Satan pansé ki i té rivé gaté projè Jéova té gen pou moun asou latè-a. Mé i pa té konprann kouman Jéova kontan moun-yan. Jéova pa janmen chanjé projè i té gen pou pitit Adan ké Èv. Kou i té kontan yé, i bay yé roun èspwar lanmenm (li Romains 8:20, 21). I té savé ki roun ran annan yé té ké désidé kontan li épi té ké doumandé l’ idé yé briga ké péché-a. Jéova fè sa ki fo pou yé té pouvé vin pròch di li, é pou tiré yé anba péché-a. Kisa i fè ?
5. Kitan Jéova bay moun roun èspwar ? Èspliké (Genèse 3:15).
5 (Li Genèse 3:15.) Lò Jéova di sa ki té ké rivé Satan, i bay moun roun èspwar. I di ki roun « désandans » té ké sové yé. Sa désandans-a té ké krazé Satan épi té ké ranjé tout problèm ki koumansé annan jarden Édèn-an (1 Jean 3:8). Mé sa désandans-a té ké gen pou soufri. Satan té ké blésé l’, sa lé di ki i té ké fè l’ mouri. Sa té ké raché tchò Jéova. Mé a pa té ké pou bon tchò, pas grasa li, rounlo ké patché moun té ké soti anba péché-a ké lanmò.
ANNAN LÉPÒK LABIB, KISA MOUN KI PA TÉ KA PARFÈ FÈ POU JÉOVA ASÈPTÉ YÉ ?
6. Kisa moun ki té gen lafwa, kou Abèl ké Noé, fè pou yé vin pròch ké Jéova ?
6 Piti piti, pi tan-an té ka pasé, Jéova montré kouman moun-yan pouvé vin pròch ké li, menmsi yé pa parfè. Prémyé moun ki mété so lafwa annan Jéova apré tousa ki rivé annan jarden Édèn-an, a Abèl, dézyèm pitit Adan ké Èv. Abèl té kontan so Bondjé, i té lé fè l’ plézi é i té lé vin pròch ké li. Donk, i fè roun sakrifis. Kou i té bèrjé, i pran déztrwa annan so ti mouton é i sakrifyé yé pou Jéova. Kouman Jéova réyaji ? I « asèpté Abèl ké sa i té bay » (Gen. 4:4). Pita, lò moun ki té kontan l’ é ki té ka fè l’ konfyans bay li menm kalité sakrifis-ya, Jéova asèpté osi. A sa Noé fè parèkzanp (Gen. 8:20, 21). Lò Jéova asèpté sa kalité sakrifis-ya, i montré ki menmsi roun moun pa parfè, i ka asèpté l’ é i pouvé vin pròch ké li b.
7. Abraam té paré pou sakrifyé so pròp pitit, kisa sa ka anprann nou ?
7 Jéova doumandé Abraam, roun mouché ki té gen roun lafwa ki té fò toubonnman, fè roun bagaj ki té rèd menm : i té divèt sakrifyé so pitit Izaak. A pa ti rèd sa té divèt rèd pou Abraam, mé i obéyi so Bondjé. Lò Abraam té paré pou tchwé so pitit, Jéova anpéché li fè sa. Èkzanp Abraam té ké anprann tout sa ki té ké gen lafwa roun bagaj enpòrtan : tèlman Jéova kontan moun-yan, i té ké paré sakrifyé so Pitit i kontan-an ! (Gen. 22:1-18).
8. Kisa patché sakrifis Bondjé doumandé Israyélit-ya fè té ka montré ? (Lévitique 4:27-29 ; 17:11).
8 Roun patché lannen pita, annan Lalwa i bay Israyélit-ya, Bondjé doumandé yé fè roun patché sakrifis pou pardonnen yé péché (li Lévitique 4:27-29 ; 17:11). Sa sakrifis-ya té ka montré ki Jéova té ké bay roun sakrifis ki té ké miyò. Sa sakrifis-a té ké tiré moun-yan anba péché-a. Bondjé fè sèrten profèt èspliké ki désandans i té promèt-a (pita moun vin konprann ki a té Pitit Bondjé-a menm) té ké soufri épi yé té ké tchwé l’. Yé té ké tchwé l’ kou roun mouton yé ka sakrifyé (Is. 53:1-12). Imajiné sa : Jéova té ké bay so Pitit i kontan-an an sakrifis pou libéré moun-yan di péché ké lanmò-a. É to menm osi, to annan !
KISA JÉZI FÈ POU SOVÉ NOU ?
9. Kisa Janbatis di asou Jézi ? (Hébreux 9:22 ; 10:1-4, 12).
9 Annan 1é syèk-a, lò Janbatis wè Jézi di Nazarèt vini, men sa i di asou l’ : « Gadé : Timouton Bondjé-a ki ka tiré péché monn-an ! » (Jean 1:29). Sa i di té ka montré ki Jézi té sa désandans èspésyal Bondjé té promèt-a. Anfen, moun-yan té gen roun èspwar anyen pa té pouvé charyé : yé té ké ganyen péché-a nèt ! (li Hébreux 9:22 ; 10:1-4, 12).
10. Kouman Jézi montré ki i té « vin aplé » moun ki té ka péché ?
10 Jézi gadé èspésyalman pou sa-ya ki té krazé akoz di péché-a é i envité yé divini so disip. I té savé ki a akoz di péché-a moun ka soufri. A pou sa, i alé wè èspésyalman moun-yan tout moun té savé yé té ka péché. Roun jou, i èspliké : « A pa moun ki gen bon lasanté ki bézwen dòktèr, mé a sa-ya ki malad. » É i di ankò : « A pa moun ki jis mo vin aplé, a moun ki ka fè péché mo vin aplé » (Mat. 9:12, 13). Ès a sa i fè vré ? An tout sans ! Ké tout so tchò, i pardonnen madanm-an ki té lavé so pyé ké so dlo wéy (Luc 7:37-50). I anprann roun fanm Samari i té jwenn bò d’ roun pi plizyèr bagaj enpòrtan, menmsi i té savé ki i té ka mennen roun vyé lavi (Jean 4:7, 17-19, 25, 26). É Jéova jis bay li pouvwar pou tiré sa péché-a ka mennen : lanmò. Jézi résisité moun ki té gen tout kalité laj, wonm kou fanm (Mat. 11:5).
11. Poukisa moun ki té ka péché té alèz ké Jézi ?
11 Sa pa ka sirprann nou ki menm moun-yan ki té ka benyen annan péché-a té alèz ké Jézi. Yé pa té pè alé wè l’ (Luc 15:1, 2). I té ka konprann sa yé té ka rousanti é i té janti ké yé. É i té ka félisité yé, i té ka rékonpansé yé pas yé té gen lafwa annan li (Luc 19:1-10). Jézi montré parfètman kouman so Papa gen pityé pou moun-yan é i lé pardonnen yé (Jean 14:9). Lò nou ka gadé sa Jézi di ké fason i aji ké moun-yan, nou ka anprann ki Jéova gen pityé pou moun-yan, i lé pardonnen yé, i kontan yé é i lé idé yé chak fin ké péché-a. Fason i té ka fè bay sa-ya ki té ka péché anvi chanjé épi swiv li (Luc 5:27, 28).
12. Kisa Jézi di asou so lanmò ?
12 Jézi té savé ki i té ké bay so lavi. Plizyèr fwa i di so disip ki moun té ké trayi l’ é ki yé té ké mété l’ asou roun poto pou tchwé l’ (Mat. 17:22 ; 20:18, 19). I té savé ki grasa so sakrifis, i té ké pouvé tiré péché-a annan monn-an, kou Janbatis ké profèt-ya té di l’. É i èspliké ki lò i té ké bay so lavi, i té ké « fè tout kalité moun vini òbò » li (Jean 12:32). Sa-ya ki té ké mété yé lafwa annan Jézi é ki té ké imité l’ té ké pouvé fè Jéova plézi, menmsi yé pa té parfè. Konsa, yé té ké « libéré di péché-a » (Rom. 6:14, 18, 22 ; Jean 8:32). A pou sa, Jézi pran kouraj é i té paré soufri épi mouri (Jean 10:17, 18).
13. Kouman Jézi mouri, é kisa sa ka anprann nou asou Jéova ? (gadé zimaj-a osi).
13 Yé trayi Jézi, yé arété l’, yé jouré l’, yé manti asou l’, yé di i té koupab é yé malmennen l’. Plizyèr sòlda mennen l’ koté yé té ké tchwé l’ é yé mété l’ asou roun poto. Toupannan i té ka sipòrté sa soufrans-ya, i té gen roun moun ki té ka soufri ankò plis, a té Jéova. Jéova té pouvé fè roun bagaj pou arété sa. Mé i tchenbé so kò, i pa fè anyen. Jéova té kontan so Pitit bokou, atò, poukisa i lésé l’ soufri épi mouri konsa ? Pas Jéova kontan nou. Men sa Jézi èspliké : « Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:16).
A pa ti soufri Jéova soufri lò i pèrmèt moun tchwé so Pitit. Mé i té lé nou soti anba péché-a ké lanmò (gadé paragaf 13).
14. Kisa sakrifis Jézi ka montré nou ?
14 Sakrifis Jézi-a, a pi bèl prèv ki ka montré kouman Jéova kontan pitit Adan ké Èv. Donk, sa ka montré kouman Jéova kontan to. To Bondjé bay so Pitit pou tiré to anba péché-a ké lanmò, menmsi i té savé ki a pa ti soufri i té ké soufri ! (1 Jean 4:9, 10). I vréman lé idé nou chak briga ké péché-a épi ganyen !
15. Ki bèl bagaj ranson-an, bèl kado Jéova fè nou-a, pouvé mennen pou nou, mé kisa nou divèt fè pou profité di sa kado-a ?
15 Grasa bèl kado Bondjé bay nou-a, ranson-an, i pouvé pardonnen nou péché. Mé pou Bondjé pardonnen nou péché, nou gen roun bagaj pou fè. A kisa ? Janbatis é pita Jézi li menm, di : « Répanti, paské rwayonm-an ki annan syèl-a vin pi pròch » (Mat. 3:1,2 ; 4:17). Nou blijé répanti si nou lé briga ké péché-a épi vin pi pròch di nou Papa ki kontan nou. Mé lò roun moun ka répanti, kisa i ka fè ? É si nou ka répanti, kouman sa ké idé nou fè Jéova plézi menmsi nou pa parfè ? Artik ki ka vin dèyè-a ké réponn sa késyon-yan.
KANTIK 18 Nou tchò plen ké rékonésans pou ranson-an
a POU BYEN KONPRANN : Lò Labib ka palé di « péché-a », a pou palé di mové bagaj roun moun ka fè paské i pa ka swiv sa Jéova ka di asou sa ki bon ouben sa ki pa bon. Mé, a pou palé osi di tout vyé défo Adan bay nou ki ka fè ki nou gen mové lidé é ki ka fè nou anvi fè bagaj ki pa bon. Akoz di péché Adan bay nou, nou tout ka mouri.
