1-2. Dapré 1 Pierre 2:21, ké kimoun nou pouvé konparé Jézi ?

IMAJINÉ sa sitiasyon-an. To annan roun group moun ki ka maché annan roun gro danbwa ki danjéré. Latè-a mòl. Zòt ka swiv roun moun ki byen konnèt danbwa-a. To ka wè tras i ka lésé annan latè-a lò i ka maché. Épi men ! Zòt pa ka wè l’ ankò. Mé zòt pa ka pran pè. Zòt savé ki, pou zòt trapé zòt chimen, a pou zòt swiv tras i lésé dèyè li.

² Jòdla, a kousidiré vré krétyen-yan ka maché annan roun gran danbwa ki danjéré : monn Satan-an. Érézman, kou nou ka wè l’ annan 1 Pierre 2:21, Jéova bay nou pi bon gid-a, so Pitit Jézi Kris, é nou pouvé swiv so tras. Dapré roun liv ki ka èspliké vèrsé Labib-ya, apot Pyèr ka konparé Jézi ké roun gid annan sa vèrsé-a. Kou gid nou palé annan èkzanp nou pran-an, Jézi lésé tras pou nou maché dèyè li. Annan sa artik-a nou ké bay répons asou sa trwa késyon-yan : Kisa sa lé di swiv tras Jézi ? Poukisa nou divèt fè sa ? É kouman nou pouvé fè l’ ?

3. Kisa sa lé di swiv tras roun moun ?

³ Kisa sa lé di swiv tras roun moun ? Annan Labib-a, lò yé ka sèrvi mo « maché » ké « pyé », détan a pou palé di fason roun moun ka viv (Gen. 6:9 ; Prov. 4:26). Nou pouvé konparé èkzanp roun moun ka bay ké so konpòrtman, ké tras i ka lésé lò i ka maché. Donk, swiv tras roun moun, sa lé di swiv so èkzanp, fè kou li.

4. Kisa sa lé di swiv tras Jézi ?

 ⁴ Alòr, kisa sa lé di swiv tras Jézi ? Sa lé di imité so èkzanp, pa plis ki sa. Annan vèrsé sa artik-a ka apiyé asou-a, Pyèr ka palé di èkzanp Jézi ka bay nou annan zafè sipòrté soufrans-ya. Mé nou pouvé imité l’ annan patché ròt bagaj ankò (1 Pierre 2:18-25). Nou pouvé di ki tout bagaj annan lavi Jézi, tousa i di ké tousa i fè, a roun èkzanp pou nou swiv.

5. Ès moun ki pa parfè pouvé vréman swiv èkzanp Jézi ki parfè ? Èspliké.

⁵ Ès moun ki pa parfè pouvé vréman swiv èkzanp Jézi ? Wi. Si to ka byen gadé, Pyèr ka di nou « byen » swiv tras Jézi, i pa ka di nou swiv Jézi « roun fason ki parfè ». Si nou ka fè tousa nou pouvé pou byen swiv so tras menm si nou pa parfè, sa lé di si nou ka imité l’, nou ké fè sa Jan ka di nou fè : ‘Kontinyé maché menm fason [Jézi] maché’ (1 Jean 2:6, nòt).

6-7. Poukisa nou pouvé di ki, lò nou ka swiv tras Jézi, sa ka fè nou vin pi pròch ké Jéova ?

⁶ Si nou ka swiv tras Jézi lésé, nou ké vin pi pròch ké Jéova. Poukisa nou pouvé di sa ? Pou dé rézon. Prémyèrman, tousa Jézi té ka fè té ka fè Bondjé plézi (Jean 8:29). Donk, si nou ka imité l’, nou ké fè bagaj Bondjé kontan. É nou savé ki nou Papa ki annan syèl-a ka vin pi pròch ké tout sa ki ka fè tousa yé pouvé pou divini so zanmi (Jacq. 4:8).

⁷ Dézyèmman, Jézi té ka imité so Papa roun fason ki té parfè. A pou sa i té pouvé di : « Moun-an ki wè mo, wè Papa-a osi » (Jean 14:9). Parèkzanp, Labib-a ka anprann nou ki Jézi montré i té gen pityé pou roun moun ki té gen lalèp, i montré i té ka konprann soufrans roun madanm ki té gen roun maladi ki té ka fè l’ soufri, é i montré i té gen lapenn pou moun-yan ki té gen chagren paské yé  té pédi moun yé té kontan. Lò nou ka imité so bèl kalité ké fason i té ka aji ké ròt-ya, nou ka imité Jéova osi (Marc 1:40, 41 ; 5:25-34 ; Jean 11:33-35). Pi nou ka fè tousa nou pouvé pou sanblé Jéova, pi nou ka vin pròch ké li.

8. Èspliké poukisa swiv Jézi ka idé nou ganyen asou monn-an.

⁸ Si nou ka swiv tras Jézi lésé, nou pa ké lésé nou sèrvis pou Jéova. Lannwit anvan i mouri, Jézi té pouvé di : « Mo ganyen asou monn-an » (Jean 16:33). I té lé di ki, i pa té janmen lésé konpòrtman moun annan monn-an, fason yé ka wè lavi-a, ké sa ki té pi enpòrtan pou yé fè li chanjé. I pa janmen bliyé poukisa i té vini asou latè-a : pou sanktifyé non Jéova. Kisa sa ka anprann nou ? Annan sa monn-an, i gen bokou bagaj ki pouvé fè nou lésé nou sèrvis pou Jéova. Mé si kou Jézi fè l’, nou ka mété nou lidé asou fè volonté Bondjé rounso, nou osi nou ké ‘ganyen asou monn-an’ (1 Jean 5:5).

9. Kisa nou divèt fè pou rété asou chimen lavi pou tout-tan ?

⁹ Si nou ka swiv tras Jézi lésé, nou ké gen lavi pou tout-tan. Roun jou, roun jenn wonm ki té gen bokou soumaké, doumandé Jézi kisa i té divèt fè pou i té gen lavi pou tout-tan. Jézi réponn li : « Vini, swiv mo » (Mat. 19:16-21). Men sa Jézi di Jwif-ya ki pa té ka krè i té sa Kris-a : « Mo brébi-ya [...] ka swiv mo. Mo ka bay yé lavi pou tout-tan » (Jean 10:24-29). É i èspliké Nikodèm, roun moun annan sanédren-an ki té lé konnèt plis bagaj asou sa i té ka ansényé-a, ki ‘moun-yan ki té ké montré yé lafwa annan li’ té ké gen « lavi pou tout-tan-an » (Jean 3:16). Nou ka montré nou gen lafwa annan Jézi lò nou ka fè sa i ansényé-a é lò nou ka imité l’. A sa ki ké fè nou rété asou chimen lavi pou tout-tan (Mat. 7:14).

10. Kisa nou divèt fè pou nou anprann konnèt Jézi pi byen ? (Jean 17:3).

¹⁰ Pou nou pouvé byen swiv tras Jézi, pou koumansé, a pou nou anprann konnèt li (li Jean 17:3). ‘Anprann konnèt Jézi’ ka pran tan. Nou divèt chaché konprann pi byen ki kalité moun i sa : ki kalité i gen, fason i ka pansé é fason i ka wè sa ki bon ouben sa ki pa bon. Menm si sa ka fè lannen nou krétyen, nou divèt kontinyé anprann konnèt Jéova ké so Pitit.

11. Kisa nou ka trouvé annan kat Évanjil-ya ?

¹¹ Pou idé nou anprann konnèt so Pitit, Jéova mété annan so Paròl kat liv ki ka palé di so lavi ké so prédikasyon : Évanjil-ya. Annan sa liv-ya, nou ka wè sa i di, sa i fè é sa i té ka rousanti. Yé ka pèrmèt  nou « byen réfléchi » asou so èkzanp (Héb. 12:3). Nou pouvé di ki, annan sa liv-ya, i gen tras Jézi lésé dèyè li. Lò nou ka étidyé Évanjil-ya, nou ka anprann konnèt Jézi pi byen é a sa ki ka pèrmèt nou byen swiv so tras.

12. Kisa nou divèt fè pou nou byen profité di sa nou ka li annan Évanjil-ya ?

¹² Pou nou anprann konnèt Jézi pi byen, nou divèt fè plis ki li Évanjil-ya. Nou divèt osi pran tan byen étidyé yé ké byen réfléchi asou yé (gadé Josué 1:8, nòt). Annou wè aprézan dé konsèy ki pouvé idé nou byen réfléchi asou sa nou ka li annan Évanjil-ya é apliké sa nou ka anprann.

13. Kisa to pouvé fè pou imajiné sa to ka li annan Évanjil-ya ?

¹³ Prémyé konsèy : Imajiné sa to ka li annan Évanjil-ya. Éséyé wè ké tandé sa ki pasé épi éséyé konprann sa moun-yan rousanti. Pou idé to fè sa, gadé sa nou piblikasyon ka di asou sa. Byen gadé sa ki pasé anvan ké apré vèrsé to ka étidyé-a. Chaché konnèt plis bagaj asou moun-yan ké asou koté istwè-a ka pasé. Konparé sa to fin li ké sa rounòt Lévanjil ka di asou sa menm istwè-a. Détan, i gen annan roun Lévanjil roun ti détay enpòrtan ki rounòt Lévanjil pa ka bay.

14-15. Kouman nou pouvé apliké sa nou ka anprann annan Évanjil-ya ?

¹⁴ Dézyèm konsèy : Apliké sa to ka anprann annan Évanjil-ya (Jean 13:17). Lò to fin byen étidyé roun bagaj to li annan Évanjil-ya, doumandé to kò : « Annan sa mo fin li-a, ès i gen roun bagaj mo pouvé apliké annan mo lavi ? Kouman mo pouvé sèrvi sa istwè-a pou idé roun moun ? » Éséyé sonjé roun moun, épi chwazi bon moman-an pou palé jantiman ké li di sa to anprann.

¹⁵ Annou wè aprézan roun èkzanp pou wè kouman nou pouvé swiv sa dé konsèy-ya. Nou ké palé di ofrann vèv maléré-a fè.

16. Di sa ki ka pasé annan Marc 12:41.

¹⁶ Imajiné sa ki ka pasé (li Marc 12:41). Nou lé 11 nizan 33, sa lé di pa menm roun simenn anvan lanmò Jézi. Pannan près tout lajournen, i ansényé annan Tanp-a. Chèf rélijyé-ya pa jwé ké li. Sèrten annan yé doumandé l’ ké ki otorité i té ka fè so travay. Ròt ankò éséyé pozé l’ késyon yé té ka pansé i pa té ké pouvé réponn (Marc 11:27-33 ; 12:13-34). Aprézan, Jézi asiz annan rounòt parti di Tanp-a yé ka aplé Trézòr koté i gen bwèt pou mété ofrann-yan ; a divèt koté yé ka aplé lakou Madanm-yan. I ka gadé moun-yan ki ka mété lajan annan bwèt pou mété ofrann-yan. I ka wè bokou moun plen ké plon mété bokou lanmonnen annan bwèt-ya. Pitèt i tou pròch ké yé pou tandé dézòrd lanmonnen ka fè lò i ka tonbé annan bwèt-ya.

17. Dapré Marc 12:42, kisa Jézi ka wè aprézan ?

¹⁷ (Li Marc 12:42.) Roun tibi tan apré sa, Jézi ka wè roun madanm. A roun « vèv ki té maléré ». Lavi-a rèd pou li. Pitèt i pa menm gen asé lajan pou viv. Mé, i ka vin bò di roun di sa bwèt-ya é i ka mété dé pyès lanmonnen roun fason pou pyès moun pa wè l’. Pitèt, to pa menm ka tandé yé tonbé ofon bwèt-a. Mé, Jézi li menm savé sa i mété : dé lèpta. Lèpton-an, a té pi piti pyès yé té gen annan sa lépòk-a. Dé lèpta pa menm té asé pou achté roun ti zozo, sa-la moun té ka vandé ki té pi bon marché a sa lépòk-a.

18. Dapré Marc 12:43, 44, kisa Jézi di asou ofrann vèv-a bay ?

¹⁸ (Li Marc 12:43, 44.) Sa vèv-a ka fè Jézi rété èstébékwé. Alòr, i ka aplé so disip-ya, i ka montré yé madanm-an é i ka di : « Sa vèv maléré-a mété plis ki tout sa ki mété soumaké annan bwèt pou mété ofrann-yan annan Trézòr-a. » Épi i ka di poukisa : « Yé tout [èspésyalman sa-ya ki té gen bokou soumaké] mété sa yé pa té bézwen, mé li menm ki maléré mété tousa i té gen, tousa i té gen pou viv. » Sa vèv fidèl-a bay so dèrnyé lanmonnen i té gen sa jou-a. I fè Jéova konfyans pou i pran swen di li (Ps. 26:3).

19. Ki bagaj enpòrtan nou pouvé anprann ké sa Jézi di asou vèv maléré-a ?

¹⁹ Apliké sa sa istwè-a ka anprann to. Doumandé to kò : « Kisa mo pouvé anprann ké sa Jézi di asou vèv maléré-a ? » Fè kousidiré a to ki sa vèv maléré-a. I té ké byen kontan bay Jéova plis ki sa, mé i bay tousa i té pouvé bay. É Jézi té savé ki so ofrann té gen bokou valò pou so Papa. Nou pouvé anprann roun bagaj enpòrtan ké sa istwè-a : Jéova kontan lò nou ka bay li tousa nou pouvé bay. Sa lé di lò nou ka fè so volonté ké tout nou nanm ké tout nou tchò (Mat. 22:37 ; Col. 3:23). So tchò kontan lò nou ka fè tousa nou pouvé pou li ! Sa prensip-a ka maché osi pou tan ké fòrs nou ka bay lò nou ka adoré Bondjé. Parèkzanp, lò nou ka préché ké lò nou ka alé annan réinyon-yan.

20. Kouman to pouvé apliké sa sa istwè-a ka anprann to ? Bay roun èkzanp.

²⁰ Kouman to pouvé apliké sa to anprann ké sa istwè-a ? Éséyé sonjé frè ké sò ki té ké kontan si to té ka fè yé sonjé ki Jéova kontan sa yé ka fè pou li. Parèkzanp, ès to konnèt roun sò ki gen so ti laj ki ka santi so kò koupab ouben ki ka santi ki i pa ka sèrvi anyen paské i pa pouvé préché kou anvan ? Ouben,  ès to konnèt roun frè annan to asanblé ki gen roun maladi é ki ka soufri dipi lontan é ki dékourajé paské i pa pouvé vini annan tout réinyon-yan annan sal di Rwayonm-an ankò ? To pouvé soutni sa frè ké sò-ya ké paròl ki bon pou fè yé « vin pi fò » (Éph. 4:29). Palé ké yé di sa bèl bagaj nou anprann-an ké istwè vèv maléré-a. Sa to ké di yé pou konsolé yé ké fè yé sonjé ki Jéova kontan lò nou ka bay li tousa nou pouvé (Prov. 15:23 ; 1 Thess. 5:11). Lò to ka félisité tout sa ki ka bay Jéova tousa yé pouvé, menm si sa pouvé sanblé roun ti kichoz, to ka byen swiv tras Jézi.

21. Kisa to byen désidé fè ?

²¹ Nou vréman kontan paské nou konnèt roun patché ti détay asou lavi Jézi gras a sa ki marké annan Évanjil-ya ! Sa ka pèrmèt nou imité l’, sa lé di byen swiv so tras. Nou pouvé pran roun ti moso tan lò nou ka étidyé nou rounso ouben ké nou fanmi pou étidyé Évanjil-ya. A pou nou sonjé ki, pou nou byen profité di sa étid-a, nou divèt imajiné sa ki pasé é apliké sa nou ka anprann. Anplis di imité sa Jézi fè, nou divèt osi kouté sa i di. Annan artik ka vin dèyè-a, nou ké wè kisa sa Jézi di anvan i mouri ka anprann nou.