1-2. A kisa ki ranson-an, é poukisa nou bézwen sa ranson-an ?

LÒ Adan, ki té sa roun wonm parfè, péché, i pédi posibilité viv pou tout-tan. I pédi l’ ni pou li ni pou so pitit. Adan pa té gen pyès èskiz paské a chwazi i té chwazi dézobéyi Bondjé. Mé so pitit-ya, yé menm, a pa yé ki té péché (Rom. 5:12, 14). Ès Jéova té pouvé fè roun bagaj pou yé té pouvé viv pou tout-tan ? Wi. Roun tibi tan apré Adan péché, i koumansé èspliké kouman i té ké sové milyon pitit Adan di péché-a ké lanmò-a (Gen. 3:15). I désidé i té ké voyé so Pitit asou latè-a pou i « bay so lavi pou péyé ranson-an an échanj di bokou moun » (Marc 10:45 ; Jean 6:51).

² A kisa ki ranson-an ? Annan Ékritir grèk-ya, ranson-an a sa Jézi péyé pou viré achté sa Adan té pédi-a (1 Cor. 15:22). Poukisa nou bézwen ranson-an ? Paské, kou nou ka wè l’ annan Lalwa Jéova té bay Moyiz, pou fè sa ki jis douvan Jéova, yé té divèt bay roun lavi pou rounòt lavi (Ex. 21:23, 24). Adan té pédi so lavi wonm parfè. Pou fè sa ki k’alé annan sans jistis Bondjé-a, Jézi bay so lavi wonm parfè (Rom. 5:17). A konsa i divini roun « Papa pou tout-tan » pou sa-ya ki ka montré yé gen lafwa annan ranson-an (Is. 9:6 ; Rom. 3:23, 24).

3. Dapré Jean 14:31 ké 15:13, poukisa Jézi té paré bay so lavi wonm parfè ?

³ Jézi té paré bay so lavi pas i té kontan so Papa ki annan syèl-a toubonnman é pas i té kontan moun-yan osi (li Jean 14:31 ; 15:13). A sa lanmou-a ki fè si i té byen désidé rété fidèl jistan i mouri é fè volonté so Papa. É a sa i fè. Gras a sa, sa Jéova prévwè pou moun-yan ké latè-a ké fèt. Annan sa artik-a, nou ké wè poukisa Bondjé lésé so Pitit soufri  konsa anvan i mouri. Nou ké palé osi di roun moun ki ékri plizyèr liv annan Labib-a é ki té gen bokou rékonésans pou ranson-an. É pou fini, nou ké wè kouman nou pouvé montré nou rékonésans pou ranson Jéova bay gras a Jézi é kouman nou pouvé gen plis rékonésans ankò.

4. Rakonté kouman Jézi mouri.

⁴ Éséyé imajiné kouman Jézi soufri dèrnyé jou i té asou latè-a. I té ké pouvé doumandé roun patché zanj vini protéjé li, mé awa, i ka lésé sòlda romen-yan arété l’, é yé ka pran tout yé plézi ka bay li kout fwèt (Mat. 26:52-54 ; Jean 18:3 ; 19:1). Yé ka sèrvi roun fwèt ki ka raché so lachè. Apré sa, yé ka mété roun gro poto byen lou asou so do ki ja byen pliché. Jézi ka koumansé ralé poto-a pou alé koté yé ké tchwé l’. Mé vitman, i ka pédi tout so fòrs, é yé ka doumandé roun mouché ki ka pasé pa bò la, poté poto-a bay li (Mat. 27:32). Lò Jézi ka rivé koté i divèt mouri-a, sòlda-ya ka klouwé so lanmen ké so pyé asou poto-a. Apré sa, yé ka lévé poto-a mété l’ dibout. Kò Jézi gen so pwa, donk so lachè ka déchiré koté yé mété klou-ya. So zanmi-ya ka pléré, so manman krazé nèt, mé chèf jwif-ya yé menm ka ari di so tèt (Luc 23:32-38 ; Jean 19:25). Apré sa, i ka soufri pannan lontan. So tchò ké so poumon ka koumansé fatigé, é sa rèd pou i rèspiré. Jézi savé i rété fidèl, é jis anvan i mouri, i ka priyè Jéova roun dèrnyé fwa. Apré sa, i ka bésé so tèt é i ka mouri (Marc 15:37 ; Luc 23:46 ; Jean 10:17, 18 ; 19:30). A pa ti soufri Jézi soufri anvan i mouri. I mouri piti piti é yé fè l’ ronté douvan tout moun.

5. Pou Jézi, kisa ki té pi mové ankò ki fason yé tchwé l’ ?

⁵ Pou Jézi, sa ki té pi mové-a, a pa fason yé tchwé l’, mé a pito sa yé di asou l’ pou yé té pouvé tchwé l’. Yé manti asou l’, yé di ki i té ka blasfémé, sa lé di ki i té sa roun moun ki pa té ka rèspèkté ni Bondjé ni so non (Mat. 26:64-66). Lò Jézi té ka sonjé ki moun-yan té pouvé di ki i pa té ka rèspèkté Bondjé, sa té ka troumanté l’ tèlman, ki i té lé ki so Papa pa lésé yé fè l’ ronté konsa (Mat. 26:38, 39, 42). Mé poukisa Jéova lésé so Pitit i té kontan soufri épi mouri ? Annou wè trwa rézon.

6. Poukisa a té pou yé maré Jézi asou roun poto ?

⁶ Prémyèrman, yé té divèt maré Jézi asou roun poto pou libéré Jwif-ya anba roun malédiksyon ki té asou yé èspésyalman (Gal. 3:10, 13). Jwif-ya té promèt yé té ké obéyi Lalwa Bondjé té bay Israyèl, mé yé pa obéyi. Akoz di sa, yé té anba rounòt malédiksyon anplis di malédiksyon ki asou tout pitit Adan-yan (Rom. 5:12). Dapré Lalwa, lò yé té tchwé roun moun pas i té fè roun péché ki té grav, détan yé té divèt maré so kò asou roun poto * ; sa té ka montré ki Bondjé té modi sa péchèr-a (Deut. 21:22, 23 ; 27:26). Kou Jézi té byen rèspèkté tout Lalwa-a, i pa té ka mérité malédiksyon ki té asou Jwif-ya. Donk lò yé maré li asou poto-a, i pran malédiksyon-an ki té asou yé. A konsa, menm si sa nasyon-an pa té asèpté l’, i té pouvé profité di so sakrifis osi.

7. Bay roun dézyèm rézon ki ka pèrmèt nou konprann poukisa Bondjé lésé so Pitit soufri.

⁷ Annou wè roun dézyèm rézon pou konprann poukisa Bondjé lésé so Pitit soufri. A té pou bay li roun fòrmasyon  pou lò i té ké divini Gran Prèt. Jézi anprann kouman sa difisil pou nou obéyi Bondjé lò nou anba éprèv ki rèd toubonnman. Présyon yé mété anlè l’ té fò tèlman ki a ké « patché rélé ké pléré » i doumandé so Papa idé l’. Défwa i té troumanté bokou. Donk nou pouvé sir ki i ka byen konprann sa nou bézwen é ki i pouvé « idé nou » lò nou anba éprèv. Nou gen bokou rékonésans pou Jéova paské i bay nou roun Gran Prèt plen ké mizérikòrd ki pouvé « konprann nou féblès » ! (Héb. 2:17, 18 ; 4:14-16 ; 5:7-10).

8. Bay roun trwazyèm rézon ki ka montré nou poukisa Bondjé lésé so Pitit soufri konsa.

⁸ Jéova lésé so Pitit soufri konsa pou roun trwazyèm rézon. A té pou bay répons asou roun késyon enpòrtan : ès roun moun té ké rété fidèl douvan Bondjé si i anba éprèv ki rèd menm ? Satan lé fè nou krè ki pyès moun pa ké rété fidèl. I ka di ki moun-yan ka sèrvi Bondjé paské yé ka gadé pou yé douvan lèstomak é ki, kou Adan, yé pa vréman kontan l’ (Job 1:9-11 ; 2:4, 5). Jéova té sir ki so Pitit té ké rété fidèl. A pou sa i lésé li pasé anba pi mové éprèv roun moun pouvé gen. Jézi rété fidèl é a konsa i montré ki Satan sa roun mantò.

9. Ki bon èkzanp apot Jan ka bay nou ?

⁹ Sa Labib-a ka anprann nou asou ranson-an ka idé krétyen-yan fè yé lafwa vin pi fò. A sa ki ka idé yé kontinyé préché menm si yé ka pèrsékité yé. É yé ka kontinyé tchenbé anba tout kalité éprèv, pannan tout yé lavi. Annou wè èkzanp apot Jan. A ké fidélité i préché lavérité asou Jézi é asou ranson-an pitèt pannan pasé 60 lannen. É lò i té près gen 100 an, yé mété l’ lajòl asou zilé Patmos. Sa ka montré nou vréman kouman Anpir romen-an té divèt wè l’ kou roun moun ki té danjéré ! Mé kisa i té fè konsa ? I té « palé di Bondjé é i té bay témwanyaj asou Jézi » (Rév. 1:9). Men roun bèl èkzanp i ka bay nou annan zafè gen lafwa é annan zafè tchenbé lò bagaj-a rèd !

10. Kouman nou ka wè rékonésans Jan té gen pou ranson-an annan sa i ékri-a ?

¹⁰ Annan liv i ékri annan Labib-a, Jan ka di kouman i kontan Jézi é kouman i gen rékonésans pou ranson-an. Pasé 100 fwa i ka palé di ranson-an ouben di bèl bagaj ranson-an ka pèrmèt nou gen. Parèkzanp, men sa i ékri : « Si roun moun ka fè roun péché, nou gen roun asistan òbò Papa-a, Jézi Kris, roun moun ki jis » (1 Jean 2:1, 2). Annan sa i ékri-a, i ka fè nou sonjé osi ki sa enpòrtan « pou nou bay témwanyaj asou Jézi » (Rév. 19:10). Jan té vréman gen bokou rékonésans pou ranson-an. É nou menm kouman nou pouvé montré nou rékonésans ?

11. Kisa ki pouvé idé nou tchenbé douvan tantasyon-an ?

¹¹ Annou tchenbé pou nou pa fè pyès péché. Si nou vréman gen rékonésans pou ranson-an, nou pa ké di : « Lò mo anvi fè roun bagaj ki pa bon, a pa lapenn mo fòrsé mo kò pou pa fè l’. Mo pouvé fè roun mové bagaj épi apré sa, a jis doumandé Bondjé pardon épi i bon. » Non, lò nou anvi fè roun bagaj ki pa bon, nou ka di : « To fou ! Kouman mo pouvé fè roun bagaj konsa apré tousa Jéova ké Jézi fè pou mo. » Pou idé nou fè sa, nou pouvé doumandé Jéova bay nou fòrs é nou pouvé sipliyé l’ : « Pa lésé mo antré an tantasyon » (Mat. 6:13, nòt).

12. Kouman nou pouvé apliké konsèy nou ka trouvé annan 1 Jean 3:16-18 ?

 ¹² Annou kontan nou frè ké sò-ya. Lò nou ka montré nou kontan nou frè ké sò-ya, nou ka montré osi nou gen rékonésans pou ranson-an. Poukisa nou ka di sa ? Jézi pa bay so lavi pou nou sèlman, i bay so lavi osi pou nou frè ké sò-ya. Si i té paré mouri pou yé, sa lé di ki yé gen valò pou li (li 1 Jean 3:16-18). Nou ka montré nou kontan nou frè ké sò-ya asou fason nou ka aji ké yé (Éph. 4:29, 31 – 5:2). Parèkzanp, nou ka idé yé lò yé malad ouben lò yé anba éprèv, kou katastròf natirèl. Mé kouman nou divèt réyaji si roun annan yé ka fè ouben ka di nou roun bagaj ki ka fè nou lapenn ?

13. Poukisa nou divèt paré pou pardonnen ?

¹³ Ès détan sa rèd pou nou pardonnen nou frè ké sò-ya ? (Lév. 19:18). Si sa ka rivé nou, annou swiv sa konsèy Pòl bay-a : « Kontinyé sipòrté zòt konpanyen ké pardonnen zòt konpanyen ké tout zòt tchò, menm si roun moun gen roun rézon pou plenn so kò di rounòt moun. Menm fason Jéova pardonnen zòt ké tout so tchò, zòt divèt pardonnen zòt konpanyen ké tout zòt tchò » (Col. 3:13). Chak kou nou ka pardonnen roun frè ouben roun sò, nou ka montré nou Papa ki annan syèl-a ki nou vréman gen bokou rékonésans pou ranson-an. Mé kouman nou pouvé gen plis rékonésans pou sa kado Bondjé bay nou-a ?

14. Di kisa to pouvé fè pou to pouvé gen plis rékonésans pou ranson-an.

¹⁴ Annou di Jéova mèrsi pou ranson-an. Joana, roun sò ki gen 83 lannen é ki ka rété an End ka di : « Mo ka trouvé ki sa enpòrtan di palé di ranson-an chak jou annan mo lapriyè é di di Jéova mèrsi pou sa kado-a ». Lò nou ka priyè annou sonjé èspésyalman ki mové bagaj nou fè annan lajournen-an épi annou doumandé Jéova pardon. Si nou fè roun péché ki grav, nou ké divèt osi doumandé ansyen-yan idé nou. Yé ké pran tan byen kouté nou é yé ké bay nou bon konsèy ki ka vini di Labib-a. Yé ké priyè ké nou é yé ké doumandé Jéova kontinyé bay nou tout bèl bénédiksyon sakrifis Jézi-a ka pèrmèt nou gen, ‘pou nou géri annan domenn [èspirityèl]’ (Jacq. 5:14-16).

15. Poukisa nou divèt pran tan li ké réfléchi asou piblikasyon-yan ki ka palé di ranson-an ?

 ¹⁵ Annou pran tan byen réfléchi asou ranson-an. Rajamani, roun sò ki gen 73 an ka di : « Chak kou mo ka li roun bagaj ki ka palé di fason Jézi soufri, dlo ka vini an mo wéy ». Pitèt to menm osi to gen lapenn lò to ka réfléchi asou tousa Pitit Bondjé sipòrté. Mé pi to ké pran tan réfléchi asou sakrifis i fè-a, pi to ké kontan l’, li ké so Papa. É si to té ka pran tan étidyé ranson-an ?

16. Ki bénédiksyon nou ka rousouvwè lò nou ka fè ròt-ya savé a kisa ki ranson-an ? (gadé zimaj-a anlè prémyé paj-a).

¹⁶ Annou fè ròt-ya savé a kisa ki ranson-an. Chak kou nou ka palé di ranson-an ké roun moun, nou gen plis rékonésans pou sa kado-a. Nou gen roun patché bon zouti pou èspliké poukisa Jézi té divèt mouri pou nou. Kilès ? Parèkzanp, nou gen léson 4 annan brochir Bondjé gen bon ti nouvèl pou nou ! Tit sa léson-an a : « Jézi Kris a kimoun ? ». I gen osi chapit 5-a annan liv Kisa Labib-a ka anprann nou ?, so tit a :« Ranson-an : a pi bèl kado Bondjé ». Anplis di sa, chak lannen, nou ka fè nou rékonésans pou ranson-an vin pi fò lò nou ka alé annan Mémoryal lanmò Jézi é lò nou ka envité tout moun vini ké nou. Men roun bèl lònò Jéova ka bay nou : fè tout moun konnèt so Pitit !

17. Poukisa ranson-an a pi bèl kado Bondjé bay nou ?

¹⁷ Sa klè kou dlo ròch, nou divèt gen rékonésans pou ranson-an. A gras a ranson-an ki nou pouvé zanmi ké Jéova, menm si nou pa parfè. A osi gras a ranson-an ki Bondjé ké détrwi tout travay Djab-a (1 Jean 3:8). É a toujou gras a ranson-an ki sa Bondjé prévwè pou latè-a ké fèt. Wi tout latè-a ké divini roun paradi. Tout moun ké kontan Jéova é ké adoré l’. Atò, annou fè tousa nou pouvé touléjou, pou montré Bondjé nou gen rékonésans pou ranson-an, pi bèl kado i bay nou-a !