1-2. Di sa ki pasé anvan Jézi palé dèrnyé kou-a.

NOU annan lannen 33 di nou lépòk, jou 14 nizan-an. Apré yé manti anlè l’ é yé kondanen l’ pou roun bagaj i pa té fè, aprézan yé ka ari di tèt Jézi, yé ka fè l’ patché méchansté, é pou fini, yé ka klouwé l’ asou roun poto. Klou-ya ka krévé so lanmen ké so pyé. Chak kou i ka éséyé rèspiré, chak kou i ka éséyé di roun bagaj, i ka soufri. Mé pa gen mwayen, a pou i palé. I gen plizyèr bagaj enpòrtan pou di.

² Annou wè kisa i di anvan i mouri é kisa sa ka anprann nou. Annou kouté li (Mat. 17:5).

3. Di kimoun Jézi té dèt ka palé lò i di : « Papa, pardonnen yé » ?

³ Kisa Jézi di ? Apré yé klouwé l’ asou poto-a, Jézi fè sa lapriyè-a : « Papa, pardonnen yé. » Mé pardonnen kimoun ? Sa Jézi di apré ka idé nou konprann di kimoun i té ka palé. I di : « Yé pa savé sa yé ka fè » (Luc 23:33, 34). Donk, Jézi té dèt ka palé di sé sòlda romen-yan ki té fin krévé so lanmen ké so pyé ; sa wonm-yan pa té savé kimoun i té sa vréman. Pitèt Jézi té ka sonjé osi sa-ya ki té la é ki té doumandé pou i mouri, mé ki té ké gen lafwa annan li pita (Actes 2:36-38). Magré tout vyé bagaj yé fè l’, i pa koumansé rayi tout moun é i pa tchenbé pyès moun asou so tchò (1 Pierre 2:23). I pito doumandé Jéova pardonnen sa-ya ki té ka tchwé l’.

4. Jézi pardonnen so lèlmi-ya. Kisa sa ka anprann nou ?

 ⁴ Kisa sa Jézi di ka anprann nou ? Kou Jézi, nou divèt paré pou pardonnen (Col. 3:13). Détan, menm nou fanmi pouvé éséyé anpéché nou adoré Jéova paské yé pa ka asèpté nou krwayans, ni fason nou désidé viv. Yé pouvé manti anlè nou, fè nou ronté douvan tout moun, jité nou piblikasyon, ouben menm ménasé nou fè nou méchansté. Pasé nou tchenbé yé asou nou tchò, nou ka doumandé Jéova louvri yé wéy pou roun jou yé pouvé wè lavérité (Mat. 5:44, 45). Détan, sa pouvé rèd pou nou pardonnen èspésyalman lò yé fè nou bagaj ki té rèd menm. Mé si nou ka rété faché, é si nou pa ka pardonnen, a nou menm ki pa ké byen. Men sa roun sò èspliké : « Mo konprann ki pardonnen, sa pa lé di ki mo ka trouvé ki sa yé fè mo a té roun bon bagaj, ni ki mo ka asèpté yé fè nenpòrt kisa ké mo. Sa lé di ki mo ka désidé pa tchenbé yé asou mo tchò » (Ps. 37:8). Lò nou ka désidé pardonnen, nou ka désidé pa rété faché ké tris (Éph. 4:31, 32).

5. Kisa Jézi promèt roun di sé bandi-ya, é poukisa ?

⁵ Kisa Jézi di ? Yé tchwé Jézi an menm tan ké dé bandi. Yé toulédé koumansé jouré l’ (Mat. 27:44). Mé apré sa, roun annan yé chanjé. I konprann ki Jézi pa té fè « anyen ki mové » (Luc 23:40, 41). Anplis di sa, annan sa i di-a, i montré ki i té ka krè ki Jézi té ké résisité roun jou, é ki i té ké divini Rwa. I di Jézi : « Sonjé mo lò to ké vini annan to rwayonm » (Luc 23:42). Men bèl lafwa ! Jézi réponn li : « Vréman mo ka di to sa jòdla, to ké la ké mo [pa annan Rwayonm-an, mé] annan paradi-a » (Luc 23:43). Nou ka wè ki a Jézi li menm ki fè bandi-a sa promès-a lò i di « mo » ké « to ». Kou i té savé ki so Papa kontan pardonnen, a pou sa i té pouvé bay sa bandi ki té ka mouri-a roun èspwar (Ps. 103:8).

6. Kisa sa Jézi réponn bandi-a ka anprann nou ?

⁶ Kisa sa Jézi di ka anprann nou ? Jézi vréman kou so Papa (Héb. 1:3). Jéova paré pou pardonnen nou é i paré montré nou so mizérikòrd. I ké fè l’ ké tout so tchò si nou ka vréman rigrété mové bagaj nou fè anvan, é si nou sir ki i pouvé pardonnen nou gras a sakrifis Jézi (1 Jean 1:7). Sèrten ka pansé ki Jéova pa ké janmen pardonnen péché yé fè anvan. Si détan to ka pansé konsa, réfléchi asou sa : Roun tibi tan anvan i mouri, Jézi montré so mizérikòrd pou bandi-a ki té fin gen lafwa annan li. Donk, Jéova ké montré so mizérikòrd ankò plis pou sa-ya ki ka fè tousa yé pouvé pou obéyi so koumannman, é ki ka adoré l’ ké fidélité (Ps. 51:1 ; 1 Jean 2:1, 2).

7. Dapré Jean 19:26, 27, kisa Jézi di Mari ké Jan, é poukisa ?

⁷ Kisa Jézi di ? (li Jean 19:26, 27). Jézi té lé pran swen di so manman ki té pitèt ja pédi so mari. So frè ké sò-ya té pouvé bay li sa i té bézwen pou viv. Mé kimoun ki té ké idé l’ kontinyé adoré Jéova ? Anyen pa ka di nou ki so  frè-ya té ja divini so disip a sa lépòk-a. Mé Jan li menm té sa roun annan so apot ki té fidèl, é i té sa roun annan so pi bon zanmi. É Jézi té ka wè sa-ya ki té ka adoré Jéova òbò li kou so fanmi (Mat. 12:46-50). A pou sa i di Jan okipé di so manman ; i té savé ki i té ké pran swen di li paské i té ké idé l’ kontinyé adoré Jéova. I di Mari : « Men to pitit. » É i di Jan : « Men to manman. » Dipi sa jou-a, Jan divini kou roun pitit pou Mari, é i pran swen di li kousidiré a té so pròp manman. Sa Jézi di té ka montré ki i té kontan sa madanm-an ki té pran swen di li dipi lò i fèt, é ki té la òbò li jou i mouri-a.

8. Kisa sa Jézi di Mari ké Jan ka anprann nou ?

 ⁸ Kisa sa Jézi di ka anprann nou ? Lanmityé nou gen ké nou frè ké sò krétyen pouvé pi fò pasé lanmityé nou gen ké nou fanmi. Détan, nou fanmi pouvé baré nou chimen, ouben yé pouvé mété nou asou koté. Mé kou Jézi promèt nou l’, si nou ka rété pròch di Jéova ké so òrganizasyon, nou ‘ké rousouvwè san fwa plis’ ki sa nou pédi. Bokou annan nou frè ké sò ké montré nou yé kontan nou kousidiré yé té sa roun garson, roun tifi, roun manman, ouben roun papa pou nou (Marc 10:29, 30). Nou ka viv byen ansanm gras a nou lafwa, mé osi gras a nou lanmou — lanmou nou gen pou Jéova é lanmou nou gen pou nou konpanyen. Ès a pa roun bénédiksyon pou nou di fè parti di sa bèl fanmi-a ? (Col. 3:14 ; 1 Pierre 2:17).

9. Kisa sa Jézi di annan Matthieu 27:46 ka anprann nou ?

⁹ Kisa Jézi di ? Roun tibi tan anvan i mouri, Jézi rélé : « Mo Bondjé, mo Bondjé, poukisa to lésé mo ? » (Mat. 27:46). Labib-a pa ka di poukisa Jézi di sa. Mé annou wè kisa sa paròl-ya ka anprann nou. Pou koumansé, lò i di sa, Jézi réyalizé profési nou ka trouvé annan Psaume 22:1 *. Anplis di sa, sa i di ka montré nou ki Jéova pa té ka mété roun « baryè » alantou so Pitit « pou protéjé li » (Job 1:10). Jézi té konprann ki so Papa té ka lésé so lèlmi-ya fè li wè pi mové éprèv-ya — éprèv pyès ròt moun pa té ké janmen wè. Pou fini, sa i di ka byen montré ki i pa té fè pyès bagaj pou i mérité mouri.

10. Kisa sa Jézi di so Papa ka anprann nou ?

¹⁰ Kisa sa Jézi di ka anprann nou ? Roun prémyé bagaj nou pouvé anprann, a ki nou pa divèt pansé ki Jéova ké protéjé nou di tout éprèv. Kou Jézi, nou divèt paré rété fidèl menm si nou ka riské mouri (Mat. 16:24, 25). Nou savé ki Bondjé pa ké lésé nou soufri pasé sa nou pouvé sipòrté (1 Cor. 10:13). Rounòt bagaj nou ka anprann, a ki détan nou pouvé soufri menm si nou pa fè anyen (1 Pierre 2:19, 20). Sa-ya ki lé anpéché nou adoré Jéova pa ka fè sa paské nou fè roun mové bagaj. Yé ka fè sa pas nou pa ka fè parti di sa monn-an é paské nou ka défann lavérité ki annan Labib-a (Jean 17:14 ; 1 Pierre 4:15, 16). Jézi té ka konprann poukisa Jéova té ka lésé li soufri. Mé détan, roun ran sèrvitèr Jéova ka doumandé yé kò poukisa yé ka soufri (Hab. 1:3). Mé Bondjé gen mizérikòrd é i pasyan. I savé a pa lafwa yé pa gen ; sa yé bézwen, a konsolasyon li rounso pouvé bay (2 Cor. 1:3, 4).

11. Poukisa Jézi di sa nou ka li annan Jean 19:28 ?

¹¹ Kisa Jézi di ? (li Jean 19:28). Poukisa Jézi di : « Mo swèf » ? A té « pou sa ki marké annan Ékritir-ya fèt ». Sa Jan ka di la, a roun profési nou ka jwenn annan Psaume 22:15 : « Mo fòrs vini sèk kou roun moso potri ; mo lang ka kolé asou mo jansiv. » Mé anplis di sa, apré tousa i té wè, kou soufrans i  té ka wè asou poto-a, i té divèt byen swèf. I té bézwen roun moun bay li bwè.

12. Kisa sa Jézi di ka anprann nou ?

¹² Kisa sa Jézi di ka anprann nou ? Jézi pa té ka pansé ki a moun ki fèb ki ka di sa yé ka rousanti. Nou divèt fè kou li. Pitèt nou pa kontan fè moun savé sa nou bézwen. Mé détan annan nou lavi, a pa pou nou pè doumandé roun moun idé nou. Parèkzanp, lò laj ka monté ouben lò maladi gaté vayan, pitèt nou ké divèt doumandé roun zanmi mennen nou fè nou komisyon, ouben alé wè roun dòktèr. Si nou dékourajé, annou pa pè doumandé roun ansyen ouben rounòt krétyen ki gen èspéryans kouté nou, ouben di nou roun « bon paròl » (Prov. 12:25). Annou pa bliyé ki nou frè ké sò-ya kontan nou, é ki yé lé idé nou annan « jou malò-ya » (Prov. 17:17). Mé yé pa pouvé savé sa nou gen annan nou tèt. Yé pitèt pa ké savé nou bézwen roun moun idé nou si nou pa ka di yé anyen.

13. Paské i rété fidèl jistan i mouri, kisa Jézi rivé fè ?

¹³ Kisa Jézi di ? Bò d’ trwazèr aprémidi, Jézi rélé byen fò : « Sa fèt ! » (Jean 19:30). Jézi té savé ki i té fè tousa Jéova té lé i fè. Paské i rété fidèl jistan i mouri, i rivé fè plizyèr bagaj. Prémyèrman, i byen montré ki Satan a roun mantò. A vré, i montré ki roun moun parfè pouvé rété fidèl kèlkanswa mizè Djab-a ka fè li wè. Dézyèmman, i bay so lavi pou péyé ranson-an. Gras a so sakrifis, Bondjé pouvé wè moun ki pa parfè kou moun ki jis, é yé pouvé gen èspwar viv pou tout-tan. Trwazyèmman, i byen montré ki a Jéova rounso ki gen drwa dirijé tout moun, é i défann so répitasyon.

14. Kouman nou divèt viv chak jou, é poukisa ?

¹⁴ Kisa sa Jézi di ka anprann nou ? Nou divèt byen désidé rété fidèl touléjou. Gadé sa frè Maxwell Friend ki té fòrmatèr annan Lékòl Galaad di annan roun diskour asou fidélité-a pannan roun asanblé entèrnasyonal : « Sa to pouvé di ouben fè jòdla, fè l’, pa di to ké fè l’ dimen. Pyès moun pa savé si dimen i ké la toujou. A pou zòt viv chak jou kousidiré a té dèrnyé fwa zòt té pouvé montré ki Bondjé gen rézon bay zòt lavi pou tout-tan. » A pou nou viv chak jou kousidiré a té dèrnyé fwa nou té pouvé montré nou fidélité. Alòr, menm douvan lanmò nou ké pouvé di : « Jéova, mo fè tousa mo pouvé pou rété fidèl, pou montré ki Satan a roun mantò é pou défann to non ké to souvérènté ! »

15. Dapré Luc 23:46, di kisa Jézi té sir ?

¹⁵ Kisa Jézi di ? (li Luc 23:46). Jézi di ké konfyans : « Papa, a annan to lanmen mo ka lésé mo lèspri. » I té savé ki so lavi té ka dépann di Jéova, é i té sir ki so Papa té ké sonjé li.

16. Kisa èkzanp Joshua ka anprann nou ?

¹⁶ Kisa sa Jézi di ka anprann nou ? Kou Jézi, a pou nou paré lésé nou lavi annan lanmen Jéova. Pou fè sa, ‘annou fè li konfyans ké tout nou tchò’ (Prov. 3:5). Joshua, roun jenn Témwen Jéova ki té gen 15 an, té gen roun maladi pyès  moun pa té pouvé géri. I réfizé pran trètman ki pa té k’alé ké lalwa Bondjé asou disan-an. Roun tibi tan anvan i mouri, i di so manman : « Manman, mo annan lanmen Jéova. [...] Mo pouvé di to sa, manman, mo savé Jéova ké résisité mo, paské i li annan mo tchò, é i savé mo vréman kontan l’ *. » Nou tout divèt doumandé nou kò : « Si roun jou mo ka riské mouri akoz di mo lafwa, ès mo ké lésé mo lavi annan lanmen Jéova ? Ès mo ké sir i ké sonjé mo ? »

17-18. Kisa nou anprann annan sa artik-a ? (gadé ankadré-a «  Kisa sa Jézi di anvan i mouri ka anprann nou »).

¹⁷ A pa ti bèl léson nou ka anprann gras a sa Jézi di anvan i mouri ! Sa enpòrtan pou nou pardonnen ròt-ya é nou divèt sir ki Jéova ké pardonnen nou. Nou kontan paské nou annan roun bèl fanmi ké frè ké sò ki paré idé nou. Mé si nou bézwen roun moun idé nou, a pou nou doumandé. Nou savé ki Jéova ké idé nou sipòrté nenpòrt ki kalité éprèv. É nou ka konprann ki sa enpòrtan pou nou viv chak jou kousidiré a té dèrnyé fwa nou té pouvé montré nou fidélité. É nou divèt sir ki nou lavi an sékirité annan lanmen Jéova.

¹⁸ Sa Jézi di anvan i mouri asou poto-a ka anprann nou roun patché bagaj. Si nou ka fè sa nou fin anprann-an, nou ké obéyi lòrd Jéova bay nou-a : « Kouté li » (Mat. 17:5).