1. Gras a kimoun nou pouvé palé ?

 A JÉOVA ki bay nou posibilité palé. Dipi prémyé jou Adan (ki té sa prémyé moun-an) fèt, i té pouvé palé ké so Papa annan syèl-a. I té pouvé osi envanté nouvo mo. Adan sèrvi sa pou bay zannimo-ya yé non, kou Jéova té doumandé l’ fè. (Gen. 2:19). É imajiné kouman i té divèt tou kontan lò i palé pou prémyé fwa ké rounòt moun kou li menm : so madanm, Èv (Gen. 2:22, 23).

2. Tan-lontan, kouman yé mal sèrvi zafè palé-a, é kouman yé ka mal sèrvi l’ jòdla ?

² Mé byen vit, plizyèr moun mal sèrvi sa kado-a. Satan Djab-a manti pou Èv, é akoz di sa manti-a, nou tout ka péché (Gen. 3:1-4). Lò Adan péché, a Èv i akizé é i menm akizé Jéova (Gen. 3:12). Kayen manti pou Jéova apré i tchwé so frè Abèl (Gen. 4:9). Pita, pitit Kayen yé té ka aplé Lamèk fè roun powenm ki té ka byen montré kouman moun annan so lépòk té méchan (Gen. 4:23, 24). É jòdla, kouman moun-yan fika ? Sèrten chèf politik pa menm ronté jouré douvan tout moun, é jòdla sa rèd pou trapé roun fim koté i pa gen mo sal annan. É ki to lékòl ki to o travay, to ka tandé moun ka jouré. Malérèzman, tousa ka montré kouman monn-an vin mové jòdla.

3. a) Kisa nou divèt panga ? b) Kisa nou ké wè annan sa artik-a ?

³ Si nou pa panga, nou pouvé tèlman abitchwé tandé moun jouré ki nou menm nou ka koumansé jouré osi.  Kou nou krétyen, nou lé fè Jéova plézi, donk nou pa janmen lé vyé paròl soti di nou bouch. Nou lé sèrvi sa bèl kado-a di roun bon fason, sa lé di pou louwé nou Bondjé. Annan sa artik-a, nou ké wè kouman nou pouvé fè sa 1) lò nou ka préché, 2) annan nou réinyon é 3) lò nou ka palé ké roun moun. Mé pou koumansé, annou wè poukisa sa nou ka di enpòrtan pou Jéova.

4. Dapré Malachie 3:16, poukisa sa nou ka di enpòrtan pou Jéova ?

⁴ (Li Malachie 3:16.) Dapré sa vèrsé-a, Jéova gen roun « liv pou sonjé » sa-ya ki gen lakrent pou li é ki ka pran tan réfléchi asou so non. Lò yé ka palé ké yé konpanyen, i ka kouté sa yé ka di é i ka marké yé non annan sa liv-a. Mé dapré to, poukisa i ka fè sa ? Paské sa nou ka di ka montré sa nou gen annan nou tchò. Men sa Jézi di : « Paské a sa roun moun gen annan so tchò i ka di » (Mat. 12:34). Sa nou ka désidé kozé asou-a ka montré fòrs lanmou nou gen pou Jéova. É Jéova promèt ki sa-ya ki kontan l’ ké viv pou tout-tan annan monn nouvo-a.

5. a) Ki rapòr i gen ant nou ladorasyon ké fason nou ka palé ? b) Kou nou ka wè l’ asou zimaj-ya ki k’alé ké paragraf 4 ké 5-a, kisa nou pa divèt fè pou Jéova kontan sa nou ka di ?

⁵ A fason nou ka palé-a ki ké fè si Jéova ké asèpté fason nou ka adoré li (Jacq. 1:26). Roun ran moun ki pa kontan Bondjé ka volé asou moun, yé ka palé rèd ké ròt-ya, é fason yé ka palé ka montré ki yé ka krè yé kò (2 Tim. 3:1-5). Nou pa lé sanblé ké yé. Nou lé fè Bondjé plézi lò nou ka palé. Ès Jéova té ké kontan si i té ka wè nou ka palé tou dous annan nou réinyon ouben lò nou ka préché épi dèyè sa, nou ka palé rèd ké nou fanmi lò ròt-ya pa pouvé tandé nou ? (1 Pierre 3:7).

6. Ki bon bagaj rivé Kimberly paské i ka panga fason i ka palé ?

⁶ Nou pouvé palé, a roun kado ki ka vini di Jéova. Si nou ka byen sèrvi sa kado-a, sa pouvé idé moun vini annan  lavérité-a. Nou ka idé moun-yan òbò nou byen wè diférans ant « roun moun ki ka adoré Bondjé ké roun moun ki pa ka adoré l’ » (Mal. 3:18). A sa ki rivé roun sò yé ka aplé Kimberly b. Yé mété l’ ké roun kanmarad lékòl pou yé travay asou roun projè. Lò yé té fin travay ansanm, so kanmarad wè ki Kimberly té diféran di ròt-ya. I pa té ka mal palé moun, i té ka di bon bagaj asou yé, é i pa té ka jouré. Kanmarad Kimberly té étoné é i asèpté étidyé Labib-a. Jéova kontan lò nou ka palé roun fason ki ka bay moun anvi anprann konnèt li !

7. Kouman to lé sèrvi paròl-a, sa bèl kado Jéova bay to-a ?

⁷ Nou tout lé palé roun fason ki ka bay Jéova lònò é ki ka fè nou vin pi pròch di nou frè ké sò-ya. Donk, annou wè déztrwa bagaj ki ké idé nou kontinyé sa ‘roun èkzanp […] annan fason nou ka palé’.

8. Kouman Jézi byen sèrvi zafè palé-a lò i té ka préché ?

⁸ Palé jantiman épi ké rèspè lò yé ka provoké to. Lò Jézi té ka préché, moun-yan di konsa ki i té sa roun tafyatò, roun agoulou, ki i té ka travay pou Djab-a, ki i pa té ka rèspèkté saba-a, é ki i pa té ka rèspèkté ni Bondjé ni so non (Mat. 11:19 ; 26:65 ; Luc 11:15 ; Jean 9:16). Mé Jézi pa voyé vyé paròl méchan pou réponn yé. Kou li, lò yé ka provoké nou, nou pa janmen divèt bay pou randé (1 Pierre 2:21-23). A vré ki sa pa fasil pou nou kontrolé nou kò (Jacq. 3:2). Kisa ki pouvé idé nou ?

9. Lò roun moun méchan ké nou, kisa ki pouvé idé nou kontrolé nou kò ?

⁹ Lò roun moun ka mal réponn nou lò nou ka préché pou li, annou pa rété asou sa. A sa Sam ka fè, i ka èspliké : « Mo ka éséyé sonjé ki moun-an bézwen tandé palé di lavérité-a, é ki pitèt i ké chanjé roun jou. » Détan, roun moun pouvé koumansé kòlè jis paské nou pa rivé o bon moman. Lò nou douvan roun moun ki kòlè, annou réyaji kou sa sò-a yé ka aplé Lucia : annou priyè vitman pou nou doumandé Jéova idé nou rété kalm é annou panga di pyès vyé bagaj ouben bagaj pou dérèspèkté moun-an.

10. Dapré 1 Timothée 4:13, kisa nou divèt chaché fè ?

¹⁰ « Divini pi vayan annan zafè [...] ansényé moun. » Timoté té vayan pou préché, mé magré sa, i té divèt kontinyé fè progrè annan zafè ansényé-a (li 1 Timothée 4:13). Kouman nou menm  osi nou pouvé vin pi vayan annan sa zafè-a ? A pou nou byen préparé nou kò. Érèzman, nou gen roun patché zouti ki pouvé idé nou vin pi vayan pou ansényé. Parèkzanp, to pouvé gadé ti liv Applique-toi à la lecture et à l’enseignement, épi osi parti « Applique-toi au ministère » annan Cahier pour la réunion Vie chrétienne et ministère. Ès to ka byen sèrvi tout lidé yé ka bay nou annan sa piblikasyon-yan ? Si to ka byen préparé to kò, to ké mwens pè é to ké rivé palé pi fasilman.

11. Kouman sèrten krétyen vin pi vayan annan zafè ansényé-a ?

¹¹ Nou pouvé vin pi vayan osi annan zafè ansényé lò nou ka pran èkzanp asou ròt-ya. Sam, frè-a nou ja palé anvan, ka byen gadé kouman sa-ya ki konnèt byen ansényé ka fè. I ka gadé ki métòd yé ka sèrvi, é i ka fè tousa i pouvé pou imité yé. Roun sò yé ka aplé Talia ka byen kouté kouman frè-ya ki gen èspéryans ka fè yé diskour. A konsa i rivé anprann kouman i pouvé réponn késyon moun ka pozé souvan annan prédikasyon-an.

12. Kisa roun ran ka trouvé rèd pou fè ?

¹² Nou tout pouvé fè roun bagaj pou nou réinyon chwit lò nou ka chanté ansanm ké ròt-ya é lò nou ka bay répons nou byen préparé (Ps. 22:22). Mé pou roun ran, chanté ouben palé douvan tout moun, a pa yépa. Si to gen sa problèm-an, to ké kontan savé kisa ki idé ròt frè ké sò pa rété asou sa.

13. Kisa ki pouvé idé nou chanté ké tout nou tchò pannan nou réinyon ?

¹³ Chanté ké tout to tchò. Lò nou ka chanté kantik, a pou louwé Jéova. Roun sò yé ka aplé Sara ka trouvé ki i pa ka chanté byen, mé i lé chanté kantik-ya kanmenm ké so frè ké sò-ya pou louwé Jéova. Pou fè sa, i ka répété kantik-ya lò i an so kaz menm fason i ka préparé pou ròt parti annan réinyon-an. Lò i ka antréné so kò, i ka chaché wè kouman paròl chanté-a ka alé ké sa i ké wè annan réinyon-an. I ka di : « Sa ka idé mo rété asou paròl chanté-a pasé mo rété asou fason mo ka chanté ».

14. Si to pè palé, kisa ki pouvé idé to réponn pannan réinyon-yan ?

¹⁴ Bay répons. A vré, sa ka doumandé roun ran fè bokou éfòr pou yé bay répons. Talia, sò-a nou ja palé anvan, ka di : « Pitèt ròt-ya pa ka wè sa paské lò mo ka palé mo kalm, mé mo pè moun. Donk sa rèd pou mo bay répons. » Pourtan Talia ka fè l’ kanmenm. Lò i ka préparé so réinyon, i ka sonjé ki lò yé  ka pozé roun késyon, prémyé répons-a divèt kourt épi dirèk. I ka di osi : « Sa lé di ki si mo ka bay roun répons ki kourt, senp é ki ka réponn késyon-an, ében i bon ! Paské a sa kalité répons-a frè-a lé tandé. »

15. Si nou pè bay roun répons pannan réinyon-yan, kisa nou divèt sonjé ?

¹⁵ Menm krétyen-yan ki pa ronté palé pouvé pè réponn tanzantan. Poukisa ? Roun sò yé ka aplé Juliette ka di : « Détan, mo pè bay roun répons paské mo pè mo répons tro senp é i pa entérésan. » Si a sa to ka pansé osi, sonjé ki Jéova lé to fè sa to pouvé c. I kontan tousa to ka fè pou louwé li pannan réinyon-yan é tousa to ka fè pou to pa rété asou sa ki ka fè to pè.

16. Ki kalité paròl nou pa divèt di ?

¹⁶ « Tiré tout kalité [...] jouré », (ouben : paròl pou fè moun mal) (Éph. 4:31). Kou nou wè l’, lang roun krétyen pa janmen divèt sal. Mé i gen ròt kalité paròl ka fè moun mal nou pa divèt di. Parèkzanp, lò nou ka palé di moun di ròt kiltir, nasyon ouben ras, nou pa divèt di mové bagaj asou yé. Anplis di sa, nou pa janmen divèt voyé vyé blag asou moun pou fè yé lapenn. Men sa roun frè ka di : « Anvan, mo té ka di bagaj ki pa té méchan pou mo, a té pou ari. Mé a vré ki mo pa té ka tchenbé kont di sa ròt-ya té ka rousanti. Mo madanm idé mo bokou. Pannan roun patché lannen, lò mo té ka di bagaj ki pa té janti, ki pou li ki pou rounòt moun, i té ka di mo l’. »

17. Dapré Éphésiens 4:29, kouman nou pouvé bay ròt-ya plis fòrs ?

¹⁷ Di bagaj ki ka ankourajé ròt-ya. Pasé to kritiké yé ouben to plenn to kò pou sa yé ka fè, pran labitid félisité yé (li Éphésiens 4:29). Israyélit-ya té gen roun patché bagaj pou di Jéova mèrsi, mé yé té ka plenn yé kò toulong. É nou savé ki imité ka détenn. Sonjé ki akoz di mové bagaj dis èspyon di, « tout Israyélit-ya koumansé rounourounou kont Moyiz » (Nomb. 13:31 – 14:4). Parkont, lò nou ka félisité roun moun, sa pouvé idé li bokou. Parèkzanp, paské so zanmi félisité l’, tifi Jèfté dèt pran fòrs pou kontinyé so sèrvis annan tabèrnak-a (Juges 11:40). Sara, sò-a nou ja palé anvan ka di : « Lò nou ka félisité ròt-ya, nou ka fè yé santi ki Jéova kontan yé é ki yé gen yé plas annan  asanblé-a. » Atò, chaché tout okazyon pou félisité to frè ké sò-ya ké tout to tchò.

18. Dapré Psaume 15:1, 2, poukisa nou divèt di lavérité, é kisa sa lé di ?

¹⁸ Di lavérité. Pou fè Jéova plézi, nou pa jen divèt manti. Jéova rayi tout kalité manti (Prov. 6:16, 17). Jòdla, roun patché moun ka pansé ki manti a pa anyen, mé nou menm, nou ka wè manti-a kou Jéova ka wè l’ (li Psaume 15:1, 2). A pou sa, nou pa ka manti é nou ka panga bay moun fo lidé.

19. Ki kalité vyé kozé nou pa lé gen ?

¹⁹ Pa fè kankan (Prov. 25:23 ; 2 Thess. 3:11). Juliette, sò-a nou ja palé anvan ka èspliké sa i ka rousanti lò roun moun ka mal palé ròt-ya ouben ka fè fouyaya : « Lò mo ka tandé roun moun fè kankan, sa ka dékourajé mo é anplis di sa, mo pa ka fè l’ konfyans ankò. Kimoun ka di mo i pa ké alé fè kankan asou mo osi ? » Si to ka wè ki roun kozé ka chanjé, i ka tounen an kankan, éséyé fè kozé-a vin pi ankourajan (Col. 4:6).

20. Kisa to byen désidé fè ?

²⁰ Jòdla, roun patché moun ka jouré. Donk, nou divèt fè roun éfòr èspésyal pou nou palé roun fason ki ka fè Jéova plézi. Sonjé ki a gras a Jéova si nou pouvé palé. A roun kado i fè nou é i lé nou byen sèrvi sa kado-a. Si nou ka fè tousa nou pouvé pou nou di bagaj ki ka bay li lònò lò nou ka préché, lò nou annan nou réinyon é annan nou kozé, i ké béni nou. Lò sa monn-an pa ké fè nou fè mové bagaj ankò, sa ké pi fasil pou nou bay Jéova laglwar ké sa nou ka di (Jude 15). Mé anvan sa jou-a rivé, fè tousa to pouvé pou ‘sa to ka di’ fè li plézi (Ps. 19:14).