1. Kisa ki ka vréman fè nou tchò kontan ?

 JÉOVA lé nou kontan. Nou savé sa paské lajwa ka fè parti di frwi so lèspri ka bay (Gal. 5:22). Kou nou tchò plis kontan lò nou ka bay ki lò nou ka rousouvwè, nou vréman kontan lò nou ka travay rèd annan prédikasyon-an, é lò nou ka idé nou frè ké sò-ya soulon sa yé bézwen (Actes 20:35).

2-3. a) Ki konsèy Pòl bay annan Galates 6:4 ki ka pèrmèt nou gardé nou lajwa annan nou sèrvis pou Jéova ? b) Kisa nou ké wè annan sa artik-a ?

² Kou nou ka li l’ annan Galates 6:4, apot Pòl ka palé di dé bagaj ki ké idé nou gardé nou lajwa (li). Prémyèrman, nou divèt chaché bay Jéova sa nou gen ki miyò. Si nou ka bay li sa nou gen ki miyò, nou blijé kontan (Mat. 22:36-38). Dézyèmman, nou pa divèt konparé nou kò ké ròt-ya. Si nou lasanté, sa nou anprann ouben bagaj nou konnèt fè ka pèrmèt nou fè bokou pou Jéova, nou divèt di li mèrsi pou sa. A li ki bay nou tousa nou gen. Parkont si roun moun pi vayan pasé nou annan roun bagaj annan prédikasyon-an, nou divèt kontan wè li sèrvi sa i konnèt fè pou louwé Jéova, pasé i sèrvi sa pou so pròp kò ouben pou montré ki i miyò pasé pyès moun. Donk pasé nou chaché dépasé li, a pou nou pran èkzanp asou li.

³ Annan sa artik-a, nou ké wè kisa nou pouvé fè si nou dékourajé paské nou pa pouvé fè tousa nou té ké lé. Nou  ké wè osi miyò fason nou pouvé sèrvi sa nou konnèt fè é kisa èkzanp ròt-ya pouvé anprann nou.

4. Ki kalité sitiasyon pouvé dékourajé nou ? Bay roun èkzanp.

⁴ Roun ran sèrvitèr Jéova pa pouvé fè tousa yé lé pou li paské yé ka pran laj ouben yé malad, é sa ka dékourajé yé. A sa ki rivé Carole. Pannan roun tan, i préché annan roun koté yé té bézwen plis moun pou préché. I étidyé Labib-a ké 35 moun, é plizyèr annan yé vansé jistan yé batizé. Carole té gen bokou rézilta annan prédikasyon-an ! Mé i tonbé malad é dipi sa jou-a, i pa pouvé soti di so kaz ankò. Carole ka di : « Mo savé ki a akoz di mo maladi mo pa pouvé fè sa ròt-ya ka fè. Magré sa, mo ka santi ki mo pa sa roun bon krétyen kou yé. Mo pa pouvé fè tousa mo lé, é sa ka dékourajé mo. » Carole lé bay Jéova sa i gen ki miyò é a roun bon bagaj. Nou pouvé sir ki nou Bondjé ki gen bokou konpasyon kontan wè so bèl mantalité.

5. a) Kisa nou divèt sonjé si nou pa pouvé fè tousa nou té ka fè anvan ? b) Kou nou ka wè l’ asou foto-ya ki k’alé ké paragraf 4, 5 ké 6-a, kouman frè-a toujou kontinyé bay Jéova sa i gen ki miyò ?

⁵ Si détan to dékourajé paské to pa pouvé fè tousa to té ka fè anvan, doumandé to kò : « Kisa Jéova lé mo fè ? » Men répons-a : Jéova lé to fè tousa to pouvé annan sitiasyon to fika jòdla. Annou pran roun èkzanp : Roun sò ki ja gen 80 lannen dékourajé paské i pa pouvé fè tousa i té ka fè an prédikasyon lò i té gen 40 lannen. I ka fè sa i pouvé, mé pou li, sa i ka fè pa asé pou i fè Jéova plézi. Mé ès a vré ? Annou réfléchi : lò i té gen 40 lannen, sa sò-a té ka fè tousa i té pouvé. É aprézan i gen 80 lannen, i ka kontinyé fè tousa i pouvé ; donk i pa janmen arété fè tousa i pouvé ! Si nou menm nou ka pansé ki sa nou ka fè pou Jéova annan prédikasyon-an pa asé pou fè li plézi, nou divèt sonjé ki a li ki pou désidé sa ki asé bon pou li. É si nou ka bay li tousa nou gen ki miyò, i ké di nou : « Sa byen ! » (gadé Matthieu 25:20-23).

6. Kisa èkzanp Maria ka anprann nou ?

⁶ Sa ké pi fasil pou nou gardé nou lajwa si nou ka rété asou sa nou pouvé fè pasé nou rété asou sa nou pa pouvé fè. Annou wè èkzanp roun sò yé ka aplé Maria. Dipi i tonbé malad, i pa pouvé préché bokou ankò. Lò maladi-a pran li, i té déprimé é i té ka santi so kò initil. Mé apré sa, i désidé idé roun sò annan so asanblé ki té malad kouché annan so lit. Maria ka di : « Mo òrganizé mo kò pou alé koté li pou préché ké lèt ké téléfonn. É chak kou mo té ka rantré lakaz, mo té kontan paské mo té rivé idé mo sò. » Nou menm osi, nou ké pi kontan si nou ka rété asou sa nou pouvé fè pasé nou rété asou sa nou pa pouvé fè. Mé si aprézan nou pouvé fè plis ouben nou vayan toubonnman annan roun bagaj ?

7. Ki konsèy Pyèr bay so frè ké sò-ya ?

⁷ Annan prémyé lèt i ékri-a, Pyèr ankourajé so frè ké sò-ya sèrvi yé don pou ankourajé yé konpanyen annan yé asanblé. Pyèr ékri : « Si zòt rousouvwè roun don, sèrvi sa don-an pou sèrvi zòt konpanyen, kou moun ki ka byen sèrvi favèr Bondjé nou pa mérité »  (1 Pierre 4:10). Nou pa divèt di ki nou pa ké sèrvi don nou gen-an paské nou pè ròt-ya jalou ouben dékourajé. Si nou té ka fè sa, nou pa té ké bay Jéova tousa nou pouvé bay li.

8. Dapré 1 Corinthiens 4:6, 7, poukisa nou pa divèt gonflé nou lèstomak si nou gen roun don ?

⁸ Si nou gen roun don, a pou nou sèrvi l’, mé nou pa divèt gonflé nou lèstomak pou sa (li 1 Corinthiens 4:6, 7). Parèkzanp, pitèt nou vayan pou koumansé étidyé Labib-a ké moun. A pa pou nou pè sèrvi sa don-an. Mé itilizé roun don é fè tout moun savé ki nou gen roun don, a dé bagaj diféran. Annou pran roun èkzanp : To byen kozé ké roun moun an prédikasyon é to rivé koumansé roun léson biblik. To présé rakonté to group prédikasyon sa. Mé lò to ka kontré ké to group prédikasyon, i gen roun sò ki ka rakonté kouman i rivé bay roun moun roun journal. Donk sò-a li menm bay roun journal mé to menm to koumansé roun léson biblik. Kisa to ké fè ? To savé ki sa ki rivé to ké ankourajé to frè ké sò-ya. Mé pitèt to ké désidé antann rounòt moman pou rakonté yé sa, paské to pa lé fè sò-a santi ki i pa vayan kou to. A ké roun bon bagaj. Mé pi enpòrtan-an, pa arété propozé moun étidyé Labib-a ! To gen roun don, sèrvi l’ !

9. Kouman nou divèt sèrvi sa nou konnèt fè ?

⁹ Annou pa bliyé ki tout bagaj nou ka rivé fè, a gras a Bondjé. Donk nou divèt sèrvi sa kado-ya pou ankourajé asanblé-a, pa pou fè moun wè (Phil. 2:3). Si nou ka sèrvi nou fòrs ké sa nou konnèt fè pou fè volonté Bondjé, nou ké kontan. Nou tchò ké kontan, pa paské nou ka chaché montré ki nou miyò pasé ròt-ya, mé paské nou ka bay Jéova lònò.

10. Kisa nou pa divèt fè ?

¹⁰ Annou pa koumansé konparé sa nou konnèt fè ké sa rounòt moun pa konnèt fè. Parèkzanp, roun frè pouvé vayan pou fè diskour. A so fòrs. É annan so tchò, pitèt i pouvé méprizé rounòt frè ki ka djoubaté pou fè diskour. Mé pitèt sa frè-a toujou ka rousouvwè moun, i ka byen lévé so timoun ouben i ka préché ké bokou balan. Sa ka fè nou plézi wè roun patché frè ké sò annan nou asanblé ka sèrvi sa yé konnèt fè pou adoré Jéova é pou idé ròt-ya !

11. Poukisa nou divèt fè tousa nou pouvé pou imité Jézi ?

¹¹ Kou nou wè l’, nou pa divèt konparé nou kò ké ròt sèrvitèr Jéova. Mé nou pouvé pran èkzanp asou yé. Pi bon èkzanp nou pouvé swiv, a Jézi. A vré, i té parfè, mé nou pouvé pran èkzanp asou li kanmenm (1 Pierre 2:21). Si nou ka fè tousa nou pouvé pou nou imité so bèl kalité ké so konpòrtman, nou ké divini roun pi bon sèrvitèr Jéova é nou ké vin pi vayan annan prédikasyon-an.

12-13. Kisa èkzanp David pouvé anprann nou ?

¹² Annan Labib-a, nou ka jwenn èkzanp roun patché wonm ké fanm fidèl nou pouvé imité menm si yé pa té parfè (Héb. 6:12). Parèkzanp, Jéova di ki David té sa ‘roun wonm ki té ka aji soulon so volonté’ (Actes 13:22). Pourtan, David pa té parfè. Anfèt i menm fè péché ki té grav. Mé magré sa, i sa roun bon èkzanp pou nou. Poukisa ? Paské lò Jéova korijé l’, i pa chaché èskiz pou so kò. I pito asèpté konsèy Jéova bay li é i vréman répanti. A pou sa Jéova pardonnen l’ (Ps. 51:3, 4, 10-12).

¹³ Lò nou ka réfléchi asou èkzanp David, annou doumandé nou kò : « Kouman mo ka réyaji lò yé ka bay mo roun konsèy ? Ès mo ka rékonnèt sa mo fè ki pa bon, ouben ès mo ka chaché èskiz pou mo kò ? Ès mo abitchwé akizé ròt-ya ? Ès mo ka fè tousa mo pouvé pou mo pa roufè menm bagaj-ya ? » To pouvé pozé to kò sa kalité késyon-yan lò to ka li istwè ròt sèrvitèr Jéova. Ès yé jwenn menm kalité problèm to ka jwenn ? Ki bèl kalité yé montré annan sa sitiasyon-yan ? Chak kou doumandé to kò : « Kouman mo pouvé imité sa moun-an ? »

14. Kisa nou frè ké sò-ya pouvé anprann nou ?

¹⁴ Ki yé jenn, ki yé granmoun, nou frè ké sò-ya pouvé anprann nou roun patché bagaj osi. Parèkzanp, ès i gen roun moun annan to asanblé ki ka rété fidèl menm si i ka jwenn roun problèm ? Pitèt i ka briga pou i pa fè kou ròt-ya ouben i ka sipòrté présyon so fanmi ka mété anlè l’ ouben i pa gen roun bon lasanté ? Ès to ka wè ki bèl kalité sa moun-an gen to lé imité ? Si to ka réfléchi asou èkzanp sa moun-an, pitèt to ké anprann kouman  to menm to pouvé tchenbé annan topa problèm. Nou vréman kontan paské nou gen sa frè ké sò-ya ki ka bay nou roun bèl èkzanp annan zafè gen lafwa ! (Héb. 13:7 ; Jacq. 1:2, 3).

15. Ki konsèy Pòl bay pouvé idé nou gardé nou lajwa annan nou sèrvis pou Jéova ?

¹⁵ Pou asanblé-a kontinyé rété ansanm ansanm annan lapè, nou chak nou divèt bay sa nou gen ki miyò. Prémyé krétyen-yan té rousouvwè plizyèr kalité don é yé tout pa té ka fè menm travay-a. Mé a pa pou sa yé té ka chaché dépasé yé konpanyen ouben briga ké yé konpanyen (1 Cor. 12:4, 7-11). Pòl ankourajé yé pito fè tousa yé té divèt fè pou « konstrwi kò Kris-a ». Men sa i ékri frè-ya ki té Éfèz : « Lò chak parti ka byen maché, sa ka pèrmèt kò-a grandi é divini pi fò ké lanmou » (Éph. 4:1-3, 11, 12, 16). Lò krétyen-yan annan sa lépòk-a té ka fè sa, yé té ka pèrmèt asanblé-a rété ansanm ansanm annan lapè. É a sa nou ka wè annan asanblé-ya jòdla osi.

16. Kisa nou divèt byen désidé fè ? (Hébreux 6:10).

¹⁶ A pou to byen désidé pa konparé to kò ké ròt-ya. Pasé to fè sa, pran èkzanp asou Jézi, é éséyé imité so bèl kalité. Pran èkzanp asou moun annan Labib-a mé osi asou to frè ké sò-ya jòdla. Toupannan to ka kontinyé bay sa to gen ki miyò, a pou to sir ki Jéova ‘pa enjis pou i bliyé sa to fè pou li’ (li Hébreux 6:10). I kontan tousa to ka fè pou fè li plézi. Alòr kontinyé pran plézi adoré l’ !