Annan roun sitiasyon konsa, pou asanblé-a, ansyen maryaj-a fini lò yé roumaryé é nouvo maryaj-a valab douvan lalwa. Pou nou rivé konprann poukisa, annou wè sa Jézi di asou zafè divòrsé ké roumaryé.

Jézi byen di ki pou Bondjé a rounsèl bagaj ki pouvé fè roun moun fini ké roun maryaj : « Sa-la ki ka divòrsé ké so madanm, sòf si a pou roun péché sèksyèl, é ki ka maryé ké rounòt madanm, a roun adiltèr i ka fè » (Mat. 19:9). Sa Jézi di ka anprann nou 1) sèl rézon ki pouvé pèrmèt roun moun divòrsé, a roun péché sèksyèl é 2) ki roun mouché a ki ka divòrsé ké so madanm pou rounòt rézon é ki ka maryé ké rounòt madanm ka fè roun adiltèr.

Ès paròl Jézi lé di ki dapré Labib-a roun mouché ki ka fè roun péché sèksyèl é ki ka divòrsé ké so madanm pouvé roumaryé kou i lé ? Pa fòrséman. Si mouché-a ka fè roun adiltèr, so madanm ki pa fè anyen pouvé désidé pardonnen ouben i pouvé désidé pa pardonnen. Si i ka désidé pa pardonnen, épi yé ka divòrsé, yé toulédé ké pouvé roumaryé kou yé lé lò jij-a ké di ki maryaj-a fini.

Mé madanm-an (sa lé di moun-an ki pa fè anyen) pouvé rété maryé ké so mari é di li ki i paré pou pardonnen l’. Mé kisa ki ké rivé si mari-a ki fè adiltèr-a pa lé so madanm pardonnen l’ é i ka rivé divòrsé san so madanm pa dakò ? Kou i té paré pou pardonnen l’ épi kontinyé rété ké li, dapré Labib-a, mouché-a pa pouvé roumaryé. Mé si i ka désidé maryé kanmenm ké rounòt moun, menm si Labib-a pa ka pèrmèt li fè sa, a roun adiltèr i ka fè, é ansyen-yan annan asanblé-a ké fè rounòt comité de discipline religieuse pou sa sitiasyon-an (1 Cor. 5:1, 2 ; 6:9, 10).

Lò roun mouché ka roumaryé mé ki Labib-a pa ka pèrmèt li fè sa, kouman asanblé-a ka wè ansyen maryaj-a ké nouvo maryaj-a ? Ès ansyen maryaj-a valab toujou dapré Labib-a ? Ès madanm-an pouvé désidé pardonnen l’ ou pa pardonnen l’ toujou ? Ès asanblé-a ka wè nouvo maryaj-a kou roun adiltèr ?

Anvan, asanblé-a té ka wè nouvo maryaj-a kou roun adiltèr si madanm-an ki inosan pa té ka roumaryé é pa té ka fè pyès péché sèksyèl. Mé, lò Jézi palé di sa zafè divòrsé ké roumaryé, i pa palé di moun-an ki pa té fè anyen. I jis di ki roun mouché ki ka divòrsé ké so madanm san i pa gen anyen annan Labib-a ki ka pèrmèt li fè sa é i ka maryé ké rounòt madanm, i ka fè roun adiltèr. Annan sa sitiasyon-an, so divòrs ké so nouvo maryaj (pou Jézi, a roun adiltèr) ka fè ansyen maryaj-a fini.

Lò so maryaj ka fini akoz di roun divòrs épi moun-an roumaryé dèyè sa, moun-an ki  pa fè anyen pa pouvé désidé ankò si i ké pardonnen ouben si i pa ké pardonnen moun-an. Donk i pa gen pou pran sa désizyon-an. Anplis di sa, fason asanblé-a ka wè nouvo maryaj-a pa ka dépann di si moun-an ki pa fè anyen mouri, si i roumaryé, ouben si i fè roun péché sèksyèl b.

Annan èkzanp nou pran-an, mari-a ka fè roun adiltèr é ka divòrsé ké so madanm. Mé si mari-a ka divòrsé san i pa fè pyès adiltèr é i ka roumaryé apré sa ? Ouben si i pa ka fè pyès péché sèksyèl anvan i divòrsé, mé apré, i ka fè roun péché sèksyèl épi i ka roumaryé alòr ki so madanm té paré pou pardonnen li ? An tout sans, divòrs-a ké nouvo maryaj-a (a roun adiltèr) ka fè ansyen maryaj-a fini. Nouvo maryaj-a valab douvan lalwa. Kou La Tour de Garde 15 févriyé 1980, paj 31 ké 32 té ka di, « aprézan i roumaryé, i pa pouvé viré annan sitiasyon i té fika anvan ; divòrs-a, adiltèr-a, ké nouvo maryaj-a fè ansyen maryaj-a fini ».

Sa chanjman-an annan fason nou ka konprann bagaj-ya pa ka rouvini asou valò maryaj-a é sa pa lé di ki roun adiltèr a pa roun bagaj ki grav. Annou pran roun èkzanp : roun mouché ka divòrsé ké so madanm san i pa gen pyès bagaj annan Labib-a ki ka pèrmèt li fè sa. Apré sa, i ka maryé ké rounòt moun san Labib-a pa ka pèrmèt li fè sa. Sa mouché-a ké pasé douvan roun comité de discipline religieuse pou adiltèr. (Si so nouvo madanm Témwen Jéova, li menm osi ké pasé douvan roun comité de discipline religieuse pou adiltèr.) Menm si nouvo maryaj-a a pa roun adiltèr, sa mouché-a pa ké pouvé gen rèsponsabilité annan asanblé-a pannan roun patché lannen mé osi jistan moun-yan annan asanblé-a ké choké toujou akoz di sa i fè ouben si yé ka pansé ki sa i fè pa ka bay li roun bon répitasyon. Anvan yé bay li rèsponsabilité, ansyen-yan ké gadé annan ki sitiasyon i fika aprézan, yé ké tchenbé kont osi di sitiasyon so ansyen madanm i pitèt bloublou ké so timoun i pitèt lésé tonbé lò yé té piti toujou (Mal. 2:14-16).

Kou krétyen-yan ka konprann ki zafè divòrsé ké roumaryé san Labib-a pa ka pèrmèt nou fè sa ka mennen konsékans ki grav, yé ka fè atansyon pou yé wè bagaj-ya kou Jéova ka wè yé é pou wè maryaj-a kou roun bagaj ki sakré (Eccl. 5:4, 5 ; Héb. 13:4).