1. Di kisa nou sir ?

 NOU savé ki Jéova kontan nou é ki i lé nou lavi bèl toubonnman (Rom. 8:35-39). Anplis di sa, nou sir ki prensip-ya ki annan Labib-a toujou bon pou nou (Is. 48:17, 18). Mé sa pouvé rivé ki roun problèm nou pa té ka antann ka tonbé anlè nou. Kouman nou divèt réyaji lò sa ka rivé ?

2. Ki problèm nou ka jwenn détan, é lò sa ka rivé nou, ki késyon nou pouvé pozé nou kò ?

² Nou tout ka jwenn problèm. Parèkzanp, pitèt roun moun annan nou fanmi fè nou lapenn. Pitèt nou gen roun maladi grav ki ka anpéché nou sèrvi Jéova kou nou lé. Pitèt roun katastròf natirèl fè déga koté nou ka rété. Ouben pitèt yé ka pèrsékité nou akoz di nou lafwa. Lò nou ka jwenn sa kalité problèm-yan, nou pouvé doumandé nou kò : « Poukisa sa ka rivé mo ? Ès mo fè roun bagaj ki pa bon ? Ès sa lé di ki Jéova pa kontan mo ankò ? » Ès to ja pozé to kò sa késyon-yan ? Si sa ja rivé to, pa dékourajé. Roun patché sèrvitèr Jéova ki fidèl ja pozé yé kò sa kalité késyon-yan (Ps. 22:1, 2 ; Hab. 1:2, 3).

3. Kisa Psaume 34:19 ka anprann nou ?

³ (Li Psaume 34:19.) I gen dé lidé enpòrtan annan sa Psaume-an : 1) sa-ya ki jis gen éprèv épi 2) Jéova ka libéré nou di tout éprèv nou gen. Kouman i ka fè sa ? Parèkzanp, i ka idé nou wè bagaj-ya kou yé fika. A vré, Jéova  ka promèt nou ki nou tchò ké kontan si nou ka adoré l’, mé i pa ka promèt nou ki nou lavi, a ké roun bòl toloman (Is. 66:14). I ka ankourajé nou mété nou lidé asou bèl bagaj nou ké gen dimen, asou lavi i lé nou gen pou tout-tan, lavi nou ké gen titalò (2 Cor. 4:16-18). An atandan, i ka idé nou kontinyé adoré l’ chak jou (Lam. 3:22-24).

4. Kisa nou ké wè annan sa artik-a ?

⁴ Annan sa artik-a, nou ké wè èkzanp plizyèr sèrvitèr Jéova tan-lontan ki té fidèl, ké èkzanp plizyèr sèrvitèr Jéova jòdla. Nou ké wè ki roun problèm pouvé tonbé anlè nou rounsèl kou konsa mé ki si nou ka konté asou Jéova, i ké idé nou (Ps. 55:22). Pannan sa étid-a, doumandé to kò : « Kouman mo té ké réyaji annan sa menm kalité sitiasyon-an ? Kouman sa èkzanp-ya ka fè mo fè Jéova plis konfyans ankò ? Kisa sa ka anprann mo, é kouman mo pouvé apliké sa annan mo sitiasyon ? »

5. Kisa Labann fè Jakòb ? (gadé zimaj-a anlè prémyé paj-a).

⁵ Plizyèr sèrvitèr Jéova annan lépòk Labib-a jwenn problèm yé pa té ka antann. Annou palé di Jakòb. So papa té di li maryé ké roun tifi Labann. A té roun moun yé fanmi ki té ka adoré Jéova. É i té promèt li ki Jéova té ké bay li roun patché bénédiksyon (Gen. 28:1-4). Donk Jakòb fè sa i té divèt fè. I lésé Kanaan é i alé jik koté Labann ki té gen dé tifi, Léa ké Rachèl. I vin kontan pi piti-a, Rachèl, é pou i té pouvé maryé ké li, i asèpté travay sèt lannen pou so papa (Gen. 29:18). Mé bagaj-ya pa pasé kou i té prévwè. Labann fè roun kout gaya. I bay li Léa, so pi gran tifi, pou i maryé. I pèrmèt li maryé ké Rachèl roun simenn apré sa, mé i té divèt travay sèt lannen ankò pou li (Gen. 29:25-27). Anplis di sa, Labann vòlò Jakòb lò i travay pou li. I profité anlè Jakòb pannan 20 lannen ! (Gen. 31:41, 42).

6. Ki ròt sitiasyon difisil Jakòb sipòrté ?

⁶ Jakòb sipòrté ròt sitiasyon ki té difisil. I té gen roun patché timoun, é a pa tout tan so tibolonm té ka tonbé dakò. Yé jis vandé yé frè Jozèf kou èsklav. Siméyon ké Lévi sali non yé fanmi ké non Jéova. Rachèl, madanm Jakòb, sa-la i té kontan tèlman mouri lò i akouché yé dézyèm pitit. É akoz di roun lafamin ki té rèd, Jakòb té blijé alé rété an Éjip, alòr ki i té déja byen vyé (Gen. 34:30 ; 35:16-19 ; 37:28 ; 45:9-11, 28).

7. Kouman Jéova montré Jakòb ki i té kontan li ?

⁷ Magré tout malò ki rivé Jakòb, i pa janmen pédi so lafwa, ni annan Jéova, ni annan promès i té fè. Jéova li menm byen montré li ki i té kontan li. Parèkzanp, i bay li roun patché bagaj, menm si Labann té malonnèt. Réfléchi asou sa : Jakòb té divèt gen bokou rékonésans pou Jéova lò i rouwè Jozèf so pitit, alòr ki i té krè i té mouri dipi lontan ! Kou so lanmityé ké so Bondjé té fò, sa idé l’ tchenbé annan tout éprèv i jwenn (Gen. 30:43 ; 32:9, 10 ; 46:28-30). Si nou lanmityé ké Jéova fò, nou menm osi nou ké pouvé sipòrté nenpòrt ki problèm ki pouvé tonbé anlè nou.

8. Kisa David té anvi fè pou Jéova ?

⁸ Rwa David pa rivé fè tousa i té lé pou Jéova. Parèkzanp, a pa ti anvi i té anvi  konstrwi roun tanp pou so Bondjé. Lò i di profèt Natan sa, i réponn li : « Tousa to lé fè, fè l’, paské vré Bondjé-a la ké to » (1 Chron. 17:1, 2). Imajiné kouman sa Natan di David divèt ankourajé l’ ! Pitèt lanmenm i koumansé réfléchi asou fason i té pouvé fè sa bèl projè-a.

9. Kouman David réyaji lò i rousouvwè roun mové nouvèl ?

⁹ Mé Natan viré wè David vitman pou bay li roun mové nouvèl. « Sa lannwit-a menm », Jéova té di profèt-a ki a pa David ki té ké fè Tanp-a, mé a roun di so pitit ki té ké fè l’ (1 Chron. 17:3, 4, 11, 12). Kouman David réyaji ? I chanjé sa i té prévwè fè. I koumansé rasanblé roun patché soumaké ké tousa so pitit Salomon té ké bézwen pou fè Tanp-a (1 Chron. 29:1-5).

10. Kouman Jéova béni David ?

¹⁰ Lò Jéova fè David savé ki a pa li ki té ké fè Tanp-a, lanmenm, i fè roun alyans ké li. I promèt li ki a ké roun pitit di so pitit ki té ké rwa pou tout-tan (2 Sam. 7:16). Imajiné kouman David ké kontan lò pannan mil lannen-yan i ké anprann ki Rwa-a, a Jézi, roun pitit di so pitit ! Èkzanp David ka anprann nou ki si nou pa pouvé fè tousa nou té ké anvi fè pou Jéova, pitèt i gen ròt bénédiksyon pou i bay nou dimen, bénédiksyon nou pa menm ka imajiné.

11. Kouman Jéova béni krétyen-yan annan 1^é syèk-a, menm si Rwayonm-an pa rivé lò yé té krè i té ké vini ? (Actes 6:7).

¹¹ Annan 1^é syèk-a, krétyen-yan yé menm osi, jwenn problèm yé pa té ka antann. Parèkzanp, yé té présé wè rwayonm Bondjé-a vini, mé yé pa té savé kitan i té ké vini (Actes 1:6, 7). Donk, kisa yé fè ? Yé kontinyé préché ké balan. É toupannan yé té ka di bon nouvèl-a tout koté, yé té pouvé wè ki Jéova té ka béni tout éfòr yé té ka fè (li Actes 6:7).

12. Kisa krétyen-yan annan 1^é syèk-a fè lò roun gran lafamin rivé ?

¹² Annan 1^é syèk-a, roun gran lafamin « vini asou tout latè-a » (Actes 11:28). Krétyen-yan annan sa lépòk-a té pri annan sa osi. Imajiné kouman yé dèt soufri akoz di sa lafamin-an ki té grav ! Chèf fanmi-ya té divèt enkyèt, é yé dèt doumandé yé kò kouman yé té ké bay yé fanmi manjé. Sonjé osi jenn-yan ki té lé fè plis pou Jéova. Ès yé di ki yé té ké fè sa pita ? Kèlkéswa yé sitiasyon, krétyen-yan annan 1^é syèk-a adapté yé kò. Yé kontinyé préché kou yé té pouvé é yé té kontan partajé sa yé té gen ké yé frè ké sò-ya ki té an Jidé (Actes 11:29, 30).

13. Ki bénédiksyon Jéova bay krétyen-yan annan 1^é syèk-a pannan lafamin ?

¹³ Ki bénédiksyon Jéova bay krétyen-yan annan 1^é syèk-a pannan lafamin ? Sa-ya yé idé byen wè Jéova soutni yé (Mat. 6:31-33). Yé dèt santi yé té pi pròch osi di yé frè ké sò-ya ki idé yé. É sa ki bay roun bagaj ké sa-ya ki idé yé konpanyen, yé rivé konprann a kisa ki kontan bay (Actes 20:35). Jéova té kontan wè sa krétyen-yan adapté yé kò é i béni yé tout.

14. Kisa ki rivé Barnabé ké Pòl, é ki bon bagaj rivé paské yé pa lagé ? (Actes 14:21, 22).

¹⁴ Yé té ka pèrsékité krétyen-yan annan 1^é syèk-a souvan, é détan sa té ka rivé lò yé pa té ka antann sa. Annou wè sa ki rivé Barnabé ké apot Pòl lò yé té ka préché bò d’ Lis. Lò yé rivé, roun patché  moun byen rousouvwè yé é yé kouté yé. Mé pita, plizyèr moun ki pa té kontan yé « palé annan tèt moun-yan ki té la ». Alòr roun ran annan sa-ya ki té byen rousouvwè yé voyé ròch asou Pòl, é yé lésé l’ la pas yé té krè i té mouri (Actes 14:19). Mé Barnabé ké Pòl alé annan rounòt vil koté yé kontinyé préché. Ki bon bagaj rivé paské yé pa lagé ? Yé fè « roun patché disip », é gras a sa yé di épi gras a yé èkzanp, yé bay yé konpanyen fòrs (li Actes 14:21, 22). Paské Barnabé ké Pòl pa lagé lò yé pèrsékité yé, yé idé yé frè ké sò-ya bokou. Si nou ka fè kou yé, si nou pa ka arété fè travay Jéova bay nou fè-a, i ké béni nou.

15. Kisa èkzanp frè Macmillan ka anprann to ?

¹⁵ Anvan 1914, sèrvitèr Jéova-ya té ka antann roun bagaj rivé. Annou pran èkzanp frè Macmillan. Kou roun patché frè ké sò annan so lépòk, i té ka pansé ki i pa té gen lontan pou antann ankò anvan i rousouvwè so rékonpans annan syèl-a. Annan roun diskour i fè an sèptanm 1914, men sa i di : « A pitèt dèrnyé diskour mo ké fè. » Nou savé ki a pa té so dèrnyé diskour. Pita, frè Macmillan ékri : « Pitèt roun ran annan nou palé tro vit lò yé di ki nou té ké alé annan syèl-a lanmenm. » I di osi : « Sa nou té divèt fè, a té kontinyé gen bokou bagaj pou fè annan sèrvis Sényèr-a. » É a sa i fè. I kontinyé gen balan annan prédikasyon-an. I ankourajé roun patché frè ki té lajòl pas yé pa té ka mélé annan lapolitik. I toujou alé annan réinyon asanblé-ya, menm lò i té ja granmoun. Donk, frè Macmillan kontinyé gen bokou bagaj pou fè pou Jéova, toupannan i té ka antann so rékonpans. Ki bénédiksyon i jwenn ? Roun ti moso tan anvan i mouri an 1966, men sa i ékri : « Aprézan, mo lafwa pi fò pasé pyès tan. » Men roun bèl mantalité ! Annou imité l’, èspésyalman si nou ka tchenbé dipi pi lontan ki sa nou té pansé (Héb. 13:7).

16. Ki problèm tonbé rounsèl kou asou frè Herbert Jennings ké so madanm ? (Jacques 4:14).

¹⁶ Roun patché Témwen Jéova ka briga ké roun maladi ki tonbé anlè yé rounsèl kou konsa. A sa ki rivé frè Herbert Jennings b. Annan istwè so lavi, i ka rakonté kouman li ké so madanm pran plézi sèrvi kou misyonèr o Gana. Malérèzman, i ka rakonté osi ki roun jou, yé wè ki i té gen sa yé ka aplé troubles de l’humeur. I té ka sonjé Jacques 4:14 lò i èspliké ki a té ‘roun bagaj yé pa té prévwè pou “dimen”’ (li). I di osi : « Nou wè sitiasyon-an kou i té fika, […] donk nou fè sa ki té fo pou nou pati. Nou lésé Gana, nou lésé roun patché bon zanmi é nou routounen o Kanada [pou yé bay mo roun trètman]. » Jéova idé frè Jennings ké so madanm kontinyé adoré l’ ké fidélité magré sa éprèv-a.

17. Kouman èkzanp frè Jennings ankourajé roun ran frè ké sò ?

¹⁷ Frè Jennings ka palé di so sitiasyon franchman annan istwè so lavi, é sa idé roun ran frè ké sò bokou. Men sa roun sò ékri : « A prémyé fwa roun artik té ka touché mo konsa. […] Lò mo li ki frè Jennings té blijé lésé koté yé té voyé li pou i té pouvé swanyé so kò, sa idé mo  pou mo pi rézonab annan fason mo ka wè mo sitiasyon. » Men sa roun frè ka di : « Mo té ansyen pannan dis lannen mé apré sa, mo té blijé arété paské mo té malad annan mo tèt. Mo té ka santi ki mo té raté mo lavi, a pou sa mo pa menm té ka rivé li istwè lavi frè ké sò-ya. Mé lò mo wè ki frè Jennings pa lagé, sa bay mo fòrs. » Sa ka fè nou sonjé ki, lò nou ka tchenbé lò roun problèm ka tonbé anlè nou rounsèl kou konsa, nou pouvé ankourajé ròt-ya. Menm si tout bagaj pa ka fèt kou nou lé annan nou lavi, nou pouvé sa roun èkzanp annan zafè gen lafwa épi annan zafè tchenbé (1 Pierre 5:9).

18. Kisa èkzanp roun sò ki vèv é ki ka rété o Nijéria ka anprann to ? (gadé zimaj-a ki ka montré nou sa ki pasé).

¹⁸ Pandémi Covid-19-a mennen problèm pou roun patché sèrvitèr Jéova. Parèkzanp, roun jou, roun sò ki pédi so mouché é ki ka rété o Nijéria pa té gen bokou manjé ankò. Roun jou bonmanten, li ké so tifi té ka préparé ti moso douri ki té ka rété yé é so tifi doumandé li kisa yé té ké manjé apré sa. Nou sò réponn li ki yé pa té gen ni soumaké ni provizyon ankò, mé yé té pou fè kou vèv Sarèpta-a : préparé yé dèrnyé manjé épi mété tout yé konfyans annan Jéova (1 Rois 17:8-16). Anvan menm yé doumandé yé kò kisa yé té ké manjé a midi, plizyèr frè ké sò mennen roun patché manjé pou yé. I té gen manjé pou pasé dé simenn. Nou sò di ki i pa menm té imajiné kouman Jéova té ka byen kouté sa i té ka réponn so tifi. Lò nou ka konté asou Jéova, éprèv nou gen annan nou lavi pouvé fè nou vin pi pròch ké li, asiré pa pitèt (1 Pierre 5:6, 7).

19. Kisa ki rivé Alekseï Ierchov ?

 ¹⁹ I pa gen lontan, yé koumansé pèrsékité roun patché frè ké sò san yé pitèt pa menm té ka antann sa. Annou pran èkzanp frè Alekseï Ierchov ki ka rété an Risi. Lò i batizé an 1994, Témwen Jéova-ya annan sa koté-a té pouvé préché kou yé té lé. Mé i pa gen lontan, sitiasyon-an an Risi chanjé. An 2020, lapolis antré annan kaz frè Ierchov, é yé pran roun patché bagaj ki té di li. Déztrwa mwa apré, gouvèrnman-an mennen li douvan tribinal. É sa ki pi rèd, a ki yé akizé l’ gras a plizyèr vidéyo roun moun té bay yé. Sa moun-an té fè sanblan kontan étidyé Labib-a pannan pasé roun lannen. Ès a pa roun méchansté sa ?

20. Kisa frè Ierchov ka fè pou fè so lanmityé ké Jéova vin pi fò ?

²⁰ Ès éprèv frè Ierchov mennen bon bagaj ? Wi. So lanmityé ké Jéova divini pi fò. I ka èspliké : « Mo ké mo madanm nou ka priyè ansanm pi souvan. Mo savé ki mo pa té ké rivé jéré sa sitiasyon-an si Jéova pa té ka idé mo. » I ka di dèyè sa : « Sa ki ka idé mo [pa dékourajé], a étidyé mo rounso. Mo ka réfléchi asou èkzanp sèrvitèr tan-lontan ki té fidèl. Roun patché istwè annan Labib-a ka montré ki sa enpòrtan pou nou rété kalm é pou nou fè Jéova konfyans. »

21. Kisa nou anprann annan sa artik-a ?

²¹ Kisa nou anprann annan sa artik-a ? Annan sa monn-an, détan, nou ka jwenn problèm nou pa ka antann. Mé, Jéova toujou ka idé so sèrvitèr lò yé ka konté asou li. Kou vèrsé-a yé sèrvi pou fè sa artik-a ka di, « moun-an ki jis gen patché éprèv, mé Jéova ka libéré li di tout sa éprèv-ya » (Ps. 34:19). Donk, a pa pou nou rété asou éprèv nou gen, mé a pou nou kontinyé mété nou lidé asou sa Jéova ka fè pou idé nou. Si nou ka fè sa, kou apot Pòl, nou ké pouvé di : « Pou tout bagaj, mo gen fòrs gras a sa-la ki ka bay mo pwisans » (Phil. 4:13).