1. Annan ki sitiasyon Jézi fè so prémyé mirak ?

 IMAJINÉ sa : lannen 29 di nou lépòk près fini. Jézi koumansé préché i pa gen lontan. Jòdla, ké so manman Mari ké déztrwa annan so disip, yé envité annan roun maryaj ki ka fèt Kana, roun vilaj Nazarèt koté i lévé. Fanmi sa-ya ki ka maryé, a zanmi Mari, é dapré sa nou ka wè, Mari ka fè parti di sa-ya ki ka okipé di moun ki envité. Mé pannan maryaj-a i gen roun bagaj ka rivé ki pouvé fè fanmi-a ké sa-ya ki ka maryé ronté : i pa gen diven ankò b. Pitèt i gen plis moun ki sa yé té prévwè. Lanmenm, Mari ka alé wè so pitit é i ka di li : « Yé pa gen diven ankò » (Jean 2:1-3). Kisa Jézi ka fè ? Roun bagaj pyès moun pòkò wè : i ka fè dilo-a tounen roun « bon diven » (Jean 2:9, 10).

2-3. a) Kouman Jézi sèrvi pouvwar i té gen pou fè mirak ? b) Kisa nou ké anprann lò nou ké étidyé mirak Jézi fè ?

² Jézi fè roun patché ròt mirak lò i té asou latè-a c. I sèrvi pouvwar i té gen-an pou idé roun patché moun. Parèkzanp, roun jou i bay 5 000 wonm manjé épi rounòt jou a 4 000 wonm i bay manjé. Lò i fè sa mirak-ya, pitèt i bay pasé 27 000 moun manjé, si nou ka konté madanm-yan  ké timoun-yan ki té la osi (Mat. 14:15-21 ; 15:32-38). Annan sa dé sitiasyon-yan, Jézi géri osi roun patché moun ki té malad (Mat. 14:14 ; 15:30, 31). Imajiné kouman wéy tout sa moun-yan té ka limen paské Jézi té géri yé é i té bay yé manjé !

³ Mirak Jézi fè pouvé anprann nou roun patché bagaj. Annan sa artik-a, nou ké wè plizyèr vérité sa mirak-ya ka anprann nou é sa ké fè nou lafwa vin pi fò. Apré sa nou ké wè kouman nou pouvé imité imilité ké konpasyon Jézi té gen lò i té ka fè mirak.

4. Mirak Jézi ka anprann nou plizyèr vérité asou kimoun ?

⁴ Mirak Jézi fè ka anprann nou plizyèr vérité ki ka fè nou lafwa vin pi fò. Sa vérité-ya ka konsèrné li mé ka konsèrné so Papa osi paské a Jéova ki té ka pèrmèt li fè mirak. Actes 10:38 ka di nou : « Bondjé […] wen [Jézi] ké lèspri sen épi ké pwisans, é […] [Jézi] maché annan tout péyi-a toupannan i té ka fè bon bagaj é i té ka géri tout sa Djab-a té ka malmennen, paské Bondjé té ké li. » Sonjé osi ki tousa Jézi té ka di, tousa i té ka fè, kou mirak-ya parèkzanp, té ka montré parfètman kouman so Papa ka réfléchi é kisa i ka rousanti (Jean 14:9). Annou wè trwa vérité nou ka anprann gras a mirak i fè.

5. Kisa ki té ka pousé Jézi fè mirak ? (Matthieu 20:30-34).

⁵ Prémyèrman, Jézi ké so Papa kontan nou bokou. Lò i té asou latè-a, Jézi montré kouman i té kontan moun-yan. I sèrvi pouvwar i té gen pou fè mirak pou soulajé yé soufrans. Roun jou, dé avèg sipliyé l’ pou i idé yé (li Matthieu 20:30-34). Si to ka byen gadé, vèrsé-a ka di ki « so tchò fè l’ mal » anvan i di ki i géri yé. An grèk, vèrb-a yé ka sèrvi pou di « so tchò fè l’ mal », a roun vèrb ki lé di ki roun moun ka santi roun konpasyon ki fò toubonnman annan tout so andidan. Si Jézi bay sa-ya ki té fen manjé é i géri roun mouché ki té gen lalèp, a paské i té gen konpasyon ké lanmou pou moun-yan (Mat. 15:32 ; Marc 1:41). Donk nou pouvé sir ki Jéova, Bondjé-a ki ka montré roun « konpasyon ki plen ké tandrès », ké so Pitit kontan nou bokou. É sa ka fè yé lapenn lò yé ka wè nou soufri (Luc 1:78 ; 1 Pierre 5:7). Yé présé soulajé nou di tout problèm ki ka fè nou soufri !

6. Ki pouvwar Jéova bay Jézi ?

⁶ Dézyèmman, Jéova bay Jézi pouvwar pou i réglé tout problèm moun-yan gen. Nou pa pouvé débarasé nou kò di tout problèm nou gen jòdla. Mé gras a mirak i fè, Jézi li menm montré ki i pouvé fè l’. Parèkzanp, i pouvé débarasé nou di sa ki ka fè ki nou gen problèm, sa lé di péché Adan bay nou-a épi konsékans péché-a : maladi ké lanmò (Mat. 9:1-6 ; Rom. 5:12, 18, 19). Mirak i fè montré ki i pouvé géri « tout kalité maladi » é i jis pouvé résisité moun mouri (Mat. 4:23 ; Jean 11:43, 44). I pouvé kalmé tanpèt ki fò osi, épi ganyen asou lèspri méchan-yan (Marc 4:37-39 ; Luc 8:2). Kou nou savé ki Jéova bay so Pitit sa kalité pouvwar-a, sa ka rasiré nou !

7-8. a) Mirak Jézi ka pèrmèt nou sir di kisa ? b) Ki mirak to présé wè fèt annan monn nouvo-a ?

⁷ Trwazyèmman, nou pouvé sir ki lò Rwayonm-an ké dirijé latè-a, i ké fè nou gen tout bèl bagaj Jéova promèt nou.  Mirak Jézi fè ka pèrmèt nou gen roun ti lidé di sa i ké fè asou tout latè-a dipi syèl-a, aprézan i Rwa Rwayonm-an. Sonjé sa nou ké gen titalò : Anba dominasyon Jézi, nou ké gen roun lasanté parfè paské i ké tiré tout maladi ké tout andikap moun-yan gen jòdla (Is. 33:24 ; 35:5, 6 ; Rév. 21:3, 4). Nou pa ké soufri paské nou fen (Is. 25:6). Nou pa ké janmen soufri akoz di katastròf natirèl ankò (Marc 4:41). É a pa ti kontan nou ké kontan rousouvwè moun-yan nou kontan ki ka dronmi ‘annan tonm-an’ jòdla (Jean 5:28, 29). Ki mirak to présé wè fèt annan monn nouvo-a ?

⁸ Lò Jézi té ka fè mirak, i té ka montré ki i té gen bokou imilité ké konpasyon. A dé kalité nou divèt montré nou menm osi. Nou ké wè dé istwè ki ka montré sa, é nou ké koumansé ké istwè maryaj-a ki fèt Kana.

9. Poukisa Jézi fè roun mirak annan maryaj-a ki fèt Kana ? (Jean 2:6-10).

⁹ (Li Jean 2:6-10.) Lò yé té ka manjé annan maryaj-a ki fèt Kana é ki diven-an koumansé fini, ès Jézi té blijé fè roun bagaj ? Non. I pa gen pyès profési ki té ka di ki Mési-a té ké fè roun mirak pou fè diven. Mé kisa to té ké rousanti si i pa té gen anyen pou bwè ankò annan to maryaj ? Jézi dèt rousanti bokou konpasyon pou sa fanmi-a, èspésyalman pou  sa-ya ki té fin maryé. É i pa té lé yé ronté. A pou sa, kou nou wè l’ annan koumansman sa artik-a, i fè roun mirak : i fè apéprè 390 lit dilo tounen diven. Poukisa i fè sa patché diven-an ? Pitèt pou yé té pouvé sèrvi diven-an ki té ké rété pou bwè apré, ouben pou yé té pouvé vandé l’, konsa sa-ya ki té fin maryé té pouvé gen roun ti soumaké pou byen koumansé yé lavi ansanm. Yé dèt té kontan pou sa Jézi té fè pou yé !

10. Bay déztrwa détay entérésan nou ka wè annan Jean chapit 2 (gadé zimaj-a osi).

¹⁰ Gadé déztrwa détay entérésan nou ka wè annan Jean chapit 2. Ès to wè ki a pa Jézi ki plen jar-ya ké dlo ? Pasé i fè sa pou moun wè l’, i doumandé sèrvitèr-ya fè l’ (vèrsé 6, 7). É apré i fè dilo tounen diven, ès to rémarké ki a pa li ki alé mennen roun ti moso diven pou sa-la ki té ka òrganizé maryaj-a ? Sa kou-a ankò, i doumandé sèrvitèr-ya fè l’ (vèrsé 8). Ès to ka imajiné Jézi lévé dibout, pran roun vèr diven épi di douvan tout moun : « Gouté sa diven mo fin fè-a ! » ? Awa !

11. Kisa mirak Jézi fè lò i té Kana ka anprann nou ?

¹¹ Kisa mirak Jézi fè lò i té Kana ka anprann nou ? Sa ka anprann nou ki nou divèt gen imilité. Jézi pa vanté so kò. I pa té jen ka vanté so kò lò i té ka fè roun bagaj. O kontrèr, a ké imilité i té ka bay so Papa laglwar é i té ka byen di tout moun ki a li ki té ka pèrmèt li fè sa (Jean 5:19, 30 ; 8:28). Si nou ka imité Jézi, sa lé di si nou gen imilité, nou pa ké vanté nou kò lò nou ké fè roun bagaj. Kèlkéswa sa nou ka fè pou Jéova, annou pa vanté nou kò. Annou pito louwé Bondjé nou gen lònò adoré-a (Jér. 9:23, 24). Annou bay li lònò i mérité-a paské si nou pouvé fè bèl bagaj, a gras a li (1 Cor. 1:26-31).

12. Ki ròt bagaj nou pouvé fè pou imité imilité Jézi ? Bay roun èkzanp.

¹² I gen rounòt bagaj nou pouvé fè pou imité imilité Jézi. Imajiné sa sitiasyon-an : Roun ansyen ka pasé bokou tan ka idé roun jenn asistan pou i préparé so prémyé diskour douvan asanblé-a. Gras-a konsèy i ka bay li, jenn frè-a ka fè roun diskour ankourajan é tout asanblé-a kontan diskour-a. Apré réinyon-an, roun moun ka alé wè ansyen-an é i ka di li : « Frè Entèl fè roun bon diskour pa vré ? » Ès ansyen-an ké réponn : « A vré, mé mo pasé bokou tan ka idé l’ ! » ? Ouben ès i ké di ké imilité : « A vré, so diskour té bon menm. » Lò nou ka fè bon bagaj, annou gen imilité. Annou pa chaché fè moun krè ki a nou rounso ki fè sa. Dipi nou savé ki Jéova ka wè sa nou ka fè é ki i kontan sa nou ka fè, nou pa bézwen plis ki sa (gadé Matthieu 6:2-4 ; Héb. 13:16). Si nou ka imité Jézi, si nou gen imilité, nou ké fè Jéova plézi, asiré pa pitèt (1 Pierre 5:6).

13. Kisa Jézi ka wè lò i ka rivé Nayin, é kisa i ka fè ? (Luc 7:11-15).

¹³ (Li Luc 7:11-15.) Sa té ka fè roun lannen é dimi Jézi té ka préché lò sa nou ka li annan sa vèrsé-ya rivé. Imajiné : Jézi ka alé annan vil Nayin an Galilé bò d’ vil Chounèm, koté profèt Élizé résisité tibolonm roun madanm ki té kontan Bondjé, apéprè 900 lannen anvan sa (2 Rois 4:32-37). Lò i ka rivé bò d’ lapòt vil-a, i ka wè roun patché moun ki ka soti di vil-a, a roun lantèrman. Sa  tris toubonnman : roun madanm ki té ja pédi so mari fin pédi sèl pitit i té gen-an. Sa manman-an ki gen bokou chagren pa tousèl. I gen roun patché moun ki la ké li. Jézi ka arété yé é i ka fè roun bagaj ki bèl toubonnman pou sa manman-an ki ka pléré : i ka résisité so pitit ! A prémyé rézirèksyon Jézi fè nou ka li annan Évanjil-ya.

14. Bay sèrten détay entérésan nou ka jwenn annan Luc chapit 7 (gadé zimaj-a osi).

¹⁴ Gadé déztrwa détay nou ka jwenn annan Luc chapit 7. Ès to wè ki a apré Jézi « wè » ki manman-an té ka pléré ki « so tchò fè li mal » ? (vèrsé 13). Donk a sa i wè, roun manman ki té ka pléré é ki té ka maché douvan kò so pitit, ki fè ki so tchò vin plen ké konpasyon. So tchò pa jis fè li mal ; i montré li ki so tchò té ka fè l’ mal. I dèt di li jantiman : « Pa pléré ankò. » Apré sa, i fè roun bagaj pou li, i résisité so pitit é i « mennen li pou so manman » (vèrsé 14, 15).

15. Kisa mirak Jézi fè pou vèv-a ki té ka rété Nayin ka anprann nou ?

¹⁵ Kisa sa mirak Jézi fè-a ka anprann nou ? Nou ka anprann ki nou divèt aji ké konpasyon ké sa-ya ki an dèy. Nou pa kou Jézi, nou pa pouvé lévé moun mouri-ya, mé kou li menm nou pouvé pran tan gadé pou sa-ya ki pédi roun moun yé kontan épi aji ké konpasyon ké yé. Parèkzanp, nou pouvé désidé fè bagaj pou idé yé épi konsolé yé d (Prov. 17:17 ; 2 Cor. 1:3, 4 ; 1 Pierre 3:8). Roun ti paròl ouben roun bagaj tou senp pouvé idé yé bokou.

16. Kouman roun manman ki pédi so tifi trapé konsolasyon i té bézwen-an, é kisa sa ka anprann to ? (gadé zimaj-a ki ka montré nou kouman sa pasé).

¹⁶ Annou pran roun èkzanp. I gen plizyèr lannen, annan roun réinyon, pannan yé té ka chanté roun kantik, roun sò wè  ki roun manman ki té ròt bò lasal-a té ka pléré. Kantik-a té ka palé di rézirèksyon-an é sa manman-an té fin pédi so tifi. Kou i té savé sa, lanmenm sò-a alé jwenn li é i pozé so lanmen asou so zépol é i chanté larèstan kantik-a ké li. Pita, manman-an di ki so tchò té plen ké lanmou pou so frè ké sò-ya. I té byen kontan i té alé laréinyon. I randé so kò kont ki a annan sal di Rwayonm-an yé pouvé idé nou. Nou pouvé sir ki Jéova ka gadé é i kontan tout ti bagaj nou ka fè pou montré nou konpasyon pou sa-ya ki pédi roun moun yé té kontan é « ki dékourajé » (Ps. 34:18).

17. Kisa nou anprann annan sa artik-a ?

¹⁷ Nou pouvé étidyé mirak Jézi fè. A roun bagaj ki trè entérésan. Sa mirak-ya ka anprann nou ki Jéova ké Jézi kontan nou bokou. Yé ka montré nou ki Jézi pouvé réglé tout problèm nou gen. É sa ka pèrmèt nou plis sir ankò ki titalò, Rwayonm-an ké pèrmèt nou gen tout bèl bagaj Jéova promèt nou. Nou pouvé chwazi roun mirak Jézi fè épi étidyé sa nou rounso ouben ké nou fanmi. Lò nou ké étidyé sa mirak-a, annou doumandé nou kò kisa sa ka anprann nou é kouman nou pouvé imité bèl kalité Jézi. Apré sa, annou palé di sa nou anprann ké ròt-ya, konsa, nou ké ankourajé nou konpanyen ! (Rom. 1:11, 12).

18. Ki késyon nou ké réponn annan ròt artik-a ?

¹⁸ Annan artik ki ka vin dèyè-a, nou ké palé di dèrnyé rézirèksyon Jézi fè nou ka li annan Labib-a. I fè sa rézirèksyon-an lò so lavi asou latè-a té près fini. Poukisa sa rézirèksyon-an té diféran ? Sa kou-a, a roun di so bon zanmi i résisité. É sitiasyon-an té èspésyal. Kisa sa mirak-a nou ka li annan Évanjil-ya ka anprann nou ? É kouman nou pouvé fè nou lafwa annan rézirèksyon-an vin pi fò ? Nou ké réponn sa késyon-yan annan artik-a ki ka vin dèyè-a.