STUDY ARTICLE 19
Kouman nou pouvé gen plis lafwa annan promès monn nouvo-a Jéova fè nou ?
« Lò [Jéova] ka di i ké fè roun bagaj, ès i pa ka fè l’ ? » (NOMB. 23:19).
KANTIK 142 Annou tchenbé nou lèspérans byen fò
KOUTWÉY ASOU SA NOU KÉ WÈ a
1-2. Kisa nou divèt fè toupannan nou ka antann monn nouvo-a ?
JÉOVA promèt nou ranplasé sa monn-an ké roun nouvo monn koté i ké gen lajistis (2 Pierre 3:13). É sa promès-a gen bokou valò pou nou. Nou pa savé kitan sa monn nouvo-a ké rivé, mé tousa ki ka pasé ka montré ki nou pa gen bokou tan ankò pou nou antann (Mat. 24:32-34, 36 ; Actes 1:7).
2 Pannan sa tan-an, ki nou annan lavérité dipi lontan, ki nou pa la dipi lontan, nou tout bézwen gen plis lafwa annan sa promès-a. Poukisa ? Paské tou fò nou lafwa fò, i pouvé fébli. Lò apot Pòl palé di zafè pa gen asé lafwa, i di ki a « péché-a ki pouvé vitman anpéché nou vansé » (Héb. 12:1). Pou nou lafwa pa fébli, nou divèt réfléchi souvan asou bagaj ki ka montré ki monn nouvo-a tou pròch (Héb. 11:1).
3. Kisa nou ké wè annan sa artik-a ?
3 Annan sa artik-a nou ké wè trwa bagaj nou pouvé fè pou nou gen plis lafwa annan promès monn nouvo-a Jéova fè nou ; nou ké wè ki nou divèt 1) réfléchi asou ranson-an, 2) réfléchi asou pwisans Jéova-a épi 3) fè bagaj ki ka fè nou vin pi pròch ké Jéova. Nou ké wè osi kouman mésaj Jéova bay Abakouk pouvé fè nou lafwa vin pi fò. Mé pou koumansé, annou palé di plizyèr sitiasyon nou pouvé jwenn koté nou divèt gen roun lafwa ki fò annan monn nouvo-a.
LÒ NOU BÉZWEN ROUN LAFWA KI FÒ
4. Pou ki kalité désizyon nou bézwen gen roun lafwa ki fò ?
4 Chak jou, nou gen sèrten désizyon pou nou pran. Parèkzanp, ki zanmi nou ké gen, kouman nou ké anmizé, ki lékòl nou ké alé, si nou ké maryé, si nou ké gen timoun épi ki kalité travay nou ké pran. Pou nou pran bon désizyon, nou divèt gen roun lafwa ki fò. Donk, annou doumandé nou kò : « Ès sa mo ka chwazi ka montré ki mo sir ki sa monn-an pa la pou tout-tan é ki titalò a monn nouvo-a ki ké ranplasé l’ ? ouben ès mo ka fè menm bagaj ké sa-ya ki ka krè ki lò to mouri i pa gen pyès èspwar ankò ? » (Mat. 6:19, 20 ; Luc 12:16-21). Nou ké pran bon désizyon si nou sir ki monn nouvo-a tou pròch rivé.
5-6. Poukisa nou bézwen roun lafwa ki fò lò nou gen problèm ? Bay roun èkzanp.
5 Nou bézwen gen roun lafwa ki fò osi lò nou ka jwenn éprèv. Yé pouvé pèrsékité nou, nou pouvé gen roun maladi ki grav, ouben nou pouvé jwenn ròt sitiasyon ki difisil. Pou koumansé, pitèt nou pouvé pansé ki nou pouvé tchenbé. Mé si éprèv-a pa ka fini, kou sa ka rivé souvan, si nou lafwa fò nou ké pouvé tchenbé épi kontinyé adoré Jéova ké tchò kontan (Rom. 12:12 ; 1 Pierre 1:6, 7).
6 Lò nou an mitan roun éprèv, nou pouvé pansé ki monn nouvo-a pa ké janmen vini. Ès sa lé di ki nou lafwa fèb ? Pa oblijé. Annou pran roun èkzanp. Lò lapli ka tonbé pannan plizyèr simenn, nou pouvé pansé ki solèy-a pa ké janmen rouvini. É pourtan, solèy-a ka rouvini. Menm fason-an, lò nou dékourajé menm, nou pouvé krè ki monn nouvo-a pa ké janmen vini. Mé lò nou lafwa fò, nou sir ki promès Bondjé-ya ké fèt (Ps. 94:3, 14, 15 ; Héb. 6:17-19). Paské nou sir di sa, sa ka pèrmèt nou kontinyé mété nou ladorasyon pou Jéova an prémyé annan nou lavi.
7. Kisa roun ran moun ka pansé é kisa nou divèt panga ?
7 Nou divèt gen roun lafwa ki fò osi pou nou préché. Roun patché moun ka pansé ki « bon nouvèl-a » asou monn nouvo-a tro bèl pou sa fèt (Mat. 24:14 ; Ézéch. 33:32). Yé pa ka krè sa Jéova ka ansényé nou é si nou pa panga, yé pouvé détenn asou nou. Pou sa pa rivé nou, nou divèt kontinyé fè nou lafwa vin pi fò. Annou wè trwa bagaj nou pouvé fè pou sa.
RÉFLÉCHI ASOU RANSON-AN
8-9. Si nou ka réfléchi asou ranson-an, kouman sa ké fè nou lafwa vin pi fò ?
8 Roun prémyé bagaj nou pouvé fè pou nou fè nou lafwa vin pi fò, a réfléchi asou ranson-an. Ranson-an ka pèrmèt nou sir ki promès Bondjé-ya ké fèt. Lò nou ka pran tan byen réfléchi asou poukisa Bondjé bay nou ranson-an, épi tout sakrifis i fè pou sa, nou lafwa ka vin pi fò. É nou sir ki nou Bondjé ki ka di ki nou ké viv pou tout-tan annan roun monn ki miyò, ké tchenbé so promès. Poukisa nou pouvé di sa ?
9 Annou réfléchi asou sa Jéova sakrifyé pou i bay nou ranson-an. Jéova voyé so prémyé Pitit i té kontan tèlman, so pi bon zanmi, pou i fèt asou latè-a, pou i sa roun wonm parfè. Lò i té asou latè-a, Jézi jwenn tout kalité problèm. Épi apré sa, i soufri é i mouri. Jéova péyé chè menm ! Nou Bondjé ki plen ké lanmou pa té ké janmen pèrmèt so Pitit soufri é mouri jis pou bay nou roun bèl lavi mé pou roun ti moman sèlman (Jean 3:16 ; 1 Pierre 1:18, 19). Kou Jéova péyé chè pou sové nou, i ké fè tousa ki fo pou nou pouvé viv pou tout-tan annan monn nouvo-a.
RÉFLÉCHI ASOU PWISANS JÉOVA-A
10. Dapré Éphésiens 3:20, kisa Jéova pouvé fè ?
10 Roun dézyèm bagaj nou pouvé fè pou nou fè nou lafwa vin pi fò, a réfléchi asou pwisans Jéova-a. I pouvé fè tousa i ka promèt. Jòdla, roun patché moun ka pansé ki moun-yan pa pouvé viv pou tout-tan annan roun monn nouvo. Mé Jéova souvan ka promèt bagaj ki moun pa ké janmen pouvé fè. Fo pa nou bliyé ki i sa Tou-Pwisan-an (Job 42:2 ; Marc 10:27). Donk sa pa ka étoné nou lò i ka promèt nou bagaj moun pa janmen wè (li Éphésiens 3:20).
11. Bay roun promès Jéova fè ki fò menm (gadé karé-a « Plizyèr promès ki fò menm é ki réyalizé »).
11 Sonjé plizyèr bagaj Jéova promèt so sèrvitèr tan-lontan ki té ka parèt enposib. I di Abraam ké Sara ki yé té ké gen roun tibolonm menm si yé té vyé (Gen. 17:15-17). I di Abraam osi ki i té ké bay pitit di so pitit péyi Kanaan-an. Pannan patché lannen pitit Abraam, Israyélit-ya, té èsklav an Éjip, yé dèt té ka pansé ki sa promès-a pa té ké janmen fèt. Mé i fèt. Pita, Jéova di Élizabèt ki té ja vyé, ki i té ké gen roun timoun. É i di Mari osi ki té vyèrj, ki i té ké fè so pròp Pitit. Lò Jézi fèt, sa réyalizé rounòt promès Jéova té fè roun patché lannen anvan sa annan jarden Édèn-an. Sa promès-a té ka di ki so Pitit té ké vini asou latè-a (Gen. 3:15).
12. Kisa Josué 23:14 ké Isaïe 55:10, 11 ka anprann nou asou pwisans Jéova-a ?
12 Lò nou ka réfléchi asou tout promès Jéova fè é asou fason i réyalizé yé, nou ka konprann ki i gen bokou pwisans épi sa ka fè nou gen plis lafwa annan promès monn nouvo-a i fè nou (li Josué 23:14 ; Isaïe 55:10, 11). Konsa nou paré pou idé ròt-ya konprann ki promès monn nouvo-a, a pa roun rèv. Jéova li menm di parapòrta nouvo syèl-a ké nouvo latè-a : « To pouvé krè sa paròl-ya é yé vré » (Rév. 21:1, 5).
FÈ BAGAJ KI KA FÈ TO VIN PI PRÒCH KÉ JÉOVA
RÉINYON ASANBLÉ-A
Kouman sa bagaj-ya pouvé fè to gen plis lafwa ? (gadé paragraf 13).
13. Kouman réinyon asanblé-ya pouvé fè nou lafwa vin pi fò ?
13 Trwazyèm bagaj nou pouvé fè pou nou fè nou lafwa vin pi fò, a fè bagaj pou fè nou vin pi pròch ké Jéova. Gadé parèkzanp kouman réinyon asanblé-ya ka idé nou. Ana b, roun sò ki pasé plizyèr lannen annan sèrvis a plen tan-an ka di : « Réinyon-yan ka idé mo pou mo fè mo lafwa rété fò. Menm si frè-a pa djè fò annan zafè ansényé-a ouben i pa ka anprann mo anyen ki nouvo, souvan mo ka tandé roun bagaj ki ké idé mo konprann roun vérité annan Labib-a pi byen, é sa ka fè mo lafwa vin pi fò. » É lò nou frè ké sò-ya ka réponn ? Ès sa pa ka fè nou lafwa vin pi fò osi ? (Rom. 1:11, 12 ; 10:17).
PRÉCHÉ
Kouman sa bagaj-ya pouvé fè to gen plis lafwa ? (gadé paragraf 14).
14. Kouman prédikasyon-an ka fè nou lafwa vin pi fò ?
14 Nou ka fè nou lafwa vin pi fò osi lò nou ka préché (Héb. 10:23). Barbara, roun sò ki ka adoré Jéova dipi pasé 70 lannen ka di : « Prédikasyon-an toujou fè mo lafwa vin pi fò. Pi mo ka palé pou ròt-ya di bèl promès Jéova fè nou, pi mo lafwa ka vin pi fò. »
ÉTIDYÉ TO ROUNSO
Kouman sa bagaj-ya pouvé fè to gen plis lafwa ? (gadé paragraf 15).
15. Lò nou ka étidyé nou rounso, kouman sa ka fè nou gen plis lafwa lafwa ? (gadé zimaj-ya osi).
15 Pou fini annou palé di rounòt bagaj ki ka fè nou gen plis lafwa : étidyé nou rounso. Roun sò yé ka aplé Susan ka di ki sa ka idé l’ lò i ka swiv roun program pou étidyé. I ka di : « Chak dimanch, mo ka étidyé Tourdégard-a nou ké fè simenn apré. Lendi ké mardi, mo ka préparé réinyon-an pou mitan simenn-an. É ròt jou-ya, mo ka étidyé roun bagaj mo chwazi. » Kou Susan toujou ka swiv so program pou étidyé, i ka kontinyé fè so lafwa vin pi fò. Irene, roun sò ki ka travay dipi roun patché lannen annan syèj mondyal-a ka trouvé ki étidyé profési-ya ki annan Labib-a, ka fè so lafwa vin pi fò c. I ka di osi : « Lò mo ka wè kouman profési-ya ka fèt annan tout ti détay, mo ka rété èstébékwé. »
« I KÉ FÈT, ASIRÉ PA PITÈT »
16. Poukisa sa Jéova di Abakouk, a pou nou jòdla osi ? (Hébreux 10:36, 37).
16 Roun ran sèrvitèr Jéova ka antann lafen sa monn-an dipi lontan. Sèrten moun ka pansé ki lafen ka pran tròp tan pou i rivé. Mé Jéova savé sa so sèrvitèr ka rousanti, é i di profèt Abakouk : « Vizyon-an gen pou fèt toujou jou i divèt fèt-a, mé a ké ti kouri i ké fèt, é a pa manti. Menm si i ka pran tan, kontinyé antann li ! Paské i ké fèt, asiré pa pitèt. I pa ké an rétar ! » (Hab. 2:3). Ès Jéova té ka palé pou Abakouk rounso ? Ouben ès sa paròl-ya pou nou osi jòdla ? Bondjé fè apot Pòl apliké sa paròl-ya pou krétyen-yan ki présé wè monn nouvo-a rivé (li Hébreux 10:36, 37). Donk nou pouvé sir ki menm si nou ka pansé ki promès Jéova pou sové nou ka pran tan pou rivé, « i ké fèt, asiré pa pitèt » ; « i pa ké an rétar! »
17. Kouman roun sò swiv konsèy Jéova bay Abakouk ?
17 Roun patché sèrvitèr Jéova ka ‘kontinyé antann’, kou i doumandé yé. É roun ran annan yé ka fè l’ dipi roun patché lannen. Louise parèkzanp koumansé adoré Jéova an 1939. I ka di : « A sa lépòk-a, mo té ka pansé ki Armagédon té ké vini anvan mo fini alé lisé. Mé a pa sa ki rivé. Lannen apré lannen, sa idé mo li sa mo ka aplé “istwè moun ki antann”, sa lé di istwè Noé, Abraam, Jozèf ké ròt sèrvitèr Jéova ki antann lontan anvan yé rousouvwè rékonpans Jéova té promèt yé. Kou mo kontinyé antann, sa idé mo kou roun patché moun osi, kontinyé sir ki monn nouvo-a tou pròch. » Roun patché frè ké sò ki ka sèrvi Jéova dipi lontan dakò ké Louise !
18. Kouman sa nou ka anprann lò nou ka gadé kréyasyon-an pouvé fè nou lafwa annan monn-nouvo-a vin pi fò ?
18 A vré, monn nouvo-a pòkò la. Mé sonjé plizyèr bagaj ki la jòdla. Parèkzanp, zétwèl-ya, pyébwa-ya, zannimo-ya ké moun-yan, yé tout byen la menm si i gen roun tan yé pa té ka èkzisté. Si yé la jòdla, a paské Jéova désidé fè yé (Gen. 1:1, 26, 27). Nou Bondjé désidé osi ki i ké mété roun monn nouvo koté moun-yan ké gen lavi pou tout-tan ké roun lasanté ki parfè. I ké fè sa i di ! Lò Bondjé ké désidé, monn nouvo-a ké la, menm fason inivèr-a la jòdla (Is. 65:17 ; Rév. 21:3, 4).
19. Kouman to pouvé gen plis lafwa ?
19 Toupannan to ka antann monn nouvo-a, fè tousa to pouvé pou fè to lafwa vin pi fò. Kontinyé gen rékonésans pou ranson-an. Réfléchi asou pwisans Jéova-a. Épi fè bagaj pou to vin pi pròch ké Jéova. Atò, to ké annan « sa-ya ki ka rousouvwè sa Bondjé promèt, gras a yé lafwa ké yé pasyans » (Héb. 6:11, 12 ; Rom. 5:5).
KANTIK 139 Imajiné monn nouvo-a
a Jòdla, roun patché moun pa ka krè promès monn nouvo-a ki annan Labib-a. Yé ka pansé ki sa pa ké jen fèt, a roun èspwar mal papay. Mé nou menm, nou sir ki tout promès Jéova fè ké fèt vré. Mé kanmenm, i gen bagaj nou divèt fè pou nou lafwa annan so promès vin pi fò. Kisa nou divèt fè ? A sa sa artik-a ké èspliké.
b Yé chanjé déztrwa non.
c To ké jwenn roun patché artik asou profési ki annan Labib-a annan l’Index des publications des Témoins de Jéhovah, anba « Prophéties ». Parèkzanp gadé artik « Les prédictions de Jéhovah s’accomplissent » annan La Tour de Garde 1é janvyé 2008.
