1. A kisa ki paradi èspirityèl-a, é kisa nou byen désidé fè ?

 JÒDLA, asou latè-a, i gen roun paradi koté bokou moun okipé ka fè bèl bagaj. Annan sa paradi-a, milyon moun ka profité di vré lapè-a. Yé byen désidé pa janmen lésé l’. É yé lé roun patché moun vin jwenn yé. A kisa sa bèl koté-a ? A paradi èspirityèl-a a !

2. Ki bèl bagaj Jéova fè ?

² Jéova fè roun koté pou so pèp viv annan lapè menm si yé ka viv an mitan monn Satan-an ki danjéré é koté moun-yan rayi yé konpanyen. Ès a pa roun bèl bagaj ? (1 Jean 5:19 ; Rév. 12:12). Nou Bondjé ki plen ké lanmou ka byen wè tout problèm sa monn-an ka bay nou é a pou sa i ka bay nou sékirité nou bézwen-an pou adoré l’ ké lajwa. So Paròl ka di ki paradi èspirityèl-a kou roun koté « pou moun séré » ké roun « jarden yé byen rozé » (Is. 4:6 ; 58:11). Gras a so bénédiksyon, menm si lavi pannan sa dèrnyé jou-ya rèd menm, sa-ya ki ka rété annan sa paradi-a pouvé kontan é santi yé kò an sékirité (Is. 54:14 ; 2 Tim. 3:1).

3. Kouman profési Isaïe chapit 65 fèt tan-lontan ?

³ Jéova sèrvi profèt Izayi pou i èspliké kouman lavi ké fika annan paradi èspirityèl-a. Nou ka trouvé sa i di annan Isaïe chapit 65. Sa profési-a fèt pou prémyé fwa-a annan lannen 537 anvan nou lépòk. Pannan sa lépòk-a, roun ti moman apré yé libéré yé di Babilòn, Jwif-ya ki té répanti routounen annan yé péyi. É Jéova béni yé. Gras a li, yé rivé roukonstrwi Jérizalèm ki té krazé nèt. I té tou  bèl aprézan. Épi yé fè Tanp-a roudivini koté moun-yan té ka adoré vré Bondjé-a an Israyèl (Is. 51:11 ; Zach. 8:3).

4. Kouman profési Isaïe chapit 65 ka réyalizé jòdla ?

⁴ Profési Izayi-a koumansé réyalizé roun dézyèm kou an 1919 lò Jéova libéré so sèrvitèr-ya di Gran Babilòn-an. A konsa paradi èspirityèl-a koumansé èkzisté asou tout latè-a. Proklamatèr Rwayonm-an té gen bokou balan é yé fè roun patché asanblé. Nou ka wè osi ki sa sèrvitèr-ya té gen bèl kalité frwi lèspri-a ka bay. Anvan sa, roun ran annan yé té vyolan menm, yé té ka fè kou zannimo. Mé aprézan, yé té « abiyé ké nouvo pèrsonalité-a ki fèt soulon sa Bondjé lé » (Éph. 4:24). Nou savé ki roun patché bénédiksyon Izayi palé ké fèt annan monn nouvo ki ka vini-a. Mé dipi jòdla, roun patché annan sa promès-ya ja ka fèt. Annou palé di roun ran bénédiksyon nou ka trapé annan sa paradi èspirityèl-a é annou wè poukisa nou pa janmen divèt lésé sa paradi-a.

KOUMAN SA-YA KI ANNAN PARADI ÈSPIRITYÈL-A FIKA

5. Dapré Isaïe 65:13, ki kalité lavi sa-ya ki annan paradi èspirityèl-a gen ?

⁵ Yé ka byen manjé é yé gen roun bon lasanté. Profési Izayi-a ka montré kouman lavi sa-ya ki annan paradi èspirityèl-a diféran di lavi sa-ya ki pa annan l’ (li Isaïe 65:13). Jéova ka bay so sèrvitèr-ya tousa yé bézwen annan domenn èspirityèl-a. Yé gen so lèspri sen, so Paròl ké roun patché manjé èspirityèl. Yé ka « manjé », « bwè » é yé « tchò kontan » (gadé Révélation 22:17). Parkont, sa-ya ki pa annan paradi èspirityèl-a, yé « fen » ké « swèf » é yé « ronté ». Yé pa ka trapé sa yé bézwen annan domenn èspirityèl-a (Amos 8:11).

6. Kisa Joël 2:21-24 ka di asou sa nou ka trapé annan domenn èspirityèl-a, é ki bénédiksyon sa ka mennen pou nou ?

⁶ Annan so profési, Jowèl palé di sa moun so lépòk té gen labitid manjé ké bwè kou séréyal, diven, ké dilwil zoliv pou montré ki Jéova ka bay so sèrvitèr-ya tousa yé bézwen san konté, èspésyalman annan domenn èspirityèl-a (Joël 2:21-24). I ka fè l’ ké Labib, nou piblikasyon, nou sit Entèrnèt, nou réinyon-yan ké nou gran asanblé-ya. Nou pouvé profité di tout sa bèl bagaj-ya chak jou, é sa ka pèrmèt nou gen fòrs é roun pi bon lasanté.

7. Kisa ka fè « nou tchò kontan » ? (Isaïe 65:14).

⁷ Yé tchò kontan toulong. Kou yé gen bokou rékonésans, sèrvitèr Bondjé-ya ka « rélé tèlman yé tchò kontan » (li Isaïe 65:14). « Nou tchò kontan » paské vérité-ya ké promès-ya ki annan Labib ka ankourajé nou é ka konsolé nou. Épi nou gen osi roun èspwar ki fò ki ka apiyé asou ranson-an. Lò nou ka palé di sa bagaj-ya ké nou frè ké sò, sa ka fè nou gen bokou lajwa ! (Ps. 34:8 ; 133:1-3).

8. Bay dé bagaj enpòrtan i gen annan paradi èspirityèl-a.

⁸ I gen dé bagaj enpòrtan ki ka byen montré ki nou annan paradi èspirityèl-a : nou kontan nou konpanyen é nou ka rété byen séré ansanm. Sa ka bay nou roun ti lidé di kouman lavi-a ké fika annan monn nouvo-a, koté sèrvitèr Jéova-ya ké pi pròch ankò é yé lanmou ké pi fò (Col. 3:14). Roun sò ka di sa ki touché l’ lanmenm koté Témwen Jéova-ya :  « Mo pa té savé sa pou mo té fè pou mo tchò té pouvé kontan. Menm ké mo fanmi, mo pa té savé sa mo té divèt fè. Prémyé moun mo wè ki té vréman kontan yé konpanyen, a té Témwen Jéova-ya. » Si roun moun lé so tchò kontan toulong, i divèt antré annan nou paradi èspirityèl. Moun-yan pouvé di sa yé lé asou sèrvitèr Jéova-ya, yé gen roun bèl répitasyon pou Jéova é pou tout sa ki ka adoré l’ (Is. 65:15).

9. Kisa Isaïe 65:16, 17 ka promèt parapòrta problèm lavi-a ?

⁹ Yé pa enkyèt é yé kalm. Isaïe 65:14 ka di sa ki ka rivé sa-ya ki ka chwazi pa antré annan paradi èspirityèl-a. I ka di ki ‘lapenn annan yé tchò ka fè yé rélé’ é ki ‘yé ka plenn yé kò paské yé lèspri krazé’. Mé, é nou menm ? Roun jou, nou « ké bliyé » tout bagaj ki ka fè nou soufri é Bondjé « pa ké wè sa bagaj-ya ankò » (li Isaïe 65:16, 17). Jéova ké fè nou problèm disparèt é, piti piti, tout bagaj nou ka sonjé ki ka fè nou lapenn ké disparèt nèt.

10. Poukisa a roun lònò si nou pouvé frékanté krétyen ki fidèl ? (gadé zimaj-a osi).

¹⁰ Dipi jòdla, nou ja ka santi nou kò pi kalm lò nou k’alé annan nou réinyon-yan. Yé ka pèrmèt nou santi nou kò byen é yé ka fè nou bliyé présyon sa monn méchan-an ka mété anlè nou. Nou menm osi nou ka idé nou frè ké sò-ya santi yé kò byen lò nou ka montré ki nou gen kalité frwi lèspri-a ka bay. Parèkzanp, lanmou, lajwa, lapè, byenvéyans ké dousèr (Gal. 5:22, 23). É a pou nou sonjé ki lò i ka asèpté nou annan so òrganizasyon, a roun lònò Bondjé ka fè nou ! Sa-ya ki ka rété annan paradi èspirityèl-a ké pouvé wè Bondjé fè « roun nouvo syèl ké roun nouvo latè » kou i promèt nou fè l’.

11. Dapré Isaïe 65:18, 19, kisa paradi èspirityèl-a divèt fè nou rousanti ?

¹¹ Yé gen rékonésans é yé kontan kou sousouri. Apré sa, Izayi ka èspliké ki nou gen rézon « fè lafèt » épi « gen lajwa » annan paradi èspirityèl-a. É sa nòrmal paské sa paradi-a, a Jéova ki fè l’ (li Isaïe 65:18, 19). É sa pa ka étoné nou si i ka itilizé nou pou fè moun soti di òrganizasyon sa monn-an ki kou dézèr ki sèk é pou fè yé antré annan nou bèl paradi èspirityèl ! Bénédiksyon nou gen paské nou annan lavérité-a ka fè nou kontan kou sousouri é a pou sa nou ka palé di sa bénédiksyon-yan ké ròt-ya (Jér. 31:12).

12. Kisa to ka rousanti lò to ka li promès ki annan Isaïe 65:20-24, é poukisa ?

 ¹² Nou gen rékonésans é nou kontan toubonnman pou rounòt bagaj ankò : kou nou ka viv annan roun paradi èspirityèl, nou gen roun bèl èspwar. Sonjé tousa nou ké wè é tousa nou ké fè annan monn nouvo-a ! Labib ka promèt : « I pa ké gen ti bébé [...] ki ké viv déztrwa jou rounso, i pa ké gen granmoun ki pa ka rivé annan bout so lavi. » Nou ‘ké fè kaz é nou ké rété annan, nou ké manjé rézen nou planté’. ‘Nou pa ké las pou anyen’ paské nou ké fè parti di « jénérasyon Jéova béni ». Nou Bondjé ka promèt nou roun lavi san danjé ké tchò kontan é ki gen roun sans. « Anvan menm yé aplé [l’] », i ké konnèt tousa tout moun bézwen é i ké « bay tout sa ki vivan sa yé lé » (Is. 65:20-24 ; Ps. 145:16).

13. Kisa Isaïe 65:25 ka di asou chanjman roun ran moun ka fè lò yé ka koumansé adoré Jéova ?

¹³ Yé kontan lapè é yé ka viv an sékirité. Gras a lèspri sen, moun ki té ka fè kou zannimo fè bokou éfòr pou chanjé (li Isaïe 65:25). Yé travay rèd pou yé débarasé yé kò di yé défo (Rom. 12:2 ; Éph. 4:22-24). Kou sèrvitèr Bondjé-ya pa parfè, yé ka kontinyé fè fot. Mé, sa pa ka anpéché Jéova mété « tout kalité moun » ansanm pou yé viv annan lapè ké lanmou (Tite 2:11). A sèlman nou Bondjé ki tou-pwisan ki pouvé fè roun mirak konsa !

14. Kouman Isaïe 65:25 réyalizé annan lavi roun frè ?

¹⁴ Ès roun moun pouvé vréman chanjé so pèrsonalité ? Pou réponn sa késyon-an, annou pran roun èkzanp. Annou palé di roun jennjan ki té vyolan menm é ki té ka mennen roun vyé lavi. Lò i té gen 20 lannen, yé té ja mété l’ lajòl plizyèr kou paské i té vòlò loto, i té antré annan kaz moun pou vòlò, épi ròt bagaj konsa. I té toujou paré pou briga. Mé, lò i tandé vérité-ya ki annan Labib é i koumansé vini annan nou réinyon-yan, lanmenm i vin sir ki i té trapé roun sans pou so lavi : i té pouvé adoré Jéova annan paradi èspirityèl-a. Apré i batizé, plizyèr fwa i di so kò ki Isaïe 65:25 té vré annan so sitiasyon. Li ki té sa roun moun ki té vyolan, sovaj kou roun lou, i té vin dous kou roun ti mouton.

15. Poukisa nou lé envité tout moun annan nou paradi èspirityèl, é kouman nou pouvé fè sa ?

¹⁵ Isaïe 65:13 ka koumansé konsa : « Men sa Souvéren Sényèr Jéova-a ka di. » É vèrsé 25-a ka fini konsa : « A sa Jéova di ». Sa Jéova ka di toujou ka fèt (Is. 55:10, 11). Paradi èspirityèl-a ja ka èkzisté. Jéova fè roun fanmi èspirityèl ki pa ka èkzisté pyès ròt koté. Paské nou ka fè parti di sa fanmi-a, nou ka santi nou kò an sékirité é nou ka rivé viv annan lapè menm si nou ka viv annan roun monn vyolan (Ps. 72:7). A pou tout sa bagaj-ya nou lé envité roun patché moun vini annan nou fanmi èspirityèl. Nou pouvé fè sa lò nou ka fè tousa nou pouvé pou nou préché ké ansényé (Mat. 28:19, 20).

KOUMAN NOU POUVÉ BAY MOUN-YAN ANVI ANTRÉ ANNAN PARADI ÈSPIRITYÈL-A

16. Kisa ki pouvé bay roun moun anvi antré annan paradi èspirityèl-a ?

¹⁶ Pou bay moun-yan anvi antré annan paradi èspirityèl-a nou tout gen roun bagaj pou fè : nou divèt imité Jéova. I pa ka fòrsé pyès moun vini annan so òrganizasyon. I pito ka « fè [chak moun]  vini òbò li » ké dousèr (Jean 6:44 ; Jér. 31:3). Lò moun ki sensèr ka vin savé ki pèrsonalité Jéova-a bèl toubonnman, yé anvi vini òbò li. Gras a nou kalité ké nou bèl kondwit, nou menm osi nou pouvé bay yé anvi konnèt paradi èspirityèl-a. Annou wè kouman nou pouvé fè sa.

17. Kouman nou pouvé fè moun-yan vini annan paradi èspirityèl-a ?

¹⁷ Roun fason nou pouvé bay moun anvi vini annan paradi èspirityèl-a, a lò nou ka aji jantiman ké nou frè ké sò-ya. Lò roun moun ka vin annan nou réinyon pou prémyé fwa-a, nou lé i rousanti menm bagaj ké roun moun ki té ké alé annan réinyon ki té ka fèt Korent é ki té ké gen rézon rélé : « Bondjé la ké zòt vré » ! (1 Cor. 14:24, 25 ; Zach. 8:23). Donk, annou kontinyé swiv sa konsèy-a : « A pou zòt rété byen ké zòt konpanyen » (1 Thess. 5:13).

18. Kisa ki pouvé fè moun anvi vini annan nou òrganizasyon ?

¹⁸ Annou toujou fè tousa nou pouvé pou nou wè nou frè ké sò-ya kou Jéova ka wè yé. Nou ké rivé fè sa si nou ka mété nou lidé asou yé kalité pasé nou mété nou lidé asou yé défo ki ké disparèt titalò. Si nou gen roun problèm ké roun frè ouben roun sò, annou réglé sa lanmenm ké lanmou. A pou nou toujou ‘bon pou nou konpanyen, a pou nou plen ké konpasyon, a pou nou pardonnen nou konpanyen ké tout nou tchò’ (Éph. 4:32). Konsa, moun-yan ki lé yé aji konsa ké yé ké anvi vini annan paradi èspirityèl-a b.

 RÉTÉ ANAN PARADI ÈSPIRITYÈL-A

19. a) Kisa roun ran moun di lò yé rouvin annan paradi èspirityèl-a ? (gadé karé-a «  Yé pati, épi yé rouvin »). b) Kisa nou divèt byen désidé fè ? (gadé zimaj-a osi).

¹⁹ Paradi èspirityèl-a gen vréman bokou valò pou nou ! A pa ti bèl i bèl é a prémyé fwa i gen bokou sèrvitèr Jéova konsa annan l’. A pou nou toujou gen rékonésans pou nou Bondjé ki fè sa paradi-a pou nou. Si roun moun lé so tchò kontan, gen roun bon lasanté, santi so kò an sékirité épi kalm, i divèt antré annan paradi èspirityèl-a épi pa janmen lésé l’ ! Mé, a pou nou panga paské Satan ka éséyé tout kalité bagaj pou fè nou soti annan l’ (1 Pierre 5:8 ; Rév. 12:9). Annou pa lésé l’ fè sa. Annou protéjé sa paradi-a, pou i rété pròp, pou i gen lapè é pou i rété bèl.