1. Kouman Jéova souvan ka réponn lapriyè so sèrvitèr-ya ?

 ÈS TO té savé ki Jéova pouvé itilizé to pou réponn lapriyè roun moun fè ? Nou tout konsèrné, ki nou ansyen, asistan, pyonyé ouben proklamatèr annan roun asanblé. Ouben ankò, ki nou jenn, ki nou granmoun, ki nou sa roun frè ouben roun sò. Lò roun moun ki kontan Jéova ka doumandé li idé l’, nou Bondjé souvan ka sèrvi ansyen-yan ouben ròt sèrvitèr fidèl pou yé divini « roun sours ki ka bay gran konsolasyon » (Col. 4:11). A roun lònò pou nou sèrvi Jéova ké frè ké sò-ya konsa ! Nou pouvé idé ké konsolé nou frè ké nou sò lò i gen roun épidémi, roun katastròf natirèl, ouben lò yé ka pèrsékité nou.

2. Poukisa sa pouvé rèd pou idé ròt-ya lò i gen roun épidémi ?

² Lò i gen roun épidémi, sa pouvé rèd pou nou idé nou konpanyen. Parèkzanp nou pitèt lé alé wè nou zanmi, mé a pa roun bon lidé. Pitèt nou lé envité sa-ya ki gen problèm soumaké pou yé manjé ké nou, mé sa osi, sa pa posib. Pitèt nou lé idé ròt-ya, mé sa pouvé rèd si nou pròp fanmi ka soufri. Mé nou lé idé nou frè ké sò-ya kanmenm. Jéova kontan wè nou fè sa nou pouvé pou idé yé (Prov. 3:27 ; 19:17). Alòr, kisa nou pouvé fè ?

3. Kisa èkzanp ansyen-yan annan asanblé Desi ka anprann nou ? (Jérémie 23:4).

 ³ Sa ansyen-yan pouvé fè. Si to sa roun ansyen, anprann konnèt brébi-ya byen (li Jérémie 23:4). Desi b, roun sò nou ja palé annan ròt artik-a, ka di : « Ansyen-yan annan mo group prédikasyon té gen labitid préché ké nou, é yé té ka pasé tan ké nou, donk ké mo osi. » Donk sa bèrjé-ya rivé idé Desi pi fasilman lò Covid-19-a koumansé é ki maladi-a tchwé sèrten moun annan so fanmi.

4. Poukisa ansyen-yan té pouvé idé Desi, é kisa sa ka anprann nou ?

⁴ Desi ka èspliké : « Kou ansyen-yan té ja mo zanmi, mo té alèz pou di yé sa mo té ka rousanti é sa ki té ka fè mo pè. » Kisa ansyen-yan pouvé anprann di sa ? Pran swen di sa-ya ki annan zòt group anvan problèm tonbé. Divini zanmi ké zòt frè ké sò-ya. Si akoz di épidémi-a zòt pa pouvé alé wè yé zòt menm, chaché rounòt fason pou palé ké yé. Desi ka di : « Annan rounsèl lajournen, sa ja rivé plizyèr ansyen aplé mo ouben voyé mésaj pou mo. Yé té ka pran vèrsé ki té ka fè mo plézi, menm si mo té ja konnèt sa vèrsé-ya. »

5. Kouman ansyen-yan pouvé savé sa frè ké sò-ya bézwen épi idé yé ?

⁵ Roun fason zòt pouvé savé sa zòt frè ké sò-ya bézwen, a lò zòt ka pozé yé déztrwa késyon, san zòt pa fè yé ronté, pou yé di zòt sa yé gen asou yé tchò (Prov. 20:5). Ès yé gen asé manjé, asé médikaman ké ròt bagaj yé bézwen ? Ès yé ka riské pédi yé travay, yé kaz ? Ès yé bézwen roun moun idé yé ouben ès yé bézwen nou idé yé pou doumandé gouvèrnman-an roun èd ? Plizyèr frè ké sò idé Desi gen sa i té bézwen, mé sa ki idé l’ èspésyalman pou i tchenbé pannan sa éprèv-ya, a lanmou anyen-yan montré li ké ankourajman yé bay li gras a Labib-a. I ka di : « Ansyen-yan priyè ké mo. Menm si mo pa ka sonjé sa yé di, mo ka sonjé sa mo rousanti. A kousidiré Jéova té ka di mo : “Mo la ké to” » (Is. 41:10, 13).

6. Kisa bokou moun annan asanblé-a pouvé fè pou idé ròt-ya ? (gadé zimaj-a).

⁶ Sa ròt-ya pouvé fè. Pitèt pou nou, a ansyen-yan an prémyé ki divèt idé yé frè ké sò-ya. Sa nòrmal. Mé Jéova ka  doumandé nou tout ankourajé ké idé ròt-ya (Gal. 6:10). Menm si a roun ti bagaj nou ka fè pou montré nou lanmou pou roun moun ki malad, sa pouvé fè li plézi bokou. Roun timoun pouvé voyé roun ti kart ouben roun désen pou ankourajé roun frè. Roun jennjan pouvé alé fè komisyon pou roun sò. Ouben ròt moun annan asanblé-a pouvé fè manjé é lésé manjé-a douvan kaz roun moun ki malad. Lò i gen roun épidémi, tout moun annan asanblé-a bézwen ankourajman. Pitèt nou pouvé rété roun tibi pi lontan apré réinyon-yan pou palé ké frè ké sò-ya. Nou pouvé alé wè yé, ouben nou pouvé palé ké yé ké vidéyo. Ansyen-yan osi bézwen nou ankourajé yé. Plizyèr frè ké sò voyé roun ti lèt pou ansyen-yan pou di yé mèrsi paské souvan yé gen plis bagaj pou fè pannan roun épidémi. Sa bèl lò nou ka fè sa nou pouvé pou ‘kontinyé ankourajé ké bay nou konpanyen plis fòrs’ ! (1 Thess. 5:11).

7. Kisa ki pouvé rèd apré roun katastròf ?

⁷ Roun katastròf pouvé boulvèrsé lavi roun moun rounsèl kou. Moun-yan pouvé pédi sa yé gen, yé pouvé pédi yé kaz, ouben menm yé pouvé pédi moun yé kontan. Sa ka rivé nou frè ké sò-ya osi. Kisa nou pouvé fè pou idé yé ?

8. Kisa ansyen-yan ké chèf fanmi-ya pouvé fè anvan roun katastròf rivé ?

⁸ Sa ansyen-yan pouvé fè. Zòt ki ansyen, idé zòt frè ké sò-ya pou yé paré pou roun katastròf anvan i rivé. Vérifyé si tout moun annan asanblé-a savé sa yé divèt fè pou yé rété an sékirité é kouman yé pouvé jwenn ansyen-yan. Men sa Margaret nou ja palé annan ròt artik-a ka di : « Annan roun diskour asou bézwen asanblé-a, ansyen-yan avèrti nou. Yé di nou ki difé té pouvé pri toujou koté nou té ka rété-a. Yé di nou ki, si yé té ka di nou pati, ouben si sitiasyon-an té ka divini danjéré, nou té ké divèt chapé lanmenm ». Frè-ya bay nou sa enfòrmasyon-an o bon moman, paské senk simenn apré sa, roun gro difé pri. Lò yé ka étidyé ké yé fanmi, chèf fanmi-ya pouvé rouwè sa chak moun annan fanmi-a ké fè. Si to ké to timoun zòt paré zòt kò, sa ké pi fasil pou zòt rété kalm.

9. Kouman ansyen-yan pouvé travay ansanm anvan ké apré roun katastròf rivé ?

⁹ Si to rèsponsab roun group prédikasyon, pa antann roun katastròf rivé pou to pran niméro ké adrès tout moun ki ka asèpté bay to sa enfòrmasyon-yan. Fè roun lis é byen gadé si enfòrmasyon-yan bon toujou. Konsa, si i gen roun katastròf, to ké pouvé jwenn chak proklamatèr pou to savé sa yé bézwen. Apré sa, di koòrdinatèr ansyen-yan sa yé bézwen lanmenm. Koòrdinatèr-a li menm ké jwenn rèsponsab sirkonskripsyon-an. Lò sa frè-ya ka travay byen ansanm, yé pouvé idé nou frè ké sò pi byen. Apré difé-a, rèsponsab sirkonskripsyon Margaret pa dronmi pannan 36 lèr. I té gen pou òrganizé travay ansyen-yan ki té ka éséyé jwenn apéprè 450 frè ké sò ki té lésé yé kaz épi pou i okipé di sa yé té bézwen (2 Cor. 11:27). Konsa, tout sa ki pa té gen kaz ankò akoz di sa ki té pasé, trapé roun koté pou yé rété.

10. Poukisa zafè pran swen di brébi-ya enpòrtan pou ansyen-yan ? (Jean 21:15).

¹⁰ Bèrjé-ya divèt ankourajé frè ké sò-ya ké Labib-a é idé sa-ya ki enkyèt (1 Pierre 5:2). Lò roun katastròf ka rivé, prémyé  bagaj ansyen-yan divèt fè, a gadé si chak moun an sékirité, si yé gen manjé, lenj ké roun koté pou rété. Mé plizyèr mwa toujou apré sa, sa-ya ki viv sa katastròf-a ké toujou bézwen moun ankourajé yé ké Labib-a é idé yé lò yé ké enkyèt (li Jean 21:15). Harold, roun frè ki annan roun komité filyal é ki palé ké roun patché frè ké sò ki pasé anba roun katastròf ka di : « Sa ka pran tan pou yé viré kou anvan. Pitèt yé ka koumansé asèpté ki yé pédi bagaj yé té gen. Mé yé ka toujou sonjé sa yé pédi ki té gen valò pou yé. Ouben sa ki pi rèd ankò, yé ka kontinyé sonjé roun moun yé té kontan ki mouri. Ouben yé ka sonjé ki yé menm yé manké mouri. Tout sa bagaj-ya pouvé fè chagren-an viré souvan. A pa paské yé pa gen asé lafwa, a roun bagaj ki nòrmal. »

11. Kisa fanmi-ya pouvé bézwen pitèt pannan plizyèr mwa ?

¹¹ Ansyen-yan ka konprann ki sa enpòrtan pou yé ‘pléré ké sa-ya ki ka pléré’ kou Labib-a ka di l’ (Rom. 12:15). Sa-ya ki pasé anba roun katastròf pouvé bézwen roun moun fè yé sonjé ki Jéova ké yé frè ké sò-ya kontan yé toujou. Ansyen-yan ké idé fanmi-ya pou yé kontinyé priyè, étidyé, alé annan réinyon-yan épi préché. Yé pouvé osi ankourajé papa ké manman-yan idé yé timoun mété yé lidé asou bagaj pyès katastròf pa pouvé krazé. Papa ké manman, fè zòt timoun sonjé ki Jéova ké toujou sa yé Zanmi é ki i ké toujou la pou yé. Épi pa bliyé di yé ki yé ké toujou gen roun fanmi frè ké sò asou tout latè-a ki paré pou idé yé (1 Pierre 2:17).

12. Kouman ròt frè ké sò annan asanblé-a pouvé idé lò i gen opérasyon pou poté sékour ? (gadé zimaj-a).

¹² Sa ròt-ya pouvé fè. Si roun katastròf ka rivé bò di koté ou ka rété, doumandé ansyen-yan sa to pouvé fè pou idé. Pitèt to pouvé envité frè ké sò ki lésé yé kaz ouben sa-ya ki vini idé pou yé rété annan to kaz pannan roun tan. Ouben to pouvé bay proklamatèr-ya ki pasé anba roun katastròf manjé ké ròt bagaj yé bézwen. Si roun katastròf ka rivé annan rounòt koté, to pouvé fè roun bagaj kanmenm. Kisa to pouvé fè ? Priyè pou sa-ya ki pasé anba sa katastròf-a (2 Cor. 1:8-11). Rounòt bagaj to pouvé fè, a bay soumaké pou tousa òrganizasyon-an ka fè asou tout latè-a. A roun fason pou idé lò i gen  opérasyon pou poté sékour (2 Cor. 8:2-5). Si to pouvé alé koté i gen problèm-an, doumandé ansyen-yan sa to pouvé fè pou idé. Si yé ka asèpté to démann, yé ké bay to roun fòrmasyon, konsa yé ké pouvé itilizé to o bon moman ké koté to ké pi itil.

13. Ki problèm nou frè ka jwenn annan péyi koté nou pa pouvé adoré Jéova kou nou lé ?

¹³ Annan péyi koté yé ka défann nou adoré Bondjé kou nou lé, akoz di pèrsékisyon-an, lavi-a pi rèd. Témwen-yan ki ka rété la ka jwenn problèm soumaké, ka tonbé malad ouben ka pédi moun yé kontan kou nou tout. Mé akoz di entèrdiksyon-an, ansyen-yan pa pouvé soti pou alé wè yé kou yé lé ouben aplé yé pou ankourajé yé. A sa ki rivé Andreï, frè-a nou ja palé annan ròt artik-a. Roun sò annan so group prédikasyon té gen problèm soumaké. Dèyè sa, i fè roun aksidan. Kou yé opéré l’ plizyèr kou, i pa té pouvé travay ankò. Magré entèrdiksyon-an ké pandémi-a, frè-ya fè tousa yé té pouvé pou idé l’ é Jéova té ka gadé tousa ki té ka pasé.

14. Ki èkzanp ansyen-yan pouvé bay annan zafè konté asou Jéova ?

¹⁴ Sa ansyen-yan pouvé fè. Andreï priyè é i fè sa i té pouvé. Kouman Jéova réponn li ? I pousé krétyen ki té pi lib pou yé fè roun bagaj. Roun ran mennen sò-a lò i té gen randévou ké dòktèr. Ròt bay li soumaké. Jéova pousé sa krétyen-yan fè sa yé té pouvé é i béni tousa yé fè ansanm ké kouraj (Héb. 13:16). Zòt ki ansyen, lò i gen entèrdiksyon, doumandé ròt frè idé zòt (Jér. 36:5, 6). É pi enpòrtan-an, konté asou Jéova. I ké pèrmèt zòt idé zòt frè ké sò-ya trapé sa yé bézwen.

15. Kisa nou pouvé fè pou nou toujou rété byen ansanm pannan pèrsékisyon-an ?

¹⁵ Sa ròt-ya pouvé fè. Lò i gen entèrdiksyon, détan nou pa pouvé rasanblé ké tout asanblé-a, nou gen pou rasanblé ké ti group. Donk, a la pou nou kontinyé chaché lapè ankò plis. Annou briga ké Satan, annou pa briga ké nou konpanyen. A pa pou nou rété asou fot nou frè ka fè, é si i gen roun problèm, a pou nou ranjé sa vitman (Prov. 19:11 ; Éph. 4:26). Annou pran douvan pou idé nou konpanyen (Tite 3:14). Sa ròt-ya fè pou idé sò-a  idé tout group prédikasyon-an. Yé divini pi pròch. Yé divini kou roun fanmi (Ps. 133:1).

16. Dapré Colossiens 4:3, 18, kouman nou pouvé idé nou frè ké sò yé ka pèrsékité ?

¹⁶ Roun patché krétyen ka sèrvi Jéova magré lalwa gouvèrnman-an ka mété. Roun ran ka alé lajòl akoz di yé lafwa. Nou pouvé priyè pou yé ké yé fanmi, é nou pouvé priyè osi pou sa ki ka idé yé é ki ka défann yé annan tribinal-ya, menm si yé pouvé mété yé lajòl c (li Colossiens 4:3, 18). Annou pa janmen bliyé fòrs lapriyè gen ! (2 Thess. 3:1, 2 ; 1 Tim. 2:1, 2).

17. Kouman to pouvé paré to kò pou pèrsékisyon-an dipi aprézan ?

¹⁷ To ké to fanmi, zòt pouvé paré zòt kò pou pèrsékisyon-an dipi aprézan (Actes 14:22). Pa éséyé imajiné tout kalité mové bagaj ki pouvé rivé. Pasé to fè sa, fè to lanmityé ké Jéova vin pi fò é idé to timoun fè menm bagaj-a. Si to enkyèt, vidé to tchò pou Bondjé (Ps. 62:7, 8). Palé ké to fanmi di tousa ki ka fè zòt sir ki zòt pouvé fè li konfyans d. Kou lò roun katastròf ka rivé, si to pran tan préparé é si to ka fè Jéova konfyans, to timoun ké gen kouraj ké lapè annan yé tchò.

18. Kisa ki ké rivé dimen ?

¹⁸ Lapè Bondjé ka bay ka pèrmèt nou santi nou kò an sékirité (Phil. 4:6, 7). Ké sa lapè-a, Jéova ka kalmé nou tchò lò nou malad, lò katastròf ka rivé ouben lò yé ka pèrsékité nou. I ka sèrvi ansyen ki ka travay rèd pou yé pran swen di nou. É gras a li, nou tout gen lònò idé ròt-ya. Lapè nou gen aprézan ka pèrmèt nou paré pou éprèv ki pi rèd ki ka vin dèyè, kou « gran tribilasyon-an » (Mat. 24:21). Nou ké divèt gardé nou lapè annan nou tchò épi idé ròt-ya fè menm bagaj-a. Apré sa, i pa ké janmen gen pyès sitiasyon ki rèd ankò, donk nou pa ké janmen enkyèt ankò ! Anfen, nou ké profité di sa Jéova té toujou lé pou nou : roun lapè parfè é pou tout-tan (Is. 26:3, 4).