Non. Sa David ékri vré.

Annou gadé sa i ékri annan sa vèrsé-a ké ròt ankò ki ka sanblé l’ : « Mo ké chanté pou louwé to non pou tout-tan, é chak jou mo ké rèspèkté vé mo fè-a », « Mo ka louwé to ké tout mo tchò, o Jéova mo Bondjé, é mo lé bay to non laglwar pou tout-tan » é « Mo lé louwé to non pou tout-tan » (Ps. 61:8 ; 86:12 ; 145:1, 2).

David pa té ka alé tro lwen. I pa té ka pansé ki i pa té ké janmen mouri. I té savé ki Jéova té di ki péché-a té ké bay lanmò. É i té ka rékonnèt ki li menm pa té parfè (Gen. 3:3, 17-19 ; Ps. 51:4, 5). I té savé ki menm sa ki fè Bondjé plézi, kou Abraam, Izaak ké Jakòb, té mouri. É i té byen savé ki li menm osi té ké mouri roun jou (Ps. 37:25 ; 39:4). Mé sa i di annan Psaume 61:8 té ka montré ki i té byen désidé louwé Bondjé pou tout-tan, sa lé di jouktan i mouri (2 Sam. 7:12).

Kou nou ka wè l’ annan paròl ki marké anvan koumansman Psaumes 18, 51 ké 52, annan sèrten bagaj David ékri, i ka palé di sa ki rivé li annan so lavi. Parèkzanp, kou li menm té sa roun bèrjé, annan Psaume 23, i ka di ki Jéova kou roun bèrjé ki ka di nou ki koté pou nou alé, roun bèrjé ki ka konsolé nou é ki ka protéjé nou. Pas i réfléchi asou sa, sa bay li anvi adoré Bondjé ‘pannan tout so lavi’ (Ps. 23:6).

Anplis di sa, a pa pou nou bliyé ki a Jéova ki fè David marké sa i marké-a. Annan sa i ékri, i té gen profési ki té ka di sa ki té ké pou fèt lontan pita. Parèkzanp, annan Psaume 110, i palé di roun lépòk koté so Sényèr, ‘té ké asiz a drèt [di Bondjé]’ annan syèl-a é té ké rousouvwè bokou pouvwar. Pou fè kisa ? Pou fè lèlmi Bondjé-ya kouché plat douvan li é pou « fè jijman-an tonbé asou nasyon-yan » asou latè-a. David té sa roun gangan di Mési-a, sa-la ki té ké dirijé annan syèl-a é ki té ké « prèt pou tout-tan » (Ps. 110:1-6). Jézi di ki profési-a ki annan Psaume 110 té ka konsèrné li é ki i té ké pou fèt pita toujou (Mat. 22:41-45).

Donk Bondjé gidé David pou i palé di so lépòk mé osi di rounòt lépòk koté i té ké pouvé louwé Jéova pou tout-tan, apré i résisité l’. Sa ka pèrmèt nou konprann ki Psaume 37:10, 11, 29 pitèt ka palé di fason Israyélit-ya té ka viv tan-lontan, mé osi di fason tout moun ké viv asou latè-a lò Bondjé ké fè so promès fèt (gadé paragraf 8-a annan artik « To ké la ké mo annan paradi-a » annan sa Tourdégard-a).

Donk, Psaume 61:8 ké vèrsé-ya ki ka sanblé li ka montré ki annan so lépòk (annan lépòk Israyèl), David té lé louwé Jéova jouktan i mouri. Mé sa vèrsé-ya ka palé osi di sa David ké pouvé fè pita lò Jéova ké résisité l’.