1. Lò nou ka réfléchi asou promès lavi pou tout-tan-an, kisa sa ka fè nou ?

 JÉOVA ka promèt ki sa-ya ki ka kouté l’ ké gen « lavi pou tout-tan » (Rom. 6:23). Lò nou ka réfléchi asou sa bèl promès-a, nou blijé kontan Jéova plis ankò. To ka randé to kò kont ? Tèlman nou Papa ki annan syèl-a kontan nou ki anyen pa ké janmen séparé nou di li !

2. Ki fòrs promès lavi pou tout-tan-an ka bay nou ?

² Promès lavi pou tout-tan-an ka idé nou tchenbé magré éprèv nou ka jwenn touléjou. É menm lò nou lèlmi ka ménasé tchwé nou, nou pa ka arété adoré Jéova. Poukisa ? Paské, parèkzanp, nou savé ki si nou ka rété fidèl jiktan nou mouri, Jéova ké résisité nou, é i ké bay nou posibilité viv pou tout-tan (Jean 5:28, 29 ; 1 Cor. 15:55-58 ; Héb. 2:15). Poukisa nou pouvé sir ki nou ké pouvé viv pou tout-tan ? Annou wè plizyèr bagaj.

3. Poukisa nou pouvé sir ki Jéova pouvé fè nou viv pou tout-tan ? (Ps. 102:12, 24, 27).

³ Nou savé ki Jéova pouvé fè nou viv pou tout-tan paské a li ki sours lavi-a é paské li menm ka viv pou tout-tan (Ps. 36:9). Men plizyèr vèrsé ki ka montré ki Jéova la dipi tout-tan é ki i ké la pou tout-tan. Psaume 90:2 ka di ki Jéova la « dipi tout-tan é pou tout-tan ». Psaume 102 ka di roun bagaj konsa osi (li Psaume 102:12, 24, 27). Men sa Profèt Abakik li menm di asou nou Papa ki annan syèl-a : « Ès a pa dipi tout-tan to la, o Jéova ? O  mo Bondjé, sa-la ki Sen-an, to pa ka mouri » (Hab. 1:12).

4. Si sa rèd pou nou konprann ki Jéova la dipi tout-tan, ès nou divèt kasé nou tèt pou sa ? Èspliké.

⁴ Ès sa rèd pou to konprann ki Jéova la « pou tout-tan » ? (Is. 40:28). Si a sa, a pa to rounso. Tan-lontan, men sa Éliyou di asou Bondjé : « Pyès moun pa pouvé rivé konprann dipi kitan i la » (Job 36:26). Mé a pa paské nou pa ka konprann roun bagaj ki sa lé di ki sa bagaj-a pa vré. Parèkzanp, menm si nou pa ka byen konprann kouman zafè limyèr-a ka maché, ès sa lé di ki limyèr-a pa ka èkzisté ? Non ! Menm fason-an, pitèt nou pa ké janmen rivé byen konprann ki Jéova la dipi tout-tan é ki i ké la pou tout-tan. Mé sa pa lé di ki Jéova pa ka viv pou tout-tan. Lavérité asou Sa-la ki fè tout bagaj pa ka dépann di sa nou pouvé konprann ouben di sa nou pa pouvé konprann (Rom. 11:33-36). Anvan menm inivèr-a fèt (annan sa i gen solèy-a ké zétwèl-ya), i té la. Nou sir ki Jéova sa « Sa-la ki fè latè-a gras a so fòrs ». Wi, i té la lontan anvan i « louvri syèl-a » (Jér. 51:15 ; Actes 17:24). Ki ròt bagaj ka fè nou sir ki nou ké pouvé viv pou tout-tan ?

5. Kisa Adan ké Èv té pouvé gen ?

⁵ Lò Jéova fè tousa ki vivan asou latè-a, yé tout té divèt viv pannan roun tan épi mouri. Mé moun-yan yé menm, yé pa té pou mouri. I bay yé èspwar viv san yé pa janmen mouri. Parkont, i bay Adan sa avèrtisman-an : « Pou frwi pyébwa konésans sa ki bon ké sa ki mové, to pa divèt manjé l’. Paské jou to ké manjé l’, to ké mouri » (Gen. 2:17). Si Adan ké Èv té obéyi Jéova, yé pa té ké mouri. Donk, nou pouvé pansé ki lò moman-an té ké rivé, Jéova té ké bay yé drwa manjé frwi « pyébwa-a ki ka bay lavi ». Konsa, Jéova té ké pèrmèt yé sir ki yé té ké « viv pou tout-tan b » (Gen. 3:22).

6-7. a) Ki ròt bagaj ka montré ki moun pa té fèt pou mouri ? b) Di sa to présé fè annan monn nouvo-a (gadé zimaj-ya).

⁶ Dapré plizyèr syantifik ki ka travay pou konprann kouman sèrvo-a ka maché, nou sèrvo pouvé tchenbé bokou plis enfòrmasyon pasé sa i ka tchenbé pannan nou lavi. Ès sa pa dròl ? Dapré roun artik annan Scientific  American Mind c, ki soti an 2010, nou sèrvo pouvé tchenbé pasé apéprè 2 milyon 500 mil gigaoctets. A kousidiré to té ka anréjistré roun émisyon pannan 3 milyon lèr. Sa té ké pran to 300 lannen pou gadé sa vidéyo-a. É pitèt sa chif-ya menm pi bas pasé sa ki vréman posib. An tout sans, sa ka montré ki Jéova fè nou sèrvo pou i pouvé tchenbé lontan plis enfòrmasyon pasé sa nou pouvé tchenbé pannan 70 ouben 80 lannen rounso (Ps. 90:10).

⁷ Jéova fè nou pou nou anvi viv pou tout-tan, é sa anvi-a fò toubonnman. Labib-a ka di ki Bondjé « mété anvi viv pou tout-tan annan tchò moun » (Eccl. 3:11). A pou sa nou ka wè lanmò kou roun lèlmi (1 Cor. 15:26). Épi si nou ka trapé roun maladi ki grav, ès nou ké rété la san nou pa fè anyen ? Non. Nou ké alé koté dòktèr épi nou ké pran médikaman pou nou briga ké sa maladi-a. Pou byen di, nou ka fè tousa nou pouvé pou nou pa mouri. É lò nou ka pédi roun moun nou kontan, ki i té jenn, ki i té vyé, ès a pa roun gran soufrans nou gen annan nou tchò pannan lontan ? (Jean 11:32, 33). Nou ka wè ki nou Kréyatèr ki kontan nou pa té ké bay nou anvi viv pou tout-tan ké posibilité viv pou tout-tan si i pa té lé nou viv pou tout-tan. Mé i gen ròt bagaj ankò ki ka fè nou savé ki nou pouvé viv pou tout-tan. Annou wè sa Jéova fè tan-lontan, é sa i ka fè jòdla ki ka montré ki projè i té gen o koumansman pa chanjé.

8. Di kisa Isaïe 55:11 ka pèrmèt nou sir asou projè Jéova-a ?

⁸ Menm si akoz di péché-a, Adan ké Èv bay yé pitit lanmò, Jéova pa janmen mété so projè asou koté (li Isaïe 55:11). I pa chanjé lidé, i lé sa-ya ki fidèl viv pou tout-tan. A sa nou ka wè annan sa i di ké annan sa i fè pou so projè réyalizé.

9. Ki promès Bondjé fè ? (Daniel 12:2, 13).

⁹ Jéova promèt ki i ké résisité moun mouri-ya, é ki i ké bay yé posibilité viv pou tout-tan (Actes 24:15 ; Tite 1:1, 2). Jòb té sir ki Jéova présé résisité moun mouri-ya (Job 14:14, 15). Profèt Danyèl té savé ki, èspwar moun-yan gen, a ki Bondjé résisité yé é ki yé gen posibilité viv pou tout-tan (Ps. 37:29 ; li Daniel 12:2, 13). Jwif-ya annan lépòk Jézi té savé yé menm osi ki Jéova pouvé bay so sèrvitèr ki fidèl « lavi pou tout-tan » (Luc 10:25 ; 18:18). Jézi palé plizyèr fwa di sa promès-a, é li menm, so Papa résisité l’ (Mat. 19:29 ; 22:31, 32 ; Luc 18:30 ; Jean 11:25).

10. Kisa rézirèksyon-yan ki fèt tan-lontan ka montré nou ? (gadé zimaj-a)

¹⁰ Kou Jéova sa sa-la ki ka bay lavi, i pouvé roubay moun mouri-ya lavi. I bay profèt Éli pouvwar pou i té pouvé résisité pitit vèv Sarèpta-a (1 Rois 17:21-23). Pita, gras a Bondjé, profèt Élizé résisité pitit roun Sinamit (2 Rois 4:18-20, 34-37). Sa rézirèksyon-yan, ké ròt ankò, ka montré ki Jéova pouvé résisité moun mouri-ya. Lò i té asou latè-a, Jézi montré ki so Papa té bay li sa pouvwar-a (Jean 11:23-25, 43, 44). Atchèlman, a laro syèl-a Jézi fika é i rousouvwè « tout pouvwar annan syèl-a ké asou latè-a ». A pou sa i pouvé réyalizé promès-a ki ka di ki « tout moun ki annan tonm-yan » ké résisité é ké pouvé viv pou tout-tan (Mat. 28:18 ; Jean 5:25-29).

11. Kouman ranson-an ka bay nou posibilité viv pou tout-tan ?

¹¹ Poukisa Jéova pèrmèt ki so Pitit i kontan-an soufri bokou épi mouri ? Jézi li menm èspliké sa. Men sa i di : « Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:16). Lò Bondjé bay so Pitit kou ranson pou kouvri yé péché, Bondjé pèrmèt moun-yan asou latè-a gen posibilité viv pou tout-tan (Mat. 20:28). Men sa apot Pòl di asou sa parti enpòrtan-an annan projè Bondjé : « Kou lanmò-a vini akoz di roun wonm, rézirèksyon moun mouri-ya ka fèt osi gras a roun wonm. Wi, menm fason akoz di Adan tout moun ka mouri, menm fason-an, gras a Kris tout moun ké gen lavi ankò » (1 Cor. 15:21, 22).

12. Kouman Rwayonm-an ké pèrmèt volonté Jéova pou moun-yan fèt ?

¹² Jézi montré so disip priyè pou rwayonm Bondjé-a vini é pou volonté Bondjé fèt asou latè-a (Mat. 6:9, 10). Mé roun bagaj Bondjé lé, a ki moun-yan viv asou latè-a pou tout-tan. É a pou sa Jéova mété so Pitit Rwa rwayonm Mési-a. Anplis di sa, i ka rasanblé 144 000 moun ki ké viv annan syèl-a pou yé travay ansanm ké Jézi pou fè so volonté fèt (Rév. 5: 9, 10).

13. Kisa Jéova ka fè atchèlman é kisa sa ka pousé nou fè ?

 ¹³ Atchèlman, Jéova ka rasanblé « roun patché moun ». I ka préparé yé pou yé viv anba dominasyon so Rwayonm (Rév. 7:9, 10 ; Jacq. 2:8). Menm si sa patché moun-yan ka viv annan roun monn koté tout moun pè é ki divizé akoz di lagèr, yé ka fè tousa yé pouvé pou yé pa rayi pyès moun kèlkéswa koté moun-an soti. A kousidiré yé té ja ka fè yé zépé divini zouti pou rabouré latè (Mich. 4:3). Pasé yé bay annan lagèr ki ka tchwé roun patché moun, yé ka fè yé konpanyen konnèt Bondjé ké so projè, pou yé pouvé trouvé « vré lavi-a » (1 Tim. 6:19). Paské yé ka soutni rwayonm Bondjé-a, détan yé fanmi ka éséyé baré yé chimen, ouben yé ka jwenn problèm soumaké. Mé Jéova ka idé yé pou yé pa manké sa yé bézwen. (Mat. 6:25, 30-33 ; Luc 18:29, 30). Tousa ka fè nou sir ki rwayonm Bondjé-a la vré é ki i ké kontinyé fè projè Jéova-a fèt.

14-15. Kouman Jéova ké fè pou tiré lanmò pou tout-tan ?

¹⁴ Jòdla, Jézi Rwa annan syèl-a. É a dipi syèl-a i ka fè promès Jéova-ya fèt (2 Cor. 1:20). An 1914, i koumansé dominé so lèlmi (Ps. 110:1, 2). É titalò,  ansanm ké sa-ya ki ké dirijé Rwayonm-an ké li, i ké fini ganyen asou so lèlmi é i ké krazé tout méchan-yan (Rév. 6:2).

¹⁵ Apré sa, pannan mil lannen-yan i ké dirijé, moun mouri-ya ké résisité é sa-ya ki ké obéyi ké divini parfè. Apré dèrnyé éprèv-a, sa-ya Bondjé ké di ki yé jis « ké gen latè-a, é yé ké viv asou l’ pou tout-tan » (Ps. 37:10, 11, 29). Apré sa, pou fini, « lanmò, dèrnyé lèlmi-a, ké détrwi » (1 Cor. 15:26).

16. Ki prémyé bagaj divèt fè nou adoré Jéova ?

¹⁶ Kou nou wè l’, nou èspwar viv pou tout-tan ka apiyé asou Paròl Bondjé-a. Sa èspwar-a pouvé idé nou rété fidèl pannan sa dèrnyé jou-ya ki rèd menm. Mé si nou lé fè Jéova plézi, a pa sa sèlman ki divèt fè nou tchenbé. Prémyé bagaj-a ki ka fè nou rété fidèl pou Jéova ké Jézi, a nou lanmou pou yé (2 Cor. 5:14, 15). Sa lanmou-a ka fè nou imité yé épi ka bay nou balan pou nou fè nou konpanyen konnèt èspwar nou gen-an (Rom. 10:13-15). Pi nou ka anprann kontan bay é pi nou ka fè éfòr pou idé ròt-ya, pi Jéova ké lé sa nou zanmi pou tout-tan (Héb. 13:16).

17. Kisa chak moun divèt fè ? (Matthieu 7:13, 14).

¹⁷ Ès nou ké annan sa-ya ki ké gen lavi pou tout-tan ? Jéova fè sa ki fo pou nou gen sa posibilité-a. Aprézan, a nou ki divèt fè sa ki fo pou nou rété asou chimen lavi-a (li Matthieu 7:13, 14). Mé kouman nou lavi ké fika lò nou ké viv pou tout-tan ? A sa nou ké wè annan ròt artik-a.