1. Roun ti moso tan anvan Jézi mouri, kisa i di roun di bandi-ya ki té òbò li ? (Luc 23:39-43).

 JÉZI ké dé bandi-ya ki òbò li ka mouri piti piti. É a pa ti soufri yé ka soufri (Luc 23:32, 33). Sa dé bandi-ya ki té jouré Jézi pa sa so disip (Mat. 27:44 ; Marc 15:32). Mé roun annan yé ka chanjé. I ka di : « Jézi, sonjé mo lò to ké vini annan to rwayonm. » Jézi ka réponn li : « Vréman mo ka di to sa jòdla, to ké la ké mo annan paradi-a » (li Luc 23:39-43). Labib-a pa ka di nou ki sa bandi-a asèpté mésaj Jézi té ka préché asou « rwayonm-an ki annan syèl-a ». É Jézi pa janmen di ki sa mouché-a té ké antré annan sa rwayonm-an (Mat. 4:17). I pito té ka palé di paradi-a ki gen pou fèt asou latè-a. Poukisa nou pouvé di sa ?

2. Kisa ki ka montré ki bandi-a ki té répanti té jwif ?

² Bandi-a ki té répanti té divèt jwif paské i di ròt bandi-a : « Ès to pa ka krenn Bondjé menm, alòr ki to ka rousouvwè menm pinisyon-an ? » (Luc 23:40). Jwif-ya té ka adoré rounsèl Bondjé, mé moun nasyon-yan té ka krè annan roun patché bondjé (Ex. 20:2, 3 ; 1 Cor. 8:5, 6). Si sa bandi-ya té sa dé moun nasyon-yan, a pito sa késyon-an i té ké pozé : « Ès to pa ka krenn bondjé-ya menm ? » Anplis di sa, Bondjé pa té voyé Jézi wè moun nasyon-yan mé i té voyé li ‘òbò brébi ki té pédi ki té annan nasyon Israyèl-a’ (Mat. 15:24). É Bondjé té di Israyélit-ya ki i té ké résisité moun mouri-ya. Donk bandi-a ki té répanti té divèt savé sa, é dapré sa i di, i té ka pansé ki Jéova té ké résisité Jézi é té ké fè l’ divini Rwa  di so rwayonm. Donk sa bandi-a té ka èspéré Bondjé résisité l’ li menm osi.

3. Kouman bandi-a ki té répanti dèt imajiné paradi Jézi té ka palé-a ? Èspliké (Genèse 2:15).

³ Kou bandi-a té jwif, i té divèt byen konnèt istwè Adan ké Èv ké paradi-a koté Jéova té mété yé. Donk, lò Jézi palé di paradi-a, i dèt wè so kò annan roun bèl jarden isi-a asou latè-a (li Genèse 2:15).

4. Sa Jézi di bandi-a divèt fè nou réfléchi asou kisa ?

⁴ Sa Jézi di bandi-a divèt pousé nou imajiné kouman lavi-a ké fika annan paradi-a. Lò nou ka gadé lapè i té gen lò Salomon té rwa, sa pouvé anprann nou roun patché bagaj asou sa paradi-a. É, kou Jézi pi gran pasé Salomon, nou pouvé sir ki i ké fè nou gen roun bèl lavi asou latè-a. I ké fè sa ansanm ké sa-ya ki ké dirijé ké li (Mat. 12:42). Donk « ròt brébi-ya » divèt chaché savé sa yé gen pou fè pou yé viv pou tout-tan annan sa paradi-a (Jean 10:16).

5. Lò to ka sonjé paradi-a, kisa to ka wè ?

⁵ Lò to ka sonjé lavi annan paradi-a, kisa to ka wè ? Pitèt to ka imajiné roun bèl jarden ki ka sanblé ké sa-la Jéova té mété an Édèn (Gen. 2:7-9). To dèt ka sonjé profési-a ki annan Michée ki ka di ki sa-ya ki ka adoré Bondjé, yé chak ké « asiz anba yé pyé rézen ké anba yé pyé fig » (Mich. 4:3, 4). Ouben pitèt to ka sonjé vèrsé-ya ki ka di ki i ké gen patché manjé (Ps. 72:16 ; Is. 65:21, 22). Pitèt to ka wè to kò annan roun bèl jarden, to asiz òbò roun tab plen ké bon manjé. Lò to ka rèspiré, lè-a pròp, é to ka pran bon ti lòdò plant-ya ké flèr-ya. Épi to ka tandé to zanmi ké to fanmi ari, Bondjé résisité roun ran annan yé, yé ka anmizé yé tout ansanm. A pa roun èspwar mal papay. A divèt konsa bagaj-ya ké pasé asou latè-a. Mé lò nou ké annan paradi-a, nou ké gen roun travay entérésan pou fè osi.

6. Kisa nou ké fè annan paradi-a ? (gadé zimaj-a).

⁶ Lò Jéova fè nou, i pèrmèt nou pran plézi annan sa nou ka fè (Eccl. 2:24). Lò Jézi ké rwa pannan mil lannen-yan, nou ké gen bokou bagaj pou fè. Sa-ya ki ké janbé gran tribilasyon-an ké sa-ya ki ké résisité ké bézwen lenj, manjé ké roun kaz. A pa ti travay i ké gen pou fè pou idé yé gen tout sa bagaj-ya, mé nou ké kontan fè l’ ! Menm fason Adan ké Èv té divèt kiltivé jarden koté yé té ka rété-a, nou menm osi nou ké kontan kiltivé latè-a pou fè l’ divini  roun paradi. Imajiné osi kouman to ké kontan ansényé sa-ya Jéova ké résisité é ki pa gen tan konnèt ni li ni so projè épi kouman to ké kontan idé sa-ya ki rété fidèl konnèt tousa ki pasé apré yé mouri.

7. Di kisa nou pouvé sir, é poukisa ?

⁷ Nou pouvé sir ki dimen, annan paradi-a, nou ké viv annan lapè, nou ké gen tousa nou bézwen é tout bagaj ké byen òrganizé. Poukisa nou pouvé di sa ? Paské Jéova montré nou kouman lavi-a ké fika lò so Pitit ké dirijé nou. Pou nou pouvé wè sa, annou wè istwè Salomon lò i té rwa.

8. Kouman paròl-ya ki marké annan Psaume 37:10, 11, 29 réyalizé roun ti moso tan apré David ékri yé ? (gadé artik « Késyon moun-yan ka pozé » annan sa Tourdégard-a).

⁸ Bondjé fè David ékri kouman lavi-a té ké bèl lò roun rwa ki gen sajès é ki drèt té ké dirijé. (li Psaume 37:10, 11, 29). Lò nou ka di moun-yan ki paradi-a pròch, souvan nou ka li Psaume 37:11. A roun bon bagaj paské Jézi li menm pran sa psaume-an annan diskour i fè asou montangn-an, é sa té ka byen montré ki sa vèrsé-a té gen pou fèt pita (Mat. 5:5). Mé sa David di annan sa psaume-an té ka palé osi di lavi moun-yan té ké gen lò Salomon té ké rwa. Lò Salomon té rwa, pèp Bondjé-a té ka viv annan lapè, yé té gen plis pasé sa yé té bézwen annan roun péyi koté ‘dilèt ké myèl té ka koulé’. Bondjé té di : « Si zòt ka kontinyé swiv mo koumannman, […] mo ké mété lapè annan péyi-a é zòt ké alé dronmi san pyès moun pa fè zòt pè » (Lév. 20:24 ; 26:3, 6). Sa promès-ya réyalizé lò Salomon té rwa (1 Chron. 22:9 ; 29:26-28). Anplis di sa, Bondjé té promèt yé ki moun méchan ‘pa té ké la ankò’ (Ps. 37:10). Donk, sa ki marké annan Psaume 37:10, 11, 29 réyalizé tan-lontan é sa ké réyalizé pita osi.

9. Kisa renn Saba-a di asou fason bagaj-ya té ka pasé lò Salomon té rwa ?

 ⁹ Renn Saba-a té tandé ki moun-yan té ka viv annan lapè é ki yé té gen lontan plis pasé sa yé té bézwen lò Salomon té rwa. Donk i soti koté i té ka rété-a pou alé jik Jérizalèm pou wè sa ké so pròp wéy (1 Rois 10:1). Apré sa, men sa i di Salomon : « Yé pa menm té di mo lanmotché […]. To wonm-yan ké to sèrvitèr-ya pouvé kontan paské a tout tan yé la pou tandé to paròl ki plen ké sajès ! » (1 Rois 10:6-8). Pourtan, sa ki té ka pasé lò Salomon té rwa, a pa anyen òbò sa Jéova ké fè pou tout moun asou latè-a lò so pitit Jézi ké rwa.

10. Poukisa nou pouvé di ki Jézi pi gran pasé Salomon ?

¹⁰ Jézi pi gran pasé Salomon annan tout bagaj. Salomon pa té parfè é i fè roun patché bagaj ki grav, é akoz di sa, pèp Bondjé-a soufri. Jézi li menm, a roun Rwa ki parfè, i pa jen ka tronpé so kò (Luc 1:32 ; Héb. 4:14, 15). I rété fidèl douvan Bondjé menm si Satan fè li wè bon mizè. A konsa i montré ki i pa ké janmen fè pyès péché é ki i pa ké janmen fè sa-ya i ké dirijé pyès méchansté. Ès a pa pi bon Rwa i pouvé gen ?

11. Kimoun ki ké idé Jézi ?

¹¹ Jézi ké bay tout moun asou latè-a sa yé bézwen é i ké fè projè Jéova pou latè-a fèt. É 144 000-ya ki ké dirijé ké li ké idé li fè sa (Rév. 14:1-3). Lò yé té sa dé wonm ké dé fanm asou latè-a, yé jwenn roun patché éprèv é yé soufri bokou. Donk nou pouvé sir ki yé ké konprann sa nou ké rousanti. Kisa yé ké fè èkzaktéman ?

12. Ki travay Jéova ké bay 144 000-ya ?

¹² Jézi, ké sa-ya ki ké dirijé ansanm ké li, ké gen ankò plis travay ki Salomon. A vré Salomon té divèt bay milyon moun annan rounsèl péyi sa yé té bézwen pou viv. Mé sa-ya ki ké dirijé rwayonm Bondjé-a ké divèt bay milyar moun asou tout latè-a sa yé ké bézwen. A pa ti lònò Jéova ka bay 144 000-ya !

13. Ki bèl travay sa-ya ki ké dirijé ansanm ké Jézi ké gen pou fè ?

¹³ Kou Jézi, 144 000-ya ké rwa ké prèt (Rév. 5:10). Anba Lalwa Jéova té bay Moyiz, prèt-ya té divèt protéjé lasanté pèp-a é an menm tan, yé té divèt protéjé yé lasanté annan domenn èspirityèl-a. Lalwa té sa « roun lonbraj di bon bagaj ki gen pou vini dimen » (Héb. 10:1). Donk nou pouvé di ki sa-ya ki ké dirijé ansanm ké Jézi ké gen sa bèl travay-a pou fè ansanm ké li : bay pèp Bondjé-a sa yé ké bézwen pou viv ké sa yé ké bézwen pou yé lanmityé ké Bondjé rété fò. Nou pòkò savé kouman sa rwa-ya ké sa prèt-ya ké palé ké sa-ya ki ké asou latè-a. Mé kèlkéswa sa Jéova prévwè, nou pouvé sir ki annan paradi-a, moun-yan ké rousouvwè dirèksyon yé bézwen-an (Rév. 21:3, 4).

14. Ki rélasyon « ròt brébi-ya » gen ké « piti troupo-a » ?

¹⁴ Jézi di ki sa-ya ki ké dirijé ansanm ké li, a roun « piti troupo » (Luc 12:32). I palé osi di roun dézyèm group, i aplé yé « ròt brébi-ya ». Sa dé group-ya, a rounsèl troupo, yé ka viv ansanm  ansanm (Jean 10:16). Yé ja ka travay ansanm é yé ké kontinyé fè l’ lò latè-a ké divini roun paradi. A sa moman-an, « piti troupo »-a ké annan syèl-a épi « ròt brébi-ya » ké asou latè-a é yé ké gen èspwar viv asou l’ pou tout-tan. Mé pou viv annan paradi-a, « ròt brébi-ya » divèt fè sèrten bagaj dipi aprézan.

15. a) Kouman « ròt brébi-ya » ka travay ansanm ké frè Kris-a ? b) Kouman to pouvé swiv èkzanp frè-a nou ka wè annan roun farmasi ? (gadé zimaj-a).

¹⁵ Bandi-a ki té répanti mouri anvan i té pouvé di Jézi mèrsi. Parkont, jòdla, « ròt brébi-ya » pouvé montré sa yé ka rousanti pou Jézi. Nou ka montré li ki nou kontan li asou fason nou ka aji ké so frè-ya ki wen ké lèspri. Jézi di ki a té asou sa i té ké jijé brébi-ya (Mat. 25:31-40). Roun bèl fason nou gen pou nou soutni frè Kris-ya, a lò nou ka bay annan prédikasyon-an é lò nou ka fòrmé disip-ya ké balan ansanm ké yé (Mat. 28:18-20). Parapòrta sa, annou byen sèrvi zouti yé ka bay nou pou étidyé Labib-a kou liv Viv ké tchò kontan pou tout-tan ! Si to pòkò ka étidyé Labib-a ké roun moun, pitèt to pouvé désidé propozé plis moun étidyé Labib-a ké to !

16. Kouman nou pouvé préparé nou kò dipi jòdla pou nou viv anba dominasyon rwayonm Bondjé-a ?

¹⁶ Nou pa bézwen antann paradi-a pou nou divini roun moun Jéova lé wè annan paradi-a. Dipi jòdla, nou pouvé fè éfòr pou nou onèt annan sa nou ka di é annan sa nou ka fè, é pou nou rézonab annan nou lavi. Anplis di sa, annou rété fidèl douvan Jéova, douvan nou madanm ouben nou mouché ké douvan nou frè ké sò-ya. Pi nou ké swiv prensip Jéova-ya annan sa monn-an ki méchan, pi sa ké fasil pou nou kontinyé swiv yé annan paradi-a. Annou chaché anprann fè bagaj épi gen bèl kalité ki ka montré ki nou ja ka préparé nou kò pou nou viv annan paradi-a (gadé artik « Ès to paré pou “gen latè-a” ? » annan sa Tourdégard-a).

17. Ès a pou nou santi nou kò krazé akoz di péché nou fè anvan ? Èspliké.

 ¹⁷ Nou divèt fè éfòr osi pou nou pa rété asou péché grav nou fè anvan. A vré nou pa lé sèrvi ranson-an kou roun èskiz pou « péché parèsprè » (Héb. 10:26-31). Mé nou pouvé sir ki si nou fè roun péché grav mé ki nou répanti ké tout nou tchò, ki nou doumandé Jéova ké ansyen-yan idé nou é ki nou chanjé nou konpòrtman, Jéova pardonnen nou ké tout so tchò (Is. 55:7 ; Actes 3:19). Pa bliyé sa Jézi di farizyen-yan : « A pa moun ki jis mo vin aplé, a moun ki ka fè péché mo vin aplé » (Mat. 9:13). A pou nou sir ki sakrifis Jézi tèlman fò ki i pouvé kouvri tout nou péché.

18. Di kisa to té ké kontan palé ké bandi-a ki mouri òbò Jézi ?

¹⁸ Imajiné to annan paradi-a, to la ka palé ké bandi-a ki palé ké Jézi. Zòt toulédé zòt divèt ka di Bondjé mèrsi pou ranson-an. Pitèt to ka doumandé li bay to plis détay asou dèrnyé moman Jézi pasé asou latè-a, ouben sa i rousanti lò i tandé Jézi asèpté sa i té ka doumandé li-a. Pitèt li menm ka doumandé to kouman lavi-a té fika pannan dèrnyé jou monn Satan-an. A ké roun lònò pou nou montré moun kou sa mouché-a sa Labib-a ka di ! (Éph. 4:22-24).

19. Poukisa lavi-a annan paradi-a ké toujou entérésan ? (gadé zimaj-a anlè prémyé paj-a).

¹⁹ Annan paradi-a, nou pa ké jen las kontré ké moun entérésan épi fè bèl bagaj. Mé anplis di sa, chak jou, nou ké anprann konnèt nou Papa ki annan syèl-a pi byen é nou ké pran plézi annan tout bèl bagaj i ké bay nou. Nou ké toujou gen roun bagaj pou anprann asou li é i ké gen roun patché bagaj pou anprann asou sa i kréyé. Pi tan-an ké pasé pi nou lanmou pou li ké vin pi fò. A pa ti mèrsi nou ka di Jéova ké Jézi mèrsi paské yé promèt nou viv pou tout-tan annan paradi-a !