1. Poukisa Abraam té pouvé kontinyé èspéré gen roun timoun ?

 JÉOVA té promèt so zanmi Abraam ki tout nasyon-yan asou latè-a té ké jwenn bénédiksyon gras a pitit di so pitit (Gen. 15:5 ; 22:18). Abraam té sir ki sa promès-a té ké fèt paské a pa ti lafwa i té gen annan so Bondjé. I té ja gen 100 lannen é so madanm té gen 90 lannen, mé yé patékò gen timoun (Gen. 21:1-7). Pourtan, Labib-a ka di : « Èspwar [Abraam] té gen-an pèrmèt li gen lafwa ki i té ké divini papa roun patché nasyon, kou yé té di l’ » (Rom. 4:18). É nou savé ki sa i té ka èspéré fèt vré. Finalman, i vin gen timoun-an i té ka antann : Izaak. Asou kisa lafwa Abraam té ka apiyé ?

2. Poukisa Abraam té sir ki promès Jéova-a té ké fèt ?

² Kou Abraam té byen konnèt Jéova, « a pa ti sir i vin sir ki sa Bondjé té promèt » té ké fèt (Rom. 4:21). Bondjé té kontan sa i té ka fè é i di ki i té jis paské i té gen lafwa (Jacq. 2:23). É kou Romains 4:18 ka montré l’, so lafwa ké èspwar i té gen-an té ka maché ansanm. Aprézan, annou wè prémyé vèrsé-ya annan Romains chapit 5 koté nou ka jwenn sa apot Pòl ékri asou èspwar nou gen-an.

3. Kisa Pòl ké idé nou konprann parapòrta èspwar nou gen-an ?

³ Pòl èspliké nou poukisa nou pouvé sir ki ‘nou pa ké gen èspwar pou bon tchò’ (Rom. 5:5). I èspliké osi kouman èspwar nou gen-an pouvé vin pi fò. Toupannan  nou ké étidyé sa i ka di annan Romains 5:1-5, sonjé kouman, piti piti, èspwar to gen-an vin pi fò. Nou ké wè osi sa to pouvé fè pou i vin pi fò ankò. Mé pou koumansé, annou palé di bèl èspwar nou gen ki pa pou bon tchò dapré sa Pòl ka di.

4. Kisa Romains 5:1, 2 ka èspliké ?

⁴ (Li Romains 5:1, 2.) Pòl ékri sa paròl-ya pou asanblé-a ki té Ròm. Frè ké sò-ya annan sa asanblé-a té anprann konnèt Jéova ké Jézi, yé té koumansé gen lafwa annan yé épi yé té divini krétyen. Donk Jéova té ‘déklaré ki yé té jis gras a yé lafwa’ é i té bay yé lèspri sen. A konsa yé té vin gen roun èspwar ki té bèl toubonnman é yé té sir ki sa yé té ka èspéré té ké fèt.

5. Ki èspwar krétyen wen-yan gen ?

⁵ Pita, Pòl ékri pou krétyen wen-yan ki té Éfèz. I palé yé di èspwar Bondjé té bay yé é i di ki a té roun ‘éritaj i té mété asou koté pou sen-yan’ (Éph. 1:18). Épi i di Kolosyen-yan osi ki koté yé té ké rousouvwè yé rékonpans. I di yé ki sa èspwar-a té ‘la pou yé annan syèl-a’ (Col. 1:4, 5). Donk, krétyen wen-yan gen èspwar viv pou tout-tan annan syèl-a koté yé ké dirijé ké Kris (1 Thess. 4:13-17 ; Rév. 20:6).

6. Kisa roun frè wen di asou èspwar i té gen ?

⁶ Pou krétyen wen-yan, èspwar yé gen-an gen bokou valò. An 1991, apré i sèrvi Jéova pannan bokou lannen, men sa roun krétyen wen, frè Frederick Franz, èspliké asou sa i té ka rousanti : « Sa nou ka èspéré ké fèt vré é nou chak annan 144 000-ya ké rousouvwè sa Bondjé promèt nou. Nou rékonpans ké lontan pi bèl pasé pyès bagaj nou pouvé imajiné. […] Jik aprézan, èspwar [nou] gen-an gen bokou valò pou [nou]. [...] Pi nou ké gen pou antann li,  pi i ké gen valò pou nou. Nou paré pou antann li kèlkéswa kantité lannen nou gen pou antann. Sa èspwar-a gen plis valò pou mo pasé pyès tan. »

7-8. Ki èspwar près tout sèrvitèr Jéova-ya gen ? (Romains 8:20, 21).

⁷ Près tout sa-ya ki ka adoré Jéova jòdla gen rounòt èspwar. Yé gen menm èspwar Abraam té gen : viv pou tout-tan asou latè-a anba dominasyon rwayonm Bondjé-a (Héb. 11:8-10, 13). Pòl palé di bèl bénédiksyon sa-ya ki gen sa èspwar-a ké gen (li Romains 8:20, 21). Prémyé fwa to tandé palé di promès-ya ki annan Labib-a, kilès to té pi kontan ? Ès a té zafè ki roun jou to té ké parfè é to pa té ké péché ankò ? Ouben, ès to té kontan lò to anprann ki moun to kontan té ké résisité pou yé viv annan roun paradi asou latè-a ? To konprann ki « akoz di sa èspérans-a », sa ki dèyè pòkò touché.

⁸ Ki nou gen èspwar viv pou tout-tan annan syèl-a, ki nou gen èspwar viv pou tout-tan asou latè-a, sa èspwar-a bèl toubonnman é i ka fè nou tchò kontan. Anplis di sa, i pouvé vin pi fò. Pòl èspliké kisa ki pouvé fè l’ vin pi fò. Donk, annou wè sa i ékri asou sa. Sa ké fè nou plis sir ankò ki sa èspwar-a ké vin pi fò é ki a pa ké janmen pou bon tchò.

9-10. Kou èkzanp Pòl ka montré l’, kisa krétyen-yan divèt savé yé pouvé jwenn ? (Romains 5:3) (gadé zimaj-a osi).

⁹ (Li Romains 5:3.) Pòl èspliké ki lò nou ka jwenn roun éprèv, èspwar nou gen-an pouvé vin pi fò. Ès sa ka sirprann to ? Annou réfléchi : tout disip Kris divèt savé ki yé pouvé jwenn éprèv. Sonjé sa ki rivé Pòl. I di krétyen-yan ki té Tésalonik : « Lò nou té koté zòt, nou té ka avèrti zòt ki nou té ké gen éprèv, é a sa ki fèt » (1 Thess. 3:4). É pou Korentyen-yan, i di : « Nou frè-ya, nou lé zòt savé ki plizyèr éprèv tonbé anlè nou  [...] Nou té jis pè mouri » (2 Cor. 1:8 ; 11:23-27).

¹⁰ Jòdla osi, krétyen-yan divèt savé ki yé pouvé jwenn éprèv (2 Tim. 3:12). Ès to trapé problèm paské to mété to lafwa annan Jézi é to divini so disip ? Pitèt to zanmi ké to fanmi ari di to tèt. Pitèt yé malmennen to. Ès to trapé problèm annan to travay paské to té lé rété onèt ? (Héb. 13:18). Ouben, ès gouvèrnman koté to ka rété-a éséyé baré to chimen paské to té ka palé di èspwar to gen-an ké ròt moun ? Pòl èspliké ki kèlkéswa éprèv nou ka jwenn, nou tchò divèt kontan. Poukisa ?

11. Poukisa nou divèt byen désidé tchenbé rèd kèlkéswa éprèv nou pouvé jwenn ?

¹¹ Lò nou ka jwenn roun éprèv, nou pouvé kontan paské nou savé ki éprèv-a souvan ka mennen bon bagaj. Kou Romains 5:3 ka di, « éprèv-a ka fè nou tchenbé rèd ». Tout krétyen-yan ka jwenn éprèv. Donk, tout krétyen-yan divèt tchenbé rèd. É nou divèt byen désidé tchenbé rèd kèlkéswa éprèv nou pouvé jwenn. A sèlman si nou ka fè sa ki nou ké pouvé gen sa nou ka èspéré. Nou pa lé sanblé ké sa-ya Jézi té ka sonjé lò i palé di grenn-yan ki tonbé asou roun latè ki plen ké ròch. Sa moun-yan ka asèpté paròl-a lanmenm ké tchò kontan mé, « lò to wè éprèv ouben pèrsékisyon ka tonbé asou » yé, yé ka tonbé (Mat. 13:5, 6, 20, 21). A vré, lò nou ka jwenn éprèv ouben lò moun ka éséyé baré nou chimen, a pa janmen roun bagaj ki chwit. Mé, si nou ka tchenbé rèd, sa ké mennen bon bagaj pou nou. Ki bon bagaj ?

12. Ki bon bagaj andirans-a ka mennen ?

¹² Disip Jak palé di bon bagaj to ka jwenn lò to ka tchenbé rèd lò i di : « Lésé andirans-a fè so travay, pou zòt divini antchè épi san pyès défo annan tout domenn, pou i pa manké zòt anyen » (Jacq. 1:2-4). Jak ka èspliké isi-a ki a kousidiré andirans-a té gen roun travay pou i fè. Ki travay andirans-a gen pou fè ? Andirans-a pouvé idé nou gen bèl kalité kou pasyans-a ké lafwa é i pouvé idé nou fè Bondjé konfyans. Mé i gen rounòt bagaj enpòrtan andirans-a ka mennen.

13-14. a) Kisa andirans-a ka bay ? (Romains 5:4). b) Lò nou savé ki Bondjé kontan nou, kouman sa ka aji asou èspwar nou gen-an ?

¹³ (Li Romains 5:4.) Annan sa vèrsé-a, Pòl ka di ki paské nou ka tchenbé, nou ka fè Bondjé plézi. Donk, paské to ka tchenbé, to ka fè Jéova plézi. Sa pa lé di ki Jéova kontan lò to ka jwenn éprèv ouben problèm. A to ki ka fè l’ plézi ! Lò to ka tchenbé ké fidélité, sa to ka fè ka fè l’ plézi. Men roun bèl bénédiksyon ! (Ps. 5:12).

¹⁴ Sonjé ki Abraam tchenbé rèd é a pou sa so Bondjé té kontan l’. Jéova asèpté l’ pou i divini so zanmi é i di ki i té jis (Gen. 15:6 ; Rom. 4:13, 22). Jéova pouvé fè sa pou nou osi. A pa paské nou ka fè bokou bagaj pou Jéova ouben paské nou gen rèsponsabilité ki Jéova kontan nou. I kontan nou paské nou ka tchenbé ké fidélité. Kèlkéswa nou laj, nou sitiasyon ouben sa nou pouvé fè, nou tout nou pouvé tchenbé rèd. Ès atchèlman to annan roun éprèv é ès to ka tchenbé ké fidélité ? Si a sa to  ka fè, pa bliyé ki Jéova kontan sa to ka fè. Lò to ka konprann ki Bondjé kontan to, sa pouvé fè èspwar to gen-an vin pi fò.

15. Dapré Pòl, lò nou savé ki Bondjé kontan nou, kisa sa ka bay é poukisa roun ran pouvé étoné ?

¹⁵ Kou Pòl èspliké l’, a paské nou ka tchenbé rèd ké fidélité ki Jéova kontan nou. Mé gadé sa i di apré sa : « Bondjé kontan sa nou ka fè, é lò nou savé sa, sa ka bay nou èspwar. É nou pa gen èspwar pou bon tchò » (Rom. 5:4, 5). Roun ran moun pouvé étoné lò yé ka li sa. Poukisa ? Paské kou Romains 5:2 ka montré l’, Pòl ja di krétyen-yan ki té Ròm ki yé té gen roun èspwar, ‘èspérans yé ké rousouvwè laglwar Bondjé’. Donk, sèrten pouvé doumandé yé kò : « Si sa krétyen-yan té ja gen roun èspwar, poukisa Pòl ka palé di èspwar krétyen-yan gen ankò ? »

16. Kouman èspwar nou gen-an ka vin pi fò ? (gadé zimaj-a osi).

¹⁶ Pou nou konprann sa Pòl té lé di, nou divèt sonjé ki èspwar nou gen-an pouvé vin pi fò. Ès to ka sonjé prémyé fwa to tandé palé di bèl èspwar Paròl Bondjé-a ka bay ? Sa jou-a, pitèt to di annan to tchò ki viv pou tout-tan annan roun paradi asou latè-a, a té roun èspwar mal papay. Mé to anprann konnèt Jéova, to vin konnèt promès Labib-a pi byen é finalman to vin sir ki sa Bondjé ka promèt ké fèt.

17. Kouman èspwar nou gen-an ka kontinyé vin pi fò apré nou batizé ?

¹⁷ Apré to batizé, to vin konnèt Jéova pi byen é to vin kontan l’ ankò plis, é èspwar to gen-an vin pi fò ankò (Héb. 5:13 – 6:1). To viv to menm sa ki marké annan Romains 5:2-4. To jwenn plizyèr éprèv mé to tchenbé rèd é Jéova montré to ki i té kontan to. Jòdla, kou to sir ki i kontan sa to ka fè, sa ka pèrmèt to  antann so promès fèt. Èspwar to gen-an pi fò pasé anvan. Sa èspwar-a gen ankò plis valò pou to. Sa ka touché to plis. É sa ka aji asou tout to lavi, asou fason to ka fè ké to fanmi, asou désizyon to ka pran é menm asou fason to ka sèrvi to tan.

18. Kisa Jéova fè Pòl di pou fè nou sir ki sa i promèt nou-a ké fèt ?

¹⁸ Kou to ka fè Bondjé plézi, i ka bay to roun èspwar. Pòl bay rounòt lidé enpòrtan asou sa. Sa i di ka pèrmèt to sir ki sa to ka èspéré ké fèt, to pa ké antann pou anyen. Men sa Bondjé fè Pòl di krétyen-yan : « Nou pa gen èspwar pou bon tchò, paské lanmou Bondjé plen nou tchò gras a lèspri sen i bay nou » (Rom. 5:5). Donk, to pouvé sir ki sa Jéova promèt to-a, ké fèt.

19. Di kisa to pouvé sir ?

¹⁹ Sonjé Abraam : Jéova fè li roun promès, i té kontan sa i té ka fè é i asèpté l’ kou so zanmi. Sa sa mouché-a té ka èspéré fèt. Labib-a ka di : « Apré Abraam pran pasyans, i jwenn sa Bondjé té promèt li » (Héb. 6:15 ; 11:9, 18 ; Rom. 4:20-22). Donk, Abraam pa antann pou anyen. To menm osi, to pouvé sir ki si to ka rété fidèl, to ké rousouvwè rékonpans to ka antann-an. To pouvé kontan paské sa to ka èspéré ké fèt vré, to pa ké antann pou anyen ! (Rom. 12:12). Pou fini, Pòl ka di : « A pou Bondjé-a ki ka bay roun èspwar plen zòt ké lajwa ké lapè, paské zòt ka fè li konfyans, pou zòt plen ké èspwar gras a pwisans lèspri sen-an » (Rom. 15:13).