1. Lò nou ka réfléchi asou èkzanp Abraam bay nou annan zafè gen lafwa, ki késyon nou pitèt ka pozé nou kò ?

 ROUN patché moun ja tandé palé di Abraam, mé a pa yé tout ki konnèt gran bagaj asou li. Parkont, to, to byen konnèt sa moun-an Labib-a ka palé. Parèkzanp to savé ki Labib-a ka di ki i sa « papa tout sa ki gen lafwa » (Rom. 4:11). Mé pitèt to ka doumandé to kò : « Ès mo pouvé rivé fè mo lafwa vin fò kou lafwa Abraam ? » Enben wi to pouvé fè l’.

2. Poukisa sa enpòrtan pou nou étidyé èkzanp Abraam ? (Jacques 2:22, 23).

² Pou nou rivé fè nou lafwa vin fò kou lafwa Abraam, a pou nou étidyé so èkzanp. Kou i té lé obéyi Jéova, i pati pou alé rété annan roun péyi ki té lwen. I viv anba tant pannan lontan, é si roun zanj pa té tchenbé so lanmen, i té ké sakrifyé Izaak, so pitit i té kontan. Tout sa bagaj-ya ka montré kouman so lafwa té fò. Gras a so lafwa ké sa i fè pou montré ki i té gen lafwa, Abraam fè Jéova plézi é i divini so zanmi (li Jacques 2:22, 23). Jéova lé nou tout, donk to menm osi, nou jwenn sa menm kalité bénédiksyon-yan. A pou sa i fè Pòl ké Jak palé di Abraam annan Labib-a. Annou wè sa yé ékri asou li annan Romains chapit 4 ké Jacques chapit 2. Yé toulédé ka di roun bagaj enpòrtan asou sa mouché-a ki té fidèl.

3. Ki vèrsé Pòl ké Jak répété ?

 ³ Ni Pòl ni Jak répété sa Genèse 15:6 ka di : « [Abraam] té gen lafwa annan Jéova, a pou sa Bondjé di ki i té jis. » Annan Labib-a, roun moun ki « jis », a roun moun ki ka fè Bondjé plézi. É pou Bondjé, a roun moun ki pa gen pyès défo. To ka randé to kò kont ! Bondjé pouvé di ki roun moun ki pa parfè é ki ka fè péché pa gen pyès défo ! Asiré, a konsa to lé Bondjé wè to, é a roun bagaj ki posib ! Pou to savé kisa to divèt fè pou sa, annou wè poukisa Bondjé di ki Abraam té « jis ».

4. Kisa ki ka anpéché nou sa dé moun ki jis ?

⁴ Annan so lèt i ékri pou Romen-yan, Pòl ékri ki tout moun ka péché (Rom. 3:23). Mé, kouman Bondjé pouvé di ki roun moun ki ka péché jis, ouben ki i pa gen pyès défo ? É kouman sa moun-an pouvé fè l’ plézi ? Pou tout krétyen-yan ki sensèr trapé répons-a, Pòl pran èkzanp Abraam.

5. Kisa Jéova gadé pou di ki Abraam té jis ? (Romains 4:2, 4).

⁵ A lò i té ka rété annan péyi Kanaan ki Jéova di ki Abraam té jis. Poukisa ? Ès a paské i té ka obéyi Lalwa Moyiz parfètman ? Non (Rom. 4:13). Jéova bay Israyélit-ya sa Lalwa-a 400 lannen pita. Donk, kisa Jéova gadé pou di ki Abraam té jis ? Jéova fè Abraam profité di so favèr nou pa mérité, é a konsa i di ki i té jis gras a so lafwa (li Romains 4:2-4).

6. Kisa ki ka pèrmèt Jéova di ki roun moun jis menm si i ka péché ?

⁶ Apré sa, Pòl èspliké ki lò roun moun gen lafwa annan Bondjé, « Bondjé ka di ki i jis » (Rom. 4:5). É i di osi : « A konsa David li menm osi ka palé di moun-an ki kontan paské Bondjé ka wè l’ kou roun moun ki jis menm si i pa ka fè sa lalwa-a ka di : “Sa-ya Bondjé pardonnen mové bagaj yé fè é kouvri yé péché, yé tchò kontan ; moun-an Jéova pa ké tchenbé kont di so péché, so tchò kontan” » (Rom. 4:6-8 ; Ps. 32:1, 2). Jéova ka « kouvri », sa lé di i ka pardonnen, péché sa-ya ki gen lafwa annan li. I ka pardonnen yé nèt é i pa ka tchenbé kont di sa ankò. Pou li, sa moun-yan jis é yé pa gen pyès défo paské yé gen lafwa.

7. Poukisa Jéova té pouvé di ki so sèrvitèr-ya tan-lontan té jis ?

⁷ A pa paské Bondjé té di ki Abraam, David ké ròt annan so sèrvitèr té jis, ki yé pa té ka péché, é ki yé té parfè. Mé kou yé té gen lafwa, pou Bondjé yé pa té gen défo, èspésyalman lò nou ka konparé yé ké sa-ya ki pa té ka adoré li (Éph. 2:12). Kou Pòl byen di l’ annan so lèt, a pou nou gen lafwa pou nou vin zanmi ké Bondjé. Abraam ké David té zanmi ké Jéova paské yé té gen lafwa annan li. É nou menm osi nou pouvé divini zanmi Jéova gras a nou lafwa.

8-9. Kisa sèrten moun ka pansé di sa Pòl ké Jak ékri mé ki pa vré, é poukisa yé ka pansé sa ?

⁸ Dipi lontan, chèf rélijyé-ya pa ka tonbé dakò asou valò nou lafwa ké sa nou ka fè pou montré nou gen lafwa. Sèrten chèf rélijyé ka di ki pou nou sové, a pou nou gen lafwa annan Jézi Kris nou Sényèr épi i bon. Pitèt to tandé yé di : « Krè annan Jézi é to ké sové. » Détan yé jis ka  itilizé sa Pòl ka di : « Bondjé ka wè [roun moun] kou roun moun ki jis menm si i pa ka fè sa lalwa-a ka di » (Rom. 4:6). Mé i gen ròt chèf rélijyé ki ka di ki pou nou sové, a pou nou fè pèlrinaj é a pou nou fè bon bagaj. Détan, yé ka sèrvi Jacques 2:24 koté nou ka li : « Bondjé pa ké di ki roun moun jis gras a so lafwa rounso, i ké gadé sa i ka fè. »

⁹ Kou pyès moun pa ka tonbé dakò, sèrten èspésyalis Labib-a ka di ki Pòl ké Jak pa té dakò asou valò nou divèt bay nou lafwa ké sa nou ka fè pou montré nou gen lafwa. Dapré yé, Pòl té ka pansé ki a lafwa rounso ki té ka pèrmèt Bondjé di ki roun moun jis, san i pa té bézwen fè pyès bagaj, alòr ki Jak té ka di ki nou blijé fè bagaj pou fè Bondjé plézi. Men sa roun profésèr téoloji di : « Jak pa té ka konprann poukisa Pòl té ka ensisté konsa pou di ki a lafwa rounso ki té ka pèrmèt [roun moun divini jis] é ki i pa té bézwen fè pyès bagaj pou sa. » Mé a Bondjé ki fè ni Jak ni Pòl ékri yé dé lèt (2 Tim. 3:16). Donk, i divèt gen roun mwayen pou nou konprann poukisa sa Pòl ké Jak ka di, diféran. Ki mwayen ? A pou nou gadé vèrsé-ya ki anvan ké apré.

10. Di ki « bagaj » Pòl té ka palé ? (Romains 3:21, 28) (gadé zimaj-a osi).

¹⁰ Di ki « bagaj » Pòl té ka palé annan Romains chapit 3 ké 4 ? Di ‘sa lalwa-a té ka di fè’, sa lé di Lalwa Moyiz Bondjé té bay Israyélit-ya asou montangn Sinayi-a (li Romains 3:21, 28). Aparaman, annan lépòk Pòl, sa té rèd pou roun ran krétyen ki té jwif, asèpté ki yé pa té gen pou swiv Lalwa Moyiz ankò. Donk, Pòl pran èkzanp Abraam pou montré ki si  Bondjé ka di ki roun moun jis, a pa paské i ka fè « sa lalwa-a ka di li fè », mé a paské i gen lafwa annan Bondjé. Sa ka ankourajé nou. Sa ka pèrmèt nou sir ki nou pouvé fè Jéova plézi si nou gen lafwa annan li ké so Pitit.

11. Di ki « bagaj » Jak té ka palé ?

¹¹ É Jak, di ki « bagaj » i té ka palé annan Jacques chapit 2 ? Jak pa té ka palé di ‘sa lalwa-a té ka di fè’. I té ka sonjé sa roun krétyen ka fè annan so lavi touléjou é ki ka montré ki i vréman gen lafwa annan Bondjé. Annou wè dé èkzanp Jak pran pou èspliké sa.

12. Kouman Jak èspliké ki rapòr i gen ant nou lafwa ké sa nou ka fè pou montré nou gen lafwa ? (gadé zimaj-a osi).

¹² Annan so prémyé èkzanp, pou montré ki krétyen-yan pa divèt fè préférans, Jak palé di roun moun ki janti ké roun moun ki rich mé ki ka méprizé roun maléré. I di ki menm si sa moun-an ka di ki i gen lafwa annan Bondjé, sa i ka fè ka montré ki anyen pa la (Jacq. 2:1-5, 9). Annan so dézyèm èkzanp, i palé di roun moun ki ka wè roun frè ouben roun sò ki « pa gen lenj » ni « asé manjé chak jou » mé ki pa ka idé l’. Menm si sa moun-an ka di ki i gen lafwa annan Bondjé, so lafwa pa ka sèrvi anyen paské i pa ka fè anyen pou montré ki i gen lafwa. Kou Jak di l’, « si roun moun pa ka fè anyen pou montré i gen lafwa, so lafwa mouri » (Jacq. 2:14-17).

13. Èkzanp kimoun Jak pran pou montré a kisa ki roun moun ki ka montré ki i gen lafwa ? (Jacques 2:25, 26).

¹³ Jak pran èkzanp Raab pou montré a kisa ki roun moun ki ka montré i gen lafwa (li Jacques 2:25, 26). Raab té tandé  palé di Jéova é i té konprann ki i té ka idé Israyélit-ya (Jos. 2:9-11). Roun jou, i fè roun bagaj pou montré ki i té gen lafwa annan li : i protéjé dé èspyon israyélit ki té an danjé. Gras a sa, Bondjé di ki i té jis, kou Abraam, menm si i pa té parfè é ki i pa té israyélit. So èkzanp ka montré nou ki sa enpòrtan nou fè bagaj pou nou montré ki nou gen lafwa.

14. Poukisa nou pouvé di ki Pòl ké Jak ka tonbé dakò ?

¹⁴ Donk Pòl ké Jak ka palé di lafwa ké sa nou ka fè pou montré nou lafwa, di dé fason diféran. Pòl té ka èspliké krétyen-yan ki té jwif ki a pa paské yé té ka fè sa Lalwa Moyiz té ka di ki yé té ké pouvé fè Bondjé plézi. Jak li menm té ka montré ki sa té enpòrtan pou tout krétyen-yan fè bon bagaj pou ròt-ya pou montré ki yé té gen lafwa.

15. Bay déztrwa bagaj nou pouvé fè pou montré ki nou gen lafwa (gadé zimaj-a osi).

¹⁵ Jéova pa ka di ki pou i wè nou kou roun moun ki jis, nou divèt fè èkzaktéman sa Abraam fè. I gen roun patché bagaj nou pouvé fè pou montré nou gen lafwa. Parèkzanp, nou pouvé byen rousouvwè sa-ya ki ka vini pou prémyé fwa annan nou réinyon, nou pouvé idé nou frè ké sò-ya ki bézwen nou idé yé ouben nou pouvé fè bon bagaj pou nou fanmi. Jéova kontan sa é i ka béni sa (Rom. 15:7 ; 1 Tim. 5:4, 8 ; 1 Jean 3:18). Roun bon fason nou pouvé montré nou gen lafwa, a lò nou ka palé di bon nouvèl-a ké balan (1 Tim. 4:16). Nou tout nou pouvé fè bagaj pou montré ki nou sir ki promès Jéova fè nou ké fèt, é ki a fason i ka aji ki pi bon. Si nou ka fè sa, nou pouvé sir ki  Bondjé ka wè nou kou roun moun ki jis é ki nou sa so zanmi.

16. Ki èspwar Abraam té gen, é kou i kontinyé sonjé sa èspwar-a, kouman sa idé li fè so lafwa rété fò ?

¹⁶ Romains chapit 4 ka montré rounòt lidé enpòrtan nou pouvé anprann gras a èkzanp Abraam : sa enpòrtan pou nou kontinyé sonjé èspwar nou gen-an. Jéova té promèt Abraam ki i té ké divini « papa roun patché nasyon » é ki gras a li i té ké béni sa nasyon-yan. A pa ti bèl èspwar Abraam té gen (Gen. 12:3 ; 15:5 ; 17:4 ; Rom. 4:17). Mé lò i té gen 100 lannen, é Sara 90 lannen, yé patékò gen timoun. Si a té pou nou sèlman, yé pa té ké janmen rivé fè timoun ! Sa pa té fasil pou Abraam, mé « èspwar i té gen-an pèrmèt li gen lafwa ki i té ké divini papa roun patché nasyon » (Rom. 4:18, 19). É finalman, sa i té ka antann réyalizé : Izaak, timoun-an i té ka antann dipi lontan, fèt (Rom. 4:20-22).

17. Kouman nou savé ki Jéova pouvé di ki nou jis é ki nou pouvé divini so zanmi ?

¹⁷ Nou pouvé fè Bondjé plézi, i pouvé di ki nou jis, é nou pouvé sa so zanmi kou Abraam. A sa Pòl montré lò i di : « Lò yé ka di ki Bondjé té ka wè l’ kou roun moun ki té jis, a pa pou [Abraam] rounso yé ka palé, a pou nou osi, nou menm Bondjé ké di ki nou jis, paské nou ka krè annan Sa-la ki résisité Jézi » (Rom. 4:23, 24). Kou Abraam, annou gen lafwa annan Jéova, annou fè bagaj pou montré ki nou gen lafwa, é annou kontinyé sonjé èspwar nou gen-an. Annan Romains chapit 5, Pòl ka kontinyé palé di èspwar nou gen-an. Annan prochen artik-a, nou ké étidyé prémyé vèrsé-ya annan sa chapit-a.