1. Pou roun krétyen, kisa sa lé di « aji kou roun wonm » ?

 ROUN jou, David di so pitit Salomon : « A pou to fò é a pou to aji kou roun wonm » (1 Rois 2:1-3). Jòdla, sa konsèy-a enpòrtan pou tout frè-ya ki lé divini dé krétyen ki djòk. « Aji kou roun wonm », sa lé di obéyi lalwa Bondjé épi apliké prensip-ya ki annan Labib-a annan tout domenn annan nou lavi (Luc 2:52). Si to sa roun jenn frè, poukisa sa enpòrtan pou to menm osi to fè éfòr pou to divini roun krétyen ki djòk ?

2-3. Poukisa sa enpòrtan pou roun jenn frè divini roun krétyen ki djòk ?

² Ki annan fanmi-a, ki annan asanblé-a, mouché-ya gen roun patché rèsponsabilité enpòrtan. Pitèt to ja réfléchi asou ki kalité rèsponsabilité to ké gen pita. Pitèt to ké divini pyonyé, asistan épi pita ansyen ; ouben pitèt to ké gen roun fanmi épi to ké lévé timoun (Éph. 6:4 ; 1 Tim. 3:1). Pou to rivé fè tout sa bagaj-ya, a pou to divini roun krétyen ki djòk b.

³ Pou to divini roun krétyen ki djòk, to ké divèt chaché gen plizyèr kalité. Annou wè sa to pouvé fè pou to préparé to kò pou tout bèl rèsponsabilité to ké pitèt gen pita.

4. Ki bon èkzanp to pouvé imité ? (gadé zimaj-a osi).

⁴ A pou to chwazi bon moun pou imité. Annan Labib-a, nou ka jwenn èkzanp roun patché jennjan nou pouvé imité.  A té dé jennjan ki té kontan Bondjé é ki té gen diféran rèsponsabilité. Annan to fanmi é annan to asanblé osi, to pouvé jwenn èkzanp roun patché frè ki djòk (Héb. 13:7). É pi bon èkzanp to gen-an, a Jézi (1 Pierre 2:21). Pran tan étidyé èkzanp sa mouché-ya épi réfléchi asou bèl kalité yé té gen é ki to kontan (Héb. 12:1, 2). Apré sa, doumandé to kò kouman to pouvé imité yé.

5. Kouman to pouvé anprann « byen réfléchi », é poukisa sa enpòrtan pou roun jennjan ? (Psaume 119:9).

⁵ A pou to anprann « byen réfléchi » (Prov. 3:21). Sa lé di ki to pa ké kouri fè roun bagaj, to ké réfléchi anvan to désidé sa to ké fè. A pou to fè éfòr pou to vin pi fò annan sa domenn-an paské, lò to ka gadé, roun patché jenn ka pran yé désizyon parapòrta sa yé ka pansé ouben parapòrta sa yé ka rousanti (Prov. 7:7 ; 29:11). Épi, pa di ki latélé, rézo sosyal-ya ké Entèrnèt pa ka aji asou to. Donk, kouman to pouvé anprann « byen réfléchi » ? Pou koumansé, anprann byen konnèt prensip-ya ki annan Labib-a, konsa to ké sir ki sa prensip-ya bon pou to. Apré sa, sèrvi sa prensip-ya pou désidé fè bagaj ki ké fè Jéova plézi (li Psaume 119:9). Lò to ké abitchwé fè sa, sa ké idé to bokou pou to divini roun krétyen ki djòk (Prov. 2:11, 12 ; Héb. 5:14). Aprézan, annou wè dé domenn koté to ké bézwen « byen réfléchi » : 1) annan fason to ka aji ké sò-ya épi 2) annan fason to ka abiyé ké penyen.

6. Kouman zafè « byen réfléchi » ké idé to annan fason to ka aji ké sò-ya ?

⁶ Prensip Jéova-ya divèt idé to annan fason to ka wè madanm-yan. Roun jenn krétyen pouvé zanmi ké roun sò. I pa gen pyès problèm ké sa. Mé si i ka « byen réfléchi », i pa ké ni di ni fè pyès bagaj ki ké fè roun sò krè ki i kontan l’, sòf si i lé frékanté sò-a pou i maryé ké l’ (1 Tim. 5:1, 2). É menm si a frékanté i ka frékanté sò-a, i ké toujou fè atansyon pou i pa sali répitasyon sò-a, i ké fè atansyon pou  i toujou gen roun moun ké yé lò yé ka soti ansanm (1 Cor. 6:18).

7. Si to konnèt byen réfléchi, kouman sa ké idé to pou désidé ki lenj to ké mété épi kouman to ké penyen ?

⁷ Annou palé di rounòt domenn koté roun jennjan pouvé montré ki i konnèt byen réfléchi : zafè abiyé ké penyen. Sa-ya ki stylistes pa ka tchenbé kont di prensip Jéova-ya lò yé ka fè lenj. Yé ka fè lenj séré é ki ka fè roun boug sanblé roun fanm. Lò to ka chwazi roun lenj, a pou to pito lésé prensip-ya ki annan Labib-a ké èkzanp frè ké sò-ya annan asanblé-a gidé to. Konsa, to ké montré ki to lé divini roun krétyen ki djòk. Parèkzanp, doumandé to kò : ès sa mo ka mété ouben fason mo ka penyen ka montré ki mo ka byen réfléchi é ki mo ka tchenbé kont di sa ròt-ya ka pansé ? Ès lò moun-yan ka wè kouman mo abiyé, lanmenm yé ka wè ki mo sa roun moun ki ka adoré Bondjé ? (1 Cor. 10:31-33 ; Tite 2:6). Si to ka kontinyé anprann byen réfléchi, to frè ké sò-ya ké rèspèkté to, mé to Papa ki annan syèl-a ké rèspèkté to osi.

8. Kisa to pouvé fè pou frè ké sò-ya annan asanblé-a fè to plis konfyans ?

⁸ A pou to sa roun moun ròt-ya ka fè konfyans. Lò roun jenn frè sa roun moun ròt-ya ka fè konfyans, i ka byen fè tout travay yé ka bay li fè (Luc 16:10). Réfléchi asou èkzanp Jézi ki té parfè. A té roun moun ki té séryé. I byen fè tousa Jéova bay li fè, menm sa ki té pi rèd-a : kou i té kontan so disip ké tout moun-yan, i bay so lavi pou yé (Jean 13:1). Pou to imité Jézi, fè tousa to pouvé pou fè tousa yé ka doumandé to fè. Si to pa savé kouman pou to fè l’, doumandé roun frè ki gen èspéryans idé to. Pa fè jiskont sa yé ka doumandé to. É lò to ka koumansé roun travay, a pou to fini l’ (Rom. 12:11). A pou to toujou fè tout bagaj « pou Jéova, pa pou moun-yan » (Col. 3:23). Épi, i pa gen pyès moun ki parfè. Donk, a pou to rékonnèt to limit, épi a pou to rékonnèt lò to fè roun bagaj ki pa bon (Prov. 11:2).

9. Poukisa roun frè divèt anprann fè sèrten bagaj ki ké idé li annan so lavi touléjou ?

⁹ Roun frè ki djòk ka idé annan asanblé-a, i ka fè éfòr pou i rété byen ké ròt-ya, i ka travay pou i gen sa i bézwen pou viv é pou bay so fanmi sa i bézwen osi. Donk, a pou i konnèt fè sèrten bagaj ki itil. Annou wè trwa bagaj.

10-11. Poukisa to divèt chaché anprann byen li ké ékri ? (Psaume 1: 1-3) (gadé zimaj-a osi).

¹⁰ Anprann byen li ké ékri. Pou nou tchò kontan é pou nou rivé annan nou lavi, a pou nou pran tan li Labib-a épi réfléchi asou l’ chak jou (li Psaume 1:1-3). Si to ka li Labib-a touléjou, to ké konprann fason Jéova ka pansé pi byen é sa  ké idé to apliké tout konsèy i ka bay nou annan to lavi (Prov. 1:3, 4). Si to ka pran labitid fè sa, to ké itil annan asanblé-a.

¹¹ Sa enpòrtan paské to frè ké sò-ya bézwen frè ki pouvé ansényé yé épi bay yé konsèy ki ka vini di Labib-a (Tite 1:9). Si to ka li byen, sa ké pèrmèt to vin vayan annan zafè fè diskour ké bay répons. Ni diskour to ké fè, ni répons to ké bay ké idé ròt-ya, é sa ké fè yé lafwa vin pi fò. A pou to éséyé vin pi vayan annan zafè ékri osi. Konsa, lò to ké étidyé to rounso é lò to ké annan réinyon-yan ké gran asanblé-ya to ké pouvé marké déztrwa bagaj ki ké idé to. Si to ka fè sa, to lafwa ké vin pi fò é sa to ké marké ké pitèt idé ròt-ya osi.

12. Kouman to pouvé anprann byen kouté épi palé jantiman ?

¹² A pou to anprann kouman pou to byen kouté épi palé jantiman. Roun frè divèt anprann byen kouté épi palé jantiman. Sa lé di ki lò i ka palé ké roun moun, i divèt byen kouté l’ épi konprann fason i ka pansé ké sa i ka rousanti (Prov. 20:5). Sa lé di osi ki i ka tchenbé kont di fason moun-an ka palé, fason i ka fè ké so kò, kouman i ka fè ké so vizaj ké jès i ka fè. To pa pouvé fè sa lò to ka voyé roun mésaj, roun imèl ouben roun bagaj konsa. Sa enpòrtan pou moun-an la douvan to. Donk, fè tousa to pouvé pou to palé ké moun-yan an fas (2 Jean 12).

13. Kouman to pouvé anprann ganyen soumaké pou gen sa to bézwen ? (1 Timothée 5:8) (gadé zimaj-a osi).

¹³ A pou to anprann ganyen soumaké pou gen sa to bézwen. Roun krétyen ki djòk divèt travay pou gen sa i bézwen épi pou bay so fanmi sa i bézwen osi (li 1 Timothée 5:8). Annan sèrten koté, jennjan-yan ka anprann métyé yé papa ouben rounòt moun annan fanmi-a. Ròt koté, yé ka anprann roun métyé lékòl. Sa toujou enpòrtan pou roun jennjan anprann fè roun bagaj ki ké pèrmèt li trapé roun travay (Actes 18:2, 3 ; 20:34 ; Éph. 4:28). A pou to travay rèd é a pou to fè éfòr pou to fini sa to ka koumansé, konsa ròt-ya ké wè ki yé pouvé fè to konfyans é yé ké lé fè to konfyans. Si to ka fè sa, sa ké pi fasil pou to trapé roun travay é pou to gardé l’. Aprézan, nou ké wè ki sa nou fin palé-a ké sèrvi to lò to ké gen ròt rèsponsabilité roun jou.

14. Kouman to pouvé préparé to kò pou to sèrvi Jéova a plen tan ?

¹⁴ Sèrvi Jéova a plen tan. Lò roun jennjan ka pran sèrvis pyonyé-a, i ka anprann roun patché bagaj. Roun patché frè ki djòk é ki gen èspéryans jòdla pran sèrvis pyonyé-a lò yé té jenn toujou. Lò nou pyonyé, nou divèt adapté nou kò paské nou divèt fè ké roun patché moun ki diféran. Nou ka anprann jéré nou soumaké osi épi pa gaspiyé l’ (Phil. 4:11-13). Roun patché pyonyé pèrmanan koumansé ké sèrvis pyonyé òksilyèr-a pannan roun tan. É roun ran annan yé divini sèrvitèr annan konstriksyon-an, ouben bétélit apré. Donk si to ka divini pyonyé òksilyèr, apré sa pitèt yé ké pouvé envité to pou ròt kalité sèrvis ankò.

15-16. Kisa roun jenn frè ki lé fè plis bagaj annan so asanblé pouvé fè ?

¹⁵ Divini asistan ouben ansyen. Labib-a ka di ki sa-la ki « anvi » divini ansyen, « a roun bèl bagaj i lé fè » (1 Tim. 3:1). Anvan roun frè divini ansyen, a pou i divini asistan. Asistan-yan ka travay ké ansyen-yan annan roun patché domenn. Yé tout ka sèrvi yé frè ké sò-ya ké imilité é yé tout ka préché ké balan. Roun jenn frè pouvé divini asistan menm si i gen ant 17 ké 19 lannen. É si i ka kontinyé fè progrè, i pouvé divini ansyen roun ti moso tan apré i pran so 20 lannen.

¹⁶ Ès to pouvé sèrvi to frè ké sò-ya ? Labib-a ka byen montré ki kalité roun asistan ouben roun ansyen divèt gen. Yé tout ka maché ansanm ké lanmou : lanmou pou Jéova, pou so fanmi ké pou frè ké sò-ya annan asanblé-a (1 Tim. 3:1-13 ; Tite 1:6-9 ; 1 Pierre 5:2, 3). Pran tan étidyé tout sa kalité-ya épi priyè Jéova pou i idé to gen sa kalité-ya c.

17. Kisa to pouvé fè dipi aprézan pou to divini roun bon chèf fanmi dimen ? (gadé zimaj-a osi).

¹⁷ Divini roun chèf fanmi. Roun frè ki djòk pouvé désidé rété li rounso (Mat. 19:12). Parkont, sa-la ki ka maryé ka asèpté rounòt rèsponsabilité : i ké dirijé roun fanmi (1 Cor. 11:3). Roun bon mari divèt kontan so madanm, bay li sa i bézwen pou viv, i divèt sa so pi bon zanmi é i divèt idé li rété pròch ké Bondjé (Éph. 5:28, 29). Si to ka maryé roun jou, tousa  nou wè annan sa artik-a ké idé to sa roun bon mari ké roun bon chèf fanmi. Zafè konnèt byen réfléchi, rèspèkté madanm-yan, sa roun moun ròt-ya ka fè konfyans, a dé bagaj ki enpòrtan pou roun moun ki maryé.

18. Kisa roun jennjan pouvé fè pou i préparé so kò pou jou-a i ké gen timoun ?

¹⁸ Lévé timoun. É si to ka vin gen timoun roun jou, to lé sa roun bon papa. Kisa Jéova pouvé anprann to annan sa domenn-an ? Roun patché bagaj (Éph. 6:4). Parèkzanp, Jézi tandé so Papa di li ki i té kontan l’ é ki i té fyèr di li (Mat. 3:17). Wi, roun bon papa pa pè di so timoun ki i kontan l’ é i ka félisité l’ chak fwa i ka fè roun bon bagaj. Imité Jéova, sa lé di osi fè tousa nou pouvé pou idé nou tiboug ouben nou tifi divini roun krétyen ki djòk. Si to lé divini roun bon mouché maryé ouben roun bon papa, a pou to fè to fanmi ké frè ké sò-ya annan asanblé-a santi ki yé gen valò pou to. Montré yé ki to kontan yé é félisité yé pou sa yé ka fè (Jean 15:9). Si to ka fè sa, to ké gen bokou valò pou Jéova, pou to fanmi é pou to frè ké sò-ya.

19-20. Kouman jenn frè-ya pouvé divini dé krétyen ki djòk ? (gadé zimaj-a anlè prémyé paj-a).

¹⁹ Kou to wè l’, to pa ké divini roun krétyen ki djòk toubonnman konsa. Donk, chwazi bon èkzanp pou imité, anprann byen réfléchi, divini roun moun ròt-ya pouvé fè konfyans, anprann fè bagaj ki ké pèrmèt to trapé roun travay épi préparé to kò pou rèsponsabilité to ké gen pita.

²⁰ Lò to ka gadé tousa nou wè annan sa artik-a, pitèt to ka di, awa, i gen tròp bagaj pou fè. Mé pa enkyété to kò, to pouvé rivé ! Jéova lé idé to (Is. 41:10, 13). É to frè ké sò-ya annan to asanblé osi. Lò to ké divini wonm-an Jéova lé to divini, to lavi ké bèl toubonnman é to tchò ké kontan. Nou jenn frè-ya, nou kontan zòt ! A pou Jéova béni tout éfòr zòt ka fè pou zòt divini dé krétyen ki djòk (Prov. 22:4).