1. Kisa nou divèt fè pou nou divini dé krétyen ki djòk ?

 NOU étoné lò nou ka gadé kouman roun timoun ka grandi vit. A kousidiré sa ka fèt tousèl san i pa fè pyès éfòr (1 Cor. 13:11 ; Héb. 6:1). Mé si nou lé divini roun krétyen ki djòk b, nou blijé fè éfòr. Pou nou rivé fè sa, nou divèt gen roun lanmityé ké Jéova ki fò. Nou bézwen so lèspri sen osi pou nou gen bèl kalité i kontan, pou nou anprann fè bagaj ki itil épi pou nou préparé nou kò pou rèsponsabilité nou ké pouvé gen pita (Prov. 1:5).

2. Kisa Genèse 1:27 ka anprann nou, é kisa nou ké wè annan sa artik-a ?

² A Jéova ki fè wonm-yan ké fanm-yan (li Genèse 1:27). Nou byen savé ki roun fanm a pa roun wonm, yé pa gen menm kò-a. Mé i gen ròt bagaj ankò ka fè ki yé diféran. Parèkzanp, Jéova fè wonm-yan ké fanm-yan pou yé gen rèsponsabilité ki diféran. Donk, yé bézwen gen sèrten kalité é yé bézwen konnèt fè sèrten bagaj pou yé chak okipé di yépa rèsponsabilité (Gen. 2:18). Annan sa artik-a, nou ké wè sa roun jenn sò pouvé fè pou i divini roun krétyen ki djòk. Annan ròt artik-a, nou ké wè kisa jenn frè-ya pouvé fè.

3-4. Koté jenn sò-ya pouvé jwenn bon èkzanp pou imité ? (gadé zimaj-a osi).

³ Labib-a ka palé di roun patché madanm ki té kontan Jéova é ki té ka adoré l’ (gadé artik-a « Les femmes dans la  Bible : que pouvons-nous apprendre d’elles ? », asou jw.org). Kou vèrsé-a ki o koumansman sa artik-a ka di, yé té ‘rézonab annan sa yé té gen labitid fè’ é yé té « fidèl annan tout bagaj ». Anplis di sa, annan yé asanblé, sò-ya pouvé jwenn èkzanp madanm ki vréman kontan Jéova é ki pouvé anprann yé roun patché bagaj.

⁴ Jenn sò, ès zòt ka wè dé sò annan asanblé-a ki ka bay roun bon èkzanp é ki zòt pouvé imité ? Gadé ki bèl kalité yé gen. Épi réfléchi asou fason zòt pouvé montré sa menm kalité-ya. Annan paragraf-ya ki ka vin dèyè, nou ké wè trwa kalité enpòrtan sò-ya divèt gen.

5. Poukisa imilité-a, a roun kalité ki enpòrtan pou roun sò ?

⁵ Pou nou divini roun krétyen ki djòk, nou bézwen gen imilité. Si roun madanm gen imilité, i ké gen roun bèl lanmityé ké Jéova épi i ké byen ké ròt-ya osi (Jacq. 4:6). Kou i kontan so Papa ki annan syèl-a, a ké imilité i ka asèpté prensip otorité i mété-a (1 Cor. 11:3). Ki annan so fanmi, ki annan asanblé-a, i ka rèspèkté sa prensip-a c.

6. Kisa èkzanp Rébéka pouvé anprann nou asou zafè gen imilité ?

⁶ Annou palé di Rébéka. A té roun madanm ki té entélijan é pannan tout so lavi, i pran désizyon ké kouraj é i té savé kisa pou i té fè é kitan (Gen. 24:58 ; 27:5-17). Mé i pa té ka dérèspèkté pyès moun é i té ka asèpté fè sa yé té ka di l’ fè (Gen. 24:17, 18, 65). Kou Rébéka, si to ka soutni ké imilité désizyon Jéova ka pran, to ké sa roun bon èkzanp pou tout moun annan to fanmi ké annan to asanblé.

7. Kouman jenn sò-ya pouvé imité Èstèr ki té ka rékonnèt so limit ?

⁷ Pou yé divini dé krétyen ki djòk, tout krétyen-yan divèt rékonnèt yé limit osi. Labib-a ka di ki « a moun-yan ki konnèt yé  limit ki gen sajès » (Prov. 11:2). Èstèr té ka rékonnèt so limit é i té ka adoré Bondjé ké fidélité. Paské i té ka rékonnèt so limit, i pa koumansé krè so kò lò i divini renn. I kouté konsèy so gran kouzen Mardoché bay li (Est. 2:10, 20, 22). To pouvé montré sa menm bèl kalité-a si to ka doumandé ròt-ya konsèy é si to ka kouté yé (Tite 2:3-5).

8. Dapré 1 Timothée 2:9, 10, kouman modèsti-a pouvé idé roun sò byen chwazi fason i ké abiyé é fason i ké ranjé so kò anvan i soti ?

⁸ Èstèr montré ki i té ka rékonnèt so limit rounòt fason ankò. Menm si i té gen « roun bèl ti kò é i té jòlòt toubonnman », i pa éséyé fè so kò rémarké (Est. 2:7, 15). Si to sa roun jenn sò, kouman to pouvé imité l’ ? Nou gen roun èkzanp annan 1 Timothée 2:9, 10 koté Pòl ka di madanm-yan abiyé roun fason ki ka montré ki yé ka rèspèkté Bondjé (li). Mo grèk-a i ka sèrvi, ka montré ki roun madanm divèt toujou abiyé roun fason ki korèk é ki i divèt tchenbé kont di sa ròt-ya ka pansé lò i ka désidé kouman i ké abiyé. Nou fyèr di nou sò ki ka swiv sa konsèy-a.

9. Kisa èkzanp Abigayil pouvé anprann nou ?

⁹ Discernement-an, a rounòt kalité tout sò-ya divèt chaché gen pou yé divini dé krétyen ki djòk. A kisa ki discernement-an ? A lò to konnèt fè diférans ant sa ki bon ké sa ki mové é lò to ka chwazi fè sa ki bon. Annou pran èkzanp Abigayil. So mari pran roun mové désizyon ki té ké pouvé mennen malò pou tout moun annan so kaz. Abigayil réyaji lanmenm. Kou i té gen discernement, sa pèrmèt roun patché moun sové (1 Sam. 25:14-23, 32-35). Lò to gen discernement, to savé kitan a pou to palé é kitan a pou to pa di anyen, é sa ka idé to gadé pou ròt-ya san to pa fè fouyaya pou pa mété yé mal alèz (1 Thess. 4:11).

10-11. Si to konnèt byen li ké ékri, kouman sa pouvé idé to ké ròt-ya ? (gadé zimaj-a osi).

¹⁰ Roun jenn sò divèt konnèt fè bagaj ki itil. Sèrten bagaj roun tifi ka anprann fè lò i piti ké idé l’ pannan tout so lavi. Annou pran déztrwa èkzanp.

¹¹ Anprann byen li ké ékri. Annan sèrten péyi, moun ka pansé ki roun madanm pa bézwen anprann li ké ékri. Mé pou roun krétyen, sa bagaj-ya enpòrtan d (1 Tim. 4:13). Donk, menm si sa rèd, kontinyé éséyé anprann byen li ké ékri. Kisa sa ké mennen pou to ? Sa pouvé idé to pou to  trapé roun travay épi gardé l’. Épi osi sa ké pi fasil pou to étidyé Labib-a épi ansényé ròt-ya. É sa ki pi bèl-a, a ki kou to ké li Labib-a é to ké pran tan réfléchi asou l’, to ké vin pi pròch di Jéova (Jos. 1:8 ; 1 Tim. 4:15).

12. Kisa Proverbes 31:26 ka anprann to ?

¹² Anprann kouman pou to byen kouté é pou to palé jantiman. Sa enpòrtan pou krétyen-yan fè sa. Parapòrta sa, disip Jak ka bay nou roun bon konsèy. I ka di : « Chak moun toujou divèt paré pou kouté, pa présé palé » (Jacq. 1:19). Lò to ka byen kouté lò roun moun ka palé, to ka montré ki to ka « pran [so] lapenn » (1 Pierre 3:8). Si to pa sir ki to konprann sa roun moun di ouben sa i ka rousanti, doumandé li plizyèr késyon to byen chwazi épi pran roun ti tan pou réfléchi anvan to palé (Prov. 15:28, nòt). Doumandé to kò : « Ès sa mo ké di aprézan vré, é ès sa ké ankourajé moun-an ? Ès sa ké montré ki mo ka rèspèkté moun-an é ès a roun bagaj ki janti ? » Pran èkzanp asou sò-ya ki konnèt byen kouté ké palé jantiman (li Proverbes 31:26). Byen kouté kouman yé ka palé. Si to ka anprann fè sa bagaj-ya, sa ké pi fasil pou to gen zanmi é pou to rété byen ké yé.

13. Kouman to pouvé anprann okipé di roun kaz ? (gadé zimaj-a osi).

¹³ Anprann okipé di roun kaz. Annan roun patché péyi, a madanm-yan ki ka fè près tout travay-a annan kaz-a. To manman ouben rounòt sò ki gen èspéryans pouvé idé to fè sa travay-a byen. Roun sò yé ka aplé Cindy ka di : « Roun annan pi bèl bagaj mo manman anprann mo, a ki lò to ka travay rèd, to tchò kontan. I anprann mo fè manjé, nétwayé kaz-a, koud épi fè komisyon. Gras a sa, mo lavi té pi fasil épi sa pèrmèt mo fè plis bagaj annan mo sèrvis pou Jéova. Manman montré mo osi kouman byen rousouvwè ròt-ya é sa pèrmèt mo kontré ké roun patché frè ké sò ki té sa dé bon èkzanp pou imité » (Prov. 31:15, 21, 22). Lò roun madanm ka travay rèd, lò i konnèt rousouvwè moun é lò i konnèt kouman pou okipé di roun kaz, i sa roun bénédiksyon pou so fanmi ké so asanblé (Prov. 31:13, 17, 27 ; Actes 16:15).

14. Kisa èkzanp Crystal ka anprann to é asou kisa to divèt mété to lidé ?

¹⁴ Anprann fè bagaj to menm. Sa enpòrtan pou tout krétyen-yan anprann fè sa (Phil. 4:11). Roun sò yé ka aplé Crystal ka di : « Mo papa ké mo manman idé mo chwazi sa mo té ké fè lékòl. Lò mo té o lisé, yé ankourajé mo fè roun fòrmasyon ki té ké pèrmèt mo trapé roun travay fasilman. Mo papa ankourajé mo fè kontabilité, é sa idé mo bokou. » Anplis di anprann ganyen soumaké, a pou to  anprann byen sèrvi sa soumaké-a pou to pa dépansé plis ki sa to gen (Prov. 31:16, 18). Si to kontan ké sa to gen é to pa ka achté bagaj to pa pouvé péyé, to ké disponib pou fè plis pou Jéova (1 Tim. 6:8).

15-16. Poukisa sò-ya ki pa maryé gen bokou valò ? (Marc 10:29, 30).

¹⁵ Si to ka chaché gen bèl kalité Jéova kontan é si to ka anprann fè bagaj ki itil, sa ké idé to pou tout rèsponsabilité to ké pouvé gen pita. Annou wè plizyèr bagaj to pouvé désidé fè.

¹⁶ To pouvé désidé pa maryé pannan roun tan. Kou Jézi di, i gen roun ran sò ki ka désidé pa maryé menm si annan yé kiltir, moun-yan ka trouvé sa drol (Mat. 19:10-12). Ròt madanm pouvé rété san yé maryé pou ròt rézon ankò. To pouvé sir ki Jéova ké Jézi pa ka pansé ki to gen mwens valò paské to pa maryé. Asou tout latè-a, sò-ya ki pa maryé ka bay roun bèl èkzanp annan yé asanblé. Yé kontan ròt-ya é yé ka pran swen di yé. A pou sa, yé ka divini kou dé sò ké dé manman pou yé (li Marc 10:29, 30 ; 1 Tim. 5:2).

17. Kouman roun jenn sò pouvé préparé so kò dipi aprézan pou pran sèrvis a plen tan-an ?

¹⁷ To pouvé désidé pran sèrvis a plen tan-an. A sò-ya ki ka fè plis bagaj annan travay prédikasyon-an asou tout latè-a (Ps. 68:11). Ès to pouvé òrganizé to kò pou to pran sèrvis a plen tan-an dipi aprézan ? To pouvé divini pyonyé, volontèr pou konstriksyon-an ouben bétélit. Priyè Jéova pou to òbjèktif. Palé ké sa-ya ki rivé fè sa é chaché savé sa to divèt fè pou divini sèrvitèr a plen tan. Apré sa, réfléchi asou sa ki ké idé to rivé fè l’. Si to ka pran sèrvis a plen tan-an, to tchò ké kontan toubonnman.

18. Poukisa roun sò divèt byen chwazi so mari ? (gadé zimaj-a osi).

¹⁸ To pouvé désidé maryé. Tout bèl kalité nou fin wè ké idé to divini roun bon madanm. Si to ka réfléchi pou to maryé, a pou to byen chwazi to mari. A roun annan désizyon ki pi enpòrtan to ké pran annan to lavi. Sonjé ki lò to ké maryé, mouché-a ké divini to chèf (Rom. 7:2 ; Éph. 5:23, 33). Donk, doumandé to kò : « Ès i ka éséyé réfléchi ké aji kou Jézi ? Ès i ka mété Jéova an prémyé annan so lavi ? Ès i ka pran bon désizyon ? Ès i ka rékonnèt  lò i fè roun bagaj ki pa bon ? Ès i ka rèspèkté madanm-yan ? Ès i ké pouvé idé mo rété pròch ké Jéova ? Ès i ké pouvé bay mo sa bézwen pou viv ? Ès i ké pouvé sa roun bon zanmi pou mo ? Ès i ka byen okipé di so rèsponsabilité ? Parèkzanp, annan asanblé-a, kisa i gen pou fè é kouman i ka fè l’ ? » (Luc 16:10 ; 1 Tim. 5:8). Asiré pa pitèt, si to lé trouvé roun bon mari, a pou to sa roun bon madanm.

19. Poukisa roun madanm pouvé kontan lò Labib-a ka di ki i ka « idé » so mari ?

¹⁹ Labib-a ka di ki roun bon madanm la pou « idé » so mari é i ka « alé byen ké l’ » (Gen. 2:18). Ès sa lé di i gen mwens valò ? Non ! A roun lònò pou roun madanm lò i ka idé so mari. Anfèt, Labib-a ka di ki Jéova li menm ka « idé » nou (Ex. 18:4). Roun madanm ka idé so mari lò i ka soutni l’. Parèkzanp, lò mari-a ka pran désizyon pou fanmi-a, madanm-an ka travay ansanm ké li pou fè tout bagaj maché. É kou i kontan Jéova, i ka travay pou idé ròt-ya wè bèl kalité so mari gen (Prov. 31:11, 12 ; 1 Tim. 3:11). To pouvé préparé pou sa rèsponsabilité-a si to ka fè to lanmou pou Bondjé vin pi fò é si to ka idé ròt-ya annan to kaz é annan asanblé-a.

20. Ki bon bagaj roun manman pouvé fè pou so fanmi ?

²⁰ To pouvé gen timoun. Si to ka maryé, pitèt to ké to mari zòt ké gen timoun (Ps. 127:3). Donk, sa byen si to ka réfléchi asou kouman to pouvé sa roun bon manman. Bèl kalité nou wè annan sa artik-a ké idé to si to ka vin gen timoun. Si to ka montré to lanmou, si to janti, é si to gen pasyans, i ké gen roun bèl ti anbyans annan to fanmi. É to timoun ké santi ki yé an sékirité é ki to kontan yé (Prov. 24:3).

21. Kisa to ka pansé di nou sò-ya é poukisa ? (gadé zimaj-a anlè prémyé paj-a).

²¹ Nou sò-ya, nou kontan zòt pou tousa zòt ka fè pou Jéova ké so pèp (Héb. 6:10). Zòt ka travay rèd pou zòt gen bèl kalité èspirityèl é pou zòt rivé fè bagaj pou zòt lavi ké lavi ròt-ya pi bèl. Épi zòt ka préparé pou rèsponsabilité zòt ké pitèt gen pita. Zòt gen bokou valò annan òrganizasyon Jéova-a !