1. Ki enpòrtans dipen-an té gen annan lépòk Labib ?

 ANNAN lépòk Labib, lò moun-yan té ka manjé, près tout tan i té gen dipen (Gen. 14:18 ; Luc 4:4). Sa té tèlman enpòrtan ki détan, lò Labib ka palé di manjé, i ka di « dipen » (Mat. 6:11 ; Actes 20:7). Anplis di sa, Jézi sèrvi dipen annan dé mirak i fè é ki bokou moun konnèt (Mat. 16:9, 10). Jean chapit 6 ka palé di roun annan sa mirak-ya. Nou ké étidyé sa mirak-a é nou ké wè sa nou pouvé anprann.

2. Annan ki okazyon roun patché moun té bézwen manjé ?

² Apot Jézi fin préché é yé byen las. Atò, yé ka pran roun bato ké Jézi pou alé ròt bò lanmè Galilé (Marc 6:7, 30-32 ; Luc 9:10). Yé ka rivé Bètsayid, roun koté moun pa gen labitid alé. Mé roun patché moun té ja la ka antann Jézi. Jézi pa ka fè kousidiré yé pa la. Jantiman, i ka pran tan ansényé yé épi géri sa ki malad. Kou soukou ka tonbé, disip-ya ka doumandé yé kò kouman tout sa moun-yan ké fè pou trapé roun bagaj pou yé manjé. Pitèt sèrten annan yé gen déztrwa bagaj, mé près yé tout divèt alé annan vilaj-ya pou achté manjé (Mat. 14:15 ; Jean 6:4, 5). Kisa Jézi ké fè ?

JÉZI KA FÈ ROUN MIRAK POU BAY MOUN DIPEN POU YÉ MANJÉ

3. Kisa Jézi di apot-ya fè ? (gadé zimaj-a osi).

³ Jézi di so apot : « Yé pa bézwen alé. Bay yé manjé zòt menm » (Mat. 14:16). Mé a pa dé moun rounso i té  gen. I té gen 5 000 wonm, san konté madanm ké timoun. Atò, i dèt té gen 15 000 moun pou bay manjé ! (Mat. 14:21). André ka di : « I gen roun ti bolonm ki gen senk dipen fèt ké lòrj ké dé ti poson. Mé a pa anyen pou sa patché moun-yan ! » (Jean 6:9). Moun-yan té gen labitid manjé dipen fèt ké lòrj. A té manjé moun maléré. É ti poson-yan, a té dèt poson salé. Mé kantité manjé sa tibolonm-an té ganyen pa té ké janmen asé pou bay tout sa moun-yan manjé.

4. Kisa Jean 6:11-13 ka anprann nou ? (gadé zimaj-ya osi).

⁴ Kou Jézi té lé byen rousouvwè sa moun-yan, i doumandé yé fè plizyèr group épi asiz atè asou radyé-ya (Marc 6:39, 40 ; li Jean 6:11-13). Nou ka li ki Jézi ka di so Papa mèrsi pou dipen-yan ké poson-yan. Lò i fè sa, i montré ki a Bondjé ki té bay yé sa manjé-a é ki i té gen rékonésans pou sa. A roun bon èkzanp pou nou : annou pa jen bliyé priyè anvan nou manjé, ki nou tousèl, ki nou ké ròt moun. Apré sa, Jézi ka fè so disip bay moun-yan manjé é yé tout ka manjé plen yé vant. I jis ka rété manjé. Kou i pa té lé gaspiyé sa manjé-a, Jézi di so disip ranmasé sa ki té ka rété. Men roun bèl èkzanp ! Annou pa gaspiyé sa nou gen. Si to gen timoun, to pouvé sèrvi sa istwè-a pou anprann yé poukisa sa enpòrtan priyè anvan yé manjé, byen rousouvwè ròt-ya épi kontan bay.

5. Kisa moun-yan té lé fè lò yé wè mirak Jézi sa jou-a, mé kouman Jézi réyaji ?

 ⁵ Lò moun-yan ka wè kouman Jézi ka ansényé épi ka fè mirak, yé ka rété èstébékwé. Kou Moyiz té di ki Jéova té ké fè roun gran profèt vini, pitèt yé ka doumandé yé kò : « Sa profèt-a, ès a pa Jézi ? » (Deut. 18:15-18). Yé dèt té ka pansé ki Jézi té ké pouvé sa roun gran chèf, ki i té ké pouvé bay tout nasyon Israyèl dipen pou i manjé ! A pou sa, yé té lé « tchenbé l’ pou fè li divini rwa » (Jean 6:14, 15). Si Jézi té lésé yé tchenbé l’, i té ké pran parti pou Jwif-ya ki té anba dominasyon Romen-yan. Ès a sa i fè ? Awa. Labib ka di ki i pa fè ni roun ni dé, i « viré asou montangn-an ». Magré présyon yé té ka mété asou li, i pa mélé annan zafè lapolitik. Men rounòt bèl èkzanp pou nou !

6. Kouman nou pouvé imité èkzanp Jézi ? (gadé zimaj-a osi).

⁶ Pyès moun pa ké doumandé nou fè roun mirak pou bay moun manjé ouben pou géri moun é yé pa ké doumandé nou divini roun chèf politik. Parkont, roun ran pouvé pousé nou pran parti annan lapolitik. Parèkzanp, yé pouvé pousé nou montré ki nou ka soutni roun moun ouben voté pou li, pas dapré yé, sa moun-an ké pouvé fè roun bagaj. Mé fason Jézi  aji té klè. I pa jen asèpté mélé so kò annan lapolitik. I jis di : « Mo rwayonm pa annan sa monn-an » (Jean 17:14 ; 18:36). Jòdla, krétyen-yan ka imité fason i té ka réfléchi ké aji : yé ka préché Rwayonm-an, yé ka soutni l’, é yé ka priyè pou i vini (Mat. 6:10). Aprézan, annou wè ki ròt bagaj mirak Jézi fè pou bay moun manjé ka anprann nou.

« SA MIRAK KÉ DIPEN-YAN TÉ LÉ DI »

7. Kisa Jézi ka fè, é kouman apot-ya ka réyaji ? (Jean 6:16-20).

⁷ Lò Jézi fin bay moun manjé, i ka lésé so disip pran roun bato pou yé viré Kafarnaòm é, li menm, i k’alé asou roun montangn pas moun-yan lé fè l’ divini rwa (li Jean 6:16-20). Toupannan apot-ya asou lanmè, roun gro tanpèt ka lévé, ké gro vag. Jézi ka vin jwenn yé. I ka maché asou dlo-a, é i ka envité apot Pyèr maché asou dlo-a li menm osi (Mat. 14:22-31). Lò Jézi ka monté asou bato-a, tanpèt-a ka arété. Disip-ya ka rété ababa, yé ka di : « To sa Pitit Bondjé vré a » (Mat. 14:33). Yé pa ka konprann sa sa mirak-a gen ka wè ké sa ki pasé pi bònò. Mark ka di : « [Apot-ya] rété ababa. Yé pa té konprann sa mirak ké dipen-yan té lé di. Yé té ka pran tan pou konprann » (Marc 6:50-52). Apot-ya pa ka konprann kantité pwisans Jéova bay Jézi pou i fè mirak. Roun tibi tan apré sa, Jézi ké viré palé di mirak i fè pou bay moun manjé pou anprann yé rounòt bagaj.

8-9. Poukisa moun-yan alé dèyè Jézi ? (Jean 6:26, 27).

⁸ Landimen-an, moun-yan ka routounen koté Jézi té bay yé manjé, mé Jézi ké so apot pa la. Donk, yé ka monté asou plizyèr bato é yé k’alé dèyè Jézi jik Kafarnaòm (Jean 6:22-24). Ès yé ka fè sa pou anprann plis bagaj asou Rwayonm-an ? Awa. Sèl bagaj yé lé, a ki Jézi bay yé plis dipen pou yé manjé. Kouman nou savé sa ?

⁹ Gadé sa ki rivé lò moun-yan jwenn Jézi bò d’ Kafarnaòm. I di yé san katakata ki yé té vin wè l’ sèlman paské yé té lé manjé. I di yé ki ‘yé té manjé sa dipen-yan é ki yé vant té plen’ ké « manjé-a ki ka gaté ». Apré sa, i ankourajé yé « travay pou manjé-a ki la pou tout-tan » (li Jean 6:26, 27). Pita, i di ki a té so Papa ki té ké bay yé sa kalité manjé-a. Pitèt yé rété étoné lò yé tandé ki roun manjé té pouvé bay yé lavi pou tout-tan ! Ki kalité manjé té ké pouvé fè sa bay yé, é kouman yé té ké pouvé trapé sa kalité manjé-a ?

10. Kisa moun-yan té divèt konprann asou « sa Bondjé lé » ?

¹⁰ Dapré sa nou ka konprann, sa Jwif-ya té lé savé sa yé té divèt fè pou gen sa kalité manjé-a. Pitèt yé té ka pansé ki yé té divèt fè sa lalwa Moyiz té ka di. Mé Jézi di yé : « Men sa Bondjé lé : i lé zòt montré ki zòt gen lafwa annan sa-la i voyé-a » (Jean 6:28, 29). Pou nou « gen lavi pou tout-tan », nou blijé montré ki nou gen lafwa annan sa-la ki ka réprézanté Bondjé. A pa té prémyé fwa Jézi té ka di sa (Jean 3:16-18, 36). É pita, i ké di plis bagaj ankò asou sa  nou divèt fè pou gen lavi pou tout-tan (Jean 17:3).

11. Kisa ka montré ki sèl bagaj Jwif-ya té lé, a té manjé ? (Psaume 78:24, 25).

¹¹ Sa Jwif-ya pa té krè ki yé té divèt montré ki yé té gen lafwa annan Jézi. Yé doumandé l’ : « Ki kalité mirak to ka fè ? Konsa, nou ké wè é nou ké pouvé krè to » (Jean 6:30). Yé di ki pannan lépòk Moyiz, Bondjé té bay yé gangan lamann ki té kou dipen (Néh. 9:15 ; Jean 6:31 ; li Psaume 78:24, 25). Dapré sa nou ka wè, sèl bagaj yé té lé, a té roun bagaj pou yé manjé. Yé pa menm doumandé Jézi èspliké yé sa i té lé di lò i palé di « vré dipen-an ki ka vini di syèl-a », ki té kou lamann ki té soti di syèl-a é ki té pèrmèt yé gangan rété vivan (Jean 6:32). Kou sèl bagaj yé té lé, a té plen yé vant, yé pa kouté Jézi ki té ka éséyé anprann yé kouman yé té pouvé ganyen lavi pou tout-tan. Kisa sa ka anprann nou ?

SA KI PI ENPÒRTAN POU NOU

12. Kouman Jézi montré sa ki pi enpòrtan ?

¹² Men roun bagaj enpòrtan Jean chapit 6 ka anprann nou : sa ki divèt pi enpòrtan pou nou, a obéyi Bondjé é gen roun lanmityé ki fò ké li. A sa prensip-a Jézi bay lò i pa asèpté fè sa Satan té doumandé l’ fè (Mat. 4:3, 4). É annan Diskour i fè asou montangn-an, i byen montré nou kouman sa enpòrtan gen roun lanmityé ké Jéova ki fò (Mat. 5:3). Donk, annou doumandé nou kò : « Ès annan fason mo ka viv, mo ka montré ki sa ki pi enpòrtan pou mo, a fè sa ki fo pou mo gen roun lanmityé ké Jéova ki fò pasé mo fè mo kò plézi ? »

13. a) Poukisa kontan manjé, a pa roun mové bagaj ? b) Kisa Pòl di pou avèrti nou ? (1 Corinthiens 10:6, 7, 11).

¹³ Nou pouvé priyè pou nou gen sa nou bézwen pou viv, é pran plézi annan sa bagaj-ya. A pa roun mové bagaj (Luc 11:3). Lò nou ka travay rèd pou ‘manjé ké bwè’, nou tchò kontan. Sa lajwa-a « ka vini di lanmen vré Bondjé-a » (Eccl. 2:24 ; 8:15 ; Jacq. 1:17). Mé a pou nou lésé sa bagaj-ya a yé plas. A sa apot Pòl byen montré lò i ékri pou krétyen-yan ki té la anvan yé krazé Jérizalèm ké tanp-a. I palé di sa ki té rivé Israyélit-ya bò d’ montangn Sinayi-a. I di yé ki ‘yé pa té divèt fè kou [Israyélit-ya], yé pa té divèt anvi fè bagaj ki pa té bon’ (li 1 Corinthiens 10:6, 7, 11). Jéova té fè roun mirak pou bay Israyélit-ya manjé. Mé kou yé té voras pasé kisa, sa manjé-a divini roun ‘bagaj ki pa té bon’ ! (Nomb. 11:4-6, 31-34). É lò yé adoré ti béf-a ki té fèt ké lò, a yenki bwè, manjé ké anmizé yé sonjé (Ex. 32:4-6). Pòl pran sa èkzanp-ya pou avèrti krétyen-yan annan 1^é syèk-a pas, an 70 di nou lépòk, yé té ké détrwi Jérizalèm ké tanp-a. Jòdla, kou lafen sa monn-an tou pròch rivé, nou menm osi nou divèt kouté sa Pòl di.

14. Kisa Labib ka di asou manjé nou ké gen annan monn nouvo-a ?

¹⁴ Lò Jézi doumandé nou priyè pou « dipen-an nou bézwen pou jòdla », i anprann nou priyè osi pou volonté Bondjé fèt « asou latè-a, kou annan syèl-a » (Mat. 6:9-11). Lò to ka imajiné sa jou-a, kisa to ka wè ? Labib ka di ki annan volonté Bondjé pou latè-a, i gen manjé-a. Dapré Isaïe 25:6-8, moun-yan  ké gen roun patché bon manjé pou yé manjé. Psaume 72:16 ka di : « Latè-a ké plen ké grenn pou manjé ; i ké gen patché manjé laro tèt montangn-yan. » Ès to présé fè manjé-a to pi kontan ouben roun bagaj to pa janmen manjé anvan ? Ouben ès to présé planté to pyé rézen épi manjé so frwi ? (Is. 65:21, 22). Tout moun ké pouvé fè sa ké plen ròt bagaj ankò !

15. Lò moun-yan ké résisité, kisa yé ké anprann ? (Jean 6:35).

¹⁵ Li Jean 6:35. Sonjé sa-ya Jézi bay dipen ké poson pou yé manjé. Pitèt to ké anprann konnèt sèrten annan sa moun-yan lò yé ké résisité. Menmsi bokou annan yé pa té gen lafwa annan Jézi, pitèt yé ké résisité (Jean 5:28, 29). Yé ké divèt konprann sa Jézi té lé di lò i di : « Mo sa dipen-an ki ka bay lavi. Sa-la ki ka vini òbò mo pa ké fen pyès. » Yé ké divèt gen lafwa annan ranson-an, sa lé di krè ki Jézi bay so lavi pou yé. Sa jou-a, tout sa ki ké résisité ké tout timoun ki ké fèt annan monn nouvo-a, ké anprann lavérité asou Jéova ké so projè. Sa ké bèl toubonnman ! Sa ké pi chwit ki manjé roun bon manjé. Bagaj èspirityèl-ya ké pi enpòrtan pasé pyès ròt bagaj !

16. Kisa nou ké wè annan artik ki ka vin dèyè-a ?

¹⁶ Nou fin wè roun parti di Jean chapit 6, mé Jézi té gen roun patché bagaj pou di ankò asou « lavi pou tout-tan ». Menm fason Jwif-ya annan lépòk Jézi té divèt byen kouté sa i té ka di, nou menm osi nou divèt byen kouté l’. A pou sa, nou ké kontinyé étidyé Jean chapit 6 annan artik ki ka vin dèyè-a.