1. Poukisa bokou moun ka pansé ki nou pa pouvé viv pou tout-tan ?

 ROUN patché moun ka panga sa yé ka manjé é ka fè èspòr chak simenn pou yé lasanté. Mé yé savé ki sa pa ké pèrmèt yé viv pou tout-tan. Akoz di dézagréman lavyéyès ka mennen, pitèt nou ka pansé ki nou pa ké jen pouvé viv pou tout-tan é pitèt sa dézagréman-yan pa ka bay nou anvi viv pou tout-tan. Pourtan, annan Jean 3:16 ké 5:24, Jézi ka di ki moun pouvé « gen lavi pou tout-tan ».

2. Kisa Jean chapit 6 ka anprann nou asou lavi pou tout-tan-an ? (Jean 6:39, 40).

² Roun jou, Jézi fè roun mirak pou bay milyé moun manjé dipen ké poson a. A té roun bagaj ki té bèl toubonnman. Mé sa i di landimen-an té ankò pi bèl. Lò sa moun-yan swiv li Kafarnaòm, bò d’ lanmè Galilé, i di yé ki moun té ké pouvé résisité épi viv pou tout-tan (li Jean 6:39, 40). Réfléchi asou sa sa lé di pou moun to kontan ki mouri. Sa Jézi di ka montré ki roun patché moun mouri ké résisité. Atò, to ké pouvé viv pou tout-tan ansanm ké moun to kontan ki mouri. Mé apré sa, Jézi ka di roun bagaj roun patché moun pa rivé konprann. Annou wè sa annan larèstan chapit 6-a.

3. Annan Jean 6:51, kisa Jézi ka anprann nou asou li menm ?

 ³ Mirak Jézi fè pou bay moun manjé dipen ka fè yé sonjé lamann Jéova té bay yé gangan. Annan Labib, yé ka aplé lamann ‘dipen-an ki ka vini di syèl-a’ (Ps. 105:40 ; Jean 6:31). Jézi ka sèrvi lamann pou anprann yé roun bagaj ki enpòrtan. Menmsi a roun mirak Bondjé fè pou bay yé lamann, sa-ya ki manjé l’ mouri kanmenm (Jean 6:49). Parkont, Jézi ka di ki i sa « dipen-an ki ka vini di syèl-a », « dipen Bondjé » ké « dipen-an ki ka bay lavi » (Jean 6:32, 33, 35). Apré sa, i ka èspliké ki i gen roun bagaj enpòrtan ka fè ki li ké lamann diféran. I ka di : « Mo sa dipen ki vivan-an ki désann di syèl-a. Si roun moun ka manjé sa dipen-an, i ké viv pou tout-tan » (li Jean 6:51). Jwif-ya tou pédi. Kouman Jézi pouvé di ki i sa roun « dipen » ki désann di syèl-a é ki pi bon pasé lamann Bondjé bay yé gangan ? Atò, Jézi ka di yé : « Dipen mo ké bay pou tout moun gen lavi, a mo lachè. » Kisa i té lé di ? A pou nou chaché répons-a paské sa ké pèrmèt nou savé kouman moun nou kontan ki mouri é nou menm osi nou ké pouvé gen lavi pou tout-tan. Donk, annou wè sa Jézi té lé di.

DIPEN KI VIVAN-AN KÉ SO LACHÈ

4. Poukisa sa Jézi di choké roun ran Jwif ?

⁴ Roun ran annan sa-ya ki ka kouté Jézi choké lò i ka di ki i ké bay « [so lachè] pou tout moun gen lavi ». Pitèt yé ka pansé ki i ké vréman bay yé manjé so pròp lachè (Jean 6:52). Apré sa, Jézi ka di yé rounòt bagaj ki dèt ka choké yé ankò plis : « Si zòt pa ka manjé lachè Pitit wonm-an é si zòt pa ka bwè so disan, zòt pa gen lavi » (Jean 6:53).

5. Kisa ki ka pèrmèt nou sir ki Jézi pa té ka doumandé moun-yan bwè so pròp disan ?

⁵ Annan lépòk Noé, Bondjé défann moun manjé disan (Gen. 9:3, 4). É i roudi sa menm bagaj-a annan Lalwa i bay Israyélit-ya. Sa-ya ki pa té ka obéyi té divèt « mouri » (Lév. 7:27). Nou savé ki Jézi anprann Jwif-ya rèspèkté Lalwa Bondjé té bay yé (Mat. 5:17-19). Donk, i pa té ké janmen doumandé sa Jwif-ya manjé so lachè ni bwè disan-an ki té ka koulé annan so venn. Lò i di sa bagaj-ya ki té dròl pou yé, i té lé anprann yé kouman yé té pouvé gen « lavi pou tout-tan » (Jean 6:54).

6. Kouman nou divèt konprann sa Jézi di ?

⁶ Kisa Jézi té lé anprann yé ? A roun èkzanp i té ka pran, kou i té fè l’ ké roun fanm Samari. I té di l’ : « Sa-la ki ké bwè dlo mo ké bay li-a pa ké janmen swèf ankò, mé dlo mo ké bay li-a ké kou roun sours dlo annan so kò ki ka koulé fò pou bay lavi pou tout-tan » (Jean 4:7, 14 b). Jézi pa té lé di ki pou i té pouvé gen lavi pou tout-tan, madanm-an té divèt bwè roun dilo èspésyal. Menm fason-an, i pa té ka di moun-yan ki té Kafarnaòm ki yé té divèt manjé so lachè épi bwè so disan vré pou yé té pouvé gen lavi pou tout-tan.

 DÉ SITIASYON KI DIFÉRAN

7. Kisa roun ran moun ka di asou sa Jézi di annan Jean 6:53 ?

⁷ Annan sèrten rélijyon, moun ka di ki annan Jean 6:53, Jézi ka bay roun modèl pou swiv pannan Répa Sényèr-a. Poukisa yé ka di sa ? Paské lò Jézi fè sa Répa-a, i palé di so lachè ké so disan osi (Mat. 26:26-28). Pou yé, pannan Répa Sényèr-a, tout moun divèt manjé dipen-an ké bwè diven-an ki ka pasé. Ès a sa nou divèt fè vré ? A pou nou vérifyé sa paské chak lannen, asou tout latè-a, milyon moun ka vini fè Mémoryal-a ké nou. Sa Jézi di annan Jean 6:53 diféran di sa i di pannan Répa Sényèr-a. Kisa ki diféran ?

8. Ki diférans i gen ant sa Jézi di annan Jean 6:53 ké sa i di pannan Répa Sényèr-a ? (gadé zimaj-ya osi).

⁸ Annou wè dé bagaj ki diféran. Prémyèrman, kitan épi ki koté Jézi di sa nou ka li annan Jean 6:53-56 ? A té annan lannen 32 di nou lépòk, annan vil Galilé, douvan roun patché Jwif. A té osi apéprè roun lannen anvan Jézi fè Répa Sényèr-a, annan vil Jérizalèm. Dézyèmman, pou kimoun Jézi té ka palé ? I té ka palé pou moun ki té pi kontan Jézi bay yé manjé pasé yé té anprann bagaj asou Jéova ké so  rwayonm (Jean 6:26). Lò Jézi di roun bagaj yé pa té ka rivé konprann, yé arété krè annan li. Menm roun ran disip tounen yé do bay li (Jean 6:14, 36, 42, 60, 64, 66). Sa moun-yan té diféran di 11 apot-ya ki té fidèl é ki té ansanm ké Jézi roun lannen pita pou Répa Sényèr-a. Sa jou-a, apot-ya té la ké li menmsi yé pa té ka konprann tousa Jézi té ka anprann yé. Yé pa té kou Jwif-ya ki té Galilé, yé té sir ki Jézi té sa Pitit Bondjé, sa-la ki té désann di syèl-a (Mat. 16:16). Jézi félisité yé : « Zòt, zòt toujou rété ké mo annan mo éprèv » (Luc 22:28). Sa dé bagaj-ya ka byen montré ki annan Jean 6:53, Jézi pa ka bay roun modèl pou swiv pou Répa Sényèr-a. Mé i gen ròt bagaj ankò ki ka montré sa.

KISA SA JÉZI DI LÉ DI POU TO

9. Sa Jézi di pannan Répa Sényèr-a, a pou kimoun ?

⁹ Pannan Répa Sényèr-a, Jézi bay so apot dipen san lèlven é i byen di yé ki sa dipen-an té ka réprézanté so kò. Apré sa, i bay yé bwè diven é i di yé ki sa diven-an té ka réprézanté « disan alyans »-a (Marc 14:22-25 ; Luc 22:20 ; 1 Cor. 11:24). Sa i di asou alyans-a enpòrtan toubonnman. I ka fè sa nouvo alyans-a ké ‘pèp Israyèl [èspirityèl-a]’ ki ké fè parti di « Rwayonm Bondjé-a ». I pa ka fè l’ ké tout moun (Héb. 8:6, 10 ; 9:15). Lò i di yé sa, apot-ya pa konprann. Mé roun ti moso tan pita, Bondjé té ké wen yé ké lèspri sen é yé té ké fè parti di nouvo alyans-a. Konsa, yé té ké gen roun plas òbò Jézi annan syèl-a (Jean 14:2, 3).

10. Ki ròt diférans i gen ant sa Jézi di lò i té Galilé ké sa i di pannan Répa Sényèr-a ? (gadé zimaj-a osi).

¹⁰ Sa Jézi di pannan Répa Sényèr-a, a té pou « piti troupo »-a. Prémyé moun ki fè parti di sa group-a, a so apot ki té fidèl é ki té la ké li sa jou-a (Luc 12:32). A yé Jézi doumandé manjé dipen-an ké bwè diven-an sa jou-a. Pita, ròt moun ankò té ké fè parti di sa group-a é yé menm osi té ké divèt manjé dipen-an ké bwè diven-an pannan Mémoryal-a. A pou yé Jézi préparé roun plas òbò li annan syèl-a. Donk, men sa ki diféran : sa Jézi di lò i té Galilé, a pou roun patché moun, mé sa i di so apot pannan Répa Sényèr-a, a pou roun ti group moun.

11. Annan sa Jézi di lò i té Galilé, kisa ka montré ki i pa té ka palé di roun ti group moun ?

¹¹ Annan lannen 32 di nou lépòk, lò Jézi té Galilé, i palé pou roun ran Jwif ki té lé yenki manjé. Magré sa, i palé yé di roun bagaj ki té pi enpòrtan pasé manjé, roun bagaj ki té ké pèrmèt yé gen lavi pou tout-tan. I jis di yé ki moun mouri-ya té ké pouvé résisité pannan dèrnyé jou-ya épi viv pou tout-tan. Sa jou-a, i pa té ka palé di bénédiksyon roun ran moun sèlman té ké pouvé gen kou i ké fè l’ pita pannan Répa Sényèr-a. I té ka palé di sa tout moun té ké pouvé trapé. I di : « Si roun moun ka manjé sa dipen-an, i ké viv pou tout-tan ; […] dipen mo ké bay pou tout moun gen lavi, a mo lachè » (Jean 6:51).

12. Kisa nou divèt fè pou nou gen lavi pou tout-tan ?

 ¹² Lò i té Galilé, Jézi pa di Jwif-ya ki tout moun té ké gen lavi pou tout-tan. A sèlman sa-ya ki té ké « manjé sa dipen-an », sa lé di sa-ya ki té ké montré ki yé gen lafwa, ki té ké gen lavi pou tout-tan. Roun patché moun ki ka di ki yé krétyen ka pansé ki dipi yé ka krè annan Jézi, yé ké sové (Jean 6:29). Pourtan, sèrten annan sa-ya ki té Galilé é ki té ka krè annan Jézi arété swiv li. Poukisa yé fè sa ?

13. A kisa ki roun vré disip Jézi ?

¹³ Près tout sa Jézi té bay manjé swiv li paské i té ka bay yé sa yé té lé. Yé té lé i fè mirak pou géri yé é pou bay yé manjé épi yé té lé i di yé sa yé té lé tandé. Mé Jézi montré yé ki roun vré disip divèt fè plis ki sa. I pa té vin asou latè-a jis pou bay moun sa yé té lé. I té vin osi pou di moun-yan ‘vini òbò li’ sa lé di kouté l’ épi fè tousa i té ka ansényé (Jean 5:40 ; 6:44).

14. Kisa nou divèt fè pou nou profité di sakrifis Jézi ?

¹⁴ Jézi byen di moun-yan ki yé té divèt montré ki yé té gen lafwa. Lafwa annan kisa ? Yé té divèt krè ki lò i té ké bay so lachè ké so disan, sa té ké pèrmèt yé gen lavi pou tout-tan. Jwif-ya té bézwen gen sa lafwa-a é nou menm osi nou bézwen gen sa menm kalité lafwa-a (Jean 6:40). Kou Jézi di l’ annan Jean 6:53, a pou nou gen lafwa annan  ranson-an pou nou gen lavi pou tout-tan. É roun patché moun pouvé profité di bénédiksyon ranson-an ka poté (Éph. 1:7).

15-16. Ki bagaj enpòrtan Jean chapit 6 ka anprann nou ?

¹⁵ Sa Jézi di annan Jean chapit 6 enpòrtan pou nou tout, menm pou sa-ya nou kontan ki mouri. Sa ka montré nou kouman i kontan moun-yan. Lò i té Galilé, i géri moun malad, i anprann yé bagaj asou Rwayonm-an é i bay yé manjé lò yé té fen (Luc 9:11 ; Jean 6:2, 11, 12). Mé pi enpòrtan-an, i di yé ki a li ki « dipen-an ki ka bay lavi » (Jean 6:35, 48).

¹⁶ Pannan Répa Sényèr-a nou ka fè chak lannen, sa-ya ki annan « ròt brébi »-ya pa ka ni manjé dipen-an ni bwè diven-an é yé pa divèt fè l’ (Jean 10:16). Magré sa, lachè ké disan Jézi ka pèrmèt sa moun-yan trapé bénédiksyon si yé ka montré ki yé gen lafwa annan sakrifis Jézi (Jean 6:53). Sèl moun ki ka manjé dipen-an é ki ka bwè diven-an, a sa-ya ki annan nouvo alyans-a é ki ké fè parti di rwayonm-an ki annan syèl-a. Donk, ki nou ka fè parti di wen-yan, ki nou ka fè parti di ròt brébi-ya, nou tout divèt konprann sa Jézi di annan Jean chapit 6 paské sa ka anprann nou sa bagaj-a ki enpòrtan : pou nou gen lavi pou tout-tan, nou blijé gen lafwa.