Men sa apot Pòl ékri pou Timoté ki té sa roun ansyen kou li menm : « Mo ka bay to sa lòrd-a douvan Bondjé, Jézi Kris ké zanj-ya Bondjé chwazi : swiv sa mo ka di to fè san to fè préférans ni pran parti » (1 Tim. 5:21).

Pou idé nou konprann a kimoun ki « zanj-ya Bondjé chwazi », nou ké wè ki zanj pa pouvé fè parti di sa group-a. Zanj-ya Bondjé chwazi, a pa 144 000-ya paské lò Pòl ékri Timoté, rézirèksyon krétyen wen-yan annan syèl-a patékò koumansé. Apot-ya ké ròt wen-yan patékò divini dé kréyatir èspirityèl, donk a pa yé « zanj-ya Bondjé chwazi » Pòl ka palé-a (1 Cor. 15:50-54 ; 1 Thess. 4:13-17 ; 1 Jean 3:2).

A pa zanj-ya ki dézobéyi Bondjé annan lépòk Délij-a non plis. Sa zanj-ya pran pou Satan, yé tounen démon é Jézi tounen do ba yé (Gen. 6:2 ; Luc 8:30, 31 ; 2 Pierre 2:4). Titalò, Jézi ké fronmen yé annan roun trou san fon pannan 1 000 lannen. Apré sa, yé ké détrwi yé an menm tan ki Djab-a (Jude 6 ; Rév. 20:1-3, 10).

Donk, « zanj-ya Bondjé chwazi », a zanj-ya ki fidèl ké ‘Bondjé ké Jézi Kris’.

I gen rounlo ké roun patché zanj ki fidèl (Héb. 12:22, 23). Mé, nou pa pouvé pansé ki Bondjé ka doumandé yé tout fè menm travay-a o menm moman (Rév. 14:17, 18). Parèkzanp, pou tchwé 185 000 sòlda asiryen, i doumandé rounsèl zanj fè sa travay-a (2 Rois 19:35). A pitèt plizyèr zanj ki ka ‘ranmasé tout sa ki ka fè ròt-ya péché é ki ka fè mové bagaj é ki ka mété yé dèrò di rwayonm Jézi’ (Mat. 13:39-41). I gen ròt zanj ki ké « rasanblé sa-ya i chwazi » annan syèl-a (Mat. 24:31). Ròt zanj ankò ka ‘protéjé nou kèlkéswa koté nou k’alé’ (Ps 91:11 ; Mat. 18:10 ; gadé Mat. 4:11 ; Luc 22:43).

« Zanj-ya Bondjé chwazi » yé ka palé annan 1 Timothée 5:21, pitèt gen rèsponsabilité idé asanblé-ya. Annan sa chapit-a, Pòl ka bay konsèy ki saj. I ka di ki ansyen-yan mérité nou rèspèkté yé. I marké osi ki ansyen-yan yé menm divèt fè yé travay ‘san yé fè préférans ni pran parti’ é ki yé pa divèt pran désizyon ouben jijé vitman présé. Apré sa, Pòl ka bay ansyen-yan roun bon rézon pou swiv sa konsèy-a : i ka di yé ki yé ka travay « douvan Bondjé, Jézi Kris ké zanj-ya Bondjé chwazi ». Donk, sèrten zanj gen rèsponsabilité idé asanblé-ya. Parèkzanp, yé ka protéjé asanblé-ya, yé ka idé yé préché é yé ka di Jéova tousa yé ka wè (Mat. 18:10 ; Rév. 14:6).