1-2. Dapré Matthieu 5:11, kouman nou divèt wè éprèv-ya ?

 JÉZI promèt ki so disip-ya té ké vréman gen tchò kontan. Mé i di osi ki yé té ké jwenn éprèv (Mat. 10:22, 23 ; Luc 6:20-23). Nou gen tchò kontan paské nou sa disip Kris. Mé, kouman nou ka santi nou kò lò nou ka sonjé ki nou fanmi pouvé éséyé anpéché nou adoré Jéova, ki gouvèrnman-an pouvé pèrsékité nou ouben ki nou kanmarad lékòl, nou kolèg travay pouvé éséyé fè nou fè bagaj ki pa bon ? Lò nou ka sonjé sa, sa pouvé troumanté nou.

² I pa gen bokou moun ki kontan lò moun ka pèrsékité yé. Pourtan, Paròl Bondjé-a ka di nou kontan lò yé ka pèrsékité nou. Parèkzanp, disip Jak ékri ki éprèv nou ka jwenn pa divèt dékourajé nou, mé pito divèt bay nou tchò kontan (Jacq. 1:2, 12). É Jézi di ki nou divèt gen tchò kontan menm lò yé ka pèrsékité nou (li Matthieu 5:11). Alòr, kouman nou pouvé gen tchò kontan menm si nou anba éprèv ? Pou nou jwenn répons asou sa késyon-an, annou wè déztrwa konsèy Jak mété annan so lèt i ékri pou krétyen 1^é syèk-a. Mé pou koumansé annou wè ki problèm sa krétyen-yan jwenn.

3. Kisa ki pasé roun tibi tan apré Jak divini disip Jézi ?

³ Roun tibi tan apré Jak, dimi frè Jézi, divini so disip, moun-yan koumansé pèrsékité krétyen-yan ki té Jérizalèm (Actes 1:14 ; 5:17, 18). É apré sa moun-yan tchwé Étyèn, roun patché disip pran kouri é yé « chapé tout koté annan Jidé ké annan Samari » ; é yé jis alé Chip ké Antyòch (Actes 7:58 – 8:1 ; 11:19). A pa ti rèd sa té divèt  rèd pou yé ! Mé, yé préché ké bokou balan tout koté yé alé, é i koumansé gen asanblé annan pi bokou koté (1 Pierre 1:1). Mé sa ki té dèyè patékò touché.

4. Ki ròt kalité éprèv krétyen 1^é syèk-a wè ?

⁴ Krétyen 1^é syèk-a wè tout kalité mizè. Parèkzanp, bò d’ lannen 50 di nou lépòk, anpérèr romen Klod di Jwif-ya pa rété Ròm. Donk, krétyen Jwif-ya té divèt lésé yé kaz pou alé rounòt koté (Actes 18:1-3). Bò d’ lannen 61 di nou lépòk, apot Pòl di ki yé té jouré roun patché disip douvan tout moun, yé té jité yé lajòl é ki yé té vòlò tout yé bagaj (Héb. 10:32-34). É kou roun patché ròt moun, roun ran krétyen té ka wè mizè é yé té malad (Rom. 15:26 ; Phil. 2:25-27).

5. Asou ki késyon nou ké bay répons ?

⁵ Lò Jak ékri so lèt, anvan lannen 62 di nou lépòk, i té byen konnèt ki kalité éprèv so frè ké sò-ya té ka jwenn. Jéova fè li ékri roun lèt pou yé, pou i té pouvé bay yé konsèy ki té ké idé yé kontinyé gen tchò kontan menm si yé té ké gen éprèv. Annou wè sa i té gen annan lèt Jak é annou wè répons asou sa késyon-yan : Di ki kalité lajwa i palé ? Kisa ki pouvé anpéché roun krétyen ganyen sa lajwa-a ? É kouman sajès, lafwa ké kouraj-a pouvé idé nou kontinyé gen tchò kontan douvan nenpòrt ki kalité éprèv ?

6. Dapré Luc 6:22, 23, poukisa roun krétyen pouvé kontan lò i gen éprèv ?

⁶ Roun patché moun ka pansé ki a  sèlman si nou gen roun bon santé, si nou gen bokou soumaké é si nou byen ké nou fanmi ki nou pouvé gen tchò kontan. Mé lajwa Jak ka palé ka fè parti di frwi lèspri Bondjé é i pa ka dépann di sa ki ka pasé alantou di nou (Gal. 5:22). Roun krétyen vréman gen tchò kontan lò i savé ki i ka fè Jéova plézi é ki i ka swiv èkzanp Jézi (li Luc 6:22, 23 ; Col. 1:10, 11). Sa lajwa-a kou roun flanm-difé ki byen protéjé annan roun lanp tanpèt : menm si lapli ka tonbé, menm si van ka vanté i pa ka mouri. Menm fason-an menm si nou ka tonbé malad, menm si nou pa gen bokou soumaké, ouben menm si moun annan nou fanmi ouben ròt moun ankò ka ari nou ouben ka éséyé anpéché nou adoré Jéova, nou pa ka pédi nou lajwa. É lò moun-yan ka éséyé tiré sa lajwa-a annan nou tchò i ka vini pi fò ankò. Éprèv nou ka jwenn akoz di nou lafwa ka montré ki nou sa vré disip Jézi (Mat. 10:22 ; 24:9 ; Jean 15:20). Nou pouvé di ki Jak té gen rézon lò i di : « Mo frè-ya, lò zòt ka jwenn tout kalité tribilasyon, a pou zòt wè sa kou roun gran lajwa » (Jacq. 1:2).

7-8. Poukisa nou lafwa ka vin pi fò lò nou anba éprèv ?

⁷ Jak ka palé di rounòt bagaj ki ka fè ki krétyen-yan paré pou tchenbé anba éprèv ki rèd. I ka di : « Lò zòt lafwa anba éprèv konsa, sa ka fè zòt gen andirans » (Jacq. 1:3). Nou pouvé di ki éprèv-ya, a kou lò moun ka chofé roun moso fè pou fè l’ vin pi solid. Lò moso fè-a ka vin frèt, i pi solid. Menm fason-an, lò nou ka tchenbé anba éprèv-ya nou lafwa ka vin pi fò. A pou sa Jak di : « Lésé andirans-a fè so travay pou zòt divini antchè san pyès défo annan tout domenn pou i pa manké zòt anyen » (Jacq. 1:4). Lò nou ka wè ki éprèv-ya ka fè nou lafwa vin pi fò sa ka idé nou tchenbé ké tchò kontan.

⁸ Annan so lèt, Jak ka palé osi di sèrten bagaj ki pouvé fè nou pédi nou lajwa. Kisa ki pouvé fè nou pédi nou lajwa é kisa nou pouvé fè pou nou pa lésé sa rivé nou ?

9. Poukisa nou bézwen sajès ?

⁹ Sa ki pouvé fè nou pédi nou lajwa : lò nou pa savé sa pou nou fè. Lò nou gen roun problèm, nou lé fè bagaj ki ka fè Jéova plézi, ki ka idé nou frè ké sò-ya é ki ka idé nou rété fidèl (Jér. 10:23). A pou nou gen sajès pou nou savé kisa pou nou fè é kisa nou divèt di sa-ya ki lé anpéché nou adoré Jéova. Si nou pa savé sa pou nou fè, nou ka riské dékourajé épi, annan roun ti moman, pédi nou lajwa.

10. Dapré Jacques 1:5, kisa nou divèt fè pou nou gen sajès ?

 ¹⁰ Sa nou pouvé fè : doumandé Jéova bay nou sajès. Si nou lé tchenbé anba éprèv ké tchò kontan, nou divèt doumandé Jéova bay nou sajès nou bézwen-an pou pran bon désizyon (li Jacques 1:5). Kisa nou pouvé fè lò nou ka trouvé ki Jéova pa ka réponn nou lanmenm ? Jak ka di ki a ‘toulong nou divèt doumandé’ Bondjé bay nou sajès. I pa ké las kouté nou é i pa ké fè nou pyès répròch. Lò nou ka doumandé li bay nou sajès pou tchenbé anba éprèv, nou Papa ki annan syèl-a ka ‘bay nou l’ san konté’ (Ps. 25:12, 13). I ka wè ki éprèv nou ganyen, i gen lanpenn pou nou é i lé idé nou. Men sa ki ka bay nou bokou lajwa ! Mé kouman Jéova ka bay nou sajès ?

11. Kisa nou divèt fè ankò pou nou gen sajès ?

¹¹ Jéova ka bay nou sajès gras a so Paròl (Prov. 2:6). Donk, pou nou gen sa sajès-a, a pou nou étidyé Labib-a ké piblikasyon-yan. Mé a pa loutou di konnèt konsèy plen ké sajès Jéova ka bay nou, a pou nou apliké yé annan nou lavi. Men sa Jak ékri : « A pa pou zòt kouté sèlman, [...] mé a pou zòt pito fè sa Paròl-a ka di » (Jacq. 1:22). Si nou ka fè sa, nou ké divini miyò annan zafè chaché lapè, nou ké pi rézonab é nou ké gen plis mizérikòrd pou ròt-ya (Jacq. 3:17). É sa kalité-ya ké idé nou tchenbé rèd anba éprèv san nou pa pédi nou lajwa.

12. Poukisa sa enpòrtan pou nou byen konnèt Labib-a ?

¹² Paròl Bondjé-a kou roun mirwè : i ka idé nou wè sa nou divèt chanjé (Jacq. 1:23-25). Parèkzanp, lò nou  ké étidyé Labib-a, nou ké pitèt randé nou kò kont ki nou divèt kontrolé nou kò plis. Ké Jéova, nou pouvé anprann rété dous lò i gen moun ouben sitiasyon ki ka fè nou kòlè. Sa kalité-a ké idé nou tchenbé anba présyon-yan pi byen. I ké idé nou réfléchi pi byen épi pran pi bon désizyon (Jacq. 3:13). Atò sa vréman enpòrtan pou nou byen konnèt Labib-a !

13. Poukisa nou divèt pran tan gadé èkzanp moun annan Labib-a ?

¹³ Détan, a lò nou ka fè roun bagaj ki pa bon nou ka anprann sa nou pa divèt fè. Mé sa fason anprann-an ka fè nou soufri. Miyò nou gadé sa ròt-ya ka fè ki bon ouben ki pa bon pou nou anprann kisa nou menm nou divèt fè. A pou sa Jak ka ankourajé nou gadé èkzanp moun annan Labib-a kou Abraam, Raab, Jòb ké Éli (Jacq. 2:21-26 ; 5:10, 11, 17, 18). Sa sèrvitèr Jéova-ya wè patché mizè ki té ké pouvé fè yé pédi yé lajwa. Yé èkzanp ka montré nou ki, gras a Jéova, nou osi, nou pouvé tchenbé.

14-15. Poukisa sa enpòrtan pou nou fè roun bagaj lò nou pa sir di sa nou ka krè ?

¹⁴ Sa ki pouvé fè nou pédi nou lajwa : lò nou pa sir di sa nou ka krè. Sa pouvé rivé ki nou pa ka rivé konprann sèrten bagaj annan Labib-a ouben ki Jéova pa ka réponn nou lapriyè kou nou té ké lé. Lò a konsa, pitèt nou pouvé koumansé douté di sa nou ka krè. Si nou pa ka fè anyen pou sa, nou lafwa ké nou rélasyon ké Jéova pouvé fébli (Jacq. 1:7, 8). Pitèt nou pouvé menm pédi èspwar nou gen-an.

¹⁵ Pòl di ki èspwar nou gen-an kou roun lank (Héb. 6:19). Roun lank ka pèrmèt roun bato rété stab lò i gen roun tanpèt é i ka anpéché l’ krazé asou ròch-ya. Mé i ka sèrvi sèlman si chenn-an ki ka maré lank-a ké bato-a pa ka kasé. Menm fason larouy pouvé gaté sa chenn-an, lò nou ka douté, sa pouvé fè nou lafwa fébli é lò nou ka jwenn problèm, nou ka riské pédi nou lafwa annan promès Jéova ka bay nou. É si nou ka pédi nou lafwa, nou ka pédi èspwar nou gen-an. Kou Jak di, sa-la ki ka douté « kou roun vag lanmè van-an ka pousé é ka fè l’ alé vini » (Jacq. 1:6). Sa ké rèd pou roun moun konsa gen tchò kontan !

16. Kisa nou divèt fè si nou ka douté ?

¹⁶ Sa nou pouvé fè : annou fè roun bagaj pou sa é annou fè nou lafwa vin pi fò. Annan lépòk profèt Éli, Israyélit-ya pa té ka rivé désidé sa yé té divèt fè. Éli di yé : « Jouk kitan zòt ké kontinyé ézité ? Si a Jéova ki vré Bondjé-a, adoré l’. Mé si a Baal ki vré Bondjé-a, adoré l’ ! » (1 Rois 18:21). Nou menm osi, nou divèt fè roun bagaj ké ti kouri. Nou divèt fè réchèrch pou nou pouvé sir ki a Jéova ki vré Bondjé-a, ki Labib-a a so Paròl é ki a Témwen Jéova-ya ki ka adoré l’ kou i lé (1 Thess. 5:21). A konsa nou ké pouvé tchwé sa zafè douté-a é fè nou lafwa vin pi fò. Si nou bézwen roun moun idé nou, nou pouvé osi alé wè ansyen-yan. Annou pa pédi tan pou fè roun bagaj pou sa, pou nou kontinyé adoré Jéova ké tchò kontan.

17. Kisa ki ké rivé si nou pa gen kouraj ankò ?

¹⁷ Sa ki pouvé fè nou pédi nou lajwa : dékourajman-an. Labib-a ka di : « Si to dékourajé jou-a to annan traka, to pa ké gen bokou fòrs » (Prov. 24:10). Si nou pa gen kouraj ankò, nou ké pédi nou lajwa byen vit.

18. Kisa sa lé di andirans ?

 ¹⁸ Sa nou pouvé fè : annou konté asou Jéova pou i bay nou kouraj nou bézwen pou tchenbé. Nou bézwen kouraj pou nou tchenbé lò nou anba éprèv (Jacq. 5:11). Jak ka itilizé roun mo pou di « andirans ». Sa mo-a pouvé sèrvi pou palé di roun moun ki pa ka moli. A kou roun sòlda ki, menm si so lèlmi ka ataké l’, ka rété byen dibout é anyen pa ka fè l’ pran kouri.

19. Kisa èkzanp Pòl ka anprann nou ?

¹⁹ Asou zafè kouraj ké andirans, Pòl bay nou roun bon èkzanp. Détan, i té ka santi i pa té gen fòrs, mé kou i té ka konté asou Jéova pou bay li fòrs i rivé tchenbé lò i té gen problèm (2 Cor. 12:8-10 ; Phil. 4:13). Nou menm osi nou pouvé gen sa fòrs-a ké sa kouraj-a si nou ka rékonnèt ké imilité ki nou bézwen Jéova idé nou (Jacq. 4:10).

20-21. Di kisa nou pouvé sir ?

²⁰ Nou pouvé sir ki lò nou gen roun éprèv, a pa pini Jéova ka pini nou. Jak ka di nou roun bagaj nou pouvé sir : « A pa pou pyès moun ki anba éprèv di : “A Bondjé ki ka mété mo anba éprèv.” Paské i pa gen pyès mové bagaj ki ka mété Bondjé anba éprèv é li menm pa ka mété pyès moun anba éprèv ké mové bagaj » (Jacq. 1:13). Si nou sir ki sa paròl-ya vré, nou ké toujou vin pi pròch ké nou Papa ki annan syèl-a ki kontan nou (Jacq. 4:8).

²¹ Jéova « pa ka chanjé » (Jacq. 1:17). Menm fason i idé krétyen-yan annan 1^é syèk-a lò yé té gen éprèv, i ké idé nou chak jòdla osi. A pou to sipliyé l’ pou i bay to sajès, lafwa ké kouraj. I ké réponn to. A pou to sir ki i ké idé to pa pédi to lajwa menm si to gen éprèv.