Apré 1920, mo manman ké mo papa anprann konnèt Jéova. A té anvan yé maryé. Mo fèt an 1939. Lò mo té jenn ti bolonm, nou té ka rété an Anglétèr, é mo té k’alé annan réinyon krétyen-yan ké mo papa ké mo manman. Mo té toupiti toujou lò mo enskri annan Lékòl ministèr téyokratik-a. Jik jòdla, mo ka sonjé kouman mo té fika lò mo té gen pou monté asou roun kès pou mo té pi rot ki pipit koté mo té ka fè mo prémyé sijè. Mo té gen 6 an é mo té pè toupannan mo té ka gadé tout granmoun-yan ki té la annan lasal-a.

Mo papa té marké asou roun ti papyé roun bagaj tou senp pou mo té di lò mo té k’alé di kaz an kaz. Prémyé kou-a mo alé préché mo rounso, mo té gen 8 an. A pa ti kontan mo té kontan lò mouché-a li mo ti papyé, é lanmenm, i asèpté liv-a « Que Dieu soit reconnu pour vrai ! ». Mo kouri alé di mo papa sa. Prédikasyon-an ké réinyon-yan té ka bay mo tchò kontan é yé bay mo anvi sèrvi Jéova a plen tan.

Mo koumansé kontan Labib-a pi bokou lò mo papa pran roun abònman Tourdégard pou mo. Mo té présé pou li chak Tourdégard lò yé té ka rivé. Mo té ka fè Jéova plizanpli konfyans. É finalman, mo vouwé mo kò pou li.

An 1950, mo ké mo fanmi nou alé annan asanblé « L’accroissement de la théocratie » annan vil Nouyòrk. Tèm lajournen jédi 3 out a té « Journée des missionnaires ». Sa jou-a, frè Carey Barber, ki fè parti di Kolèj santral-a apré, fè diskour batenm-an. Lò i fini so diskour, i pozé dé késyon-yan yé ka  doumandé sa-ya ki ka alé batizé. Mo lévé é mo di wi ! Menm si mo té gen 11 an rounso, mo byen konprann ki mo té pran roun gran désizyon. Mé mo té pè alé annan dlo-a paské mo patékò anprann najé. Mo tonton vin ké mo òbò lapisin-an épi i di mo ki tout bagaj té ké byen pasé. É a sa ki fèt vré. Tout bagaj pasé tèlman vit ki mo pyé pa menm touché ofon lapisin-an. A poté yé poté mo : roun frè batizé mo épi rounòt frè tchenbé mo pou fè mo soti di lapisin-an. Dipi sa jou enpòrtan-an, Jéova kontinyé fè mo chimen vini drèt.

Lò mo fini lékòl, mo té lé divini pyonyé. Mé mo profésèr-ya ankourajé mo alé linivèrsité. A konsa mo alé linivèrsité. Apré roun ti moman, mo konprann ki mo pa té pouvé rété fò annan lavérité-a é an menm tan mété mo lidé asou étid mo té ka fè-a. Alòr mo désidé arété alé linivèrsité. Mo priyè Jéova pou sa, é mo ékri roun lèt pou mo profésèr-ya pou di yé sa mo té désidé é mo pati a lafen sa prémyé lannen-an. Ké tout mo konfyans annan Jéova, mo divini pyonyé lanmenm.

Mo koumansé sèrvis pyonyé-a an jwiyé 1957 annan vil Wellingborough. Mo doumandé frè-ya annan Bétèl ki té Lonn, ki frè pyonyé ki té gen èspéryans mo té pouvé alé jwenn. Yé konséyé mo alé jwenn frè Bert Vaisey. I anprann mo bokou bagaj. I té ka préché ké bokou balan é i idé mo gen roun bon program pou préché. Annan asanblé koté nou té fika, i té gen mo, frè Vaisey ké 6 sò ki té ja granmoun. Kou mo té gen pou préparé ké fè roun sijè annan tout réinyon-yan, sa bay mo lokazyon palé di mo lafwa épi fè Jéova plis konfyans.

Mo fè roun ti moso tan lajòl paské mo pa té asèpté fè mo sèrvis militèr. Apré sa, mo rankontré Barbara, roun sò ki té pyonyé èspésyal. Nou maryé an 1959. Nou té paré pou alé nenpòrt ki koté yé té ké voyé nou. An prémyé, yé voyé nou roun koté yé ka aplé Lancashire, an Anglétèr. Apré sa, an janvyé 1961, yé envité mo alé annan Lékòl ministèr Rwayonm-an. Sa lékòl-a té ka fèt pannan roun mwa, é sa té ka pasé annan Bétèl Lonn. A lafen lékòl-a, yé doumandé mo alé annan sèrvis sirkonskripsyon-an. Mo pa té ka antann sa menm ! Pannan dé simenn, annan vil Birmingham, roun rèsponsab sirkonskripsyon ki té gen bokou èspéryans bay mo roun fòrmasyon, é yé pèrmèt Barbara vin jwenn mo. Apré sa nou roupati koté yé té voyé nou, annan konté Lancashire ké Cheshire.

Lò nou té an vakans an out 1962, Bétèl-a voyé roun lèt pou nou. Annan sa lèt-a, i té gen papyé pou ranpli pou doumandé pou fè Lékòl Galaad ! Nou priyè Jéova pou sa, nou ranpli papyé-ya é nou voyé yé vitman pou Bétèl-a. Senk mwa pita, nou pati Brouklin, a Nouyòrk, pou alé annan 38^è klas Galaad, pannan dis mwa.

 Gras a lékòl Galaad, nou anprann bokou bagaj asou Paròl Bondjé-a, so òrganizasyon, é nou anprann kontan nou frè ké so-ya asou tout latè-a plis ankò. Kou nou té jenn toujou ; Barbara té gen 23 an é mo menm té gen 24 an. Nou anprann bokou bagaj ké ròt zélèv-ya di nou klas. Chak jou, mo té kontan travay ansanm ké frè Fred Rusk, roun annan nou fòrmatèr-ya. Roun bagaj i byen fè nou konprann, a ki nou toujou divèt bay konsèy ki jis, sa lé di véyé pou konsèy nou ka bay toujou ka vini di Labib-a. Annan sa-ya ki fè diskour pou nou pannan nou lékòl, i té gen plizyèr frè ki té gen bokou èspéryans, kou Nathan Knorr, Frederick Franz ké Karl Klein. É nou anprann bokou bagaj gras a èkzanp frè Alexander Macmillan ki té gen bokou imilité. I montré nou kouman Jéova idé so pèp lò sa té rèd pou frè-ya annan òrganizasyon-an dipi lannen 1914 jis 1919.

Lò nou lékòl té près fini, frè Knorr di pou mo ké Barbara ki yé té ké voyé nou Bouroundi, an Afrik. Nou pa fè ni roun ni dé, nou alé annan bibliyotèk Bétèl-a, pou alé wè annan Annuaire-a konmyen proklamatèr i té gen annan sa péyi-a. Nou soté lò nou wè ki annan piblikasyon-yan, i pa té gen pyès enfòrmasyon asou sa péyi-a. Nou té k’alé préché roun koté pésonn patékò préché. É sa téritwar-a té roun koté nou pa té djè konnèt. Nou té pè toubonnman, mé lò nou priyè Jéova ké tout nou tchò, nou santi nou kò byen.

O Bouroundi, tout bagaj té diféran pou nou : tan-an, kiltir-a, ké lang-a. Nou té gen pou anprann palé fransé. Nou té divèt osi trouvé roun koté pou nou rété. Dé jou apré nou rivé, Harry Arnott, roun frè ki té fè Lékòl Galaad ké nou vini wè nou. I té asou chimen pou rantré Zanbi, koté yé té voyé l’. I idé nou trapé roun kaz. Mé roun ti moman apré, nou jwenn problèm ké gouvèrnman-an, ki patékò konnèt Témwen Jéova-ya. Nou té fin koumansé santi nou kò byen, lò yé di nou ki nou pa té ké pouvé rété si nou pa té gen roun pèrmi pou travay. Nou té divèt pati annan rounòt péyi. A konsa nou rivé Ouganda.

 Nou rivé Ouganda san nou pa té gen pyès viza, mé kou nou té ka fè Jéova konfyans, nou pa té plis pè ki sa. Roun frè ki té soti Kanada pou vini préché annan péyi-a èspliké roun ajan limigrasyon nou sitiasyon. I pèrmèt nou rété plizyèr mwa annan péyi-a jistan nou trapé papyé pou rété la. A la nou wè ki Jéova té ka idé nou.

Lò nou té Ouganda, bagaj-ya pa té kou sa nou té wè Bouroundi. Yé té ja ka préché annan péyi-a, menm si a té sèlman 28 Témwen Jéova i té gen annan tout péyi-a. Bokou moun té ka palé anglé. Mé annan roun ti moman nou konprann ki nou té divèt anprann roun annan sé patché lang-ya moun-yan té ka palé pou idé sa-ya ki té entérésé vansé annan lavérité-a. Kou nou té koumansé préché annan roun koté yé ka aplé Kampala, é annan sa koté-a bokou moun té ka palé luganda, nou désidé anprann sa lang-a. Sa pran plizyèr lannen pou nou rivé byen palé sa lang-a, mé gras a sa nou vin pi vayan lò nou té ka préché. Nou konprann pi byen sa nou étidyan-yan té bézwen anprann. Épi yé menm, yé louvri yé tchò pou di nou sa yé té ka pansé di sa yé té ka anprann annan Labib-a.

Nou té kontan anprann moun-yan lavérité. Mé nou té ankò pi kontan lò yé doumandé nou alé vizité asanblé-ya tout koté annan péyi-a. Filyal Kénya-a voyé nou tout koté annan péyi-a pou chaché ki koté yé té plis bézwen pyonyé èspésyal. Plizyèr fwa, moun ki pa té janmen wè Témwen Jéova rousouvwè nou kou nou pa té janmen wè l’ anvan. Yé rousouvwè nou ké bokou lanmou é yé jis préparé manjé pou nou.

Apré sa, yé propozé mo rounòt vwayaj. Mo pran tren-an Kampala, é dé jou pita, mo rivé annan vil Monbasa, o Kénya. Lò mo rivé la, mo pran bato pou alé Séchèl (a plizyèr zilé annan oséyan Endyen-an). Épi, ant 1965 ké 1972, Barbara vini ké mo pou alé wè asanblé-ya o Séchèl. O koumansman, i té gen dé proklamatèr rounso. Finalman, yé fòrmé roun group ki divini roun asanblé. Nou fè ròt vwayaj konsa ki pèrmèt nou alé idé frè-ya ki té Éritré, Étchopi ké Soudan.

An Ouganda sitiasyon-an chanjé lò larmé pran pouvwar-a é koumansé koumandé péyi-a. Apré sa, pannan plizyèr lannen, tout moun té pè. Sa lannen-yan fè mo sonjé kouman sa enpòrtan ‘bay Sézar sa ki di Sézar’, kou Labib-a ka di (Marc 12:17). Roun jou, yé doumandé tout sa ki té étranjé alé lapolis ki té pi pròch di yé kaz pou marké yé non asou yé lis. Nou alé fè sa ké ti kouri. Plizyèr jou pita, mo ké roun frè, nou té ka roulé annan vil Kampala lò lapolis di nou arété. Nou té pè menm. Yé akizé nou, yé di nou sa dé èspyon, é yé mennen nou annan gran biro lapolis, koté nou èspliké yé ki nou té sa dé misyonèr ki pa té ka chaché problèm ké pésonn. Nou di yé osi ki nou té ja marké nou non asou yé lis, mé yé pa té lé kouté nou. Roun polisyé mennen nou jik biro lapolis ki té pi pròch di kaz misyonèr-ya. Chans pou nou, roun polisyé ki té la lò nou té vini marké nou non anvan sa, rékonnèt nou é i doumandé ròt polisyé-a libéré nou.

A sa lépòk-a, nou té gen pou janbé baraj asou larout-a souvan. Sa pa té fasil pou  nou, èspésyalman lò sòlda-ya ki té sou té ka doumandé nou arété loto-a. Mé chak fwa, kou nou té ka priyè Jéova, nou té gen lapè annan nou tchò, é nou rivé janbé baraj-ya san problèm. Malérèzman, an 1973, yé di tout misyonèr étranjé ki té Ouganda chapé.

Apré sa, yé voyé nou rounòt koté : Lakotdivwar. Sa kou-a ankò, sa té lé di bokou chanjman pou nou : nou té divèt anprann abitchwé ké roun kiltir ki té diféran toubonnman, nou té divèt roukoumansé palé fransé, é pran labitid viv ké misyonèr ki té ka vini di plizyèr koté. Sa maré-a ankò, nou wè ki Jéova té ka dirijé tout bagaj, paské annan roun ti moman, plizyèr moun ki té gen imilité é ki té sensèr asèpté kouté bon nouvèl-a. Mo ké Barbara, nou byen wè ki, kou nou té fè Jéova konfyans, i té fè nou chimen vini drèt.

Épi roun jou, nou rousouvwè roun mové nouvèl : Barbara té gen roun kansèr. Plizyèr fwa nou alé an Éròp pou i té pouvé gen trètman i té bézwen-an. Mé, an 1983, nou byen konprann ki nou té divèt lésé koté nou té fika. Nou toulédé, nou té gen bokou lapenn.

Pannan nou té ka travay Bétèl Anglétèr, santé Barbara vin plizanpli mové, épi i mouri. Fanmi Bétèl-a byen idé mo, èspésyalman roun frè ké so madanm. Yé idé mo abitchwé ké sitiasyon-an, épi kontinyé fè Jéova konfyans. Pita, mo fè konésans ké Ann, roun sò ki té ka vin travay o Bétèl souvan é ki té pyonyé èspésyal anvan. I té kontan Jéova toubonnman. Nou maryé an 1989, é dipi sa jou-a, nou ka travay annan Bétèl-a ansanm.

Dipi 1995 jik 2018, a té roun plézi pou mo réprézanté Kolèj santral-a. A konsa mo alé annan pasé 60 péyi. Chak fwa, mo wè kouman Jéova ka béni so sèrvitèr-ya, kèlkanswa problèm yé ka jwenn.

An 2017, mo routounen an Afrik. Mo té kontan mennen Ann Bouroundi pou prémyé fwa-a, é nou toulédé, nou té èstébékwé lò nou wè kouman roun patché moun té vini annan lavérité-a. Annan menm lari koté mo té préché an 1964, aprézan i gen roun bèl Bétèl. É i gen pasé 15 500 proklamatèr annan péyi-a.

Lò mo rousouvwè program vizit mo té pou fè an 2018, mo té kontan kou roun sousouri. Asou lis péyi-ya, i té gen Lakotdivwar. Lò nou rivé Abidjan, pi gran vil péyi-a, a kousidiré mo té ka rantré annan mo koté. Lò nou rivé annan chanm yé bay nou annan Bétèl-a, mo gadé lis niméro téléfonn bétélit-ya pou mo té wè a kimoun ki té nou vwazen. Lanmenm, mo rékonnèt non roun frè : Sossou. I té sirvéyan vil-a lò mo té Abidjan. Mé a pa té li. A té rounòt Sossou : so pitit !

Jéova tchenbé so promès. Mo jwenn roun patché problèm, mé mo byen wè ki a chak fwa, lò to ka fè li konfyans, i ka fè to chimen vini drèt. Sa mo lé, a kontinyé maché asou « chimen sa-ya ki jis », roun chimen koté limyèr-a ka kléré plizanpli fò é ki ka mennen to annan monn nouvo-a (Prov. 4:18).