DÉ JENN madanm té ka maché ansanm annan roun lari koté i té gen magazen annan vil Baguio, o Filipin. Yé wè roun prézantwar. Helen, sò-a ki té dibout òbò prézantwar-a, fè roun bèl sourir pou yé. Menm si sa dé jenn madanm-yan pa rété, sa bèl sourir yé wè-a marké yé.

Pita, lò yé té annan yé bis pou rantré annan yé kaz, yé wè roun gran pano asou roun sal di Rwayonm koté i té marké « jw.org ». Yé sonjé ki yé té wè sa lèt-ya asou prézantwar-a. Yé toulédé désann di bis-a é yé alé jik òbò baryè sal di Rwayonm-an pou wè a ki lèr chak asanblé té ka fè yé réinyon.

Plizyèr jou apré, yé vini annan roun réinyon. É kimoun yé wè lò yé antré annan sal di Rwayonm-an ? Helen ! Lanmenm, yé rékonnèt madanm-an ki té fè yé roun bèl sourir ! Helen ka di : « Lò yé vini bò d’ mo, mo té pè. Mo doumandé mo kò si i té gen roun problèm. » Mé dé jenn madanm-yan èspliké li poukisa yé té la.

Yé pran plézi kouté réinyon-an é yé té alèz ké frè ké sò-ya. É lò yé wè ki roun ran té ka nétwayé lasal-a, yé doumandé si yé té pouvé idé yé. Dipi sa jou-a, roun di sa madanm-yan pati annan rounòt péyi, mé ròt jenn madanm-an koumansé vini annan réinyon-yan é i koumansé étidyé Labib-a. Tousa gras a roun bèl sourir !