MÈRKRÉDI 18 janvyé 2023, roun kominikasyon èspésyal parèt asou jw.org. I té ka di ki yé té chwazi frè Gage Fleegle ké frè Jeffrey Winder pou sèrvi annan Kolèj santral Témwen Jéova-ya. Sa dé frè-ya ka sèrvi Jéova dipi roun patché lannen.

Frè Fleegle lévé Pennsilvani, Ozétazini. So papa ké so manman Témwen Jéova. Lò i té jennjan, so fanmi alé viv annan roun ti vil lakanpagn koté yé té bézwen plis proklamatèr. Roun tibi tan apré sa, 20 novanm 1988, i batizé.

So papa ké so manman toujou té ka ankourajé l’ pran sèrvis a plen tan-an. Yé té ka envité rèsponsab sirkonskripsyon-yan ké bétélit-ya annan yé kaz souvan. A konsa frè Fleegle wè kouman sa frè ké sò-ya té kontan. Roun tibi tan apré so batenm, 1^é sèptanm 1989, i divini pyonyé pèrmanan. Dé lannen apré sa, i rivé fè sa i té prévwè fè dipi i té gen 12 lannen : divini bétélit. I antré annan Bétèl Brouklin an òktòb 1991.

I travay annan sèrvis pou fè liv pannan 8 lannen. Apré sa, yé doumandé l’ alé annan biro pou sèrvis-a. Pannan plizyèr lannen, i té annan roun asanblé koté yé té ka palé ris. An 2006, i maryé ké Nadia ki vin jwenn li o Bétèl. Yé toulédé soutni roun asanblé koté yé té ka palé pòrtigè, épi apré, pannan pasé 10 lannen, yé soutni roun asanblé koté yé té ka palé èspanyòl. Frè Fleegle fè plizyèr lannen annan biro pou sèrvis-a. Apré, yé doumandé l’ alé annan komité pou ansèyman-an, é apré sa, annan biro komité pou sèrvis-a. Yé toulédé a dé komité Kolèj santral-a. An mars 2022, i divini asistan annan komité pou sèrvis-a a.

 Frè Winder lévé Ozétazini li menm osi, annan vil Murrieta an Kaliforni. A so papa ké so manman ki lévé l’ annan lavérité-a, é 29 mars 1986, i batizé. I pran sèrvis pyonyé òksilyèr-a an avril 1986. I té kontan sa tèlman ki i té lé kontinyé. I rété plizyèr mwa pyonyé òksilyèr é, 1^é òktòb 1986, i divini pyonyé pèrmanan.

Lò i té jennjan, i té alé wè so dé gran frè ki té bétélit annan sa lépòk-a. Sa té bay li anvi ranpli roun démann pou Bétèl-a pita. É an mé 1990, yé envité l’ vini sèrvi annan Bétèl Walkil.

Annan Bétèl Walkil, frè Winder travay annan plizyèr sèrvis diféran. Parèkzanp, annan sèrvis ménaj-a, annan sèrvis-a ki té ka okipé di bitasyon Bétèl-a ké annan biro Bétèl-a. An 1997, i maryé ké Angela é dipi sa jou-a, yé ka travay pou Jéova ansanm annan Bétèl-a. An 2014, yé doumandé yé alé Warwik, koté frè Winder travay ansanm ké volontèr-ya ki té ka konstrwi syèj mondyal-a. An 2016, yé doumandé yé alé Patèrsonn annan sa yé ka aplé Le Centre d’enseignement des Témoins de Jéhovah. Frè Winder travay annan sèrvis odyo vidéyo-a. Kat lannen apré, yé routounen Warwik é yé doumandé frè Winder travay annan Komité pou pèrsonèl-a. An mars 2022, i divini asistan annan Komité pou pèrsonèl-a.

Nou ka priyè Jéova pou i béni sa wonm-yan bokou, yé ki sa dé « kado », toupannan yé ka travay rèd pou Rwayonm-an (Éph. 4:8).