1. Kitan krétyen wen-yan ké monté laro syèl-a ?

 I GEN plizyèr lannen, sèrvitèr Jéova-ya té ka doumandé yé kò : « Kitan dèrnyé krétyen wen-yan ké monté laro syèl-a ? » Anvan, nou té ka pansé ki apré lagèr Armagédon-an, sèrten krétyen wen té ké pitèt rété asou latè-a pannan roun tan. Mé annan La Tour de Garde 15 jwiyé 2013, nou anprann ki tout krétyen wen-yan ké monté laro syèl-a anvan lagèr Armagédon-an pété (Mat. 24:31).

2. Ki késyon nou pouvé pozé nou kò é kisa nou ké wè annan sa artik-a ?

² Mé pitèt nou pouvé doumandé nou kò : kisa ki ké rivé « ròt brébi » Kris-ya ki ké sèrvi Jéova ké fidélité asou latè-a pannan « gran tribilasyon »-an ? (Jean 10:16 ; Mat. 24:21). Jòdla, pitèt roun ran pè i pa rété pyès moun pou idé yé ouben gidé yé lò frè ké sò-ya ki wen ké monté laro syèl-a. Annou wè dé istwè annan Labib ki pitèt ka fè yé krè sa. Apré sa, nou ké wè déztrwa rézon ki ka montré poukisa nou pa bézwen pè.

SA KI PA KÉ RIVÉ

3-4. Kisa sèrten frè ké sò pouvé doumandé yé kò, é poukisa ?

³ Sèrten frè ké sò pitèt ka doumandé yé kò si ròt brébi-ya pa ké lésé chimen lavérité-a lò krétyen wen-yan ki annan Kolèj santral-a pa ké la ankò pou gidé yé. Sèrten istwè annan Labib pitèt ka fè yé krè sa. Annou wè dé istwè. Prémyé-a, a gran prèt Joad, roun sèrvitèr Bondjé ki té fidèl. Li ké so madanm Jéochabat, protéjé roun tibolonm yé té ka aplé Joas é yé idé l’ divini roun bon rwa fidèl. Lò Joad té vivan, Joas té ka fè bon bagaj. Mé lò Joad mouri, i chanjé. I kouté prens-ya ki té méchan é i arété sèrvi Jéova (2 Chron. 24:2, 15-19).

 ⁴ Dézyèm istwè-a, a krétyen-yan annan 2^è syèk di nou lépòk. Dèrnyé apot-a ki mouri, a Jan. Lò i té vivan toujou, i idé bokou krétyen kontinyé rété fidèl (3 Jean 4). Kou ròt apot Jézi-ya, i travay rèd pou protéjé asanblé-ya kont sa-ya ki té ka ansényé yé bagaj ki pa té vré (1 Jean 2:18 ; 2 Thess. 2:7). Mé lò i mouri, bokou asanblé swiv ansèyman apòsta-ya, é plizyèr lannen pita, yé tout té apòsta.

5. Kisa nou pa divèt pansé parapòrta sa dé istwè-ya ki annan Labib ?

⁵ Ès sa dé istwè-ya ki annan Labib ka montré ki a menm bagaj-a ki ké rivé ròt brébi Kris-ya, lò tout krétyen wen-yan ké laro syèl-a ? Ès krétyen-yan ké bliyé sa yé anprann, kou Joas ? ouben ès yé ké divini apòsta kou bokou krétyen annan 2^è syèk-a ? Répons-a, a non. Pyès toubonnman ! Nou pouvé sir ki lò krétyen wen-yan pa ké asou latè-a ankò, ròt brébi-ya ké kontinyé adoré Jéova kou i lé, é i ké pran swen di yé. Poukisa nou pouvé sir di sa ?

PÈP JÉOVA-A KÉ TOUJOU KONTINYÉ ADORÉ L’ KOU I LÉ

6. Nou ké palé di trwa lépòk, kilès ?

⁶ Poukisa nou pouvé sir ki nou ké kontinyé adoré Jéova menm lò sa ké vin rèd dimen ? Paské Labib ka èspliké ki nou lépòk diféran di lépòk Israyélit-ya ouben di lépòk krétyen-yan annan 2^è syèk-a. Donk, annou palé di sa trwa lépòk-ya : 1) lépòk Israyèl tan-lontan, 2) lépòk krétyen-yan annan 2^è syèk-a ké 3) nou lépòk yé ka aplé « jou tout bagaj rouviré kou anvan » (Actes 3:21).

7. Poukisa Israyélit-ya ki té fidèl pa pédi èspwar lò rwa-ya ké nasyon-an désidé pran roun mové chimen ?

⁷ Lépòk Israyèl tan-lontan. Roun tibi tan anvan i mouri, Moyiz di Israyélit-ya : « Mo byen savé ki lò mo ké mouri, zòt ké fè sa ki mové é zòt ké lésé chimen mo di zòt swiv-a » (Deut. 31:29). Moyiz di Israyélit-ya osi ki si yé té ka rébélé yé kò, yé lèlmi té ké mennen yé alé annan yépa péyi (Deut. 28:35, 36). Ès a sa ki rivé ? Wi. Pannan santenn lannen, bokou rwa désidé pran roun mové chimen, é pèp-a swiv yé annan fo ladorasyon-an. Akoz di sa, Jéova pini so pèp ki té méchan é i pa pèrmèt rwa israyélit-ya gouvèrné yé ankò (Ézéch. 21:25-27). Mé lò Israyélit-ya ki té fidèl wè ki sa Jéova té di té fèt vré, sa bay yé kouraj ké èspwar (Is. 55:10, 11).

8. Ès nou divèt étoné lò nou ka wè ki asanblé krétyen-an annan 2^è syèk-a mal tounen ? Èspliké.

⁸ Lépòk krétyen-yan annan 2^è syèk-a. Lò nou ka wè ki asanblé krétyen-an annan 2^è syèk-a mal tounen, ès sa divèt étoné nou ? Non. Jézi té di ki i té ké gen roun gro apòstazi (Mat. 7:21-23 ; 13:24-30, 36-43). Apot Pòl, Pyèr ké Jan té di ki profési Jézi té bay té koumansé réyalizé annan 1^é syèk-a (2 Thess. 2:3, 7 ; 2 Pierre 2:1 ; 1 Jean 2:18). Roun ti tan apré dèrnyé apot-a mouri, krétyen-yan ki té apòsta divini roun gran parti di Gran Babilòn-an, sa lé di tout fo rélijyon-yan yé tout ansanm. La ankò, sa Jézi té di té fèt.

9. Poukisa nou lépòk diféran di lépòk Israyèl tan-lontan ké lépòk asanblé krétyen 2^è syèk-a ?

⁹ « Jou tout bagaj rouviré kou anvan ».  Nou lépòk diféran di lépòk Israyèl tan-lontan ké di 2^è syèk-a koté tout asanblé-ya té divini apòsta. Kouman nou ka aplé nou lépòk ? Nou abitchwé aplé l’ « dèrnyé jou » di sa monn méchan-an (2 Tim. 3:1). Mé Labib ka montré ki rounòt lépòk ki pi gran é ki pi bèl koumansé an menm tan ké lépòk « dèrnyé jou-ya ». Sa lépòk-a ké fini lò rwayonm Mési-a ké fè tout moun divini parfè épi ké fè latè-a divini roun paradi. Yé ka aplé sa lépòk-a « jou tout bagaj rouviré kou anvan » (Actes 3:21). I koumansé an 1914. Kisa ki rouviré kou anvan ? Sa lannen-an, Jézi divini Rwa annan syèl-a, Jéova viré gen roun dirijan pou réprézanté l’, roun pitit rwa David. Mé a pa sèl bagaj ki rouviré kou anvan. Roun tibi tan apré, Jéova idé so sèrvitèr-ya ki té asou latè-a viré adoré l’ kou i lé (Is. 2:2-4 ; Ézéch. 11:17-20). Ès yé ka riské arété adoré Jéova ankò ?

10. a) Kisa Labib ka di asou vré ladorasyon-an pannan nou lépòk ? (Isaïe 54:17). b) Poukisa sa profési-ya ka rasiré nou ?

¹⁰ (Li Isaïe 54:17.) Annou réfléchi asou sa profési-a : « Pyès zarm yé ké fè pou fè to mal pa ké fè to anyen. » A sa nou ka wè jòdla. I gen rounòt profési ki ka fèt jòdla é ki ka rasiré nou. Men sa i ka di : « Jéova ké ansényé tout to pitit, é to pitit ké gen roun gran lapè. To ké byen dibout annan lajistis. [...] To pa ké bézwen pè anyen é i pa ké gen anyen ki ké fè to pè, paské sa bagaj-ya pa ké vin òbò to » (Is. 54:13, 14). Menm Satan, « bondjé sa monn-an », pa pouvé fè anyen pou arété travay pèp Jéova-a ka fè pou anprann moun-yan konnèt li (2 Cor. 4:4). Pèp Jéova-a viré adoré l’ kou i lé, é yé pa ké jen arété fè l’ ankò. Vré ladorasyon-an la pou rété pou tout-tan. Pyès zarm yé ké fè pou fè nou mal pa ké fè nou anyen !

SA KI KÉ RIVÉ

11. Poukisa nou sir ki lò krétyen wen-yan ké annan syèl-a, yé pa ké yenki lagé granfoul-a konsa ?

¹¹ Kisa ki ké rivé lò dèrnyé krétyen wen-yan ké monté laro syèl-a ? Sonjé ki nou Bèrjé, a Jézi. I sa Chèf asanblé krétyen-an. I byen di : « Zòt gen rounsèl Chèf : Kris » (Mat. 23:10). É Jézi ké toujou pran swen di so disip, asiré pa  pitèt. Disip Jézi-ya, asou latè-a, pa gen pou pè paské a Kris li menm ki ké gidé yé. A vré, nou pa savé ké tout ti détay kouman i ké dirijé so pèp a sa moman-an. A pou sa, annou wè déztrwa èkzanp annan Labib ki pouvé rasiré nou.

12. Kouman Jéova pran swen di so pèp a) apré lanmò Moyiz ? b) lò i voyé Éli rounòt koté ? (gadé zimaj-a osi).

¹² Lò Israyèl té k’alé pou antré annan Péyi Bondjé té promèt yé-a, Moyiz mouri. Kisa ki rivé pèp-a ? Ès Jéova arété idé yé ? Non. Tout tan pèp-a rété fidèl, Jéova toujou bay li sa i té bézwen. Anvan Moyiz mouri, Jéova di li bay Joziyé rèsponsabilité gidé pèp-a. Moyiz fòrmé Joziyé pannan plizyèr lannen (Ex. 33:11 ; Deut. 34:9). Anplis di sa, i té gen roun patché mouché vayan ki té gen rèsponsabilité : chèf asou mil moun, asou san moun, asou senkant moun, é menm asou dis moun (Deut. 1:15). Donk, sèrvitèr Bondjé-ya pa janmen rété san pyès moun pa pran swen di yé ! Annou palé aprézan di profèt Éli. Pannan plizyèr lannen, Éli soutni vré ladorasyon-an an Israyèl ké balan. Mé apré sa, Jéova voyé l’ annan rwayonm di Sid-a, annan vil Jida (2 Rois 2:1 ; 2 Chron. 21:12). Ès Jéova arété idé dis ti nasyon Israyèl-ya ? Non. Éli té fòrmé Élizé pannan plizyèr lannen. Anplis di sa, i té gen « pitit profèt-ya » ki té ka rousouvwè roun fòrmasyon (2 Rois 2:7). Donk, Jéova té gen roun patché mouché pou dirijé so pèp. Konsa, so projè kontinyé vansé é i pran swen di sa-ya ki té ka adoré l’ ké fidélité.

13. Kisa Jéova ka promèt nou annan Hébreux 13:5b ? (gadé zimaj-a osi).

¹³ Dapré to, apré sa nou fin wè-a, kisa ki ké rivé lò dèrnyé krétyen wen-yan ké monté laro syèl-a ? Nou pa menm bézwen doumandé nou kò sa paské Labib ka di nou roun vérité ki senp é ki ka rasiré nou : Jéova pa ké jen lagé so sèrvitèr-ya ki asou latè-a (li Hébreux 13:5b). Kou Moyiz ké Éli, ti group krétyen wen-yan ki ka dirijé nou jòdla ka byen konprann ki sa enpòrtan di fòrmé ròt-ya. Dipi plizyèr lannen, frè-ya ki annan Kolèj santral-a ka fòrmé roun ran frè ki ka fè parti di ròt brébi-ya pou yé dirijé travay  Bondjé-a. Parèkzanp, yé fè plizyèr lékòl pou fòrmé ansyen-yan, rèsponsab sirkonskripsyon-yan, frè-ya annan komité filyal-ya, rèsponsab annan sèrvis Bétèl-ya, ké ròt moun ankò. Épi a frè Kolèj santral-a yé menm ki ka fòrmé asistan-yan annan komité Kolèj santral-a. Sa asistan-yan ja gen gro rèsponsabilité dipi jòdla. Sa fòrmasyon-an ka byen préparé yé pou yé kontinyé pran swen di brébi Kris-ya.

14. Kisa ki enpòrtan annan sa artik-a ?

¹⁴ Donk, men sa ki enpòrtan annan sa artik-a : Lò dèrnyé krétyen wen-yan ké monté laro syèl-a, lò gran tribilasyon-an ké près fini, sèrvitèr Bondjé-ya asou latè-a ké kontinyé adoré l’ ké fidélité. Kou Jézi Kris ké dirijé yé, yé pa ké arété fè sa. A vré, a sa moman-an, Gòg ki soti Magòg, sa lé di plizyèr nasyon ki ké mété yé kò ansanm, ké ataké nou (Ézéch. 38:18-20). Mé a ké pou roun ti tan é yé pa ké ganyen nou. Yé pa ké fin ké vré ladorasyon-an. Jéova ké sové sa-ya ki ka adoré l’, asiré pa pitèt ! Annan roun vizyon, apot Jan wè « roun patché moun » ki ka fè parti di ròt brébi Kris-ya. Labib ka di ki sa « patché moun »-yan ka vini di « gran tribilasyon-an » (Rév. 7:9, 14). Donk, nou savé ki Jéova ké sové yé, asiré pa pitèt !

15-16. Dapré Révélation 17:14, kisa krétyen wen-yan ké fè ké Jézi pannan lagèr Armagédon-an, é poukisa sa ka rasiré nou ?

¹⁵ Mé, pitèt sèrten frè ké sò pouvé doumandé yé kò : « Mé kisa krétyen wen-yan ké fè lò yé ké laro syèl-a ? » Labib ka réponn sa késyon-an. I ka di ki gouvèrnman-yan ki asou latè-a ké « briga kont Timouton-an », mé yé ké pédi. Men sa nou ka li annan Labib : « Timouton-an ké ganyen yé. » Mé, kimoun ki ké idé Timouton-an ? Menm vèrsé-a ka réponn : « sa-ya yé  aplé, yé chwazi é ki fidèl » (li Révélation 17:14). Di kimoun yé ka palé ? Di frè ké sò-ya ki wen é ki ké résisité annan syèl-a ! Donk, lò gran tribilasyon-an ké près fini, lò dèrnyé krétyen wen-yan ké monté laro syèl-a, prémyé bagaj yé ké fè, a briga. A pa ti travay non ! Anvan yé divini Témwen Jéova, sèrten annan yé té kontan briga. I gen sa ki té sòlda. Mé lò yé divini dé vré krétyen, yé trapé chimen lapè-a (Gal. 5:22 ; 2 Thess. 3:16). Donk, yé arété soutni lagèr. Mé lò yé ké résisité annan syèl-a, yé ké briga ansanm ké Kris ké so zanj-ya ki sen pannan dèrnyé lagèr kont lèlmi Bondjé-ya.

¹⁶ Réfléchi asou sa : Asou latè-a, sèrten krétyen wen granmoun jòdla, é détan yé frajil menm ! Mé lò yé ké résisité laro syèl-a, yé ké sa dé lèspri pwisan ki pa pouvé mouri. É prémyé bagaj yé ké fè, a briga òbò Jézi Kris yé Rwa Gèryé-a ! Apré lagèr Armagédon-an, yé ké travay ké Jézi pou idé moun-yan divini parfè. Annan syèl-a, yé ké pouvé fè plis bagaj pou idé yé frè ké sò-ya ki si yé té rété asou latè-a, paské asou latè-a yé pa parfè.

17. Kouman nou savé ki pannan lagèr Armagédon-an, tout sèrvitèr Bondjé-ya ké an sékirité ?

¹⁷ Ès to ka fè parti di ròt brébi-ya ? Si a sa, kisa to menm to ké divèt fè lò lagèr Armagédon-an ké pété ? Sèl bagaj to ké divèt fè, a fè Jéova konfyans é fè sa i ka di nou fè. Sa lé di ki nou ké divèt obéyi sa Isaïe 26:20 ka di : « Antré annan to chanm ki pi ofon-yan épi fronmen lapòt-ya dèyè to. Séré to kò pannan roun ti moman jiktan kòlè-a pasé. » Pannan sa lépòk-a, tout sèrvitèr Bondjé, ki annan syèl-a, ki asou latè-a, ké an sékirité. Kou apot Pòl, nou sir ki ‘ni gouvèrnman, ni bagaj ki la aprézan, ni bagaj ki ké rivé pa ké pouvé séparé nou di lanmou Bondjé gen pou nou’ (Rom. 8:38, 39). Pa janmen bliyé ki Jéova kontan to é ki i pa ké janmen lagé to !